၂. ဒုတိယပါရာဇိကံ

၈၄. တေန သမယေန ဗုဒ္ဓေါ ဘဂဝါ ရာဇဂဟေ ဝိဟရတိ ဂိဇ္ဈကူဋေ ပဗ္ဗတေ. တေန ခေါ ပန သမယေန သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ဣသိဂိလိပဿေ တိဏကုဋိယော ကရိတွာ ဝဿံ ဥပဂစ္ဆိံသု. အာယသ္မာပိ ဓနိယော ကုမ္ဘကာရပုတ္တော တိဏကုဋိကံ ကရိတွာ ဝဿံ ဥပဂစ္ဆိ. အထ ခေါ တေ ဘိက္ခူ ဝဿံဝုဋ္ဌာ တေမာသစ္စယေန တိဏကုဋိယော ဘိန္ဒိတွာ တိဏဉ္စ ကဋ္ဌဉ္စ ပဋိသာမေတွာ ဇနပဒစာရိကံ ပက္ကမိံသု. အာယသ္မာ ပန ဓနိယော ကုမ္ဘကာရပုတ္တော တတ္ထေဝ ဝဿံ ဝသိ၊ တတ္ထ ဟေမန္တံ၊ တတ္ထ ဂိမှံ. အထ ခေါ အာယသ္မတော ဓနိယဿ ကုမ္ဘကာရပုတ္တဿ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု. ဒုတိယမ္ပိ ခေါ အာယသ္မာ ဓနိယော ကုမ္ဘကာရပုတ္တော တိဏဉ္စ ကဋ္ဌဉ္စ သံကဍ္ဎိတွာ တိဏကုဋိကံ အကာသိ. ဒုတိယမ္ပိ ခေါ အာယသ္မတော ဓနိယဿ ကုမ္ဘကာရပုတ္တဿ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု. တတိယမ္ပိ ခေါ အာယသ္မာ ဓနိယော ကုမ္ဘကာရပုတ္တော တိဏဉ္စ ကဋ္ဌဉ္စ သံကဍ္ဎိတွာ တိဏကုဋိကံ အကာသိ. တတိယမ္ပိ ခေါ အာယသ္မတော ဓနိယဿ ကုမ္ဘကာရပုတ္တဿ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု.

အထ ခေါ အာယသ္မတော ဓနိယဿ ကုမ္ဘကာရပုတ္တဿ ဧတဒဟောသိ – ‘‘ယာဝတတိယကံ ခေါ မေ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု. အဟံ ခေါ ပန သုသိက္ခိတော အနဝယော သကေ အာစရိယကေ ကုမ္ဘကာရကမ္မေ ပရိယောဒါတသိပ္ပေါ. ယံနူနာဟံ သာမံ စိက္ခလ္လံ မဒ္ဒိတွာ သဗ္ဗမတ္တိကာမယံ ကုဋိကံ ကရေယျ’’န္တိ! အထ ခေါ အာယသ္မာ ဓနိယော ကုမ္ဘကာရပုတ္တော သာမံ စိက္ခလ္လံ မဒ္ဒိတွာ သဗ္ဗမတ္တိကာမယံ ကုဋိကံ ကရိတွာ တိဏဉ္စ ကဋ္ဌဉ္စ ဂေါမယဉ္စ သံကဍ္ဎိတွာ တံ ကုဋိကံ ပစိ. သာ အဟောသိ ကုဋိကာ အဘိရူပါ ဒဿနီယာ ပါသာဒိကာ လောဟိတိကာ [လောဟိတကာ (သျာ.)]၊ သေယျထာပိ ဣန္ဒဂေါပကော. သေယျထာပိ နာမ ကိင်္ကဏိကသဒ္ဒေါ [ကိင်္ကိဏိကသဒ္ဒေါ (သီ. သျာ.)] ဧဝမေဝံ တဿာ ကုဋိကာယ သဒ္ဒေါ အဟောသိ.

၈၅. အထ ခေါ ဘဂဝါ သမ္ဗဟုလေဟိ ဘိက္ခူဟိ သဒ္ဓိံ ဂိဇ္ဈကူဋာ ပဗ္ဗတာ ဩရောဟန္တော အဒ္ဒသ တံ ကုဋိကံ အဘိရူပံ ဒဿနီယံ ပါသာဒိကံ လောဟိတိကံ. ဒိသွာန ဘိက္ခူ အာမန္တေသိ – ‘‘ကိံ ဧတံ၊ ဘိက္ခဝေ၊ အဘိရူပံ ဒဿနီယံ ပါသာဒိကံ လောဟိတိကံ၊ သေယျထာပိ ဣန္ဒဂေါပကော’’တိ? အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ. ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ၊ ဘိက္ခဝေ၊ တဿ မောဃပုရိသဿ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ. ကထဉှိ နာမ သော၊ ဘိက္ခဝေ၊ မောဃပုရိသော သဗ္ဗမတ္တိကာမယံ ကုဋိကံ ကရိဿတိ! န ဟိ နာမ၊ ဘိက္ခဝေ၊ တဿ မောဃပုရိသဿ ပါဏေသု အနုဒ္ဒယာ အနုကမ္ပာ အဝိဟေသာ ဘဝိဿတိ! ဂစ္ဆထေတံ၊ ဘိက္ခဝေ၊ ကုဋိကံ ဘိန္ဒထ. မာ ပစ္ဆိမာ ဇနတာ ပါဏေသု ပါတဗျတံ အာပဇ္ဇိ. န စ၊ ဘိက္ခဝေ၊ သဗ္ဗမတ္တိကာမယာ ကုဋိကာ ကာတဗ္ဗာ. ယော ကရေယျ၊ အာပတ္တိ ဒုက္ကဋဿာ’’တိ. ‘‘ဧဝံ၊ ဘန္တေ’’တိ၊ ခေါ တေ ဘိက္ခူ ဘဂဝတော ပဋိဿုဏိတွာ ယေန သာ ကုဋိကာ တေနုပသင်္ကမိံသု၊ ဥပသင်္ကမိတွာ တံ ကုဋိကံ ဘိန္ဒိံသု. အထ ခေါ အာယသ္မာ ဓနိယော ကုမ္ဘကာရပုတ္တော တေ ဘိက္ခူ ဧတဒဝေါစ – ‘‘ကိဿ မေ တုမှေ၊ အာဝုသော၊ ကုဋိကံ ဘိန္ဒထာ’’တိ? ‘‘ဘဂဝါ၊ အာဝုသော၊ ဘေဒါပေတီ’’တိ. ‘‘ဘိန္ဒထာဝုသော၊ သစေ ဓမ္မဿာမီ ဘေဒါပေတီ’’တိ.

၈၆. အထ ခေါ အာယသ္မတော ဓနိယဿ ကုမ္ဘကာရပုတ္တဿ ဧတဒဟောသိ – ‘‘ယာဝတတိယကံ ခေါ မေ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု. ယာပိ မယာ သဗ္ဗမတ္တိကာမယာ ကုဋိကာ ကတာ သာပိ ဘဂဝတာ ဘေဒါပိတာ. အတ္ထိ စ မေ ဒါရုဂဟေ ဂဏကော သန္ဒိဋ္ဌော. ယံနူနာဟံ ဒါရုဂဟေ ဂဏကံ ဒါရူနိ ယာစိတွာ ဒါရုကုဋိကံ ကရေယျ’’န္တိ. အထ ခေါ အာယသ္မာ ဓနိယော ကုမ္ဘကာရပုတ္တော ယေန ဒါရုဂဟေ ဂဏကော တေနုပသင်္ကမိ၊ ဥပသင်္ကမိတွာ ဒါရုဂဟေ ဂဏကံ ဧတဒဝေါစ – ‘‘ယာဝတတိယကံ ခေါ မေ၊ အာဝုသော၊ ဂါမံ ပိဏ္ဍာယ ပဝိဋ္ဌဿ တိဏဟာရိယော ကဋ္ဌဟာရိယော တိဏကုဋိကံ ဘိန္ဒိတွာ တိဏဉ္စ ကဋ္ဌဉ္စ အာဒါယ အဂမံသု. ယာပိ မယာ သဗ္ဗမတ္တိကာမယာ ကုဋိကာ ကတာ သာပိ ဘဂဝတာ ဘေဒါပိတာ. ဒေဟိ မေ၊ အာဝုသော၊ ဒါရူနိ. ဣစ္ဆာမိ ဒါရုကုဋိကံ [ဒါရုကုဍ္ဍိကံ ကုဋိကံ (သီ.)] ကာတု’’န္တိ. ‘‘နတ္ထိ၊ ဘန္တေ၊ တာဒိသာနိ ဒါရူနိ ယာနာဟံ အယျဿ ဒဒေယျံ. အတ္ထိ၊ ဘန္တေ၊ ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ. သစေ တာနိ ဒါရူနိ ရာဇာ ဒါပေတိ ဟရာပေထ၊ ဘန္တေ’’တိ. ‘‘ဒိန္နာနိ၊ အာဝုသော၊ ရညာ’’တိ. အထ ခေါ ဒါရုဂဟေ ဂဏကဿ ဧတဒဟောသိ – ‘‘ဣမေ ခေါ သမဏာ သကျပုတ္တိယာ ဓမ္မစာရိနော သမစာရိနော [သမ္မစာရိနော (က.)] ဗြဟ္မစာရိနော သစ္စဝါဒိနော သီလဝန္တော ကလျာဏဓမ္မာ. ရာဇာပိမေသံ အဘိပ္ပသန္နော. နာရဟတိ အဒိန္နံ ဒိန္နန္တိ ဝတ္တု’’န္တိ. အထ ခေါ ဒါရုဂဟေ ဂဏကော အာယသ္မန္တံ ဓနိယံ ကုမ္ဘကာရပုတ္တံ ဧတဒဝေါစ – ‘‘ဟရာပေထ၊ ဘန္တေ’’တိ. အထ ခေါ အာယသ္မာ ဓနိယော ကုမ္ဘကာရပုတ္တော တာနိ ဒါရူနိ ခဏ္ဍာခဏ္ဍိကံ ဆေဒါပေတွာ သကဋေဟိ နိဗ္ဗာဟာပေတွာ ဒါရုကုဋိကံ အကာသိ.

၈၇. အထ ခေါ ဝဿကာရော ဗြာဟ္မဏော မဂဓမဟာမတ္တော ရာဇဂဟေ ကမ္မန္တေ အနုသညာယမာနော ယေန ဒါရုဂဟေ ဂဏကော တေနုပသင်္ကမိ၊ ဥပသင်္ကမိတွာ ဒါရုဂဟေ ဂဏကံ ဧတဒဝေါစ – ‘‘ယာနိ တာနိ၊ ဘဏေ၊ ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ ကဟံ တာနိ ဒါရူနီ’’တိ? ‘‘တာနိ၊ သာမိ၊ ဒါရူနိ ဒေဝေန အယျဿ ဓနိယဿ ကုမ္ဘကာရပုတ္တဿ ဒိန္နာနီ’’တိ. အထ ခေါ ဝဿကာရော ဗြာဟ္မဏော မဂဓမဟာမတ္တော အနတ္တမနော အဟောသိ – ‘‘ကထဉှိ နာမ ဒေဝေါ ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ ဓနိယဿ ကုမ္ဘကာရပုတ္တဿ ဒဿတီ’’တိ! အထ ခေါ ဝဿကာရော ဗြာဟ္မဏော မဂဓမဟာမတ္တော ယေန ရာဇာ မာဂဓော သေနိယော ဗိမ္ဗိသာရော တေနုပသင်္ကမိ၊ ဥပသင်္ကမိတွာ ရာဇာနံ မာဂဓံ သေနိယံ ဗိမ္ဗိသာရံ ဧတဒဝေါစ – ‘‘သစ္စံ ကိရ၊ ဒေဝေန [သစ္စံ ကိရ ဒေဝ ဒေဝေန (သီ.)] ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ ဓနိယဿ ကုမ္ဘကာရပုတ္တဿ ဒိန္နာနီ’’တိ? ‘‘ကော ဧဝမာဟာ’’တိ? ‘‘ဒါရုဂဟေ ဂဏကော၊ ဒေဝါ’’တိ. ‘‘တေန ဟိ၊ ဗြာဟ္မဏ၊ ဒါရုဂဟေ ဂဏကံ အာဏာပေဟီ’’တိ. အထ ခေါ ဝဿကာရော ဗြာဟ္မဏော မဂဓမဟာမတ္တော ဒါရုဂဟေ ဂဏကံ ဗန္ဓံ [ဗဒ္ဓံ (သီ.)] အာဏာပေသိ. အဒ္ဒသ ခေါ အာယသ္မာ ဓနိယော ကုမ္ဘကာရပုတ္တော ဒါရုဂဟေ ဂဏကံ ဗန္ဓံ နိယျမာနံ. ဒိသွာန ဒါရုဂဟေ ဂဏကံ ဧတဒဝေါစ – ‘‘ကိဿ တွံ၊ အာဝုသော၊ ဗန္ဓော နိယျာသီ’’တိ? ‘‘တေသံ၊ ဘန္တေ၊ ဒါရူနံ ကိစ္စာ’’တိ. ‘‘ဂစ္ဆာဝုသော၊ အဟမ္ပိ အာဂစ္ဆာမီ’’တိ. ‘‘ဧယျာသိ၊ ဘန္တေ၊ ပုရာဟံ ဟညာမီ’’တိ.

၈၈. အထ ခေါ အာယသ္မာ ဓနိယော ကုမ္ဘကာရပုတ္တော ယေန ရညော မာဂဓဿ သေနိယဿ ဗိမ္ဗိသာရဿ နိဝေသနံ တေနုပသင်္ကမိ၊ ဥပသင်္ကမိတွာ ပညတ္တေ အာသနေ နိသီဒိ. အထ ခေါ ရာဇာ မာဂဓော သေနိယော ဗိမ္ဗိသာရော ယေနာယသ္မာ ဓနိယော ကုမ္ဘကာရပုတ္တော တေနုပသင်္ကမိ၊ ဥပသင်္ကမိတွာ အာယသ္မန္တံ ဓနိယံ ကုမ္ဘကာရပုတ္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ ရာဇာ မာဂဓော သေနိယော ဗိမ္ဗိသာရော အာယသ္မန္တံ ဓနိယံ ကုမ္ဘကာရပုတ္တံ ဧတဒဝေါစ – ‘‘သစ္စံ ကိရ မယာ၊ ဘန္တေ၊ ဒေဝဂဟဒါရူနိ နဂရပဋိသင်္ခါရိကာနိ အာပဒတ္ထာယ နိက္ခိတ္တာနိ အယျဿ ဒိန္နာနီ’’တိ? ‘‘ဧဝံ၊ မဟာရာဇာ’’တိ. ‘‘မယံ ခေါ၊ ဘန္တေ၊ ရာဇာနော နာမ ဗဟုကိစ္စာ ဗဟုကရဏီယာ၊ ဒတွာပိ န သရေယျာမ၊ ဣင်္ဃ၊ ဘန္တေ၊ သရာပေဟီ’’တိ. ‘‘သရသိ တွံ၊ မဟာရာဇ၊ ပဌမာဘိသိတ္တော ဧဝရူပိံ ဝါစံ ဘာသိတာ – ‘‘ဒိန္နညေဝ သမဏဗြာဟ္မဏာနံ တိဏကဋ္ဌောဒကံ ပရိဘုဉ္ဇန္တူ’’တိ. ‘‘သရာမဟံ၊ ဘန္တေ. သန္တိ၊ ဘန္တေ၊ သမဏဗြာဟ္မဏာ လဇ္ဇိနော ကုက္ကုစ္စကာ သိက္ခာကာမာ. တေသံ အပ္ပမတ္တကေပိ ကုက္ကုစ္စံ ဥပ္ပဇ္ဇတိ. တေသံ မယာ သန္ဓာယ ဘာသိတံ၊ တဉ္စ ခေါ အရညေ အပရိဂ္ဂဟိတံ. သော တွံ၊ ဘန္တေ၊ တေန လေသေန ဒါရူနိ အဒိန္နံ ဟရိတုံ မညသိ! ကထဉှိ နာမ မာဒိသော သမဏံ ဝါ ဗြာဟ္မဏံ ဝါ ဝိဇိတေ ဝသန္တံ ဟနေယျ ဝါ ဗန္ဓေယျ ဝါ ပဗ္ဗာဇေယျ ဝါ! ဂစ္ဆ၊ ဘန္တေ၊ လောမေန တွံ မုတ္တောသိ. မာဿု ပုနပိ ဧဝရူပံ အကာသီ’’တိ. မနုဿာ ဥဇ္ဈာယန္တိ ခိယျန္တိ ဝိပါစေန္တိ – ‘‘အလဇ္ဇိနော ဣမေ သမဏာ သကျပုတ္တိယာ ဒုဿီလာ မုသာဝါဒိနော. ဣမေ ဟိ နာမ ဓမ္မစာရိနော သမစာရိနော ဗြာဟ္မစာရိနော သစ္စဝါဒိနော သီလဝန္တော ကလျာဏဓမ္မာ ပဋိဇာနိဿန္တိ! နတ္ထိ ဣမေသံ သာမညံ၊ နတ္ထိ ဣမေသံ ဗြဟ္မညံ. နဋ္ဌံ ဣမေသံ သာမညံ၊ နဋ္ဌံ ဣမေသံ ဗြဟ္မညံ. ကုတော ဣမေသံ သာမညံ၊ ကုတော ဣမေသံ ဗြဟ္မညံ! အပဂတာ ဣမေ သာမညာ၊ အပဂတာ ဣမေ ဗြဟ္မညာ. ရာဇာနမ္ပိ ဣမေ ဝဉ္စေန္တိ၊ ကိံ ပနညေ မနုဿေ’’တိ! အဿောသုံ ခေါ ဘိက္ခူ တေသံ မနုဿာနံ ဥဇ္ဈာယန္တာနံ ခိယျန္တာနံ ဝိပါစေန္တာနံ. ယေ တေ ဘိက္ခူ အပ္ပိစ္ဆာ သန္တုဋ္ဌာ လဇ္ဇိနော ကုက္ကုစ္စကာ သိက္ခာကာမာ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အာယသ္မာ ဓနိယော ကုမ္ဘကာရပုတ္တော ရညော ဒါရူနိ အဒိန္နံ အာဒိယိဿတီ’’တိ! အထ ခေါ တေ ဘိက္ခူ အာယသ္မန္တံ ဓနိယံ ကုမ္ဘကာရပုတ္တံ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ အာယသ္မန္တံ ဓနိယံ ကုမ္ဘကာရပုတ္တံ ပဋိပုစ္ဆိ – ‘‘သစ္စံ ကိရ တွံ၊ ဓနိယ၊ ရညော ဒါရူနိ အဒိန္နံ အာဒိယီ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ၊ မောဃပုရိသ၊ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ. ကထဉှိ နာမ တွံ၊ မောဃပုရိသ၊ ရညော ဒါရူနိ အဒိန္နံ အာဒိယိဿသိ! နေတံ၊ မောဃပုရိသ၊ အပ္ပသန္နာနံ ဝါ ပသာဒါယ ပသန္နာနံ ဝါ ဘိယျောဘာဝါယ၊ အထခွေတံ၊ မောဃပုရိသ၊ အပ္ပသန္နာနဉ္စေဝ အပ္ပသာဒါယ ပသန္နာနဉ္စ ဧကစ္စာနံ အညထတ္တာယာ’’တိ.

တေန ခေါ ပန သမယေန အညတရော ပုရာဏဝေါဟာရိကော မဟာမတ္တော ဘိက္ခူသု ပဗ္ဗဇိတော ဘဂဝတော အဝိဒူရေ နိသိန္နော ဟောတိ. အထ ခေါ ဘဂဝါ တံ ဘိက္ခုံ ဧတဒဝေါစ – ‘‘ကိတ္တကေန ခေါ ဘိက္ခု ရာဇာ မာဂဓော သေနိယော ဗိမ္ဗိသာရော စောရံ ဂဟေတွာ ဟနတိ ဝါ ဗန္ဓတိ ဝါ ပဗ္ဗာဇေတိ ဝါ’’တိ? ‘‘ပါဒေန ဝါ၊ ဘဂဝါ၊ ပါဒါရဟေန ဝါ’’တိ [ပါဒါရဟေနဝါ အတိရေကပါဒေနဝါတိ (သျာ.)]. တေန ခေါ ပန သမယေန ရာဇဂဟေ ပဉ္စမာသကော ပါဒေါ ဟောတိ. အထ ခေါ ဘဂဝါ အာယသ္မန္တံ ဓနိယံ ကုမ္ဘကာရပုတ္တံ အနေကပရိယာယေန ဝိဂရဟိတွာ ဒုဗ္ဘရတာယ။ပေ။ ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၈၉. ‘‘ယော ပန ဘိက္ခု အဒိန္နံ ထေယျသင်္ခါတံ အာဒိယေယျ၊ ယထာရူပေ အဒိန္နာဒါနေ ရာဇာနော စောရံ ဂဟေတွာ ဟနေယျုံ ဝါ ဗန္ဓေယျုံ ဝါ ပဗ္ဗာဇေယျုံ ဝါ – ‘စောရောသိ ဗာလောသိ မူဠှောသိ ထေနောသီ’တိ၊ တထာရူပံ ဘိက္ခု အဒိန္နံ အာဒိယမာနော အယမ္ပိ ပါရာဇိကော ဟောတိ အသံဝါသော’’တိ.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ.

၉၀. တေန ခေါ ပန သမယေန ဆဗ္ဗဂ္ဂိယာ ဘိက္ခူ ရဇကတ္ထရဏံ ဂန္တွာ ရဇကဘဏ္ဍိကံ အဝဟရိတွာ အာရာမံ ဟရိတွာ ဘာဇေသုံ. ဘိက္ခူ ဧဝမာဟံသု – ‘‘မဟာပုညတ္ထ တုမှေ၊ အာဝုသော. ဗဟုံ တုမှာကံ စီဝရံ ဥပ္ပန္န’’န္တိ. ‘‘ကုတော အာဝုသော၊ အမှာကံ ပုညံ၊ ဣဒါနိ မယံ ရဇကတ္ထရဏံ ဂန္တွာ ရဇကဘဏ္ဍိကံ အဝဟရိမှာ’’တိ. ‘‘နနု၊ အာဝုသော၊ ဘဂဝတာ သိက္ခာပဒံ ပညတ္တံ. ကိဿ တုမှေ၊ အာဝုသော၊ ရဇကဘဏ္ဍိကံ အဝဟရိတ္ထာ’’တိ? ‘‘သစ္စံ၊ အာဝုသော၊ ဘဂဝတာ သိက္ခာပဒံ ပညတ္တံ. တဉ္စ ခေါ ဂါမေ၊ နော အရညေ’’တိ. ‘‘နနု၊ အာဝုသော၊ တထေဝေတံ ဟောတိ. အနနုစ္ဆဝိကံ၊ အာဝုသော၊ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ. ကထဉှိ နာမ တုမှေ၊ အာဝုသော၊ ရဇကဘဏ္ဍိကံ အဝဟရိဿထ! နေတံ၊ အာဝုသော၊ အပ္ပသန္နာနံ ဝါ ပသာဒါယ ပသန္နာနံ ဝါ ဘိယျောဘာဝါယ၊ အထခွေတံ၊ အာဝုသော၊ အပ္ပသန္နာနဉ္စေဝ အပ္ပသာဒါယ ပသန္နာနဉ္စ ဧကစ္စာနံ အညထတ္တာယာ’’တိ. အထ ခေါ တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတွာ ဘဂဝတော ဧတမတ္ထံ အာရောစေသုံ. အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဆဗ္ဗဂ္ဂိယေ ဘိက္ခူ ပဋိပုစ္ဆိ – ‘‘သစ္စံ ကိရ တုမှေ၊ ဘိက္ခဝေ၊ ရဇကတ္ထရဏံ ဂန္တွာ ရဇကဘဏ္ဍိကံ အဝဟရိတ္ထာ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ၊ မောဃပုရိသာ၊ အနနုလောမိကံ အပ္ပဋိရူပံ အဿာမဏကံ အကပ္ပိယံ အကရဏီယံ. ကထဉှိ နာမ တုမှေ၊ မောဃပုရိသာ၊ ရဇကဘဏ္ဍိကံ အဝဟရိဿထ! နေတံ၊ မောဃပုရိသာ၊ အပ္ပသန္နာနံ ဝါ ပသာဒါယ ပသန္နာနံ ဝါ ဘိယျောဘာဝါယ၊ အထ ခွေတံ၊ မောဃပုရိသာ၊ အပ္ပသန္နာနဉ္စေဝ အပ္ပသာဒါယ ပသန္နာနဉ္စ ဧကစ္စာနံ အညထတ္တာယာ’’တိ. အထ ခေါ ဘဂဝါ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတွာ ဒုဗ္ဘရတာယ။ပေ။ ဝီရိယာရမ္ဘဿ ဝဏ္ဏံ ဘာသိတွာ ဘိက္ခူနံ တဒနုစ္ဆဝိကံ တဒနုလောမိကံ ဓမ္မိံ ကထံ ကတွာ ဘိက္ခူ အာမန္တေသိ။ပေ။ ‘‘ဧဝဉ္စ ပန၊ ဘိက္ခဝေ၊ ဣမံ သိက္ခာပဒံ ဥဒ္ဒိသေယျာထ –

၉၁. ‘‘ယော ပန ဘိက္ခု ဂါမာ ဝါ အရညာ ဝါ အဒိန္နံ ထေယျသင်္ခါတံ အာဒိယေယျ၊ ယထာရူပေ အဒိန္နာဒါနေ ရာဇာနော စောရံ ဂဟေတွာ ဟနေယျုံ ဝါ ဗန္ဓေယျုံ ဝါ ပဗ္ဗာဇေယျုံ ဝါ – ‘စောရောသိ ဗာလောသိ မူဠှောသိ ထေနောသီ’တိ၊ တထာရူပံ ဘိက္ခု အဒိန္နံ အာဒိယမာနော အယမ္ပိ ပါရာဇိကော ဟောတိ အသံဝါသော’’တိ.

၉၂. ယော ပနာတိ ယော ယာဒိသော။ပေ။ ဘိက္ခူတိ။ပေ။ အယံ ဣမသ္မိံ အတ္ထေ အဓိပ္ပေတော ဘိက္ခူတိ.

ဂါမော နာမ ဧကကုဋိကောပိ ဂါမော၊ ဒွိကုဋိကောပိ ဂါမော၊ တိကုဋိကောပိ ဂါမော၊ စတုကုဋိကောပိ ဂါမော၊ သမနုဿောပိ ဂါမော၊ အမနုဿောပိ ဂါမော၊ ပရိက္ခိတ္တောပိ ဂါမော၊ အပရိက္ခိတ္တောပိ ဂါမော၊ ဂေါနိသာဒိနိဝိဋ္ဌောပိ ဂါမော၊ ယောပိ သတ္ထော အတိရေကစတုမာသနိဝိဋ္ဌော သောပိ ဝုစ္စတိ ဂါမော.

ဂါမူပစာရော နာမ ပရိက္ခိတ္တဿ ဂါမဿ ဣန္ဒခီလေ [ဣန္ဒခိလေ (က.)] ဌိတဿ မဇ္ဈိမဿ ပုရိသဿ လေဍ္ဍုပါတော၊ အပရိက္ခိတ္တဿ ဂါမဿ ဃရူပစာရေ ဌိတဿ မဇ္ဈိမဿ ပုရိသဿ လေဍ္ဍုပါတော.

အရညံ နာမ ဌပေတွာ ဂါမဉ္စ ဂါမူပစာရဉ္စ အဝသေသံ အရညံ နာမ.

အဒိန္နံ နာမံ ယံ အဒိန္နံ အနိဿဋ္ဌံ အပရိစ္စတ္တံ ရက္ခိတံ ဂေါပိတံ မမာယိတံ ပရပရိဂ္ဂဟိတံ. ဧတံ အဒိန္နံ နာမ.

ထေယျသင်္ခါတန္တိ ထေယျစိတ္တော အဝဟရဏစိတ္တော.

အာဒိယေယျာတိ အာဒိယေယျ ဟရေယျ အဝဟရေယျ ဣရိယာပထံ ဝိကောပေယျ ဌာနာ စာဝေယျ သင်္ကေတံ ဝီတိနာမေယျ.

ယထာရူပံ နာမ ပါဒံ ဝါ ပါဒါရဟံ ဝါ အတိရေကပါဒံ ဝါ.

ရာဇာနော နာမ ပထဗျာရာဇာ ပဒေသရာဇာ မဏ္ဍလိကာ အန္တရဘောဂိကာ အက္ခဒဿာ မဟာမတ္တာ၊ ယေ ဝါ ပန ဆေဇ္ဇဘေဇ္ဇံ ကရောန္တာ အနုသာသန္တိ. ဧတေ ရာဇာနော နာမ.

စောရော နာမ ယော ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ အဒိန္နံ ထေယျသင်္ခါတံ အာဒိယတိ. ဧသော စောရော နာမ.

ဟနေယျုံ ဝါတိ ဟတ္ထေန ဝါ ပါဒေန ဝါ ကသာယ ဝါ ဝေတ္တေန ဝါ အဍ္ဎဒဏ္ဍကေန ဝါ ဆေဇ္ဇာယ ဝါ ဟနေယျုံ.

ဗန္ဓေယျုံ ဝါတိ ရဇ္ဇုဗန္ဓနေန ဝါ အန္ဒုဗန္ဓနေန ဝါ သင်္ခလိကဗန္ဓနေန ဝါ ဃရဗန္ဓနေန ဝါ နဂရဗန္ဓနေန ဝါ ဂါမဗန္ဓနေန ဝါ နိဂမဗန္ဓနေန ဝါ ဗန္ဓေယျုံ၊ ပုရိသဂုတ္တိံ ဝါ ကရေယျုံ.

ပဗ္ဗာဇေယျုံ ဝါတိ ဂါမာ ဝါ နိဂမာ ဝါ နဂရာ ဝါ ဇနပဒါ ဝါ ဇနပဒပဒေသာ ဝါ ပဗ္ဗာဇေယျုံ.

စောရောသိ ဗာလောသိ မူဠှောသိ ထေနောသီတိ ပရိဘာသော ဧသော.

တထာရူပံ နာမ ပါဒံ ဝါ ပါဒါရဟံ ဝါ အတိရေကပါဒံ ဝါ.

အာဒိယမာနောတိ အာဒိယမာနော ဟရမာနော အဝဟရမာနော ဣရိယာပထံ ဝိကောပယမာနော ဌာနာ စာဝယမာနော သင်္ကေတံ ဝီတိနာမယမာနော.

အယမ္ပီတိ ပုရိမံ ဥပါဒါယ ဝုစ္စတိ.

ပါရာဇိကော ဟောတီတိ သေယျထာပိ နာမ ပဏ္ဍုပလာသော ဗန္ဓနာ ပဝုတ္တော [ဟရိတတ္တာယ (သီ. သျာ.)] အဘဗ္ဗော ဟရိတတ္ထာယ [ဟရိတတ္တာယ (သီ. သျာ.)]၊ ဧဝမေဝ ဘိက္ခု ပါဒံ ဝါ ပါဒါရဟံ ဝါ အတိရေကပါဒံ ဝါ အဒိန္နံ ထေယျသင်္ခါတံ အာဒိယိတွာ အဿမဏော ဟောတိ အသကျပုတ္တိယော. တေန ဝုစ္စတိ – ‘ပါရာဇိကော ဟောတီ’တိ.

အသံဝါသောတိ သံဝါသော နာမ ဧကကမ္မံ ဧကုဒ္ဒေသော သမသိက္ခတာ. ဧသော သံဝါသော နာမ. သော တေန သဒ္ဓိံ နတ္ထိ. တေန ဝုစ္စတိ – ‘အသံဝါသော’တိ.

၉၃. ဘူမဋ္ဌံ ထလဋ္ဌံ အာကာသဋ္ဌံ ဝေဟာသဋ္ဌံ ဥဒကဋ္ဌံ နာဝဋ္ဌံ ယာနဋ္ဌံ ဘာရဋ္ဌံ အာရာမဋ္ဌံ ဝိဟာရဋ္ဌံ ခေတ္တဋ္ဌံ ဝတ္ထုဋ္ဌံ ဂါမဋ္ဌံ အရညဋ္ဌံ ဥဒကံ ဒန္တပေါဏံ [ဒန္တပေါနံ (သီ. က.)] ဝနပ္ပတိ ဟရဏကံ ဥပနိဓိ သုင်္ကဃာတံ ပါဏော အပဒံ ဒွိပဒံ စတုပ္ပဒံ ဗဟုပ္ပဒံ ဩစရကော ဩဏိရက္ခော သံဝိဒါဝဟာရော သင်္ကေတကမ္မံ နိမိတ္တကမ္မန္တိ.

၉၄. ဘူမဋ္ဌံ နာမ ဘဏ္ဍံ ဘူမိယံ နိက္ခိတ္တံ ဟောတိ နိခါတံ ပဋိစ္ဆန္နံ. ဘူမဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ကုဒါလံ ဝါ ပိဋကံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. တတ္ထ ဇာတကံ ကဋ္ဌံ ဝါ လတံ ဝါ ဆိန္ဒတိ၊ အာပတ္တိ ဒုက္ကဋဿ. တတ္ထ ပံသုံ ခဏတိ ဝါ ဗျူဟတိ [ဝိယူဟတိ (သျာ.)] ဝါ ဥဒ္ဓရတိ ဝါ၊ အာပတ္တိ ဒုက္ကဋဿ. ကုမ္ဘိံ အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. အတ္တနော ဘာဇနံ ပဝေသေတွာ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. အတ္တနော ဘာဇနဂတံ ဝါ ကရောတိ မုဋ္ဌိံ ဝါ ဆိန္ဒတိ၊ အာပတ္တိ ပါရာဇိကဿ. သုတ္တာရုဠှံ ဘဏ္ဍံ ပါမင်္ဂံ ဝါ ကဏ္ဌသုတ္တကံ ဝါ ကဋိသုတ္တကံ ဝါ သာဋကံ ဝါ ဝေဌနံ ဝါ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ကောဋိယံ ဂဟေတွာ ဥစ္စာရေတိ၊ အာပတ္တိ ထုလ္လစ္စယဿ. ဃံသန္တော နီဟရတိ၊ အာပတ္တိ ထုလ္လစ္စယဿ. အန္တမသော ကေသဂ္ဂမတ္တမ္ပိ ကုမ္ဘိမုခါ မောစေတိ၊ အာပတ္တိ ပါရာဇိကဿ. သပ္ပိံ ဝါ တေလံ ဝါ မဓုံ ဝါ ဖာဏိတံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော ဧကေန ပယောဂေန ပိဝတိ၊ အာပတ္တိ ပါရာဇိကဿ. တတ္ထေဝ ဘိန္ဒတိ ဝါ ဆဍ္ဍေတိ ဝါ ဈာပေတိ ဝါ အပရိဘောဂံ ဝါ ကရောတိ၊ အာပတ္တိ ဒုက္ကဋဿ.

၉၅. ထလဋ္ဌံ နာမ ဘဏ္ဍံ ထလေ နိက္ခိတ္တံ ဟောတိ. ထလဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၉၆. အာကာသဋ္ဌံ နာမ ဘဏ္ဍံ အာကာသဂတံ ဟောတိ. မောရော ဝါ ကပိဉ္ဇရော ဝါ တိတ္တိရော ဝါ ဝဋ္ဋကော ဝါ၊ သာဋကံ ဝါ ဝေဌနံ ဝါ ဟိရညံ ဝါ သုဝဏ္ဏံ ဝါ ဆိဇ္ဇမာနံ ပတတိ. အာကာသဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. ဂမနံ ဥပစ္ဆိန္ဒတိ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၉၇. ဝေဟာသဋ္ဌံ နာမ ဘဏ္ဍံ ဝေဟာသဂတံ ဟောတိ. မဉ္စေ ဝါ ပီဌေ ဝါ စီဝရဝံသေ ဝါ စီဝရရဇ္ဇုယာ ဝါ ဘိတ္တိခိလေ ဝါ နာဂဒန္တေ ဝါ ရုက္ခေ ဝါ လဂ္ဂိတံ ဟောတိ၊ အန္တမသော ပတ္တာဓာရကေပိ. ဝေဟာသဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၉၈. ဥဒကဋ္ဌံ နာမ ဘဏ္ဍံ ဥဒကေ နိက္ခိတ္တံ ဟောတိ. ဥဒကဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. နိမုဇ္ဇတိ ဝါ ဥမ္မုဇ္ဇတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. တတ္ထ ဇာတကံ ဥပ္ပလံ ဝါ ပဒုမံ ဝါ ပုဏ္ဍရီကံ ဝါ ဘိသံ ဝါ မစ္ဆံ ဝါ ကစ္ဆပံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၉၉. နာဝါ နာမ ယာယ တရတိ. နာဝဋ္ဌံ နာမ ဘဏ္ဍံ နာဝါယ နိက္ခိတ္တံ ဟောတိ. ‘‘နာဝဋ္ဌံ ဘဏ္ဍံ အဝဟရိဿာမီ’’တိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. နာဝံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဗန္ဓနံ မောစေတိ၊ အာပတ္တိ ဒုက္ကဋဿ. ဗန္ဓနံ မောစေတွာ အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဥဒ္ဓံ ဝါ အဓော ဝါ တိရိယံ ဝါ အန္တမသော ကေသဂ္ဂမတ္တမ္ပိ သင်္ကာမေတိ၊ အာပတ္တိ ပါရာဇိကဿ.

၁၀၀. ယာနံ နာမ ဝယှံ ရထော သကဋံ သန္ဒမာနိကာ. ယာနဋ္ဌံ နာမ ဘဏ္ဍံ ယာနေ နိက္ခိတ္တံ ဟောတိ. ယာနဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. ယာနံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၁၀၁. ဘာရော နာမ သီသဘာရော ခန္ဓဘာရော ကဋိဘာရော ဩလမ္ဗကော. သီသေ ဘာရံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ခန္ဓံ ဩရောပေတိ၊ အာပတ္တိ ပါရာဇိကဿ. ခန္ဓေ ဘာရံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ကဋိံ ဩရောပေတိ၊ အာပတ္တိ ပါရာဇိကဿ. ကဋိယာ ဘာရံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဟတ္ထေန ဂဏှာတိ၊ အာပတ္တိ ပါရာဇိကဿ. ဟတ္ထေ ဘာရံ ထေယျစိတ္တော ဘူမိယံ နိက္ခိပတိ၊ အာပတ္တိ ပါရာဇိကဿ. ထေယျစိတ္တော ဘူမိတော ဂဏှာတိ၊ အာပတ္တိ ပါရာဇိကဿ.

၁၀၂. အာရာမော နာမ ပုပ္ဖါရာမော ဖလာရာမော. အာရာမဋ္ဌံ နာမ ဘဏ္ဍံ အာရာမေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ ထလဋ္ဌံ၊ အာကာသဋ္ဌံ၊ ဝေဟာသဋ္ဌံ. အာရာမဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. တတ္ထ ဇာတကံ မူလံ ဝါ တစံ ဝါ ပတ္တံ ဝါ ပုပ္ဖံ ဝါ ဖလံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. အာရာမံ အဘိယုဉ္ဇတိ၊ အာပတ္တိ ဒုက္ကဋဿ. သာမိကဿ ဝိမတိံ ဥပ္ပါဒေတိ၊ အာပတ္တိ ထုလ္လစ္စယဿ. သာမိကော န မယှံ ဘဝိဿတီတိ ဓုရံ နိက္ခိပတိ၊ အာပတ္တိ ပါရာဇိကဿ. ဓမ္မံ စရန္တော သာမိကံ ပရာဇေတိ၊ အာပတ္တိ ပါရာဇိကဿ. ဓမ္မံ စရန္တော ပရဇ္ဇတိ၊ အာပတ္တိ ထုလ္လစ္စယဿ.

၁၀၃. ဝိဟာရဋ္ဌံ နာမ ဘဏ္ဍံ ဝိဟာရေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ၊ ထလဋ္ဌံ၊ အာကာသဋ္ဌံ၊ ဝေဟာသဋ္ဌံ. ဝိဟာရဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. ဝိဟာရံ အဘိယုဉ္ဇတိ၊ အာပတ္တိ ဒုက္ကဋဿ. သာမိကဿ ဝိမတိံ ဥပ္ပါဒေတိ၊ အာပတ္တိ ထုလ္လစ္စယဿ. သာမိကော န မယှံ ဘဝိဿတီတိ ဓုရံ နိက္ခိပတိ၊ အာပတ္တိ ပါရာဇိကဿ. ဓမ္မံ စရန္တော သာမိကံ ပရာဇေတိ၊ အာပတ္တိ ပါရာဇိကဿ. ဓမ္မံ စရန္တော ပရဇ္ဇတိ၊ အာပတ္တိ ထုလ္လစ္စယဿ.

၁၀၄. ခေတ္တံ နာမ ယတ္ထ ပုဗ္ဗဏ္ဏံ ဝါ အပရဏ္ဏံ ဝါ ဇာယတိ. ခေတ္တဋ္ဌံ နာမ ဘဏ္ဍံ ခေတ္တေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ၊ ထလဋ္ဌံ၊ အာကာသဋ္ဌံ၊ ဝေဟာသဋ္ဌံ. ခေတ္တဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ၊ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. တတ္ထ ဇာတကံ ပုဗ္ဗဏ္ဏံ ဝါ အပရဏ္ဏံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. ခေတ္တံ အဘိယုဉ္ဇတိ၊ အာပတ္တိ ဒုက္ကဋဿ. သာမိကဿ ဝိမတိံ ဥပ္ပါဒေတိ၊ အာပတ္တိ ထုလ္လစ္စယဿ. သာမိကော န မယှံ ဘဝိဿတီတိ ဓုရံ နိက္ခိပတိ၊ အာပတ္တိ ပါရာဇိကဿ. ဓမ္မံ စရန္တော သာမိကံ ပရာဇေတိ၊ အာပတ္တိ ပါရာဇိကဿ. ဓမ္မံ စရန္တော ပရဇ္ဇတိ၊ အာပတ္တိ ထုလ္လစ္စယဿ. ခိလံ ဝါ ရဇ္ဇုံ ဝါ ဝတိံ ဝါ မရိယာဒံ ဝါ သင်္ကာမေတိ၊ အာပတ္တိ ဒုက္ကဋဿ. ဧကံ ပယောဂံ အနာဂတေ၊ အာပတ္တိ ထုလ္လစ္စယဿ. တသ္မိံ ပယောဂေ အာဂတေ၊ အာပတ္တိ ပါရာဇိကဿ.

၁၀၅. ဝတ္ထု နာမ အာရာမဝတ္ထု ဝိဟာရဝတ္ထု. ဝတ္ထုဋ္ဌံ နာမ ဘဏ္ဍံ ဝတ္ထုသ္မိံ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ၊ ထလဋ္ဌံ၊ အာကာသဋ္ဌံ၊ ဝေဟာသဋ္ဌံ. ဝတ္ထုဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. ဝတ္ထုံ အဘိယုဉ္ဇတိ၊ အာပတ္တိ ဒုက္ကဋဿ. သာမိကဿ ဝိမတိံ ဥပ္ပါဒေတိ၊ အာပတ္တိ ထုလ္လစ္စယဿ. သာမိကော န မယှံ ဘဝိဿတီတိ ဓုရံ နိက္ခိပတိ၊ အာပတ္တိ ပါရာဇိကဿ. ဓမ္မံ စရန္တော သာမိကံ ပရာဇေတိ၊ အာပတ္တိ ပါရာဇိကဿ. ဓမ္မံ စရန္တော ပရဇ္ဇတိ၊ အာပတ္တိ ထုလ္လစ္စယဿ. ခီလံ ဝါ ရဇ္ဇုံ ဝါ ဝတိံ ဝါ ပါကာရံ ဝါ သင်္ကာမေတိ၊ အာပတ္တိ ဒုက္ကဋဿ. ဧကံ ပယောဂံ အနာဂတေ အာပတ္တိ ထုလ္လစ္စယဿ. တသ္မိံ ပယောဂေ အာဂတေ အာပတ္တိ ပါရာဇိကဿ.

၁၀၆. ဂါမဋ္ဌံ နာမ ဘဏ္ဍံ ဂါမေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ၊ ထလဋ္ဌံ၊ အာကာသဋ္ဌံ၊ ဝေဟာသဋ္ဌံ. ဂါမဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၁၀၇. အရညံ နာမ ယံ မနုဿာနံ ပရိဂ္ဂဟိတံ ဟောတိ၊ တံ အရညံ. အရညဋ္ဌံ နာမ ဘဏ္ဍံ အရညေ စတူဟိ ဌာနေဟိ နိက္ခိတ္တံ ဟောတိ – ဘူမဋ္ဌံ၊ ထလဋ္ဌံ၊ အာကာသဋ္ဌံ၊ ဝေဟာသဋ္ဌံ. အရညဋ္ဌံ ဘဏ္ဍံ အဝဟရိဿာမီတိ ထေယျစိတ္တော ဒုတိယံ ဝါ ပရိယေသတိ ဂစ္ဆတိ ဝါ၊ အာပတ္တိ ဒုက္ကဋဿ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. တတ္ထ ဇာတကံ ကဋ္ဌံ ဝါ လတံ ဝါ တိဏံ ဝါ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၁၀၈. ဥဒကံ နာမ ဘာဇနဂတံ ဝါ ဟောတိ ပေါက္ခရဏိယာ ဝါ တဠာကေ ဝါ. ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. အတ္တနော ဘာဇနံ ပဝေသေတွာ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ဥဒကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. အတ္တနော ဘာဇနဂတံ ကရောတိ၊ အာပတ္တိ ပါရာဇိကဿ. မရိယာဒံ ဘိန္ဒတိ၊ အာပတ္တိ ဒုက္ကဋဿ. မရိယာဒံ ဘိန္ဒိတွာ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ဥဒကံ နိက္ခာမေတိ၊ အာပတ္တိ ပါရာဇိကဿ. အတိရေကမာသကံ ဝါ ဦနပဉ္စမာသကံ ဝါ အဂ္ဃနကံ ဥဒကံ နိက္ခာမေတိ၊ အာပတ္တိ ထုလ္လစ္စယဿ. မာသကံ ဝါ ဦနမာသကံ ဝါ အဂ္ဃနကံ ဥဒကံ နိက္ခာမေတိ၊ အာပတ္တိ ဒုက္ကဋဿ.

၁၀၉. ဒန္တပေါဏံ နာမ ဆိန္နံ ဝါ အစ္ဆိန္နံ ဝါ. ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၁၁၀. ဝနပ္ပတိ နာမ ယော မနုဿာနံ ပရိဂ္ဂဟိတော ဟောတိ ရုက္ခော ပရိဘောဂေါ. ထေယျစိတ္တော ဆိန္ဒတိ၊ ပဟာရေ ပဟာရေ အာပတ္တိ ဒုက္ကဋဿ. ဧကံ ပဟာရံ အနာဂတေ၊ အာပတ္တိ ထုလ္လစ္စယဿ. တသ္မိံ ပဟာရေ အာဂတေ၊ အာပတ္တိ ပါရာဇိကဿ.

၁၁၁. ဟရဏကံ နာမ အညဿ ဟရဏကံ ဘဏ္ဍံ. ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. သဟဘဏ္ဍဟာရကံ ပဒသာ နေဿာမီတိ ပဌမံ ပါဒံ သင်္ကာမေတိ၊ အာပတ္တိ ထုလ္လစ္စယဿ. ဒုတိယံ ပါဒံ သင်္ကာမေတိ၊ အာပတ္တိ ပါရာဇိကဿ. ပတိတံ ဘဏ္ဍံ ဂဟေဿာမီတိ ပါတာပေတိ၊ အာပတ္တိ ဒုက္ကဋဿ. ပတိတံ ဘဏ္ဍံ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၁၁၂. ဥပနိဓိ နာမ ဥပနိက္ခိတ္တံ ဘဏ္ဍံ. ဒေဟိ မေ ဘဏ္ဍန္တိ ဝုစ္စမာနော နာဟံ ဂဏှာမီတိ ဘဏတိ၊ အာပတ္တိ ဒုက္ကဋဿ. သာမိကဿ ဝိမတိံ ဥပ္ပါဒေတိ၊ အာပတ္တိ ထုလ္လစ္စယဿ. သာမိကော န မယှံ ဒဿတီတိ ဓုရံ နိက္ခိပတိ၊ အာပတ္တိ ပါရာဇိကဿ. ဓမ္မံ စရန္တော သာမိကံ ပရာဇေတိ၊ အာပတ္တိ ပါရာဇိကဿ. ဓမ္မံ စရန္တော ပရဇ္ဇတိ၊ အာပတ္တိ ထုလ္လစ္စယဿ.

၁၁၃. သုင်္ကဃာတံ နာမ ရညာ ဌပိတံ ဟောတိ ပဗ္ဗတခဏ္ဍေ ဝါ နဒီတိတ္ထေ ဝါ ဂါမဒွါရေ ဝါ – ‘အတြ ပဝိဋ္ဌဿ သုင်္ကံ ဂဏှန္တူ’တိ. တတြ ပဝိသိတွာ ရာဇဂ္ဂံ [ရာဇဂ္ဃံ (သီ. သျာ.)] ဘဏ္ဍံ ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ပဌမံ ပါဒံ သုင်္ကဃာတံ အတိက္ကာမေတိ၊ အာပတ္တိ ထုလ္လစ္စယဿ. ဒုတိယံ ပါဒံ အတိက္ကာမေတိ၊ အာပတ္တိ ပါရာဇိကဿ. အန္တောသုင်္ကဃာတေ ဌိတော ဗဟိသုင်္ကဃာတံ ပါတေတိ၊ အာပတ္တိ ပါရာဇိကဿ. သုင်္ကံ ပရိဟရတိ၊ အာပတ္တိ ဒုက္ကဋဿ.

၁၁၄. ပါဏော နာမ မနုဿပါဏော ဝုစ္စတိ. ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. ပဒသာ နေဿာမီတိ ပဌမံ ပါဒံ သင်္ကာမေတိ၊ အာပတ္တိ ထုလ္လစ္စယဿ. ဒုတိယံ ပါဒံ သင်္ကာမေတိ၊ အာပတ္တိ ပါရာဇိကဿ.

အပဒံ နာမ အဟိ မစ္ဆာ. ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၁၁၅. ဒွိပဒံ နာမ မနုဿာ၊ ပက္ခဇာတာ. ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. ပဒသာ နေဿာမီတိ ပဌမံ ပါဒံ သင်္ကာမေတိ၊ အာပတ္တိ ထုလ္လစ္စယဿ. ဒုတိယံ ပါဒံ သင်္ကာမေတိ၊ အာပတ္တိ ပါရာဇိကဿ.

၁၁၆. စတုပ္ပဒံ နာမ – ဟတ္ထီ အဿာ ဩဋ္ဌာ ဂေါဏာ ဂဒြဘာ ပသုကာ. ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. ပဒသာ နေဿာမီတိ ပဌမံ ပါဒံ သင်္ကာမေတိ၊ အာပတ္တိ ထုလ္လစ္စယဿ. ဒုတိယံ ပါဒံ သင်္ကာမေတိ၊ အာပတ္တိ ထုလ္လစ္စယဿ. တတိယံ ပါဒံ သင်္ကာမေတိ၊ အာပတ္တိ ထုလ္လစ္စယဿ. စတုတ္ထံ ပါဒံ သင်္ကာမေတိ၊ အာပတ္တိ ပါရာဇိကဿ.

၁၁၇. ဗဟုပ္ပဒံ နာမ – ဝိစ္ဆိကာ သတပဒီ ဥစ္စာလိင်္ဂပါဏကာ. ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ. ပဒသာ နေဿာမီတိ သင်္ကာမေတိ၊ ပဒေ ပဒေ အာပတ္တိ ထုလ္လစ္စယဿ. ပစ္ဆိမံ ပါဒံ သင်္ကာမေတိ၊ အာပတ္တိ ပါရာဇိကဿ.

၁၁၈. ဩစရကော နာမ ဘဏ္ဍံ ဩစရိတွာ အာစိက္ခတိ – ‘‘ဣတ္ထန္နာမံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော တံ ဘဏ္ဍံ အဝဟရတိ၊ အာပတ္တိ ဥဘိန္နံ ပါရာဇိကဿ.

ဩဏိရက္ခော နာမ အာဟဋံ ဘဏ္ဍံ ဂေါပေန္တော ပဉ္စမာသကံ ဝါ အတိရေကပဉ္စမာသကံ ဝါ အဂ္ဃနကံ ထေယျစိတ္တော အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

သံဝိဒါဝဟာရော နာမ သမ္ဗဟုလာ သံဝိဒဟိတွာ ဧကော ဘဏ္ဍံ အဝဟရတိ၊ အာပတ္တိ သဗ္ဗေသံ ပါရာဇိကဿ.

၁၁၉. သင်္ကေတကမ္မံ နာမ သင်္ကေတံ ကရောတိ – ‘‘ပုရေဘတ္တံ ဝါ ပစ္ဆာဘတ္တံ ဝါ ရတ္တိံ ဝါ ဒိဝါ ဝါ တေန သင်္ကေတေန တံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. တေန သင်္ကေတေန တံ ဘဏ္ဍံ အဝဟရတိ၊ အာပတ္တိ ဥဘိန္နံ ပါရာဇိကဿ. တံ သင်္ကေတံ ပုရေ ဝါ ပစ္ဆာ ဝါ တံ ဘဏ္ဍံ အဝဟရတိ၊ မူလဋ္ဌဿ အနာပတ္တိ. အဝဟာရကဿ အာပတ္တိ ပါရာဇိကဿ.

၁၂၀. နိမိတ္တကမ္မံ နာမ နိမိတ္တံ ကရောတိ. အက္ခိံ ဝါ နိခဏိဿာမိ ဘမုကံ ဝါ ဥက္ခိပိဿာမိ သီသံ ဝါ ဥက္ခိပိဿာမိ၊ တေန နိမိတ္တေန တံ ဘဏ္ဍံ အဝဟရာတိ၊ အာပတ္တိ ဒုက္ကဋဿ. တေန နိမိတ္တေန တံ ဘဏ္ဍံ အဝဟရတိ၊ အာပတ္တိ ဥဘိန္နံ ပါရာဇိကဿ. တံ နိမိတ္တံ ပုရေ ဝါ ပစ္ဆာ ဝါ တံ ဘဏ္ဍံ အဝဟရတိ၊ မူလဋ္ဌဿ အနာပတ္တိ. အဝဟာရကဿ အာပတ္တိ ပါရာဇိကဿ.

၁၂၁. ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော တံ မညမာနော တံ အဝဟရတိ၊ အာပတ္တိ ဥဘိန္နံ ပါရာဇိကဿ.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော တံ မညမာနော အညံ အဝဟရတိ၊ မူလဋ္ဌဿ အနာပတ္တိ. အဝဟာရကဿ အာပတ္တိ ပါရာဇိကဿ.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော အညံ မညမာနော တံ အဝဟရတိ၊ အာပတ္တိ ဥဘိန္နံ ပါရာဇိကဿ.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော အညံ မညမာနော အညံ အဝဟရတိ၊ မူလဋ္ဌဿ အနာပတ္တိ. အဝဟာရကဿ အာပတ္တိ ပါရာဇိကဿ.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမဿ ပါဝဒ – ‘ဣတ္ထန္နာမော ဣတ္ထန္နာမဿ ပါဝဒတု – ဣတ္ထန္နာမော ဣတ္ထန္နာမံ ဘဏ္ဍံ အဝဟရတူ’’’တိ၊ အာပတ္တိ ဒုက္ကဋဿ. သော ဣတရဿ အာရောစေတိ၊ အာပတ္တိ ဒုက္ကဋဿ. အဝဟာရကော ပဋိဂ္ဂဏှာတိ၊ မူလဋ္ဌဿ အာပတ္တိ ထုလ္လစ္စယဿ. သော တံ ဘဏ္ဍံ အဝဟရတိ၊ အာပတ္တိ သဗ္ဗေသံ ပါရာဇိကဿ.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမဿ ပါဝဒ – ‘ဣတ္ထန္နာမော ဣတ္ထန္နာမဿ ပါဝဒတု – ဣတ္ထန္နာမော ဣတ္ထန္နာမံ ဘဏ္ဍံ အဝဟရတူ’’’တိ၊ အာပတ္တိ ဒုက္ကဋဿ. သော အညံ အာဏာပေတိ၊ အာပတ္တိ ဒုက္ကဋဿ. အဝဟာရကော ပဋိဂ္ဂဏှာတိ၊ အာပတ္တိ ဒုက္ကဋဿ. သော တံ ဘဏ္ဍံ အဝဟရတိ၊ မူလဋ္ဌဿ အနာပတ္တိ. အာဏာပကဿ စ အဝဟာရကဿ စ အာပတ္တိ ပါရာဇိကဿ.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော ဂန္တွာ ပုန ပစ္စာဂစ္ဆတိ – ‘‘နာဟံ သက္ကောမိ တံ ဘဏ္ဍံ အဝဟရိတု’’န္တိ. သော ပုန အာဏာပေတိ – ‘‘ယဒါ သက္ကောသိ တဒါ တံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော တံ ဘဏ္ဍံ အဝဟရတိ၊ အာပတ္တိ ဥဘိန္နံ ပါရာဇိကဿ.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော အာဏာပေတွာ ဝိပ္ပဋိသာရီ န သာဝေတိ – ‘‘မာ အဝဟရီ’’တိ. သော တံ ဘဏ္ဍံ အဝဟရတိ၊ အာပတ္တိ ဥဘိန္နံ ပါရာဇိကဿ.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော အာဏာပေတွာ ဝိပ္ပဋိသာရီ သာဝေတိ – ‘‘မာ အဝဟရီ’’တိ. သော ‘‘အာဏတ္တော အဟံ တယာ’’တိ၊ တံ ဘဏ္ဍံ အဝဟရတိ၊ မူလဋ္ဌဿ အနာပတ္တိ. အဝဟာရကဿ အာပတ္တိ ပါရာဇိကဿ.

ဘိက္ခု ဘိက္ခုံ အာဏာပေတိ – ‘‘ဣတ္ထန္နာမံ ဘဏ္ဍံ အဝဟရာ’’တိ၊ အာပတ္တိ ဒုက္ကဋဿ. သော အာဏာပေတွာ ဝိပ္ပဋိသာရီ သာဝေတိ – ‘‘မာ အဝဟရီ’’တိ. သော ‘‘သာဓူ’’တိ [သုဋ္ဌူတိ (က.)]? ဩရမတိ၊ ဥဘိန္နံ အနာပတ္တိ.

၁၂၂. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ပါရာဇိကဿ – ပရပရိဂ္ဂဟိတဉ္စ ဟောတိ၊ ပရပရိဂ္ဂဟိတသညီ စ၊ ဂရုကော စ ဟောတိ ပရိက္ခာရော၊ ပဉ္စမာသကော ဝါ အတိရေကပဉ္စမာသကော ဝါ၊ ထေယျစိတ္တဉ္စ ပစ္စုပဋ္ဌိတံ ဟောတိ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၁၂၃. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ထုလ္လစ္စယဿ – ပရပရိဂ္ဂဟိတဉ္စ ဟောတိ၊ ပရပရိဂ္ဂဟိတသညီ စ၊ လဟုကော စ ဟောတိ ပရိက္ခာရော၊ အတိရေကမာသကော ဝါ ဦနပဉ္စမာသကော ဝါ၊ ထေယျစိတ္တဉ္စ ပစ္စုပဋ္ဌိတံ ဟောတိ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ဒုက္ကဋဿ. ဌာနာ စာဝေတိ၊ အာပတ္တိ ထုလ္လစ္စယဿ.

၁၂၄. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ. ပရပရိဂ္ဂဟိတဉ္စ ဟောတိ၊ ပရပရိဂ္ဂဟိတသညီ စ၊ လဟုကော စ ဟောတိ ပရိက္ခာရော၊ မာသကော ဝါ ဦနမာသကော ဝါ၊ ထေယျစိတ္တဉ္စ ပစ္စုပဋ္ဌိတံ ဟောတိ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ဒုက္ကဋဿ. ဌာနာ စာဝေတိ၊ အာပတ္တိ ဒုက္ကဋဿ.

၁၂၅. ဆဟိ အာကာရေဟိ အဒိန္နံ အာဒိယန္တဿ အာပတ္တိ ပါရာဇိကဿ. န စ သကသညီ၊ န စ ဝိဿာသဂ္ဂါဟီ၊ န စ တာဝကာလိကံ၊ ဂရုကော စ ဟောတိ ပရိက္ခာရော၊ ပဉ္စမာသကော ဝါ အတိရေကပဉ္စမာသကော ဝါ၊ ထေယျစိတ္တဉ္စ ပစ္စုပဋ္ဌိတံ ဟောတိ. အာမသတိ၊ အာပတ္တိ ဒုက္ကဋသ. ဖန္ဒာပေတိ၊ အာပတ္တိ ထုလ္လစ္စယဿ. ဌာနာ စာဝေတိ၊ အာပတ္တိ ပါရာဇိကဿ.

၁၂၆. ဆဟိ အာကာရေဟိ အဒိန္နံ အာဒိယန္တဿ အာပတ္တိ ထုလ္လစ္စယဿ. န စ သကသညီ၊ န စ ဝိဿာသဂ္ဂါဟီ၊ န စ တာဝကာလိကံ၊ လဟုကော စ ဟောတိ ပရိက္ခာရော အတိရေကမာသကော ဝါ ဦနပဉ္စမာသကော ဝါ၊ ထေယျစိတ္တဉ္စ ပစ္စုပဋ္ဌိတံ ဟောတိ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ဒုက္ကဋဿ. ဌာနာ စာဝေတိ၊ အာပတ္တိ ထုလ္လစ္စယဿ.

၁၂၇. ဆဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ. န စ သကသညီ၊ န စ ဝိဿာသဂ္ဂါဟီ၊ န စ တာဝကာလိကံ၊ လဟုကော စ ဟောတိ ပရိက္ခာရော၊ မာသကော ဝါ ဦနမာသကော ဝါ၊ ထေယျစိတ္တဉ္စ ပစ္စုပဋ္ဌိတံ ဟောတိ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ဒုက္ကဋဿ. ဌာနာ စာဝေတိ၊ အာပတ္တိ ဒုက္ကဋဿ.

၁၂၈. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ. န စ ပရပရိဂ္ဂဟိတံ ဟောတိ၊ ပရပရိဂ္ဂဟိတသညီ စ၊ ဂရုကော စ ဟောတိ ပရိက္ခာရော၊ ပဉ္စမာသကော ဝါ အတိရေကပဉ္စမာသကော ဝါ၊ ထေယျစိတ္တဉ္စ ပစ္စုပဋ္ဌိတံ ဟောတိ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ဒုက္ကဋဿ. ဌာနာ စာဝေတိ၊ အာပတ္တိ ဒုက္ကဋဿ.

၁၂၉. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ. န စ ပရပရိဂ္ဂဟိတံ ဟောတိ၊ ပရပရိဂ္ဂဟိတသညီ စ၊ လဟုကော စ ဟောတိ ပရိက္ခာရော၊ အတိရေကမာသကော ဝါ ဦနပဉ္စမာသကော ဝါ၊ ထေယျစိတ္တဉ္စ ပစ္စုပဋ္ဌိတံ ဟောတိ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ဒုက္ကဋဿ. ဌာနာ စာဝေတိ၊ အာပတ္တိ ဒုက္ကဋဿ.

၁၃၀. ပဉ္စဟိ အာကာရေဟိ အဒိန္နံ အာဒိယန္တဿ အာပတ္တိ ဒုက္ကဋဿ. န စ ပရပရိဂ္ဂဟိတံ ဟောတိ၊ ပရပရိဂ္ဂဟိတသညီ စ၊ လဟုကော စ ဟောတိ ပရိက္ခာရော၊ မာသကော ဝါ ဦနမာသကော ဝါ၊ ထေယျစိတ္တဉ္စ ပစ္စုပဋ္ဌိတံ ဟောတိ. အာမသတိ၊ အာပတ္တိ ဒုက္ကဋဿ. ဖန္ဒာပေတိ၊ အာပတ္တိ ဒုက္ကဋဿ. ဌာနာ စာဝေတိ၊ အာပတ္တိ ဒုက္ကဋဿ.

၁၃၁. အနာပတ္တိ သသညိဿ၊ ဝိဿာသဂ္ဂါဟေ၊ တာဝကာလိကေ၊ ပေတပရိဂ္ဂဟေ၊ တိရစ္ဆာနဂတပရိဂ္ဂဟေ၊ ပံသုကူလသညိဿ၊ ဥမ္မတ္တကဿ၊ (ခိတ္တစိတ္တဿ ဝေဒနာဋ္ဋဿ) [(ခိတ္တစိတ္တဿ ဝေဒနာဋ္ဋဿ) ကတ္ထစိ နတ္ထိ] အာဒိကမ္မိကဿာတိ.

အဒိန္နာဒါနမှိ ပဌမဘာဏဝါရော နိဋ္ဌိတော.

ဝိနီတဝတ္ထုဥဒ္ဒါနဂါထာ

ရဇကေဟိ ပဉ္စ အက္ခာတာ၊ စတုရော အတ္ထရဏေဟိ စ၊

အန္ဓကာရေန ဝေ ပဉ္စ၊ ပဉ္စ ဟာရဏကေန စ.

နိရုတ္တိယာ ပဉ္စ အက္ခာတာ၊ ဝါတေဟိ အပရေ ဒုဝေ၊

အသမ္ဘိန္နေ ကုသာပါတော၊ ဇန္တဂ္ဂေန [ဇန္တာဃရေန (သျာ.)] သဟာ ဒသ.

ဝိဃာသေဟိ ပဉ္စ အက္ခာတာ၊ ပဉ္စ စေဝ အမူလကာ၊

ဒုဗ္ဘိက္ခေ ကုရမံသဉ္စ [ကူရမံသဉ္စ (သျာ.)]၊ ပူဝသက္ခလိမောဒကာ.

ဆပရိက္ခာရထဝိကာ၊ ဘိသိဝံသာ န နိက္ခမေ၊

ခါဒနီယဉ္စ ဝိဿာသံ၊ သသညာယပရေ ဒုဝေ.

သတ္တ နာဝဟရာမာတိ၊ သတ္တ စေဝ အဝါဟရုံ၊

သံဃဿ အဝဟရုံ သတ္တ၊ ပုပ္ဖေဟိ အပရေ ဒုဝေ.

တယော စ ဝုတ္တဝါဒိနော၊ မဏိ တီဏိ အတိက္ကမေ၊

သူကရာ စ မိဂါ မစ္ဆာ၊ ယာနဉ္စာပိ ပဝတ္တယိ.

ဒုဝေ ပေသီ ဒုဝေ ဒါရူ၊ ပံသုကူလံ ဒုဝေ ဒကာ၊

အနုပုဗ္ဗဝိဓာနေန၊ တဒညော န ပရိပူရယိ.

သာဝတ္ထိယာ စတုရော မုဋ္ဌီ၊ ဒွေ ဝိဃာသာ ဒုဝေ တိဏာ၊

သံဃဿ ဘာဇယုံ သတ္တ၊ သတ္တ စေဝ အဿာမိကာ.

ဒါရုဒကာ မတ္တိကာ ဒွေ တိဏာနိ၊

သံဃဿ သတ္တ အဝဟာသိ သေယျံ၊

သဿာမိကံ န စာပိ နီဟရေယျ၊

ဟရေယျ သဿာမိကံ တာဝကာလိကံ.

စမ္ပာ ရာဇဂဟေ စေဝ၊ ဝေသာလိယာ စ အဇ္ဇုကော၊

ဗာရာဏသီ စ ကောသမ္ဗီ၊ သာဂလာ ဒဠှိကေန စာတိ.

ဝိနီတဝတ္ထု

၁၃၂. တေန ခေါ ပန သမယေန ဆဗ္ဗဂ္ဂိယာ ဘိက္ခူ ရဇကတ္ထရဏံ ဂန္တွာ ရဇကဘဏ္ဍိကံ အဝဟရိံသု. တေသံ ကုက္ကုစ္စံ အဟောသိ – ‘‘ဘဂဝတာ သိက္ခာပဒံ ပညတ္တံ. ကစ္စိ နု ခေါ မယံ ပါရာဇိကံ အာပတ္တိံ အာပန္နာ’’တိ. ဘဂဝတော ဧတမတ္ထံ အာရောစေသုံ. ‘‘အာပတ္တိံ တုမှေ၊ ဘိက္ခဝေ၊ အာပန္နာ ပါရာဇိက’’န္တိ.

တေန ခေါ ပန သမယေန အညတရော ဘိက္ခု ရဇကတ္ထရဏံ ဂန္တွာ မဟဂ္ဃံ ဒုဿံ ပဿိတွာ ထေယျစိတ္တံ ဥပ္ပါဒေသိ. တဿ ကုက္ကုစ္စံ အဟောသိ – ‘‘ဘဂဝတာ သိက္ခာပဒံ ပညတ္တံ၊ ကစ္စိ နု ခေါ အဟံ ပါရာဇိကံ အာပတ္တိံ အာပန္နော’’တိ? ဘဂဝတော ဧတမတ္ထံ အာရောစေသိ. ‘‘အနာပတ္တိ၊ ဘိက္ခု၊ စိတ္တုပ္ပါဒေ’’တိ.

တေန ခေါ ပန သမယေန အညတရော ဘိက္ခု ရဇကတ္ထရဏံ ဂန္တွာ မဟဂ္ဃံ ဒုဿံ ပဿိတွာ ထေယျစိတ္တော အာမသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု ရဇကတ္ထရဏံ ဂန္တွာ မဟဂ္ဃံ ဒုဿံ ပဿိတွာ ထေယျစိတ္တော ဖန္ဒာပေသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ ထုလ္လစ္စယဿာ’’တိ.

တေန ခေါ ပန သမယေန အညတရော ဘိက္ခု ရဇကတ္ထရဏံ ဂန္တွာ မဟဂ္ဃံ ဒုဿံ ပဿိတွာ ထေယျစိတ္တော ဌာနာ စာဝေသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၁၃၃. တေန ခေါ ပန သမယေန အညတရော ပိဏ္ဍစာရိကော ဘိက္ခု မဟဂ္ဃံ ဥတ္တရတ္ထရဏံ ပဿိတွာ ထေယျစိတ္တံ ဥပ္ပါဒေသိ။ပေ။ ထေယျစိတ္တော အာမသိ။ပေ။ ထေယျစိတ္တော ဖန္ဒာပေသိ။ပေ။ ထေယျစိတ္တော ဌာနာ စာဝေသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၁၃၄. တေန ခေါ ပန သမယေန အညတရော ဘိက္ခု ဒိဝါ ဘဏ္ဍံ ပဿိတွာ နိမိတ္တံ အကာသိ – ‘ရတ္တိံ အဝဟရိဿာမီ’တိ. သော တံ မညမာနော တံ အဝဟရိ။ပေ။ တံ မညမာနော အညံ အဝဟရိ။ပေ။ အညံ မညမာနော တံ အဝဟရိ။ပေ။ အညံ မညမာနော အညံ အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု ဒိဝါ ဘဏ္ဍံ ပဿိတွာ နိမိတ္တံ အကာသိ – ‘‘ရတ္တိံ အဝဟရိဿာမီ’’တိ. သော တံ မညမာနော အတ္တနော ဘဏ္ဍံ အဝဟရိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု အညဿ ဘဏ္ဍံ ဟရန္တော သီသေ ဘာရံ ထေယျစိတ္တော အာမသိ။ပေ။ ထေယျစိတ္တော ဖန္ဒာပေသိ။ပေ။ ထေယျစိတ္တော ခန္ဓံ ဩရောပေသိ။ပေ။ ခန္ဓေ ဘာရံ ထေယျစိတ္တော အာမသိ။ပေ။ ထေယျစိတ္တော ဖန္ဒာပေသိ။ပေ။ ထေယျစိတ္တော ကဋိံ ဩရောပေသိ။ပေ။ ကဋိယာ ဘာရံ ထေယျစိတ္တော အာမသိ။ပေ။ ထေယျစိတ္တော ဖန္ဒာပေသိ။ပေ။ ထေယျစိတ္တော ဟတ္ထေန အဂ္ဂဟေသိ။ပေ။ ဟတ္ထေ ဘာရံ ထေယျစိတ္တော ဘူမိယံ နိက္ခိပိ။ပေ။ ထေယျစိတ္တော ဘူမိတော အဂ္ဂဟေသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၁၃၅. တေန ခေါ ပန သမယေန အညတရော ဘိက္ခု အဇ္ဈောကာသေ စီဝရံ ပတ္ထရိတွာ ဝိဟာရံ ပါဝိသိ. အညတရော ဘိက္ခု – ‘မာယိဒံ စီဝရံ နဿီ’တိ၊ ပဋိသာမေသိ. သော နိက္ခမိတွာ တံ ဘိက္ခုံ ပုစ္ဆိ – ‘‘အာဝုသော၊ မယှံ စီဝရံ ကေန အဝဟဋ’’န္တိ? သော ဧဝမာဟ – ‘‘မယာ အဝဟဋ’’န္တိ. ‘‘သော တံ အာဒိယိ၊ အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။. ဘဂဝတော ဧတမတ္ထံ အာရောစေသိ. ‘‘ကိံစိတ္တော တွံ၊ ဘိက္ခူ’’တိ? ‘‘နိရုတ္တိပထော အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ နိရုတ္တိပထေ’’တိ.

တေန ခေါ ပန သမယေန အညတရော ဘိက္ခု ပီဌေ စီဝရံ နိက္ခိပိတွာ. ပီဌေ နိသီဒနံ နိက္ခိပိတွာ။ ဟေဋ္ဌာပီဌေ ပတ္တံ နိက္ခိပိတွာ ဝိဟာရံ ပါဝိသိ. အညတရော ဘိက္ခု – ‘‘မာယံ ပတ္တော နဿီ’’တိ ပဋိသာမေသိ. သော နိက္ခမိတွာ တံ ဘိက္ခုံ ပုစ္ဆိ – ‘‘အာဝုသော၊ မယှံ ပတ္တော ကေန အဝဟဋော’’တိ? သော ဧဝမာဟ – ‘‘မယာ အဝဟဋော’’တိ. ‘‘သော တံ အာဒိယိ၊ အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ နိရုတ္တိပထေ’’တိ.

တေန ခေါ ပန သမယေန အညတရာ ဘိက္ခုနီ ဝတိယာ စီဝရံ ပတ္ထရိတွာ ဝိဟာရံ ပါဝိသိ. အညတရာ ဘိက္ခုနီ – ‘မာယိဒံ စီဝရံ နဿီ’တိ ပဋိသာမေသိ. သာ နိက္ခမိတွာ တံ ဘိက္ခုနိံ ပုစ္ဆိ – ‘‘အယျေ၊ မယှံ စီဝရံ ကေန အဝဟဋ’’န္တိ? သာ ဧဝမာဟ – ‘‘မယာ အဝဟဋ’’န္တိ. ‘‘သာ တံ အာဒိယိ၊ အဿမဏီသိ တွ’’န္တိ. တဿာ ကုက္ကုစ္စံ အဟောသိ. အထ ခေါ သာ ဘိက္ခုနီ ဘိက္ခုနီနံ ဧတမတ္ထံ အာရောစေသိ. ဘိက္ခုနိယော ဘိက္ခူနံ ဧတမတ္ထံ အာရောစေသုံ. ဘိက္ခူ ဘဂဝတော ဧတမတ္ထံ အာရောစေသုံ။ပေ။ ‘‘အနာပတ္တိ၊ ဘိက္ခဝေ၊ နိရုတ္တိပထေ’’တိ.

၁၃၆. တေန ခေါ ပန သမယေန အညတရော ဘိက္ခု ဝါတမဏ္ဍလိကာယ ဥက္ခိတ္တံ သာဋကံ ပဿိတွာ သာမိကာနံ ဒဿာမီတိ၊ အဂ္ဂဟေသိ. သာမိကာ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။ ‘‘ကိံစိတ္တော တွံ ဘိက္ခူ’’တိ? ‘‘အထေယျစိတ္တော အဟံ၊ ဘဂဝါ’’တိ. အနာပတ္တိ၊ ဘိက္ခု၊ အထေယျစိတ္တဿာ’’တိ.

တေန ခေါ ပန သမယေန အညတရော ဘိက္ခု ဝါတမဏ္ဍလိကာယ ဥက္ခိတ္တံ ဝေဌနံ ပဿိတွာ ‘ပုရေ သာမိကာ ပဿန္တီ’တိ ထေယျစိတ္တော အဂ္ဂဟေသိ. သာမိကာ တံ ဘိက္ခုံ စောဒေသုံ – ‘‘အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၁၃၇. တေန ခေါ ပန သမယေန အညတရော ဘိက္ခု သုသာနံ ဂန္တွာ အဘိန္နေ သရီရေ ပံသုကူလံ အဂ္ဂဟေသိ. တသ္မိဉ္စ သရီရေ ပေတော အဓိဝတ္ထော ဟောတိ. အထ ခေါ သော ပေတော တံ ဘိက္ခုံ ဧတဒဝေါစ – ‘‘မာ၊ ဘန္တေ၊ မယှံ သာဋကံ အဂ္ဂဟေသီ’’တိ. သော ဘိက္ခု အနာဒိယန္တော အဂမာသိ. အထ ခေါ တံ သရီရံ ဥဋ္ဌဟိတွာ တဿ ဘိက္ခုနော ပိဋ္ဌိတော ပိဋ္ဌိတော အနုဗန္ဓိ. အထ ခေါ သော ဘိက္ခု ဝိဟာရံ ပဝိသိတွာ ဒွါရံ ထကေသိ. အထ ခေါ တံ သရီရံ တတ္ထေဝ ပရိပတိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. န စ၊ ဘိက္ခဝေ၊ အဘိန္နေ သရီရေ ပံသုကူလံ ဂဟေတဗ္ဗံ. သော ဂဏှေယျ၊ အာပတ္တိ ဒုက္ကဋဿာ’’တိ.

၁၃၈. တေန ခေါ ပန သမယေန အညတရော ဘိက္ခု သံဃဿ စီဝရေ ဘာဇီယမာနေ ထေယျစိတ္တော ကုသံ သင်္ကာမေတွာ စီဝရံ အဂ္ဂဟေသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၁၃၉. တေန ခေါ ပန သမယေန အာယသ္မာ အာနန္ဒော ဇန္တာဃရေ အညတရဿ ဘိက္ခုနော အန္တရဝါသကံ အတ္တနော မညမာနော နိဝါသေသိ. အထ ခေါ သော ဘိက္ခု အာယသ္မန္တံ အာနန္ဒံ ဧတဒဝေါစ – ‘‘ကိဿ မေ တွံ၊ အာဝုသော အာနန္ဒ၊ အန္တရဝါသကံ နိဝါသေသီ’’တိ? ‘‘သကသညီ အဟံ၊ အာဝုသော’’တိ. ဘဂဝတော ဧတမတ္ထံ အာရောစေသုံ. ‘‘အနာပတ္တိ၊ ဘိက္ခဝေ၊ သကသညိဿာ’’တိ.

၁၄၀. တေန ခေါ ပန သမယေန သမ္ဗဟုလာ ဘိက္ခူ ဂိဇ္ဈကူဋာ ပဗ္ဗတာ ဩရောဟန္တာ သီဟဝိဃာသံ ပဿိတွာ ပစာပေတွာ ပရိဘုဉ္ဇိံသု. တေသံ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခဝေ၊ သီဟဝိဃာသေ’’တိ.

တေန ခေါ ပန သမယေန သမ္ဗဟုလာ ဘိက္ခူ ဂိဇ္ဈကူဋာ ပဗ္ဗတာ ဩရောဟန္တာ ဗျဂ္ဃဝိဃာသံ ပဿိတွာ။ ဒီပိဝိဃာသံ ပဿိတွာ။ တရစ္ဆဝိဃာသံ ပဿိတွာ။ ကောကဝိဃာသံ ပဿိတွာ ပစာပေတွာ ပရိဘုဉ္ဇိံသု. တေသံ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခဝေ၊ တိရစ္ဆာနဂတပရိဂ္ဂဟေ’’တိ.

၁၄၁. တေန ခေါ ပန သမယေန အညတရော ဘိက္ခု သံဃဿ ဩဒနေ ဘာဇီယမာနေ – ‘အပရဿ ဘာဂံ ဒေဟီ’တိ အမူလကံ အဂ္ဂဟေသိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ သမ္ပဇာနမုသာဝါဒေ ပါစိတ္တိယဿာ’’တိ.

တေန ခေါ ပန သမယေန အညတရော ဘိက္ခု သံဃဿ ခါဒနီယေ ဘာဇိယမာနေ။ သံဃဿ ပူဝေ ဘာဇိယမာနေ။ သံဃဿ ဥစ္ဆုမှိ ဘာဇိယမာနေ။ သံဃဿ တိမ္ဗရူသကေ ဘာဇိယမာနေ – ‘အပရဿ ဘာဂံ ဒေဟီ’တိ အမူလကံ အဂ္ဂဟေသိ. တဿ ကုက္ကုစ္စံ အဟောသိ။ပေ။. ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ သမ္ပဇာနမုသာဝါဒေ ပါစိတ္တိယဿာ’’တိ.

၁၄၂. တေန ခေါ ပန သမယေန အညတရော ဘိက္ခု ဒုဗ္ဘိက္ခေ ဩဒနီယဃရံ ပဝိသိတွာ ပတ္တပူရံ ဩဒနံ ထေယျစိတ္တော အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု ဒုဗ္ဘိက္ခေ သူနဃရံ [သူနာဃရံ (သီ. သျာ)] ပဝိသိတွာ ပတ္တပူရံ မံသံ ထေယျစိတ္တော အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု ဒုဗ္ဘိက္ခေ ပူဝဃရံ ပဝိသိတွာ ပတ္တပူရံ ပူဝံ ထေယျစိတ္တော အဝဟရိ။ပေ။ ပတ္တပူရာ သက္ခလိယော ထေယျစိတ္တော အဝဟရိ။ပေ။ ပတ္တပူရေ မောဒကေ ထေယျစိတ္တော အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၁၄၃. တေန ခေါ ပန သမယေန အညတရော ဘိက္ခု ဒိဝါ ပရိက္ခာရံ ပဿိတွာ နိမိတ္တံ အကာသိ – ‘‘ရတ္တိံ အဝဟရိဿာမီ’’တိ. သော တံ မညမာနော တံ အဝဟရိ။ပေ။ တံ မညမာနော အညံ အဝဟရိ။ပေ။ အညံ မညမာနော တံ အဝဟရိ။ပေ။ အညံ မညမာနော အညံ အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု ဒိဝါ ပရိက္ခာရံ ပဿိတွာ နိမိတ္တံ အကာသိ – ‘‘ရတ္တိံ အဝဟရိဿာမီ’’တိ. သော တံ မညမာနော အတ္တနော ပရိက္ခာရံ အဝဟရိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. အာပတ္တိ ဒုက္ကဋဿာ’’တိ.

၁၄၄. တေန ခေါ ပန သမယေန အညတရော ဘိက္ခု ပီဌေ ထဝိကံ ပဿိတွာ – ‘‘ဣတော ဂဏှန္တော ပါရာဇိကော ဘဝိဿာမီ’’တိ သဟ ပီဌကေန သင်္ကာမေတွာ အဂ္ဂဟေသိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု သံဃဿ ဘိသိံ ထေယျစိတ္တော အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၁၄၅. တေန ခေါ ပန သမယေန အညတရော ဘိက္ခု စီဝရဝံသေ စီဝရံ ထေယျစိတ္တော အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု ဝိဟာရေ စီဝရံ အဝဟရိတွာ – ‘‘ဣတော နိက္ခမန္တော ပါရာဇိကော ဘဝိဿာမီ’’တိ ဝိဟာရာ န နိက္ခမိ။ပေ။ ဘဂဝတော ဧတမတ္ထံ အာရောစေသုံ. ‘‘နိက္ခမိ [နိက္ခမေယျ (သီ. သျာ.)] ဝါ သော၊ ဘိက္ခဝေ၊ မောဃပုရိသော န ဝါ နိက္ခမိ [နိက္ခမေယျ (သီ. သျာ.)]၊ အာပတ္တိ ပါရာဇိကဿာ’’တိ.

၁၄၆. တေန ခေါ ပန သမယေန ဒွေ ဘိက္ခူ သဟာယကာ ဟောန္တိ. ဧကော ဘိက္ခု ဂါမံ ပိဏ္ဍာယ ပါဝိသိ. ဒုတိယော ဘိက္ခု သံဃဿ ခါဒနီယေ ဘာဇီယမာနေ သဟာယကဿ ဘာဂံ ဂဟေတွာ တဿ ဝိဿသန္တော ပရိဘုဉ္ဇိ. သော ဇာနိတွာ တံ စောဒေသိ – ‘‘အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။ ‘‘ကိံ စိတ္တော တွံ၊ ဘိက္ခူ’’တိ? ‘‘ဝိဿာသဂ္ဂါဟော အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ ဝိဿာသဂ္ဂါဟေ’’တိ.

၁၄၇. တေန ခေါ ပန သမယေန သမ္ဗဟုလာ ဘိက္ခူ စီဝရကမ္မံ ကရောန္တိ. သံဃဿ ခါဒနီယေ ဘာဇီယမာနေ သဗ္ဗေသံ ပဋိဝိသာ အာဟရိတွာ ဥပနိက္ခိတ္တာ ဟောန္တိ. အညတရော ဘိက္ခု အညတရဿ ဘိက္ခုနော ပဋိဝိသံ အတ္တနော မညမာနော ပရိဘုဉ္ဇိ. သော ဇာနိတွာ တံ စောဒေသိ – ‘‘အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။ ‘‘ကိံစိတ္တော တွံ၊ ဘိက္ခူ’’တိ? ‘‘သကသညီ အဟံ၊ ဘဂဝါ’’တိ. ‘‘အနာပတ္တိ၊ ဘိက္ခု၊ သကသညိဿာ’’တိ.

တေန ခေါ ပန သမယေန သမ္ဗဟုလာ ဘိက္ခူ စီဝရကမ္မံ ကရောန္တိ. သံဃဿ ခါဒနီယေ ဘာဇိယမာနေ အညတရဿ ဘိက္ခုနော ပတ္တေန အညတရဿ ဘိက္ခုနော ပဋိဝိသော အာဟရိတွာ ဥပနိက္ခိတ္တော ဟောတိ. ပတ္တသာမိကော ဘိက္ခု အတ္တနော မညမာနော ပရိဘုဉ္ဇိ. သော ဇာနိတွာ တံ စောဒေသိ – ‘‘အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ သကသညိဿာ’’တိ.

၁၄၈. တေန ခေါ ပန သမယေန အမ္ဗစောရကာ အမ္ဗံ ပါတေတွာ ဘဏ္ဍိကံ အာဒါယ အဂမံသု. သာမိကာ တေ စောရကေ အနုဗန္ဓိံသု. စောရကာ သာမိကေ ပဿိတွာ ဘဏ္ဍိကံ ပါတေတွာ ပလာယိံသု. ဘိက္ခူ ပံသုကူလသညိနော ပဋိဂ္ဂဟာပေတွာ ပရိဘုဉ္ဇိံသု. သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ. တေသံ ကုက္ကုစ္စံ အဟောသိ။ပေ။ ဘဂဝတော ဧတမတ္ထံ အာရောစေသုံ. ‘‘ကိံစိတ္တာ တုမှေ၊ ဘိက္ခဝေ’’တိ? ‘‘ပံသုကူလသညိနော မယံ၊ ဘဂဝါ’’တိ. ‘‘အနာပတ္တိ၊ ဘိက္ခဝေ၊ ပံသုကူလသညိဿာ’’တိ.

တေန ခေါ ပန သမယေန ဇမ္ဗုစောရကာ။ လဗုဇစောရကာ။ ပနသစောရကာ။ တာလပက္ကစောရကာ။ ဥစ္ဆုစောရကာ။ တိမ္ဗရူသကစောရကာ တိမ္ဗရူသကေ ဥစ္စိနိတွာ ဘဏ္ဍိကံ အာဒါယ အဂမံသု. သာမိကာ တေ စောရကေ အနုဗန္ဓိံသု. စောရကာ သာမိကေ ပဿိတွာ ဘဏ္ဍိကံ ပါတေတွာ ပလာယိံသု. ဘိက္ခူ ပံသုကူလသညိနော ပဋိဂ္ဂဟာပေတွာ ပရိဘုဉ္ဇိံသု. သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ. တေသံ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခဝေ၊ ပံသုကူလသညိဿာ’’တိ.

တေန ခေါ ပန သမယေန အမ္ဗစောရကာ အမ္ဗံ ပါတေတွာ ဘဏ္ဍိကံ အာဒါယ အဂမံသု. သာမိကာ တေ စောရကေ အနုဗန္ဓိံသု. စောရကာ သာမိကေ ပဿိတွာ ဘဏ္ဍိကံ ပါတေတွာ ပလာယိံသု. ဘိက္ခူ – ‘ပုရေ သာမိကာ ပဿန္တီ’တိ၊ ထေယျစိတ္တာ ပရိဘုဉ္ဇိံသု. သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ. တေသံ ကုက္ကုစ္စံ အဟောသိ။ပေ။ ‘‘အာပတ္တိံ တုမှေ၊ ဘိက္ခဝေ၊ အာပန္နာ ပါရာဇိက’’န္တိ.

တေန ခေါ ပန သမယေန ဇမ္ဗုစောရကာ။ လဗုဇစောရကာ။ ပနသစောရကာ။ တာလပက္ကစောရကာ။ ဥစ္ဆုစောရကာ။ တိမ္ဗရူသကစောရကာ တိမ္ဗရူသကေ ဥစ္စိနိတွာ ဘဏ္ဍိကံ အာဒါယ အဂမံသု. သာမိကာ တေ စောရကေ အနုဗန္ဓိံသု. စောရကာ သာမိကေ ပဿိတွာ ဘဏ္ဍိကံ ပါတေတွာ ပလာယိံသု. ဘိက္ခူ – ‘ပုရေ သာမိကာ ပဿန္တီ’တိ၊ ထေယျစိတ္တာ ပရိဘုဉ္ဇိံသု. သာမိကာ တေ ဘိက္ခူ စောဒေသုံ – ‘‘အဿမဏာတ္ထ တုမှေ’’တိ. တေသံ ကုက္ကုစ္စံ အဟောသိ။ပေ။ ‘‘အာပတ္တိံ တုမှေ၊ ဘိက္ခဝေ၊ အာပန္နာ ပါရာဇိက’’န္တိ.

တေန ခေါ ပန သမယေန အညတရော ဘိက္ခု သံဃဿ အမ္ဗံ ထေယျစိတ္တော အဝဟရိ။ သံဃဿ ဇမ္ဗုံ။ သံဃဿ လဗုဇံ။ သံဃဿ ပနသံ။ သံဃဿ တာလပက္ကံ။ သံဃဿ ဥစ္ဆုံ။ သံဃဿ တိမ္ဗရူသကံ ထေယျစိတ္တော အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

၁၄၉. တေန ခေါ ပန သမယေန အညတရော ဘိက္ခု ပုပ္ဖါရာမံ ဂန္တွာ ဩစိတံ ပုပ္ဖံ ပဉ္စမာသဂ္ဃနကံ ထေယျစိတ္တော အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု၊ အာပန္နော ပါရာဇိက’’န္တိ.

တေန ခေါ ပန သမယေန အညတရော ဘိက္ခု ပုပ္ဖါရာမံ ဂန္တွာ ပုပ္ဖံ ဩစိနိတွာ ပဉ္စမာသဂ္ဃနကံ ထေယျစိတ္တော အဝဟရိ. တဿ ကုက္ကုစ္စံ အဟောသိ။ပေ။ ‘‘အာပတ္တိံ တွံ၊ ဘိက္ခု အာပန္နော ပါရာဇိက’’န္တိ.

၁၅၀. တေန ခေါ ပန သမယေန အညတရော ဘိက္ခု ဂါမကံ ဂစ္ဆန္တော အညတရံ ဘိက္ခုံ ဧတဒဝေါစ – ‘‘အာဝုသော၊ တုယှံ ဥပဋ္ဌာကကုလံ ဝုတ္တော ဝဇ္ဇေမီ’’တိ. သော ဂန္တွာ ဧကံ သာဋကံ အာဟရာပေတွာ အတ္တနာ ပရိဘုဉ္ဇိ. သော ဇာနိတွာ တံ စောဒေသိ – ‘‘အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. န စ၊ ဘိက္ခဝေ၊ ဝုတ္တော ဝဇ္ဇေမီတိ ဝတ္တဗ္ဗော. ယော ဝဒေယျ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု ဂါမကံ ဂစ္ဆတိ. အညတရော ဘိက္ခု တံ ဘိက္ခုံ ဧတဒဝေါစ – ‘‘အာဝုသော၊ မယှံ ဥပဋ္ဌာကကုလံ ဝုတ္တော ဝဇ္ဇေဟီ’’တိ. သော ဂန္တွာ ယုဂသာဋကံ အာဟရာပေတွာ ဧကံ အတ္တနာ ပရိဘုဉ္ဇိ၊ ဧကံ တဿ ဘိက္ခုနော အဒါသိ. သော ဇာနိတွာ တံ စောဒေသိ – ‘‘အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. န စ၊ ဘိက္ခဝေ၊ ဝုတ္တော ဝဇ္ဇေဟီတိ ဝတ္တဗ္ဗော. ယော ဝဒေယျ၊ အာပတ္တိ ဒုက္ကဋဿာ’’တိ.

တေန ခေါ ပန သမယေန အညတရော ဘိက္ခု ဂါမကံ ဂစ္ဆန္တော အညတရံ ဘိက္ခုံ ဧတဒဝေါစ – ‘‘အာဝုသော၊ တုယှံ ဥပဋ္ဌာကကုလံ ဝုတ္တော ဝဇ္ဇေမီ’’တိ. သောပိ ဧဝမာဟ – ‘‘ဝုတ္တော ဝဇ္ဇေဟီ’’တိ. သော ဂန္တွာ အာဠှကံ သပ္ပိံ တုလံ ဂုဠံ ဒေါဏံ တဏ္ဍုလံ အာဟရာပေတွာ အတ္တနာ ပရိဘုဉ္ဇိ. သော ဇာနိတွာ တံ စောဒေသိ – ‘‘အဿမဏောသိ တွ’’န္တိ. တဿ ကုက္ကုစ္စံ အဟောသိ။ပေ။ ‘‘အနာပတ္တိ၊ ဘိက္ခု၊ ပါရာဇိကဿ. န စ၊ ဘိက္ခဝေ၊ ဝုတ္တော ဝဇ္ဇေမီတိ ဝတ္တဗ္ဗော၊ န စ ဝုတ္တော ဝဇ္ဇေဟီတိ ဝတ္တဗ္ဗော. ယော ဝဒေယျ၊ အာပတ္တိ ဒုက္ကဋဿာ’’တိ.