၂. သံဃာဒိသေသကဏ္ဍာဒိ

၁၉၄. ဥပက္ကမိတွာ အသုစိံ မောစနပစ္စယာ ကတိ အာပတ္တိယော အာပဇ္ဇတိ? ဥပက္ကမိတွာ အသုစိမောစနပစ္စယာ တိဿော အာပတ္တိယော အာပဇ္ဇတိ – စေတေတိ ဥပက္ကမတိ မုစ္စတိ၊ အာပတ္တိ သံဃာဒိသေသဿ၊ စေတေတိ ဥပက္ကမတိ န မုစ္စတိ၊ အာပတ္တိ ထုလ္လစ္စယဿ၊ ပယောဂေ ဒုက္ကဋံ – ဥပက္ကမိတွာ အသုစိမောစနပစ္စယာ ဣမာ တိဿော အာပတ္တိယော အာပဇ္ဇတိ.

ကာယသံသဂ္ဂံ သမာပဇ္ဇနပစ္စယာ ကတိ အာပတ္တိယော အာပဇ္ဇတိ? ကာယသံသဂ္ဂံ သမာပဇ္ဇနပစ္စယာ ပဉ္စ အာပတ္တိယော အာပဇ္ဇတိ – အဝဿုတာ ဘိက္ခုနီ အဝဿုတဿ ပုရိသပုဂ္ဂလဿ အဓက္ခကံ ဥဗ္ဘဇာဏုမဏ္ဍလံ ဂဟဏံ သာဒိယတိ၊ အာပတ္တိ ပါရာဇိကဿ၊ ဘိက္ခု ကာယေန ကာယံ အာမသတိ၊ အာပတ္တိ သံဃာဒိသေသဿ၊ ကာယေန ကာယပဋိဗဒ္ဓံ အာမသတိ၊ အာပတ္တိ ထုလ္လစ္စယဿ၊ ကာယပဋိဗဒ္ဓေန ကာယပဋိဗဒ္ဓံ အာမသတိ၊ အာပတ္တိ ဒုက္ကဋဿ၊ အင်္ဂုလိပတောဒကေ ပါစိတ္တိယံ – ကာယသံသဂ္ဂံ သမာပဇ္ဇနပစ္စယာ ဣမာ ပဉ္စ အာပတ္တိယော အာပဇ္ဇတိ.

မာတုဂါမံ ဒုဋ္ဌုလ္လာဟိ ဝါစာဟိ ဩဘာသနပစ္စယာ တိဿော အာပတ္တိယော အာပဇ္ဇတိ – ဝစ္စမဂ္ဂံ ပဿာဝမဂ္ဂံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ၊ အာပတ္တိ သံဃာဒိသေသဿ၊ ဝစ္စမဂ္ဂံ ပဿာဝမဂ္ဂံ ဌပေတွာ အဓက္ခကံ ဥဗ္ဘဇာဏုမဏ္ဍလံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ၊ အာပတ္တိ ထုလ္လစ္စယဿ၊ ကာယပဋိဗဒ္ဓံ အာဒိဿ ဝဏ္ဏမ္ပိ ဘဏတိ အဝဏ္ဏမ္ပိ ဘဏတိ၊ အာပတ္တိ ဒုက္ကဋဿ.

အတ္တကာမပါရိစရိယာယ ဝဏ္ဏံ ဘာသနပစ္စယာ တိဿော အာပတ္တိယော အာပဇ္ဇတိ – မာတုဂါမဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ သံဃာဒိသေသဿ၊ ပဏ္ဍကဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ ထုလ္လစ္စယဿ၊ တိရစ္ဆာနဂတဿ သန္တိကေ အတ္တကာမပါရိစရိယာယ ဝဏ္ဏံ ဘာသတိ၊ အာပတ္တိ ဒုက္ကဋဿ.

သဉ္စရိတ္တံ သမာပဇ္ဇနပစ္စယာ တိဿော အာပတ္တိယော အာပဇ္ဇတိ – ပဋိဂ္ဂဏှာတိ ဝီမံသတိ ပစ္စာဟရတိ၊ အာပတ္တိ သံဃာဒိသေသဿ၊ ပဋိဂ္ဂဏှာတိ ဝီမံသတိ န ပစ္စာဟရတိ၊ အာပတ္တိ ထုလ္လစ္စယဿ၊ ပဋိဂ္ဂဏှာတိ န ဝီမံသတိ န ပစ္စာဟရတိ၊ အာပတ္တိ ဒုက္ကဋဿ.

သညာစိကာယ ကုဋိံ ကာရာပနပစ္စယာ တိဿော အာပတ္တိယော အာပဇ္ဇတိ – ကာရာပေတိ၊ ပယောဂေ ဒုက္ကဋံ၊ ဧကံ ပိဏ္ဍံ [ဧကပိဏ္ဍေ (သျာ.)] အနာဂတေ အာပတ္တိ ထုလ္လစ္စယဿ၊ တသ္မိံ ပိဏ္ဍေ အာဂတေ အာပတ္တိ သံဃာဒိသေသဿ.

မဟလ္လကံ ဝိဟာရံ ကာရာပနပစ္စယာ တိဿော အာပတ္တိယော အာပဇ္ဇတိ – ကာရာပေတိ၊ ပယောဂေ ဒုက္ကဋံ၊ ဧကံ ပိဏ္ဍံ အနာဂတေ၊ အာပတ္တိ ထုလ္လစ္စယဿ၊ တသ္မိံ ပိဏ္ဍေ အာဂတေ အာပတ္တိ သံဃာဒိသေသဿ.

ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသနပစ္စယာ တိဿော အာပတ္တိယော အာပဇ္ဇတိ – အနောကာသံ ကာရာပေတွာ စာဝနာဓိပ္ပါယော ဝဒေတိ၊ အာပတ္တိ သံဃာဒိသေသေန ဒုက္ကဋဿ၊ ဩကာသံ ကာရာပေတွာ အက္ကောသာဓိပ္ပါယော ဝဒေတိ၊ အာပတ္တိ ဩမသဝါဒဿ.

ဘိက္ခုံ အညဘာဂိယဿ အဓိကရဏဿ ကိဉ္စိ ဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသနပစ္စယာ တိဿော အာပတ္တိယော အာပဇ္ဇတိ – အနောကာသံ ကာရာပေတွာ စာဝနာဓိပ္ပါယော ဝဒေတိ၊ အာပတ္တိ သံဃာဒိသေသေန ဒုက္ကဋဿ၊ ဩကာသံ ကာရာပေတွာ အက္ကောသာဓိပ္ပါယော ဝဒေတိ၊ အာပတ္တိ ဩမသဝါဒဿ.

သံဃဘေဒကော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ – ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.

ဘေဒကာနုဝတ္တကာ ဘိက္ခူ ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ – ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.

ဒုဗ္ဗစော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ – ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ.

ကုလဒူသကော ဘိက္ခု ယာဝတတိယံ သမနုဘာသနာယ န ပဋိနိဿဇ္ဇနပစ္စယာ တိဿော အာပတ္တိယော အာပဇ္ဇတိ – ဉတ္တိယာ ဒုက္ကဋံ၊ ဒွီဟိ ကမ္မဝါစာဟိ ထုလ္လစ္စယာ၊ ကမ္မဝါစာပရိယောသာနေ အာပတ္တိ သံဃာဒိသေသဿ။ပေ။.

အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ကတိ အာပတ္တိယော အာပဇ္ဇတိ? အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ဧကံ အာပတ္တိံ အာပဇ္ဇတိ. ဒုက္ကဋံ – အနာဒရိယံ ပဋိစ္စ ဥဒကေ ဥစ္စာရံ ဝါ ပဿာဝံ ဝါ ခေဠံ ဝါ ကရဏပစ္စယာ ဣမံ ဧကံ အာပတ္တိံ အာပဇ္ဇတိ.

ကတာပတ္တိဝါရော နိဋ္ဌိတော ဒုတိယော.