၄. ဆဗ္ဗဿသိက္ခာပဒံ

၅၅၇. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဘိက္ခူ အနုဝဿံ သန္ထတံ ကာရာပေန္တိ. တေ ယာစနဗဟုလာ ဝိညတ္တိဗဟုလာ ဝိဟရန္တိ – ‘‘ဧဠကလောမာနိ ဒေထ. ဧဠကလောမေဟိ အတ္ထော’’တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ သမဏာ သကျပုတ္တိယာ အနုဝဿံ သန္ထတံ ကာရာပေဿန္တိ၊ ယာစနဗဟုလာ ဝိညတ္တိဗဟုလာ ဝိဟရိဿန္တိ – ‘ဧဠကလောမာနိ ဒေထ၊ ဧဠကလောမေဟိ အတ္ထော’’’တိ! အမှာကံ ပန သကိံ ကတာနိ သန္ထတာနိ ပဉ္စပိ ဆပိ ဝဿာနိ ဟောန္တိ၊ ယေသံ နော ဒါရကာ ဥဟဒန္တိပိ ဥမ္မိဟန္တိပိ ဥန္ဒူရေဟိပိ ခဇ္ဇန္တိ. ဣမေ ပန သမဏာ သကျပုတ္တိယာ အနုဝဿံ သန္ထတံ ကာရာပေန္တိ၊ ယာစနဗဟုလာ ဝိညတ္တိဗဟုလာ ဝိဟရန္တိ – ‘‘ဧဠကလောမာနိ ဒေထ၊ ဧဠကလောမေဟိ အတ္ထော’’တိ!

အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဘိက္ခူ အနုဝဿံ သန္ထတံ ကာရာပေဿန္တိ၊ ယာစနဗဟုလာ ဝိညတ္တိဗဟုလာ ဝိဟရိဿန္တိ – ‘ဧဠကလောမာနိ ဒေထ၊ ဧဠကလောမေဟိ အတ္ထော’’’တိ! အထ ခေါ တေ ဘိက္ခူ တေ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ။ပေ။ သစ္စံ ကိရ၊ ဘိက္ခဝေ၊ ဘိက္ခူ အနုဝဿံ သန္ထတံ ကာရာပေန္တိ၊ ယာစနဗဟုလာ ဝိညတ္တိဗဟုလာ ဝိဟရန္တိ – ‘ဧဠကလောမာနိ ဒေထ၊ ဧဠကလောမေဟိ အတ္ထော’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ကထဉှိ နာမ တေ၊ ဘိက္ခဝေ၊ မောဃပုရိသာ အနုဝဿံ သန္ထတံ ကာရာပေဿန္တိ၊ ယာစနဗဟုလာ ဝိညတ္တိဗဟုလာ ဝိဟရိဿန္တိ – ‘ဧဠကလောမာနိ ဒေထ၊ ဧဠကလောမေဟိ အတ္ထော’တိ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၅၅၈. ‘‘နဝံ ပန ဘိက္ခုနာ သန္ထတံ ကာရာပေတွာ ဆဗ္ဗဿာနိ ဓာရေတဗ္ဗံ. ဩရေန စေ ဆန္နံ ဝဿာနံ တံ သန္ထတံ ဝိဿဇ္ဇေတွာ ဝါ အဝိဿဇ္ဇေတွာ ဝါ အညံ နဝံ သန္ထတံ ကာရာပေယျ၊ နိဿဂ္ဂိယံ ပါစိတ္တိယ’’န္တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၅၅၉. တေန ခေါ ပန သမယေန အညတရော ဘိက္ခု ကောသမ္ဗိယံ ဂိလာနော ဟောတိ. ဉာတကာ တဿ ဘိက္ခုနော သန္တိကေ ဒူတံ ပါဟေသုံ – ‘‘အာဂစ္ဆတု၊ ဘဒန္တော မယံ ဥပဋ္ဌဟိဿာမာ’’တိ. ဘိက္ခူပိ ဧဝမာဟံသု – ‘‘ဂစ္ဆာဝုသော၊ ဉာတကာ တံ ဥပဋ္ဌဟိဿန္တီ’’တိ. သော ဧဝမာဟ – ‘‘ဘဂဝတာ၊ အာဝုသော၊ သိက္ခာပဒံ ပညတ္တံ – ‘နဝံ ပန ဘိက္ခုနာ သန္ထတံ ကာရာပေတွာ ဆဗ္ဗဿာနိ ဓာရေတဗ္ဗ’န္တိ. အဟဉ္စမှိ ဂိလာနော၊ န သက္ကောမိ သန္ထတံ အာဒါယ ပက္ကမိတုံ. မယှဉ္စ ဝိနာ သန္ထတာ န ဖာသု ဟောတိ. နာဟံ ဂမိဿာမီ’’တိ. ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဓမ္မိံ ကထံ ကတွာ ဘိက္ခူ အာမန္တေသိ – ‘‘အနုဇာနာမိ၊ ဘိက္ခဝေ၊ ဂိလာနဿ ဘိက္ခုနော သန္ထတသမ္မုတိံ ဒါတုံ. ဧဝဉ္စ ပန၊ ဘိက္ခဝေ၊ ဒါတဗ္ဗာ. တေန ဂိလာနေန ဘိက္ခုနာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ ဂိလာနော. န သက္ကောမိ သန္ထတံ အာဒါယ ပက္ကမိတုံ. သောဟံ၊ ဘန္တေ၊ သံဃံ သန္ထတသမ္မုတိံ ယာစာမီ’တိ. ဒုတိယမ္ပိ ယာစိတဗ္ဗာ. တတိယမ္ပိ ယာစိတဗ္ဗာ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၅၆၀. ‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု ဂိလာနော. န သက္ကောတိ သန္ထတံ အာဒါယ ပက္ကမိတုံ. သော သံဃံ သန္ထတသမ္မုတိံ ယာစတိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမဿ ဘိက္ခုနော သန္ထတသမ္မုတိံ ဒဒေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု ဂိလာနော. န သက္ကောတိ သန္ထတံ အာဒါယ ပက္ကမိတုံ. သော သံဃံ သန္ထတသမ္မုတိံ ယာစတိ. သံဃော ဣတ္ထန္နာမဿ ဘိက္ခုနော သန္ထတသမ္မုတိံ ဒေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော သန္ထတသမ္မုတိယာ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒိန္နာ သံဃေန ဣတ္ထန္နာမဿ ဘိက္ခုနော သန္ထတသမ္မုတိ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၅၆၁. ‘‘နဝံ ပန ဘိက္ခုနာ သန္ထတံ ကာရာပေတွာ ဆဗ္ဗဿာနိ ဓာရေတဗ္ဗံ. ဩရေန စေ ဆန္နံ ဝဿာနံ တံ သန္ထတံ ဝိဿဇ္ဇေတွာ ဝါ အဝိဿဇ္ဇေတွာ ဝါ အညံ နဝံ သန္ထတံ ကာရာပေယျ၊ အညတြ ဘိက္ခုသမ္မုတိယာ၊ နိဿဂ္ဂိယံ ပါစိတ္တိယ’’န္တိ.

၅၆၂. နဝံ နာမ ကရဏံ ဥပါဒါယ ဝုစ္စတိ.

သန္ထတံ နာမ သန္ထရိတွာ ကတံ ဟောတိ အဝါယိမံ.

ကာရာပေတွာတိ ကရိတွာ ဝါ ကာရာပေတွာ ဝါ.

ဆဗ္ဗဿာနိ ဓာရေတဗ္ဗန္တိ ဆဗ္ဗဿပရမတာ ဓာရေတဗ္ဗံ.

ဩရေန စေ ဆန္နံ ဝဿာနန္တိ ဦနကဆဗ္ဗဿာနိ.

တံ သန္ထတံ ဝိဿဇ္ဇေတွာတိ အညေသံ ဒတွာ.

အဝိဿဇ္ဇေတွာတိ န ကဿစိ ဒတွာ.

အညတြ ဘိက္ခုသမ္မုတိယာတိ ဌပေတွာ ဘိက္ခုသမ္မုတိံ အညံ နဝံ သန္ထတံ ကရောတိ ဝါ ကာရာပေတိ ဝါ၊ ပယောဂေ ဒုက္ကဋံ. ပဋိလာဘေန နိဿဂ္ဂိယံ ဟောတိ. နိဿဇ္ဇိတဗ္ဗံ သံဃဿ ဝါ ဂဏဿ ဝါ ပုဂ္ဂလဿ ဝါ. ဧဝဉ္စ ပန၊ ဘိက္ခဝေ၊ နိဿဇ္ဇိတဗ္ဗံ။ပေ။ ဣဒံ မေ၊ ဘန္တေ၊ သန္ထတံ ဦနကဆဗ္ဗဿာနိ ကာရာပိတံ၊ အညတြ ဘိက္ခုသမ္မုတိယာ၊ နိဿဂ္ဂိယံ. ဣမာဟံ သံဃဿ နိဿဇ္ဇာမီတိ။ပေ။ ဒဒေယျာတိ။ပေ။ ဒဒေယျုန္တိ။ပေ။ အာယသ္မတော ဒမ္မီတိ.

၅၆၃. အတ္တနာ ဝိပ္ပကတံ အတ္တနာ ပရိယောသာပေတိ၊ နိဿဂ္ဂိယံ ပါစိတ္တိယံ. အတ္တနာ ဝိပ္ပကတံ ပရေဟိ ပရိယောသာပေတိ၊ နိဿဂ္ဂိယံ ပါစိတ္တိယံ. ပရေဟိ ဝိပ္ပကတံ အတ္တနာ ပရိယောသာပေတိ၊ နိဿဂ္ဂိယံ ပါစိတ္တိယံ. ပရေဟိ ဝိပ္ပကတံ ပရေဟိ ပရိယောသာပေတိ၊ နိဿဂ္ဂိယံ ပါစိတ္တိယံ.

၅၆၄. အနာပတ္တိ ဆဗ္ဗဿာနိ ကရောတိ၊ အတိရေကဆဗ္ဗဿာနိ ကရောတိ၊ အညဿတ္ထာယ ကရောတိ ဝါ ကာရာပေတိ ဝါ၊ အညေန ကတံ ပဋိလဘိတွာ ပရိဘုဉ္ဇတိ၊ ဝိတာနံ ဝါ ဘူမတ္ထရဏံ ဝါ သာဏိပါကာရံ ဝါ ဘိသိံ ဝါ ဗိဗ္ဗောဟနံ ဝါ ကရောတိ၊ ဘိက္ခုသမ္မုတိယာ၊ ဥမ္မတ္တကဿ၊ အာဒိကမ္မိကဿာတိ.

ဆဗ္ဗဿသိက္ခာပဒံ နိဋ္ဌိတံ စတုတ္ထံ.