၁၄၅. ပဝါရဏာသင်္ဂဟော

၂၄၁. တေန ခေါ ပန သမယေန သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ကောသလေသု ဇနပဒေ အညတရသ္မိံ အာဝါသေ ဝဿံ ဥပဂစ္ဆိံသု. တေသံ သမဂ္ဂါနံ သမ္မောဒမာနာနံ အဝိဝဒမာနာနံ ဝိဟရတံ အညတရော ဖာသုဝိဟာရော အဓိဂတော ဟောတိ. အထ ခေါ တေသံ ဘိက္ခူနံ ဧတဒဟောသိ – ‘‘အမှာကံ ခေါ သမဂ္ဂါနံ သမ္မောဒမာနာနံ အဝိဝဒမာနာနံ ဝိဟရတံ အညတရော ဖာသုဝိဟာရော အဓိဂတော. သစေ မယံ ဣဒါနိ ပဝါရေဿာမ၊ သိယာပိ ဘိက္ခူ ပဝါရေတွာ စာရိကံ ပက္ကမေယျုံ. ဧဝံ မယံ ဣမမှာ ဖာသုဝိဟာရာ ပရိဗာဟိရာ ဘဝိဿာမ. ကထံ နု ခေါ အမှေဟိ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ.

ဣဓ ပန၊ ဘိက္ခဝေ၊ သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ အညတရသ္မိံ အာဝါသေ ဝဿံ ဥပဂစ္ဆန္တိ. တေသံ သမဂ္ဂါနံ သမ္မောဒမာနာနံ အဝိဝဒမာနာနံ ဝိဟရတံ အညတရော ဖာသုဝိဟာရော အဓိဂတော ဟောတိ. တတြ စေ ဘိက္ခူနံ ဧဝံ ဟောတိ – ‘‘အမှာကံ ခေါ သမဂ္ဂါနံ သမ္မောဒမာနာနံ အဝိဝဒမာနာနံ ဝိဟရတံ အညတရော ဖာသုဝိဟာရော အဓိဂတော. သစေ မယံ ဣဒါနိ ပဝါရေဿာမ၊ သိယာပိ ဘိက္ခူ ပဝါရေတွာ စာရိကံ ပက္ကမေယျုံ. ဧဝံ မယံ ဣမမှာ ဖာသုဝိဟာရာ ပရိဗာဟိရာ ဘဝိဿာမာ’’တိ၊ အနုဇာနာမိ၊ ဘိက္ခဝေ၊ တေဟိ ဘိက္ခူဟိ ပဝါရဏာသင်္ဂဟံ ကာတုံ. ဧဝဉ္စ ပန၊ ဘိက္ခဝေ၊ ကာတဗ္ဗော. သဗ္ဗေဟေဝ ဧကဇ္ဈံ သန္နိပတိတဗ္ဗံ – သန္နိပတိတွာ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. အမှာကံ သမဂ္ဂါနံ သမ္မောဒမာနာနံ အဝိဝဒမာနာနံ ဝိဟရတံ အညတရော ဖာသုဝိဟာရော အဓိဂတော. သစေ မယံ ဣဒါနိ ပဝါရေဿာမ၊ သိယာပိ ဘိက္ခူ ပဝါရေတွာ စာရိကံ ပက္ကမေယျုံ. ဧဝံ မယံ ဣမမှာ ဖာသုဝိဟာရာ ပရိဗာဟိရာ ဘဝိဿာမ. ယဒိ သံဃဿ ပတ္တကလ္လံ၊ သံဃော ပဝါရဏာသင်္ဂဟံ ကရေယျ၊ ဣဒါနိ ဥပေါသထံ ကရေယျ၊ ပါတိမောက္ခံ ဥဒ္ဒိသေယျ၊ အာဂမေ ဇုဏှေ ကောမုဒိယာ စာတုမာသိနိယာ ပဝါရေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အမှာကံ သမဂ္ဂါနံ သမ္မောဒမာနာနံ အဝိဝဒမာနာနံ ဝိဟရတံ အညတရော ဖာသုဝိဟာရော အဓိဂတော. သစေ မယံ ဣဒါနိ ပဝါရေဿာမ၊ သိယာပိ ဘိက္ခူ ပဝါရေတွာ စာရိကံ ပက္ကမေယျုံ. ဧဝံ မယံ ဣမမှာ ဖာသုဝိဟာရာ ပရိဗာဟိရာ ဘဝိဿာမ. သံဃော ပဝါရဏာသင်္ဂဟံ ကရောတိ၊ ဣဒါနိ ဥပေါသထံ ကရိဿတိ၊ ပါတိမောက္ခံ ဥဒ္ဒိသိဿတိ၊ အာဂမေ ဇုဏှေ ကောမုဒိယာ စာတုမာသိနိယာ ပဝါရေဿတိ. ယဿာယသ္မတော ခမတိ ပဝါရဏာသင်္ဂဟဿ ကရဏံ၊ ဣဒါနိ ဥပေါသထံ ကရိဿတိ၊ ပါတိမောက္ခံ ဥဒ္ဒိသိဿတိ၊ အာဂမေ ဇုဏှေ ကောမုဒိယာ စာတုမာသိနိယာ ပဝါရေဿတိ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ကတော သံဃေန ပဝါရဏာသင်္ဂဟော၊ ဣဒါနိ ဥပေါသထံ ကရိဿတိ၊ ပါတိမောက္ခံ ဥဒ္ဒိသိဿတိ၊ အာဂမေ ဇုဏှေ ကောမုဒိယာ စာတုမာသိနိယာ ပဝါရေဿတိ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

တေဟိ စေ၊ ဘိက္ခဝေ၊ ဘိက္ခူဟိ ကတေ ပဝါရဏာသင်္ဂဟေ အညတရော ဘိက္ခု ဧဝံ ဝဒေယျ – ‘‘ဣစ္ဆာမဟံ၊ အာဝုသော၊ ဇနပဒစာရိကံ ပက္ကမိတုံ၊ အတ္ထိ မေ ဇနပဒေ ကရဏီယ’’န္တိ၊ သော ဧဝမဿ ဝစနီယော – ‘‘သာဓာဝုသော၊ ပဝါရေတွာ ဂစ္ဆာဟီ’’တိ. သော စေ၊ ဘိက္ခဝေ၊ ဘိက္ခု ပဝါရယမာနော အညတရဿ ဘိက္ခုနော ပဝါရဏံ ဌပေတိ၊ သော ဧဝမဿ ဝစနီယော – ‘‘အနိဿရော ခေါ မေ တွံ၊ အာဝုသော၊ ပဝါရဏာယ၊ န တာဝါဟံ ပဝါရေဿာမီ’’တိ. တဿ စေ၊ ဘိက္ခဝေ၊ ဘိက္ခုနော ပဝါရယမာနဿ အညတရော ဘိက္ခု တဿ ဘိက္ခုနော ပဝါရဏံ ဌပေတိ၊ ဥဘော သံဃေန သမနုယုဉ္ဇိတွာ သမနုဂါဟိတွာ ယထာဓမ္မံ ကာရာပေတဗ္ဗာ. သော စေ၊ ဘိက္ခဝေ၊ ဘိက္ခု ဇနပဒေ တံ ကရဏီယံ တီရေတွာ ပုနဒေဝ အန္တော ကောမုဒိယာ စာတုမာသိနိယာ တံ အာဝါသံ အာဂစ္ဆတိ၊ တေဟိ စေ၊ ဘိက္ခဝေ၊ ဘိက္ခူဟိ ပဝါရိယမာနေ အညတရော ဘိက္ခု တဿ ဘိက္ခုနော ပဝါရဏံ ဌပေတိ၊ သော ဧဝမဿ ဝစနီယော – ‘‘အနိဿရော ခေါ မေ တွံ၊ အာဝုသော၊ ပဝါရဏာယ၊ ပဝါရိတော အဟ’’န္တိ. တေဟိ စေ၊ ဘိက္ခဝေ၊ ဘိက္ခူဟိ ပဝါရိယမာနေ သော ဘိက္ခု အညတရဿ ဘိက္ခုနော ပဝါရဏံ ဌပေတိ၊ ဥဘော သံဃေန သမနုယုဉ္ဇိတွာ သမနုဂါဟိတွာ ယထာဓမ္မံ ကာရာပေတွာ သံဃေန ပဝါရေတဗ္ဗန္တိ.

ပဝါရဏာသင်္ဂဟော နိဋ္ဌိတော.

ပဝါရဏာက္ခန္ဓကော စတုတ္ထော.