၁. ပါရာဇိကကဏ္ဍံ

၁၉၃. မေထုနံ ဓမ္မံ ပဋိသေဝနပစ္စယာ ကတိ အာပတ္တိယော အာပဇ္ဇတိ? မေထုနံ ဓမ္မံ ပဋိသေဝနပစ္စယာ စတဿော အာပတ္တိယော အာပဇ္ဇတိ – အက္ခာယိတေ သရီရေ မေထုနံ ဓမ္မံ ပဋိသေဝတိ၊ အာပတ္တိ ပါရာဇိကဿ၊ ယေဘုယျေန ခါယိတေ သရီရေ မေထုနံ ဓမ္မံ ပဋိသေဝတိ၊ အာပတ္တိ ထုလ္လစ္စယဿ၊ ဝဋ္ဋကတေ မုခေ အစ္ဆုပန္တံ အင်္ဂဇာတံ ပဝေသေတိ၊ အာပတ္တိ ဒုက္ကဋဿ၊ ဇတုမဋ္ဌကေ ပါစိတ္တိယံ – မေထုနံ ဓမ္မံ ပဋိသေဝနပစ္စယာ ဣမာ စတဿော အာပတ္တိယော အာပဇ္ဇတိ.

အဒိန္နံ အာဒိယနပစ္စယာ ကတိ အာပတ္တိယော အာပဇ္ဇတိ? အဒိန္နံ အာဒိယနပစ္စယာ တိဿော အာပတ္တိယော အာပဇ္ဇတိ. ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ၊ အာပတ္တိ ပါရာဇိကဿ၊ အတိရေကမာသကံ ဝါ ဦနပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ၊ အာပတ္တိ ထုလ္လစ္စယဿ၊ မာသကံ ဝါ ဦနမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ၊ အာပတ္တိ ဒုက္ကဋဿ – အဒိန္နံ အာဒိယနပစ္စယာ ဣမာ တိဿော အာပတ္တိယော အာပဇ္ဇတိ.

သဉ္စိစ္စ မနုဿဝိဂ္ဂဟံ ဇီဝိတာ ဝေါရောပနပစ္စယာ ကတိ အာပတ္တိယော အာပဇ္ဇတိ? သဉ္စိစ္စ မနုဿဝိဂ္ဂဟံ ဇီဝိတာ ဝေါရောပနပစ္စယာ တိဿော အာပတ္တိယော အာပဇ္ဇတိ. မနုဿံ ဩဒိဿ ဩပါတံ ခဏတိ ‘‘ပပတိတွာ မရိဿတီ’’တိ၊ အာပတ္တိ ဒုက္ကဋဿ၊ ပပတိတေ ဒုက္ခာ ဝေဒနာ ဥပ္ပဇ္ဇတိ၊ အာပတ္တိ ထုလ္လစ္စယဿ၊ မရတိ၊ အာပတ္တိ ပါရာဇိကဿ – သဉ္စိစ္စ မနုဿဝိဂ္ဂဟံ ဇီဝိတာ ဝေါရောပနပစ္စယာ ဣမာ တိဿော အာပတ္တိယော အာပဇ္ဇတိ.

အသန္တံ အဘူတံ ဥတ္တရိမနုဿဓမ္မံ ဥလ္လပနပစ္စယာ ကတိ အာပတ္တိယော အာပဇ္ဇတိ? အသန္တံ အဘူတံ ဥတ္တရိမနုဿဓမ္မံ ဥလ္လပနပစ္စယာ တိဿော အာပတ္တိယော အာပဇ္ဇတိ – ပါပိစ္ဆော ဣစ္ဆာပကတော အသန္တံ အဘူတံ ဥတ္တရိမနုဿဓမ္မံ ဥလ္လပတိ၊ အာပတ္တိ ပါရာဇိကဿ၊ ‘‘ယော တေ ဝိဟာရေ ဝသတိ သော ဘိက္ခု အရဟာ’’တိ ဘဏတိ၊ ပဋိဝိဇာနန္တဿ အာပတ္တိ ထုလ္လစ္စယဿ၊ န ပဋိဝိဇာနန္တဿ အာပတ္တိ ဒုက္ကဋဿ – အသန္တံ အဘူတံ ဥတ္တရိမနုဿဓမ္မံ ဥလ္လပနပစ္စယာ ဣမာ တိဿော အာပတ္တိယော အာပဇ္ဇတိ.

စတ္တာရော ပါရာဇိကာ နိဋ္ဌိတာ.