ဝိနီတဝတ္ထု

၆၇. တေန ခေါ ပန သမယေန အညတရော ဘိက္ခု မက္ကဋိယာ မေထုနံ ဓမ္မံ ပဋိသေဝိ. တဿ ကုက္ကုစ္စံ အဟောသိ – ‘‘ဘဂဝတာ သိက္ခာပဒံ ပညတ္တံ၊ ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ. ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန သမ္ဗဟုလာ ဝေသာလိကာ ဝဇ္ဇိပုတ္တကာ ဘိက္ခူ သိက္ခံ အပစ္စက္ခာယ ဒုဗ္ဗလျံ အနာဝိကတွာ မေထုနံ ဓမ္မံ ပဋိသေဝိံသု. တေသံ ကုက္ကုစ္စံ အဟောသိ – ‘‘ဘဂဝတာ သိက္ခာပဒံ ပညတ္တံ၊ ကစ္စိ နု ခေါ မယံ ပါရာဇိကံ အာပတ္တိံ အာပန္နာ’’တိ? ဘဂဝတော ဧတမတ္ထံ အာရောစေသုံ. ‘‘အာပတ္တိံ တုမှေ၊ ဘိက္ခဝေ၊ အာပန္နာ ပါရာဇိက’’န္တိ.

တေန ခေါ ပန သမယေန အညတရော ဘိက္ခု – ‘ဧဝံ မေ အနာပတ္တိ ဘဝိဿတီ’တိ၊ ဂိဟိလိင်္ဂေန မေထုနံ ဓမ္မံ ပဋိသေဝိ. တဿ ကုက္ကုစ္စံ အဟောသိ ‘‘ဘဂဝတာ သိက္ခာပဒံ ပညတ္တံ၊ ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ. ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု – ‘ဧဝံ မေ အနာပတ္တိ ဘဝိဿတီ’တိ၊ နဂ္ဂေါ ဟုတွာ မေထုနံ ဓမ္မံ ပဋိသေဝိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု – ‘ဧဝံ မေ အနာပတ္တိ ဘဝိဿတီ’တိ၊ ကုသစီရံ နိဝါသေတွာ။ ဝါကစီရံ နိဝါသေတွာ။ ဖလကစီရံ နိဝါသေတွာ။ ကေသကမ္ဗလံ နိဝါသေတွာ။ ဝါလကမ္ဗလံ နိဝါသေတွာ။ ဥလူကပက္ခိကံ နိဝါသေတွာ။ အဇိနက္ခိပံ နိဝါသေတွာ မေထုနံ ဓမ္မံ ပဋိသေဝိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ပိဏ္ဍစာရိကော ဘိက္ခု ပီဌကေ နိပန္နံ ဒါရိကံ ပဿိတွာ သာရတ္တော အင်္ဂုဋ္ဌံ အင်္ဂဇာတံ ပဝေသေသိ. သာ ကာလမကာသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ သံဃာဒိသေသဿာ’’တိ.

၆၈. တေန ခေါ ပန သမယေန အညတရော မာဏဝကော ဥပ္ပလဝဏ္ဏာယ ဘိက္ခုနိယာ ပဋိဗဒ္ဓစိတ္တော ဟောတိ. အထ ခေါ သော မာဏဝကော ဥပ္ပလဝဏ္ဏာယ ဘိက္ခုနိယာ ဂါမံ ပိဏ္ဍာယ ပဝိဋ္ဌာယ ကုဋိကံ ပဝိသိတွာ နိလီနော အစ္ဆိ. ဥပ္ပလဝဏ္ဏာ ဘိက္ခုနီ ပစ္ဆာဘတ္တံ ပိဏ္ဍပါတပဋိက္ကန္တာ ပါဒေ ပက္ခာလေတွာ ကုဋိကံ ပဝိသိတွာ မဉ္စကေ နိသီဒိ. အထ ခေါ သော မာဏဝကော ဥပ္ပလဝဏ္ဏံ ဘိက္ခုနိံ ဥဂ္ဂဟေတွာ ဒူသေသိ. ဥပ္ပလဝဏ္ဏာ ဘိက္ခုနီ ဘိက္ခုနီနံ ဧတမတ္ထံ အာရောစေသိ. ဘိက္ခုနိယော ဘိက္ခူနံ ဧတမတ္ထံ အာရောစေသုံ. ဘိက္ခူ ဘဂဝတော ဧတမတ္ထံ အာရောစေသုံ. ‘‘အနာပတ္တိ၊ ဘိက္ခဝေ၊ အသာဒိယန္တိယာ’’တိ.

၆၉. တေန ခေါ ပန သမယေန အညတရဿ ဘိက္ခုနော ဣတ္ထိလိင်္ဂံ ပါတုဘူတံ ဟောတိ. ဘဂဝတော ဧတမတ္ထံ အာရောစေသုံ. ‘‘အနုဇာနာမိ၊ ဘိက္ခဝေ၊ တံယေဝ ဥပဇ္ဈံ တမေဝ ဥပသမ္ပဒံ တာနိယေဝ [တာနိ (သီ. သျာ.)] ဝဿာနိ ဘိက္ခုနီဟိ သင်္ဂမိတုံ [သင်္ကမိတုံ (သီ. သျာ.)]. ယာ အာပတ္တိယော ဘိက္ခူနံ ဘိက္ခုနီဟိ သာဓာရဏာ တာ အာပတ္တိယော ဘိက္ခုနီနံ သန္တိကေ ဝုဋ္ဌာတုံ. ယာ အာပတ္တိယော ဘိက္ခူနံ ဘိက္ခုနီဟိ အသာဓာရဏာ တာဟိ အာပတ္တီဟိ အနာပတ္တီ’’တိ.

တေန ခေါ ပန သမယေန အညတရိဿာ ဘိက္ခုနိယာ ပုရိသလိင်္ဂံ ပါတုဘူတံ ဟောတိ. ဘဂဝတော ဧတမတ္ထံ အာရောစေသုံ. ‘‘အနုဇာနာမိ၊ ဘိက္ခဝေ၊ တံယေဝ ဥပဇ္ဈံ တမေဝ ဥပသမ္ပဒံ တာနိယေဝ [တာနိ (သီ. သျာ.)] ဝဿာနိ ဘိက္ခူဟိ သင်္ဂမိတုံ [သင်္ကမိတုံ (သီ. သျာ.)]. ယာ အာပတ္တိယော ဘိက္ခုနီနံ ဘိက္ခူဟိ သာဓာရဏာ တာ အာပတ္တိယော ဘိက္ခူနံ သန္တိကေ ဝုဋ္ဌာတုံ. ယာ အာပတ္တိယော ဘိက္ခုနီနံ ဘိက္ခူဟိ အသာဓာရဏာ တာဟိ အာပတ္တီဟိ အနာပတ္တီ’’တိ.

၇၀. တေန ခေါ ပန သမယေန အညတရော ဘိက္ခု – ‘ဧဝံ မေ အနာပတ္တိ ဘဝိဿတီ’တိ၊ မာတုယာ မေထုနံ ဓမ္မံ ပဋိသေဝိ။ ဓီတုယာ မေထုနံ ဓမ္မံ ပဋိသေဝိ။ ဘဂိနိယာ မေထုနံ ဓမ္မံ ပဋိသေဝိ။ တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု ပုရာဏဒုတိယိကာယ မေထုနံ ဓမ္မံ ပဋိသေဝိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၇၁. တေန ခေါ ပန သမယေန အညတရော ဘိက္ခု မုဒုပိဋ္ဌိကော ဟောတိ. သော အနဘိရတိယာ ပီဠိတော အတ္တနော အင်္ဂဇာတံ မုခေန အဂ္ဂဟေသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပရာဇိက’’န္တိ.

တေန ခေါ ပန သမယေန အညတရော ဘိက္ခု လမ္ဗီ ဟောတိ. သော အနဘိရတိယာ ပီဠိတော အတ္တနော အင်္ဂဇာတံ အတ္တနော ဝစ္စမဂ္ဂံ ပဝေသေသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု မတသရီရံ ပဿိ. တသ္မိဉ္စ သရီရေ အင်္ဂဇာတသာမန္တာ ဝဏော ဟောတိ. သော – ‘ဧဝံ မေ အနာပတ္တိ ဘဝိဿတီ’တိ၊ အင်္ဂဇာတေ အင်္ဂဇာတံ ပဝေသေတွာ ဝဏေန နီဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု မတသရီရံ ပဿိ. တသ္မိဉ္စ သရီရေ အင်္ဂဇာတသာမန္တာ ဝဏော ဟောတိ. သော – ‘ဧဝံ မေ အနာပတ္တိ ဘဝိဿတီ’တိ၊ ဝဏေ အင်္ဂဇာတံ ပဝေသေတွာ အင်္ဂဇာတေန နီဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု သာရတ္တော လေပစိတ္တဿ နိမိတ္တံ အင်္ဂဇာတေန ဆုပိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု သာရတ္တော ဒါရုဓီတလိကာယ နိမိတ္တံ အင်္ဂဇာတေန ဆုပိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ ဒုက္ကဋဿာ’’တိ.

၇၂. တေန ခေါ ပန သမယေန သုန္ဒရော နာမ ဘိက္ခု ရာဇဂဟာ ပဗ္ဗဇိတော ရထိကာယ [ရထိယာယ (က.)] ဂစ္ဆတိ. အညတရာ ဣတ္ထီ – ‘မုဟုတ္တံ [ဣတ္ထီ တံ ပဿိတွာ ဧတဒဝေါစ မုဟုတ္တံ (သျာ.)]၊ ဘန္တေ၊ အာဂမေဟိ၊ ဝန္ဒိဿာမီ’တိ သာ ဝန္ဒန္တီ အန္တရဝါသကံ ဥက္ခိပိတွာ မုခေန အင်္ဂဇာတံ အဂ္ဂဟေသိ. တဿ ကုက္ကုစ္စံ အဟောသိ။ပေ။ ‘‘သာဒိယိ တွံ၊ ဘိက္ခူ’’တိ? ‘‘နာဟံ၊ ဘဂဝါ၊ သာဒိယိ’’န္တိ. ‘‘အနာပတ္တိ၊ ဘိက္ခု၊ အသာဒိယန္တဿာ’’တိ.

တေန ခေါ ပန သမယေန အညတရာ ဣတ္ထီ ဘိက္ခုံ ပဿိတွာ ဧတဒဝေါစ – ‘‘ဧဟိ၊ ဘန္တေ၊ မေထုနံ ဓမ္မံ ပဋိသေဝါ’’တိ. ‘‘အလံ၊ ဘဂိနိ၊ နေတံ ကပ္ပတီ’’တိ. ‘‘ဧဟိ၊ ဘန္တေ၊ အဟံ ဝါယမိဿာမိ၊ တွံ မာ ဝါယမိ၊ ဧဝံ တေ အနာပတ္တိ ဘဝိဿတီ’’တိ. သော ဘိက္ခု တထာ အကာသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရာ ဣတ္ထီ ဘိက္ခုံ ပဿိတွာ ဧတဒဝေါစ – ‘‘ဧဟိ၊ ဘန္တေ၊ မေထုနံ ဓမ္မံ ပဋိသေဝါ’’တိ. ‘‘အလံ၊ ဘဂိနိ၊ နေတံ ကပ္ပတီ’’တိ. ‘‘ဧဟိ ဘန္တေ၊ တွံ ဝါယမ၊ အဟံ န ဝါယမိဿာမိ၊ ဧဝံ တေ အနာပတ္တိ ဘဝိဿတီ’’တိ. သော ဘိက္ခု တထာ အကာသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရာ ဣတ္ထီ ဘိက္ခုံ ပဿိတွာ ဧတဒဝေါစ – ‘‘ဧဟိ၊ ဘန္တေ၊ မေထုနံ ဓမ္မံ ပဋိသေဝါ’’တိ. ‘‘အလံ၊ ဘဂိနိ၊ နေတံ ကပ္ပတီ’’တိ. ‘‘ဧဟိ၊ ဘန္တေ၊ အဗ္ဘန္တရံ ဃဋ္ဋေတွာ ဗဟိ မောစေဟိ။ပေ။ ဗဟိ ဃဋ္ဋေတွာ အဗ္ဘန္တရံ မောစေဟိ၊ ဧဝံ တေ အနာပတ္တိ ဘဝိဿတီ’’တိ. သော ဘိက္ခု တထာ အကာသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၇၃. တေန ခေါ ပန သမယေန အညတရော ဘိက္ခု သိဝထိကံ ဂန္တွာ အက္ခာယိတံ သရီရံ ပဿိတွာ တသ္မိံ မေထုနံ ဓမ္မံ ပဋိသေဝိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု သိဝထိကံ ဂန္တွာ ယေဘုယျေန အက္ခာယိတံ သရီရံ ပဿိတွာ တသ္မိံ မေထုနံ ဓမ္မံ ပဋိသေဝိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု သိဝထိကံ ဂန္တွာ ယေဘုယျေန ခါယိတံ သရီရံ ပဿိတွာ တသ္မိံ မေထုနံ ဓမ္မံ ပဋိသေဝိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ ထုလ္လစ္စယဿာ’’တိ.

တေန ခေါ ပန သမယေန အညတရော ဘိက္ခု သိဝထိကံ ဂန္တွာ ဆိန္နသီသံ ပဿိတွာ ဝဋ္ဋကတေ မုခေ ဆုပန္တံ အင်္ဂဇာတံ ပဝေသေသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု သိဝထိကံ ဂန္တွာ ဆိန္နသီသံ ပဿိတွာ ဝဋ္ဋကတေ မုခေ အစ္ဆုပန္တံ အင်္ဂဇာတံ ပဝေသေသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု အညတရိဿာ ဣတ္ထိယာ ပဋိဗဒ္ဓစိတ္တော ဟောတိ. သာ ကာလင်္ကတာ [ကာလကတာ (သီ. သျာ.)] သုသာနေ ဆဍ္ဍိတာ. အဋ္ဌိကာနိ ဝိပ္ပကိဏ္ဏာနိ ဟောန္တိ. အထ ခေါ သော ဘိက္ခု သိဝထိကံ ဂန္တွာ အဋ္ဌိကာနိ သင်္ကဍ္ဎိတွာ နိမိတ္တေ အင်္ဂဇာတံ ပဋိပါဒေသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု နာဂိယာ မေထုနံ ဓမ္မံ ပဋိသေဝိ။ ယက္ခိနိယာ မေထုနံ ဓမ္မံ ပဋိသေဝိ။ ပေတိယာ မေထုနံ ဓမ္မံ ပဋိသေဝိ ။ ပဏ္ဍကဿ မေထုနံ ဓမ္မံ ပဋိသေဝိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု ဥပဟတိန္ဒြိယော ဟောတိ. သော – ‘နာဟံ ဝေဒိယာမိ [ဝေဒယာမိ (က.)] သုခံ ဝါ ဒုက္ခံ ဝါ၊ အနာပတ္တိ မေ ဘဝိဿတီ’တိ၊ မေထုနံ ဓမ္မံ ပဋိသေဝိ. ဘဂဝတော ဧတမတ္ထံ အာရောစေသုံ. ‘‘ဝေဒယိ ဝါ သော၊ ဘိက္ခဝေ၊ မောဃပုရိသော န ဝါ ဝေဒယိ၊ အာပတ္တိ ပါရာဇိကဿာ’’တိ.

တေန ခေါ ပန သမယေန အညတရော ဘိက္ခု – ‘ဣတ္ထိယာ မေထုနံ ဓမ္မံ ပဋိသေဝိဿာမီ’တိ၊ ဆုပိတမတ္တေ ဝိပ္ပဋိသာရီ အဟောသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ သံဃာဒိသေသဿာ’’တိ.

၇၄. တေန ခေါ ပန သမယေန အညတရော ဘိက္ခု ဘဒ္ဒိယေ ဇာတိယာဝနေ ဒိဝါဝိဟာရဂတော နိပန္နော ဟောတိ. တဿ အင်္ဂမင်္ဂါနိ ဝါတူပတ္ထဒ္ဓါနိ ဟောန္တိ. အညတရာ ဣတ္ထီ ပဿိတွာ အင်္ဂဇာတေ အဘိနိသီဒိတွာ ယာဝဒတ္ထံ ကတွာ ပက္ကာမိ. ဘိက္ခူ ကိလိန္နံ ပဿိတွာ ဘဂဝတော ဧတမတ္ထံ အာရောစေသုံ. ‘‘ပဉ္စဟိ၊ ဘိက္ခဝေ၊ အာကာရေဟိ အင်္ဂဇာတံ ကမ္မနိယံ ဟောတိ – ရာဂေန၊ ဝစ္စေန၊ ပဿာဝေန၊ ဝါတေန၊ ဥစ္စာလိင်္ဂပါဏကဒဋ္ဌေန. ဣမေဟိ ခေါ၊ ဘိက္ခဝေ၊ ပဉ္စဟာကာရေဟိ အင်္ဂဇာတံ ကမ္မနိယံ ဟောတိ. အဋ္ဌာနမေတံ၊ ဘိက္ခဝေ၊ အနဝကာသော ယံ တဿ ဘိက္ခုနော ရာဂေန အင်္ဂဇာတံ ကမ္မနိယံ အဿ. အရဟံ သော၊ ဘိက္ခဝေ၊ ဘိက္ခု. အနာပတ္တိ၊ ဘိက္ခဝေ၊ တဿ ဘိက္ခုနော’’တိ.

တေန ခေါ ပန သမယေန အညတရော ဘိက္ခု သာဝတ္ထိယာ အန္ဓဝနေ ဒိဝါဝိဟာရဂတော နိပန္နော ဟောတိ. အညတရာ ဂေါပါလိကာ ပဿိတွာ အင်္ဂဇာတေ အဘိနိသီဒိ. သော ဘိက္ခု ပဝေသနံ သာဒိယိ၊ ပဝိဋ္ဌံ သာဒိယိ၊ ဌိတံ သာဒိယိ၊ ဥဒ္ဓရဏံ သာဒိယိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု သာဝတ္ထိယာ အန္ဓဝနေ ဒိဝါဝိဟာရဂတော နိပန္နော ဟောတိ. အညတရာ အဇပါလိကာ ပဿိတွာ။ အညတရာ ကဋ္ဌဟာရိကာ ပဿိတွာ။ အညတရာ ဂေါမယဟာရိကာ ပဿိတွာ အင်္ဂဇာတေ အဘိနိသီဒိ. သော ဘိက္ခု ပဝေသနံ သာဒိယိ၊ ပဝိဋ္ဌံ သာဒိယိ၊ ဌိတံ သာဒိယိ၊ ဥဒ္ဓရဏံ သာဒိယိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၇၅. တေန ခေါ ပန သမယေန အညတရော ဘိက္ခု ဝေသာလိယံ မဟာဝနေ ဒိဝါဝိဟာရဂတော နိပန္နော ဟောတိ. အညတရာ ဣတ္ထီ ပဿိတွာ အင်္ဂဇာတေ အဘိနိသီဒိတွာ ယာဝဒတ္ထံ ကတွာ သာမန္တာ ဟသမာနာ ဌိတာ ဟောတိ. သော ဘိက္ခု ပဋိဗုဇ္ဈိတွာ တံ ဣတ္ထိံ ဧတဒဝေါစ – ‘‘တုယှိဒံ ကမ္မ’’န္တိ? ‘‘အာမ၊ မယှံ ကမ္မ’’န္တိ. တဿ ကုက္ကုစ္စံ အဟောသိ။ပေ။ ‘‘သာဒိယိ တွံ၊ ဘိက္ခူ’’တိ? ‘‘နာဟံ၊ ဘဂဝါ၊ ဇာနာမီ’’တိ. ‘‘အနာပတ္တိ၊ ဘိက္ခု၊ အဇာနန္တဿာ’’တိ.

၇၆. တေန ခေါ ပန သမယေန အညတရော ဘိက္ခု ဝေသာလိယံ မဟာဝနေ ဒိဝါဝိဟာရဂတော ရုက္ခံ အပဿာယ နိပန္နော ဟောတိ. အညတရာ ဣတ္ထီ ပဿိတွာ အင်္ဂဇာတေ အဘိနိသီဒိ. သော ဘိက္ခု သဟသာ ဝုဋ္ဌာသိ. တဿ ကုက္ကုစ္စံ အဟောသိ။ပေ။ ‘‘သာဒိယိ တွံ၊ ဘိက္ခူ’’တိ? ‘‘နာဟံ၊ ဘဂဝါ၊ သာဒိယိ’’န္တိ. ‘‘အနာပတ္တိ၊ ဘိက္ခု၊ အသာဒိယန္တဿာ’’တိ.

တေန ခေါ ပန သမယေန အညတရော ဘိက္ခု ဝေသာလိယံ မဟာဝနေ ဒိဝါဝိဟာရဂတော ရုက္ခံ အပဿာယ နိပန္နော ဟောတိ. အညတရာ ဣတ္ထီ ပဿိတွာ အင်္ဂဇာတေ အဘိနိသီဒိ. သော ဘိက္ခု အက္ကမိတွာ ပဝတ္တေသိ [ပဝဋ္ဋေသိ (သီ. သျာ.)]. တဿ ကုက္ကုစ္စံ အဟောသိ။ပေ။ ‘‘သာဒိယိ တွံ၊ ဘိက္ခူ’’တိ? ‘‘နာဟံ၊ ဘဂဝါ၊ သာဒိယိ’’န္တိ. ‘‘အနာပတ္တိ၊ ဘိက္ခု၊ အသာဒိယန္တဿာ’’တိ.

၇၇. တေန ခေါ ပန သမယေန အညတရော ဘိက္ခု ဝေသာလိယံ မဟာဝနေ ကူဋာဂါရသာလာယံ ဒိဝါဝိဟာရဂတော ဒွါရံ ဝိဝရိတွာ နိပန္နော ဟောတိ. တဿ အင်္ဂမင်္ဂါနိ ဝါတူပတ္ထဒ္ဓါနိ ဟောန္တိ. တေန ခေါ ပန သမယေန သမ္ဗဟုလာ ဣတ္ထိယော ဂန္ဓဉ္စ မာလဉ္စ အာဒါယ အာရာမံ အာဂမံသု ဝိဟာရပေက္ခိကာယော. အထ ခေါ တာ ဣတ္ထိယော တံ ဘိက္ခုံ ပဿိတွာ အင်္ဂဇာတေ အဘိနိသီဒိတွာ ယာဝဒတ္ထံ ကတွာ၊ ပုရိသူသဘော ဝတာယန္တိ ဝတွာ ဂန္ဓဉ္စ မာလဉ္စ အာရောပေတွာ ပက္ကမိံသု. ဘိက္ခူ ကိလိန္နံ ပဿိတွာ ဘဂဝတော ဧတမတ္ထံ အာရောစေသုံ. ‘‘ပဉ္စဟိ၊ ဘိက္ခဝေ၊ အာကာရေဟိ အင်္ဂဇာတံ ကမ္မနိယံ ဟောတိ – ရာဂေန၊ ဝစ္စေန၊ ပဿာဝေန၊ ဝါတေန၊ ဥစ္စာလိင်္ဂပါဏကဒဋ္ဌေန. ဣမေဟိ ခေါ၊ ဘိက္ခဝေ၊ ပဉ္စဟာကာရေဟိ အင်္ဂဇာတံ ကမ္မနိယံ ဟောတိ. အဋ္ဌာနမေတံ၊ ဘိက္ခဝေ၊ အနဝကာသော၊ ယံ တဿ ဘိက္ခုနော ရာဂေန အင်္ဂဇာတံ ကမ္မနိယံ အဿ. အရဟံ သော၊ ဘိက္ခဝေ၊ ဘိက္ခု. အနာပတ္တိ၊ ဘိက္ခဝေ၊ တဿ ဘိက္ခုနော. အနုဇာနာမိ၊ ဘိက္ခဝေ၊ ဒိဝါ ပဋိသလ္လီယန္တေန ဒွါရံ သံဝရိတွာ ပဋိသလ္လီယိတု’’န္တိ.

၇၈. တေန ခေါ ပန သမယေန အညတရော ဘာရုကစ္ဆကော ဘိက္ခု သုပိနန္တေ [သုပိနန္တေန (သီ. သျာ.)] ပုရာဏဒုတိယိကာယ မေထုနံ ဓမ္မံ ပဋိသေဝိတွာ – ‘အဿမဏော အဟံ၊ ဝိဗ္ဘမိဿာမီ’တိ၊ ဘာရုကစ္ဆံ ဂစ္ဆန္တော အန္တရာမဂ္ဂေ အာယသ္မန္တံ ဥပါလိံ ပဿိတွာ ဧတမတ္ထံ အာရောစေသိ. အာယသ္မာ ဥပါလိ ဧဝမာဟ – ‘‘အနာပတ္တိ၊ အာဝုသော၊ သုပိနန္တေနာ’’တိ.

တေန ခေါ ပန သမယေန ရာဇဂဟေ သုပဗ္ဗာ နာမ ဥပါသိကာ မုဓပ္ပသန္နာ [မုဒ္ဓပ္ပသန္နာ (သီ.)] ဟောတိ. သာ ဧဝံဒိဋ္ဌိကာ ဟောတိ – ‘‘ယာ မေထုနံ ဓမ္မံ ဒေတိ သာ အဂ္ဂဒါနံ ဒေတီ’’တိ. သာ ဘိက္ခုံ ပဿိတွာ ဧတဒဝေါစ – ‘‘ဧဟိ၊ ဘန္တေ၊ မေထုနံ ဓမ္မံ ပဋိသေဝါ’’တိ. ‘‘အလံ၊ ဘဂိနိ၊ နေတံ ကပ္ပတီ’’တိ. ‘‘ဧဟိ၊ ဘန္တေ၊ ဦရုန္တရိကာယ [ဦရန္တရိကာယ (သီ.)] ဃဋ္ဋေဟိ၊ ဧဝံ တေ အနာပတ္တိ ဘဝိဿတီ’’တိ။ပေ။ ဧဟိ၊ ဘန္တေ၊ နာဘိယံ ဃဋ္ဋေဟိ။ ဧဟိ၊ ဘန္တေ၊ ဥဒရဝဋ္ဋိယံ ဃဋ္ဋေဟိ။ ဧဟိ၊ ဘန္တေ၊ ဥပကစ္ဆကေ ဃဋ္ဋေဟိ။ ဧဟိ၊ ဘန္တေ၊ ဂီဝါယံ ဃဋ္ဋေဟိ။ ဧဟိ၊ ဘန္တေ၊ ကဏ္ဏစ္ဆိဒ္ဒေ ဃဋ္ဋေဟိ။ ဧဟိ၊ ဘန္တေ၊ ကေသဝဋ္ဋိယံ ဃဋ္ဋေဟိ။ ဧဟိ၊ ဘန္တေ၊ အင်္ဂုလန္တရိကာယ ဃဋ္ဋေဟိ။ ‘‘ဧဟိ၊ ဘန္တေ၊ ဟတ္ထေန ဥပက္ကမိတွာ မောစေဿာမိ၊ ဧဝံ တေ အနာပတ္တိ ဘဝိဿတီ’’တိ. သော ဘိက္ခု တထာ အကာသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ သံဃာဒိသေသဿာ’’တိ.

၇၉. တေန ခေါ ပန သမယေန သာဝတ္ထိယံ သဒ္ဓါ နာမ ဥပါသိကာ မုဓပ္ပသန္နာ ဟောတိ. သာ ဧဝံဒိဋ္ဌိကာ ဟောတိ – ‘‘ယာ မေထုနံ ဓမ္မံ ဒေတိ သာ အဂ္ဂဒါနံ ဒေတီ’’တိ. သာ ဘိက္ခုံ ပဿိတွာ ဧတဒဝေါစ – ‘‘ဧဟိ၊ ဘန္တေ၊ မေထုနံ ဓမ္မံ ပဋိသေဝါ’’တိ. ‘‘အလံ၊ ဘဂိနိ၊ နေတံ ကပ္ပတီ’’တိ. ‘‘ဧဟိ၊ ဘန္တေ၊ ဦရုန္တရိကာယ ဃဋ္ဋေဟိ။ပေ။ ဧဟိ၊ ဘန္တေ၊ ဟတ္ထေန ဥပက္ကမိတွာ မောစေဿာမိ၊ ဧဝံ တေ အနာပတ္တိ ဘဝိဿတီ’’တိ. သော ဘိက္ခု တထာ အကာသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ သံဃာဒိသေသဿာ’’တိ.

၈၀. တေန ခေါ ပန သမယေန ဝေသာလိယံ လိစ္ဆဝိကုမာရကာ ဘိက္ခုံ ဂဟေတွာ ဘိက္ခုနိယာ ဝိပ္ပဋိပါဒေသုံ။ သိက္ခမာနာယ ဝိပ္ပဋိပါဒေသုံ။ သာမဏေရိယာ ဝိပ္ပဋိပါဒေသုံ. ဥဘော သာဒိယိံသု. ဥဘော နာသေတဗ္ဗာ. ဥဘော န သာဒိယိံသု. ဥဘိန္နံ အနာပတ္တိ.

၈၁. တေန ခေါ ပန သမယေန ဝေသာလိယံ လိစ္ဆဝိကုမာရကာ ဘိက္ခုံ ဂဟေတွာ ဝေသိယာ ဝိပ္ပဋိပါဒေသုံ။ ပဏ္ဍကေ ဝိပ္ပဋိပါဒေသုံ။ ဂိဟိနိယာ ဝိပ္ပဋိပါဒေသုံ. ဘိက္ခု သာဒိယိ. ဘိက္ခု နာသေတဗ္ဗော. ဘိက္ခု န သာဒိယိ. ဘိက္ခုဿ အနာပတ္တိ.

တေန ခေါ ပန သမယေန ဝေသာလိယံ လိစ္ဆဝိကုမာရကာ ဘိက္ခူ ဂဟေတွာ အညမညံ ဝိပ္ပဋိပါဒေသုံ. ဥဘော သာဒိယိံသု. ဥဘော နာသေတဗ္ဗာ. ဥဘော န သာဒိယိံသု. ဥဘိန္နံ အနာပတ္တိ.

၈၂. တေန ခေါ ပန သမယေန အညတရော ဝုဍ္ဎပဗ္ဗဇိတော ဘိက္ခု ပုရာဏဒုတိယိကာယ ဒဿနံ အဂမာသိ. သာ – ‘ဧဟိ၊ ဘန္တေ၊ ဝိဗ္ဘမာ’တိ အဂ္ဂဟေသိ. သော ဘိက္ခု ပဋိက္ကမန္တော ဥတ္တာနော ပရိပတိ. သာ ဥဗ္ဘဇိတွာ [ဥဗ္ဘုဇိတွာ (သီ. သျာ.)] အင်္ဂဇာတေ [အင်္ဂဇာတေန (သီ.)] အဘိနိသီဒိ. တဿ ကုက္ကုစ္စံ အဟောသိ ။ပေ။ ‘‘သာဒိယိ တွံ၊ ဘိက္ခူ’’တိ? ‘‘နာဟံ၊ ဘဂဝါ၊ သာဒိယိ’’န္တိ. ‘‘အနာပတ္တိ၊ ဘိက္ခု၊ အသာဒိယန္တဿာ’’တိ.

၈၃. တေန ခေါ ပန သမယေန အညတရော ဘိက္ခု အရညေ ဝိဟရတိ. မိဂပေါတကော တဿ ပဿာဝဋ္ဌာနံ အာဂန္တွာ ပဿာဝံ ပိဝန္တော မုခေန အင်္ဂဇာတံ အဂ္ဂဟေသိ. သော ဘိက္ခု သာဒိယိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

ပဌမပါရာဇိကံ သမတ္တံ.