၄. ပဝါရဏာက္ခန္ဓကော

၁၂၀. အဖာသုကဝိဟာရော

၂၀၉. တေန သမယေန ဗုဒ္ဓေါ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ကောသလေသု ဇနပဒေ အညတရသ္မိံ အာဝါသေ ဝဿံ ဥပဂစ္ဆိံသု. အထ ခေါ တေသံ ဘိက္ခူနံ ဧတဒဟောသိ – ‘‘ကေန နု ခေါ မယံ ဥပါယေန သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသေယျာမ၊ န စ ပိဏ္ဍကေန ကိလမေယျာမာ’’တိ. အထ ခေါ တေသံ ဘိက္ခူနံ ဧတဒဟောသိ – ‘‘သစေ ခေါ မယံ အညမညံ နေဝ အာလပေယျာမ န သလ္လပေယျာမ – ယော ပဌမံ ဂါမတော ပိဏ္ဍာယ ပဋိက္ကမေယျ သော အာသနံ ပညပေယျ၊ ပါဒေါဒကံ ပါဒပီဌံ ပါဒကထလိကံ ဥပနိက္ခိပေယျ၊ အဝက္ကာရပါတိံ ဓောဝိတွာ ဥပဋ္ဌာပေယျ၊ ပါနီယံ ပရိဘောဇနီယံ ဥပဋ္ဌာပေယျ၊ ယော ပစ္ဆာ ဂါမတော ပိဏ္ဍာယ ပဋိက္ကမေယျ၊ သစဿ ဘုတ္တာဝသေသော၊ သစေ အာကင်္ခေယျ ဘုဉ္ဇေယျ၊ နော စေ အာကင်္ခေယျ အပ္ပဟရိတေ ဝါ ဆဍ္ဍေယျ၊ အပ္ပါဏကေ ဝါ ဥဒကေ ဩပိလာပေယျ၊ သော အာသနံ ဥဒ္ဓရေယျ၊ ပါဒေါဒကံ ပါဒပီဌံ ပါဒကထလိကံ ပဋိသာမေယျ၊ အဝက္ကာရပါတိံ ဓောဝိတွာ ပဋိသာမေယျ၊ ပါနီယံ ပရိဘောဇနီယံ ပဋိသာမေယျ၊ ဘတ္တဂ္ဂံ သမ္မဇ္ဇေယျ၊ ယော ပဿေယျ ပါနီယဃဋံ ဝါ ပရိဘောဇနီယဃဋံ ဝါ ဝစ္စဃဋံ ဝါ ရိတ္တံ တုစ္ဆံ သော ဥပဋ္ဌာပေယျ၊ သစဿ ဟောတိ အဝိသယှံ၊ ဟတ္ထဝိကာရေန ဒုတိယံ အာမန္တေတွာ ဟတ္ထဝိလင်္ဃကေန ဥပဋ္ဌာပေယျ၊ န တွေဝ တပ္ပစ္စယာ ဝါစံ ဘိန္ဒေယျ – ဧဝံ ခေါ မယံ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသေယျာမ၊ န စ ပိဏ္ဍကေန ကိလမေယျာမာ’’တိ. အထ ခေါ တေ ဘိက္ခူ အညမညံ နေဝ အာလပိံသု၊ န သလ္လပိံသု. ယော ပဌမံ ဂါမတော ပိဏ္ဍာယ ပဋိက္ကမတိ၊ သော အာသနံ ပညပေတိ၊ ပါဒေါဒကံ ပါဒပီဌံ ပါဒကထလိကံ ဥပနိက္ခိပတိ၊ အဝက္ကာရပါတိံ ဓောဝိတွာ ဥပဋ္ဌာပေတိ၊ ပါနီယံ ပရိဘောဇနီယံ ဥပဋ္ဌာပေတိ. ယော ပစ္ဆာ ဂါမတော ပိဏ္ဍာယ ပဋိက္ကမတိ၊ သစေ ဟောတိ ဘုတ္တာဝသေသော၊ သစေ အာကင်္ခတိ ဘုဉ္ဇတိ၊ နော စေ အာကင်္ခတိ အပ္ပဟရိတေ ဝါ ဆဍ္ဍေတိ၊ အပ္ပါဏကေ ဝါ ဥဒကေ ဩပိလာပေတိ၊ သော အာသနံ ဥဒ္ဓရတိ၊ ပါဒေါဒကံ ပါဒပီဌံ ပါဒကထလိကံ ပဋိသာမေတိ၊ အဝက္ကာရပါတိံ ဓောဝိတွာ ပဋိသာမေတိ၊ ပါနီယံ ပရိဘောဇနီယံ ပဋိသာမေတိ၊ ဘတ္တဂ္ဂံ သမ္မဇ္ဇတိ. ယော ပဿတိ ပါနီယဃဋံ ဝါ ပရိဘောဇနီယဃဋံ ဝါ ဝစ္စဃဋံ ဝါ ရိတ္တံ တုစ္ဆံ သော ဥပဋ္ဌာပေတိ. သစဿ ဟောတိ အဝိသယှံ၊ ဟတ္ထဝိကာရေန ဒုတိယံ အာမန္တေတွာ ဟတ္ထဝိလင်္ဃကေန ဥပဋ္ဌာပေတိ၊ န တွေဝ တပ္ပစ္စယာ ဝါစံ ဘိန္ဒတိ.

အာစိဏ္ဏံ ခေါ ပနေတံ ဝဿံဝုဋ္ဌာနံ ဘိက္ခူနံ ဘဂဝန္တံ ဒဿနာယ ဥပသင်္ကမိတုံ. အထ ခေါ တေ ဘိက္ခူ ဝဿံဝုဋ္ဌာ တေမာသစ္စယေန သေနာသနံ သံသာမေတွာ ပတ္တစီဝရမာဒါယ ယေန သာဝတ္ထိ တေန ပက္ကမိံသု. အနုပုဗ္ဗေန ယေန သာဝတ္ထိ ဇေတဝနံ အနာထပိဏ္ဍိကဿ အာရာမော ယေန ဘဂဝါ တေနုပသင်္ကမိံသု၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိံသု. အာစိဏ္ဏံ ခေါ ပနေတံ ဗုဒ္ဓါနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ. အထ ခေါ ဘဂဝါ တေ ဘိက္ခူ ဧတဒဝေါစ – ‘‘ကစ္စိ၊ ဘိက္ခဝေ၊ ခမနီယံ၊ ကစ္စိ ယာပနီယံ၊ ကစ္စိ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသိတ္ထ၊ န စ ပိဏ္ဍကေန ကိလမိတ္ထာ’’တိ? ‘‘ခမနီယံ ဘဂဝါ၊ ယာပနီယံ ဘဂဝါ. သမဂ္ဂါ စ မယံ၊ ဘန္တေ၊ သမ္မောဒမာနာ အဝိဝဒမာနာ ဖာသုကံ ဝဿံ ဝသိမှာ၊ န စ ပိဏ္ဍကေန ကိလမိမှာ’’တိ. ဇာနန္တာပိ တထာဂတာ ပုစ္ဆန္တိ၊ ဇာနန္တာပိ န ပုစ္ဆန္တိ. ကာလံ ဝိဒိတွာ ပုစ္ဆန္တိ၊ ကာလံ ဝိဒိတွာ န ပုစ္ဆန္တိ. အတ္ထသံဟိတံ တထာဂတာ ပုစ္ဆန္တိ၊ နော အနတ္ထသံဟိတံ. အနတ္ထသံဟိတေ သေတုဃာတော တထာဂတာနံ. ဒွီဟာကာရေဟိ ဗုဒ္ဓါ ဘဂဝန္တော ဘိက္ခူ ပဋိပုစ္ဆန္တိ – ဓမ္မံ ဝါ ဒေသေဿာမ၊ သာဝကာနံ ဝါ သိက္ခာပဒံ ပညပေဿာမာတိ. အထ ခေါ ဘဂဝါ တေ ဘိက္ခူ ဧတဒဝေါစ – ‘‘ယထာကထံ ပန တုမှေ၊ ဘိက္ခဝေ၊ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသိတ္ထ၊ န စ ပိဏ္ဍကေန ကိလမိတ္ထာ’’တိ.

ဣဓ မယံ၊ ဘန္တေ၊ သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ကောသလေသု ဇနပဒေ အညတရသ္မိံ အာဝါသေ ဝဿံ ဥပဂစ္ဆိမှာ. တေသံ နော၊ ဘန္တေ၊ အမှာကံ ဧတဒဟောသိ – ‘‘ကေန နု ခေါ မယံ ဥပါယေန သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသေယျာမ၊ န စ ပိဏ္ဍကေန ကိလမေယျာမာ’’တိ. တေသံ နော၊ ဘန္တေ၊ အမှာကံ ဧတဒဟောသိ – ‘‘သစေ ခေါ မယံ အညမညံ နေဝ အာလပေယျာမ န သလ္လပေယျာမ – ယော ပဌမံ ဂါမတော ပိဏ္ဍာယ ပဋိက္ကမေယျ သော အာသနံ ပညပေယျ၊ ပါဒေါဒကံ ပါဒပီဌံ ပါဒကထလိကံ ဥပနိက္ခိပေယျ၊ အဝက္ကာရပါတိံ ဓောဝိတွာ ဥပဋ္ဌာပေယျ၊ ပါနီယံ ပရိဘောဇနီယံ ဥပဋ္ဌာပေယျ၊ ယော ပစ္ဆာ ဂါမတော ပိဏ္ဍာယ ပဋိက္ကမေယျ၊ သစဿ ဘုတ္တာဝသေသော၊ သစေ အာကင်္ခေယျ ဘုဉ္ဇေယျ၊ နော စေ အာကင်္ခေယျ အပ္ပဟရိတေ ဝါ ဆဍ္ဍေယျ၊ အပ္ပါဏကေ ဝါ ဥဒကေ ဩပိလာပေယျ၊ သော အာသနံ ဥဒ္ဓရေယျ၊ ပါဒေါဒကံ ပါဒပီဌံ ပါဒကထလိကံ ပဋိသာမေယျ၊ အဝက္ကာရပါတိံ ဓောဝိတွာ ပဋိသာမေယျ၊ ပါနီယံ ပရိဘောဇနီယံ ပဋိသာမေယျ၊ ဘတ္တဂ္ဂံ သမ္မဇ္ဇေယျ၊ ယော ပဿေယျ ပါနီယဃဋံ ဝါ ပရိဘောဇနီယဃဋံ ဝါ ဝစ္စဃဋံ ဝါ ရိတ္တံ တုစ္ဆံ သော ဥပဋ္ဌာပေယျ၊ သစဿ ဟောတိ အဝိသယှံ၊ ဟတ္ထဝိကာရေန ဒုတိယံ အာမန္တေတွာ ဟတ္ထဝိလင်္ဃကေန ဥပဋ္ဌာပေယျ၊ န တွေဝ တပ္ပစ္စယာ ဝါစံ ဘိန္ဒေယျ – ဧဝံ ခေါ မယံ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသေယျာမ၊ န စ ပိဏ္ဍကေန ကိလမေယျာမာ’’တိ. အထ ခေါ မယံ၊ ဘန္တေ၊ အညမညံ နေဝ အာလပိမှာ န သလ္လဝိမှာ. ယော ပဌမံ ဂါမတော ပိဏ္ဍာယ ပဋိက္ကမတိ သော အာသနံ ပညပေတိ၊ ပါဒေါဒကံ ပါဒပီဌံ ပါဒကထလိကံ ဥပနိက္ခိပတိ၊ အဝက္ကာရပါတိံ ဓောဝိတွာ ဥပဋ္ဌာပေတိ၊ ပါနီယံ ပရိဘောဇနီယံ ဥပဋ္ဌာပေတိ. ယော ပစ္ဆာ ဂါမတော ပိဏ္ဍာယ ပဋိက္ကမတိ၊ သစေ ဟောတိ ဘုတ္တာဝသေသော၊ သစေ အာကင်္ခတိ ဘုဉ္ဇတိ၊ နော စေ အာကင်္ခတိ အပ္ပဟရိတေ ဝါ ဆဍ္ဍေတိ၊ အပ္ပါဏကေ ဝါ ဥဒကေ ဩပိလာပေတိ၊ သော အာသနံ ဥဒ္ဓရတိ၊ ပါဒေါဒကံ ပါဒပီဌံ ပါဒကထလိကံ ပဋိသာမေတိ၊ အဝက္ကာရပါတိံ ဓောဝိတွာ ပဋိသာမေတိ၊ ပါနီယံ ပရိဘောဇနီယံ ပဋိသာမေတိ၊ ဘတ္တဂ္ဂံ သမ္မဇ္ဇတိ. ယော ပဿတိ ပါနီယဃဋံ ဝါ ပရိဘောဇနီယဃဋံ ဝါ ဝစ္စဃဋံ ဝါ ရိတ္တံ တုစ္ဆံ သော ဥပဋ္ဌာပေတိ. သစဿ ဟောတိ အဝိသယှံ၊ ဟတ္ထဝိကာရေန ဒုတိယံ အာမန္တေတွာ ဟတ္ထဝိလင်္ဃကေန ဥပဋ္ဌာပေတိ၊ န တွေဝ တပ္ပစ္စယာ ဝါစံ ဘိန္ဒတိ. ဧဝံ ခေါ မယံ၊ ဘန္တေ၊ သမဂ္ဂါ သမ္မောဒမာနာ အဝိဝဒမာနာ ဖာသုကံ ဝဿံ ဝသိမှာ၊ န စ ပိဏ္ဍကေန ကိလမိမှာတိ.

အထ ခေါ ဘဂဝါ ဘိက္ခူ အာမန္တေသိ – ‘‘အဖာသုညေဝ [အဖာသုကညေဝ (သီ.)] ကိရမေ [ကိရိမေ (က.)]၊ ဘိက္ခဝေ၊ မောဃပုရိသာ ဝုဋ္ဌာ [ဝုတ္ထာ (က.)] သမာနာ ဖာသုမှာ [ဖာသုကမှာ (သီ.)] ဝုဋ္ဌာတိ ပဋိဇာနန္တိ. ပသုသံဝါသညေဝ ကိရမေ၊ ဘိက္ခဝေ၊ မောဃပုရိသာ ဝုဋ္ဌာ သမာနာ ဖာသုမှာ ဝုဋ္ဌာတိ ပဋိဇာနန္တိ. ဧဠကသံဝါသညေဝ ကိရမေ၊ ဘိက္ခဝေ၊ မောဃပုရိသာ ဝုဋ္ဌာ သမာနာ ဖာသုမှာ ဝုဋ္ဌာတိ ပဋိဇာနန္တိ. သပတ္တသံဝါသညေဝ ကိရမေ၊ ဘိက္ခဝေ၊ မောဃပုရိသာ ဝုဋ္ဌာ သမာနာ ဖာသုမှာ ဝုဋ္ဌာတိ ပဋိဇာနန္တိ. ကထဉှိ နာမိမေ၊ ဘိက္ခဝေ၊ မောဃပုရိသာ မူဂဗ္ဗတံ တိတ္ထိယသမာဒါနံ သမာဒိယိဿ’’န္တိ. နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ – န၊ ဘိက္ခဝေ၊ မူဂဗ္ဗတံ တိတ္ထိယသမာဒါနံ သမာဒိယိတဗ္ဗံ. ယော သမာဒိယေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ ဝဿံဝုဋ္ဌာနံ ဘိက္ခူနံ တီဟိ ဌာနေဟိ ပဝါရေတုံ – ဒိဋ္ဌေန ဝါ သုတေန ဝါ ပရိသင်္ကာယ ဝါ. သာ ဝေါ ဘဝိဿတိ အညမညာနုလောမတာ အာပတ္တိဝုဋ္ဌာနတာ ဝိနယပုရေက္ခာရတာ. ဧဝဉ္စ ပန၊ ဘိက္ခဝေ၊ ပဝါရေတဗ္ဗံ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၂၁၀. ‘‘သုဏာတု မေ၊ ဘန္တေ၊ သံဃော. အဇ္ဇ ပဝါရဏာ. ယဒိ သံဃဿ ပတ္တကလ္လံ၊ သံဃော ပဝါရေယျာ’’တိ.

ထေရေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘သံဃံ၊ အာဝုသော၊ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တော အနုကမ္ပံ ဥပါဒါယ. ပဿန္တော ပဋိကရိဿာမိ. ဒုတိယမ္ပိ၊ အာဝုသော၊ သံဃံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တော အနုကမ္ပံ ဥပါဒါယ. ပဿန္တော ပဋိကရိဿာမိ. တတိယမ္ပိ၊ အာဝုသော၊ သံဃံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တော အနုကမ္ပံ ဥပါဒါယ. ပဿန္တော ပဋိကရိဿာမီ’’တိ.

နဝကေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘သံဃံ၊ ဘန္တေ၊ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တော အနုကမ္ပံ ဥပါဒါယ. ပဿန္တော ပဋိကရိဿာမိ. ဒုတိယမ္ပိ၊ ဘန္တေ၊ သံဃံ။ပေ။ တတိယမ္ပိ၊ ဘန္တေ၊ သံဃံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တော အနုကမ္ပံ ဥပါဒါယ. ပဿန္တော ပဋိကရိဿာမီ’’တိ.

၂၁၁. တေန ခေါ ပန သမယေန ဆဗ္ဗဂ္ဂိယာ ဘိက္ခူ ထေရေသု ဘိက္ခူသု ဥက္ကုဋိကံ နိသိန္နေသု ပဝါရယမာနေသု အာသနေသု အစ္ဆန္တိ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ ဆဗ္ဗဂ္ဂိယာ ဘိက္ခူ ထေရေသု ဘိက္ခူသု ဥက္ကုဋိကံ နိသိန္နေသု ပဝါရယမာနေသု အာသနေသု အစ္ဆိဿန္တီ’’တိ. အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ။ပေ။ ‘‘သစ္စံ ကိရ၊ ဘိက္ခဝေ၊ ဆဗ္ဗဂ္ဂိယာ ဘိက္ခူ ထေရေသု ဘိက္ခူသု ဥက္ကုဋိကံ နိသိန္နေသု ပဝါရယမာနေသု အာသနေသု အစ္ဆန္တီ’’တိ? ‘‘သစ္စံ၊ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ။ပေ။ ‘‘ကထဉှိ နာမ တေ၊ ဘိက္ခဝေ၊ မောဃပုရိသာ ထေရေသု ဘိက္ခူသု ဥက္ကုဋိကံ နိသိန္နေသု ပဝါရယမာနေသု အာသနေသု အစ္ဆိဿ’’န္တိ. နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ၊ ပသန္နာနံ ဝါ ဘိယျောဘာဝါယ။ပေ။ ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ ထေရေသု ဘိက္ခူသု ဥက္ကုဋိကံ နိသိန္နေသု ပဝါရယမာနေသု အာသနေသု အစ္ဆိတဗ္ဗံ. ယော အစ္ဆေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ သဗ္ဗေဟေဝ ဥက္ကုဋိကံ နိသိန္နေဟိ ပဝါရေတု’’န္တိ.

တေန ခေါ ပန သမယေန အညတရော ထေရော ဇရာဒုဗ္ဗလော ယာဝ သဗ္ဗေ ပဝါရေန္တီတိ [ယာဝ သဗ္ဗေ ပဝါရေန္တိ (သျာ.)] ဥက္ကုဋိကံ နိသိန္နော အာဂမယမာနော မုစ္ဆိတော ပပတိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ တဒမန္တရာ ဥက္ကုဋိကံ နိသီဒိတုံ ယာဝ ပဝါရေတိ၊ ပဝါရေတွာ အာသနေ နိသီဒိတုန္တိ.

အဖာသုကဝိဟာရော နိဋ္ဌိတော.

၁၂၁. ပဝါရဏာဘေဒါ

၂၁၂. အထ ခေါ ဘိက္ခူနံ ဧတဒဟောသိ – ‘‘ကတိ နု ခေါ ပဝါရဏာ’’တိ? ဘဂဝတော ဧတမတ္ထံ အာရောစေသုံ. ဒွေမာ၊ ဘိက္ခဝေ၊ ပဝါရဏာ – စာတုဒ္ဒသိကာ စ ပန္နရသိကာ စ. ဣမာ ခေါ၊ ဘိက္ခဝေ၊ ဒွေ ပဝါရဏာတိ.

အထ ခေါ ဘိက္ခူနံ ဧတဒဟောသိ – ‘‘ကတိ နု ခေါ ပဝါရဏကမ္မာနီ’’တိ? [ပဝါရဏာကမ္မာနီတိ (သျာ.)] ဘဂဝတော ဧတမတ္ထံ အာရောစေသုံ. စတ္တာရိမာနိ၊ ဘိက္ခဝေ၊ ပဝါရဏကမ္မာနိ – အဓမ္မေန ဝဂ္ဂံ ပဝါရဏကမ္မံ၊ အဓမ္မေန သမဂ္ဂံ ပဝါရဏကမ္မံ၊ ဓမ္မေန ဝဂ္ဂံ ပဝါရဏကမ္မံ၊ ဓမ္မေန သမဂ္ဂံ ပဝါရဏကမ္မံ. တတြ၊ ဘိက္ခဝေ၊ ယဒိဒံ အဓမ္မေန ဝဂ္ဂံ ပဝါရဏကမ္မံ၊ န၊ ဘိက္ခဝေ၊ ဧဝရူပံ ပဝါရဏကမ္မံ ကာတဗ္ဗံ၊ န စ မယာ ဧဝရူပံ ပဝါရဏကမ္မံ အနုညာတံ. တတြ၊ ဘိက္ခဝေ၊ ယဒိဒံ အဓမ္မေန သမဂ္ဂံ ပဝါရဏကမ္မံ၊ န၊ ဘိက္ခဝေ၊ ဧဝရူပံ ပဝါရဏကမ္မံ ကာတဗ္ဗံ၊ န စ မယာ ဧဝရူပံ ပဝါရဏကမ္မံ အနုညာတံ. တတြ၊ ဘိက္ခဝေ၊ ယဒိဒံ ဓမ္မေန ဝဂ္ဂံ ပဝါရဏကမ္မံ၊ န၊ ဘိက္ခဝေ၊ ဧဝရူပံ ပဝါရဏကမ္မံ ကာတဗ္ဗံ၊ န စ မယာ ဧဝရူပံ ပဝါရဏကမ္မံ အနုညာတံ. တတြ၊ ဘိက္ခဝေ၊ ယဒိဒံ ဓမ္မေန သမဂ္ဂံ ပဝါရဏကမ္မံ၊ ဧဝရူပံ၊ ဘိက္ခဝေ၊ ပဝါရဏကမ္မံ ကာတဗ္ဗံ၊ ဧဝရူပဉ္စ မယာ ပဝါရဏကမ္မံ အနုညာတံ. တသ္မာတိဟ၊ ဘိက္ခဝေ၊ ဧဝရူပံ ပဝါရဏကမ္မံ ကရိဿာမ ယဒိဒံ ဓမ္မေန သမဂ္ဂန္တိ၊ ဧဝဉှိ ဝေါ၊ ဘိက္ခဝေ၊ သိက္ခိတဗ္ဗန္တိ.

ပဝါရဏာဘေဒါ နိဋ္ဌိတာ.

၁၂၂. ပဝါရဏာဒါနာနုဇာနနာ

၂၁၃. အထ ခေါ ဘဂဝါ ဘိက္ခူ အာမန္တေသိ – ‘‘သန္နိပတထ၊ ဘိက္ခဝေ. သံဃော ပဝါရေဿတီ’’တိ. ဧဝံ ဝုတ္တေ အညတရော ဘိက္ခု ဘဂဝန္တံ ဧတဒဝေါစ – ‘‘အတ္ထိ၊ ဘန္တေ၊ ဘိက္ခု ဂိလာနော၊ သော အနာဂတော’’တိ. အနုဇာနာမိ၊ ဘိက္ခဝေ၊ ဂိလာနေန ဘိက္ခုနာ ပဝါရဏံ ဒါတုံ. ဧဝဉ္စ ပန၊ ဘိက္ခဝေ၊ ဒါတဗ္ဗာ – တေန ဂိလာနေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘ပဝါရဏံ ဒမ္မိ၊ ပဝါရဏံ မေ ဟရ၊ ပဝါရဏံ မေ အာရောစေဟိ၊ မမတ္ထာယ ပဝါရေဟီ’’တိ ကာယေန ဝိညာပေတိ၊ ဝါစာယ ဝိညာပေတိ၊ ကာယေန ဝါစာယ ဝိညာပေတိ၊ ဒိန္နာ ဟောတိ ပဝါရဏာ၊ န ကာယေန ဝိညာပေတိ၊ န ဝါစာယ ဝိညာပေတိ၊ န ကာယေန ဝါစာယ ဝိညာပေတိ၊ န ဒိန္နာ ဟောတိ ပဝါရဏာ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ သော၊ ဘိက္ခဝေ၊ ဂိလာနော ဘိက္ခု မဉ္စေန ဝါ ပီဌေန ဝါ သံဃမဇ္ဈေ အာနေတွာ ပဝါရေတဗ္ဗံ. သစေ၊ ဘိက္ခဝေ၊ ဂိလာနုပဋ္ဌာကာနံ ဘိက္ခူနံ ဧတဒဟောသိ – ‘‘သစေ ခေါ မယံ ဂိလာနံ ဌာနာ စာဝေဿာမ၊ အာဗာဓော ဝါ အဘိဝဍ္ဎိဿတိ၊ ကာလံကိရိယာ ဝါ ဘဝိဿတီ’’တိ န၊ ဘိက္ခဝေ၊ ဂိလာနော ဘိက္ခု ဌာနာ စာဝေတဗ္ဗော. သံဃေန တတ္ထ ဂန္တွာ ပဝါရေတဗ္ဗံ၊ န တွေဝ ဝဂ္ဂေန သံဃေန ပဝါရေတဗ္ဗံ. ပဝါရေယျ စေ၊ အာပတ္တိ ဒုက္ကဋဿ.

ပဝါရဏဟာရကော [ပဝါရဏာဟာရကော (သျာ.)] စေ၊ ဘိက္ခဝေ၊ ဒိန္နာယ ပဝါရဏာယ တတ္ထေဝ ပက္ကမတိ၊ အညဿ ဒါတဗ္ဗာ ပဝါရဏာ. ပဝါရဏဟာရကော စေ၊ ဘိက္ခဝေ၊ ဒိန္နာယ ပဝါရဏာယ တတ္ထေဝ ဝိဗ္ဘမတိ။ပေ။ ကာလံကရောတိ။ သာမဏေရော ပဋိဇာနာတိ။ သိက္ခံ ပစ္စက္ခာတကော ပဋိဇာနာတိ။ အန္တိမဝတ္ထုံ အဇ္ဈာပန္နကော ပဋိဇာနာတိ။ ဥမ္မတ္တကော ပဋိဇာနာတိ။ ခိတ္တစိတ္တော ပဋိဇာနာတိ။ ဝေဒနာဋ္ဋော ပဋိဇာနာတိ။ အာပတ္တိယာ အဒဿနေ ဥက္ခိတ္တကော ပဋိဇာနာတိ။ အာပတ္တိယာ အပ္ပဋိကမ္မေ ဥက္ခိတ္တကော ပဋိဇာနာတိ။ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကော ပဋိဇာနာတိ။ ပဏ္ဍကော ပဋိဇာနာတိ။ ထေယျသံဝါသကော ပဋိဇာနာတိ။ တိတ္ထိယပက္ကန္တကော ပဋိဇာနာတိ။ တိရစ္ဆာနဂတော ပဋိဇာနာတိ။ မာတုဃာတကော ပဋိဇာနာတိ။ ပိတုဃာတကော ပဋိဇာနာတိ။ အရဟန္တဃာတကော ပဋိဇာနာတိ။ ဘိက္ခုနိဒူသကော ပဋိဇာနာတိ။ သံဃဘေဒကော ပဋိဇာနာတိ ။ လောဟိတုပ္ပါဒကော ပဋိဇာနာတိ။ ဥဘတောဗျဉ္ဇနကော ပဋိဇာနာတိ၊ အညဿ ဒါတဗ္ဗာ ပဝါရဏာ.

ပဝါရဏဟာရကော စေ၊ ဘိက္ခဝေ၊ ဒိန္နာယ ပဝါရဏာယ အန္တရာမဂ္ဂေ ပက္ကမတိ၊ အနာဟဋာ ဟောတိ ပဝါရဏာ. ပဝါရဏဟာရကော စေ၊ ဘိက္ခဝေ၊ ဒိန္နာယ ပဝါရဏာယ အန္တရာမဂ္ဂေ ဝိဗ္ဘမတိ။ပေ။ ကာလံကရောတိ။ သာမဏေရော ပဋိဇာနာတိ။ သိက္ခံ ပစ္စက္ခာတကော ပဋိဇာနာတိ။ အန္တိမဝတ္ထုံ အဇ္ဈာပန္နကော ပဋိဇာနာတိ။ ဥမ္မတ္တကော ပဋိဇာနာတိ။ ခိတ္တစိတ္တော ပဋိဇာနာတိ။ ဝေဒနာဋ္ဋော ပဋိဇာနာတိ။ အာပတ္တိယာ အဒဿနေ ဥက္ခိတ္တကော ပဋိဇာနာတိ။ အာပတ္တိယာ အပ္ပဋိကမ္မေ ဥက္ခိတ္တကော ပဋိဇာနာတိ။ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကော ပဋိဇာနာတိ။ ပဏ္ဍကော ပဋိဇာနာတိ။ ထေယျသံဝါသကော ပဋိဇာနာတိ။ တိတ္ထိယပက္ကန္တကော ပဋိဇာနာတိ။ တိရစ္ဆာနဂတော ပဋိဇာနာတိ။ မာတုဃာတကော ပဋိဇာနာတိ။ ပိတုဃာတကော ပဋိဇာနာတိ။ အရဟန္တဃာတကော ပဋိဇာနာတိ။ ဘိက္ခုနိဒူသကော ပဋိဇာနာတိ။ သံဃဘေဒကော ပဋိဇာနာတိ။ လောဟိတုပ္ပါဒကော ပဋိဇာနာတိ။ ဥဘတောဗျဉ္ဇနကော ပဋိဇာနာတိ၊ အနာဟဋာ ဟောတိ ပဝါရဏာ.

ပဝါရဏဟာရကော စေ၊ ဘိက္ခဝေ၊ ဒိန္နာယ ပဝါရဏာယ သံဃပ္ပတ္တော ပက္ကမတိ၊ အာဟဋာ ဟောတိ ပဝါရဏာ. ပဝါရဏဟာရကော စေ၊ ဘိက္ခဝေ၊ ဒိန္နာယ ပဝါရဏာယ သံဃပ္ပတ္တော ဝိဗ္ဘမတိ။ပေ။ ကာလံကရောတိ။ သာမဏေရော ပဋိဇာနာတိ။ သိက္ခံ ပစ္စက္ခာတကော ပဋိဇာနာတိ။ အန္တိမဝတ္ထုံ အဇ္ဈာပန္နကော ပဋိဇာနာတိ။ ဥမ္မတ္တကော ပဋိဇာနာတိ။ ခိတ္တစိတ္တော ပဋိဇာနာတိ။ ဝေဒနာဋ္ဋော ပဋိဇာနာတိ။ အာပတ္တိယာ အဒဿနေ ဥက္ခိတ္တကော ပဋိဇာနာတိ။ အာပတ္တိယာ အပ္ပဋိကမ္မေ ဥက္ခိတ္တကော ပဋိဇာနာတိ။ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကော ပဋိဇာနာတိ။ ပဏ္ဍကော ပဋိဇာနာတိ။ ထေယျသံဝါသကော ပဋိဇာနာတိ။ တိတ္ထိယပက္ကန္တကော ပဋိဇာနာတိ။ တိရစ္ဆာနဂတော ပဋိဇာနာတိ။ မာတုဃာတကော ပဋိဇာနာတိ။ ပိတုဃာတကော ပဋိဇာနာတိ။ အရဟန္တဃာတကော ပဋိဇာနာတိ။ ဘိက္ခုနိဒူသကော ပဋိဇာနာတိ။ သံဃဘေဒကော ပဋိဇာနာတိ။ လောဟိတုပ္ပါဒကော ပဋိဇာနာတိ။ ဥဘတောဗျဉ္ဇနကော ပဋိဇာနာတိ၊ အာဟဋာ ဟောတိ ပဝါရဏာ.

ပဝါရဏဟာရကော စေ၊ ဘိက္ခဝေ၊ ဒိန္နာယ ပဝါရဏာယ သံဃပ္ပတ္တော သုတ္တော နာရောစေတိ၊ အာဟဋာ ဟောတိ ပဝါရဏာ. ပဝါရဏဟာရကဿ အနာပတ္တိ. ပဝါရဏဟာရကော စေ၊ ဘိက္ခဝေ၊ ဒိန္နာယ ပဝါရဏာယ သံဃပ္ပတ္တော ပမတ္တော နာရောစေတိ။ပေ။ သမာပန္နော နာရောစေတိ၊ အာဟဋာ ဟောတိ ပဝါရဏာ. ပဝါရဏဟာရကဿ အနာပတ္တိ.

ပဝါရဏဟာရကော စေ၊ ဘိက္ခဝေ၊ ဒိန္နာယ ပဝါရဏာယ သံဃပ္ပတ္တော သဉ္စိစ္စ နာရောစေတိ၊ အာဟဋာ ဟောတိ ပဝါရဏာ. ပဝါရဏဟာရကဿ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ တဒဟု ပဝါရဏာယ ပဝါရဏံ ဒေန္တေန ဆန္ဒမ္ပိ ဒါတုံ၊ သန္တိ သံဃဿ ကရဏီယန္တိ.

ပဝါရဏာဒါနာနုဇာနနာ နိဋ္ဌိတာ.

၁၂၃. ဉာတကာဒိဂ္ဂဟဏကထာ

၂၁၄. တေန ခေါ ပန သမယေန အညတရံ ဘိက္ခုံ တဒဟု ပဝါရဏာယ ဉာတကာ ဂဏှိံသု. ဘဂဝတော ဧတမတ္ထံ အာရောစေသုံ. ဣဓ ပန၊ ဘိက္ခဝေ၊ ဘိက္ခုံ တဒဟု ပဝါရဏာယ ဉာတကာ ဂဏှန္တိ. တေ ဉာတကာ ဘိက္ခူဟိ ဧဝမဿု ဝစနီယာ – ‘‘ဣင်္ဃ၊ တုမှေ အာယသ္မန္တော ဣမံ ဘိက္ခုံ မုဟုတ္တံ မုဉ္စထ၊ ယာဝါယံ ဘိက္ခု ပဝါရေတီ’’တိ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ တေ ဉာတကာ ဘိက္ခူဟိ ဧဝမဿု ဝစနီယာ – ‘‘ဣင်္ဃ၊ တုမှေ အာယသ္မန္တော မုဟုတ္တံ ဧကမန္တံ ဟောထ၊ ယာဝါယံ ဘိက္ခု ပဝါရဏံ ဒေတီ’’တိ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ တေ ဉာတကာ ဘိက္ခူဟိ ဧဝမဿု ဝစနီယာ – ‘‘ဣင်္ဃ၊ တုမှေ အာယသ္မန္တော ဣမံ ဘိက္ခုံ မုဟုတ္တံ နိဿီမံ နေထ၊ ယာဝ သံဃော ပဝါရေတီ’’တိ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ န တွေဝ ဝဂ္ဂေန သံဃေန ပဝါရေတဗ္ဗံ. ပဝါရေယျ စေ၊ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ ဘိက္ခုံ တဒဟု ပဝါရဏာယ ရာဇာနော ဂဏှန္တိ။ပေ။ စောရာ ဂဏှန္တိ ။ ဓုတ္တာ ဂဏှန္တိ။ ဘိက္ခုပစ္စတ္ထိကာ ဂဏှန္တိ. တေ ဘိက္ခုပစ္စတ္ထိကာ ဘိက္ခူဟိ ဧဝမဿု ဝစနီယာ – ‘‘ဣင်္ဃ၊ တုမှေ အာယသ္မန္တော ဣမံ ဘိက္ခုံ မုဟုတ္တံ မုဉ္စထ၊ ယာဝါယံ ဘိက္ခု ပဝါရေတီ’’တိ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ တေ ဘိက္ခုပစ္စတ္ထိကာ ဘိက္ခူဟိ ဧဝမဿု ဝစနီယာ – ‘‘ဣင်္ဃ၊ တုမှေ အာယသ္မန္တော မုဟုတ္တံ ဧကမန္တံ ဟောထ၊ ယာဝါယံ ဘိက္ခု ပဝါရဏံ ဒေတီ’’တိ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ တေ ဘိက္ခုပစ္စတ္ထိကာ ဘိက္ခူဟိ ဧဝမဿု ဝစနီယာ – ‘‘ဣင်္ဃ၊ တုမှေ အာယသ္မန္တော ဣမံ ဘိက္ခုံ မုဟုတ္တံ နိဿီမံ နေထ၊ ယာဝ သံဃော ပဝါရေတီ’’တိ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ န တွေဝ ဝဂ္ဂေန သံဃေန ပဝါရေတဗ္ဗံ. ပဝါရေယျ စေ၊ အာပတ္တိ ဒုက္ကဋဿာတိ.

ဉာတကာဒိဂ္ဂဟဏကထာ နိဋ္ဌိတာ.

၁၂၄. သံဃပဝါရဏာဒိပ္ပဘေဒါ

၂၁၅. တေန ခေါ ပန သမယေန အညတရသ္မိံ အာဝါသေ တဒဟု ပဝါရဏာယ ပဉ္စ ဘိက္ခူ ဝိဟရန္တိ. အထ ခေါ တေသံ ဘိက္ခူနံ ဧတဒဟောသိ – ‘‘ဘဂဝတာ ပညတ္တံ ‘သံဃေန ပဝါရေတဗ္ဗ’န္တိ. မယဉ္စမှာ ပဉ္စ ဇနာ. ကထံ နု ခေါ အမှေဟိ ပဝါရေတဗ္ဗ’’န္တိ? ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ပဉ္စန္နံ သံဃေ ပဝါရေတုန္တိ.

၂၁၆. တေန ခေါ ပန သမယေန အညတရသ္မိံ အာဝါသေ တဒဟု ပဝါရဏာယ စတ္တာရော ဘိက္ခူ ဝိဟရန္တိ. အထ ခေါ တေသံ ဘိက္ခူနံ ဧတဒဟောသိ – ‘‘ဘဂဝတာ အနုညာတံ ပဉ္စန္နံ သံဃေ ပဝါရေတုန္တိ. မယဉ္စမှာ စတ္တာရော ဇနာ. ကထံ နု ခေါ အမှေဟိ ပဝါရေတဗ္ဗ’’န္တိ? ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ စတုန္နံ အညမညံ ပဝါရေတုံ. ဧဝဉ္စ ပန၊ ဘိက္ခဝေ၊ ပဝါရေတဗ္ဗံ. ဗျတ္တေန ဘိက္ခုနာ ပဋိဗလေန တေ ဘိက္ခူ ဉာပေတဗ္ဗာ –

‘‘သုဏန္တု မေ အာယသ္မန္တော. အဇ္ဇ ပဝါရဏာ. ယဒါယသ္မန္တာနံ ပတ္တကလ္လံ၊ မယံ အညမညံ ပဝါရေယျာမာ’’တိ.

ထေရေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ တေ ဘိက္ခူ ဧဝမဿု ဝစနီယာ – ‘‘အဟံ၊ အာဝုသော၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တော အနုကမ္ပံ ဥပါဒါယ. ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ အာဝုသော၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တော အနုကမ္ပံ ဥပါဒါယ. ပဿန္တော ပဋိကရိဿာမီ’’တိ.

နဝကေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ တေ ဘိက္ခူ ဧဝမဿု ဝစနီယာ – ‘‘အဟံ၊ ဘန္တေ၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တော အနုကမ္ပံ ဥပါဒါယ. ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ ဘန္တေ၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တော အနုကမ္ပံ ဥပါဒါယ. ပဿန္တော ပဋိကရိဿာမီ’’တိ.

တေန ခေါ ပန သမယေန အညတရသ္မိံ အာဝါသေ တဒဟု ပဝါရဏာယ တယော ဘိက္ခူ ဝိဟရန္တိ. အထ ခေါ တေသံ ဘိက္ခူနံ ဧတဒဟောသိ – ‘‘ဘဂဝတာ အနုညာတံ ပဉ္စန္နံ သံဃေ ပဝါရေတုံ၊ စတုန္နံ အညမညံ ပဝါရေတုံ. မယဉ္စမှာ တယော ဇနာ. ကထံ နု ခေါ အမှေဟိ ပဝါရေတဗ္ဗ’’န္တိ? ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ တိဏ္ဏံ အညမညံ ပဝါရေတုံ. ဧဝဉ္စ ပန၊ ဘိက္ခဝေ၊ ပဝါရေတဗ္ဗံ. ဗျတ္တေန ဘိက္ခုနာ ပဋိဗလေန တေ ဘိက္ခူ ဉာပေတဗ္ဗာ –

‘‘သုဏန္တု မေ အာယသ္မန္တာ. အဇ္ဇ ပဝါရဏာ. ယဒါယသ္မန္တာနံ ပတ္တကလ္လံ၊ မယံ အညမညံ ပဝါရေယျာမာ’’တိ.

ထေရေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ တေ ဘိက္ခူ ဧဝမဿု ဝစနီယာ – ‘‘အဟံ၊ အာဝုသော၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တာ အနုကမ္ပံ ဥပါဒါယ. ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ အာဝုသော၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တာ အနုကမ္ပံ ဥပါဒါယ. ပဿန္တော ပဋိကရိဿာမီ’’တိ.

နဝကေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ တေ ဘိက္ခူ ဧဝမဿု ဝစနီယာ – ‘‘အဟံ၊ ဘန္တေ၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တာ အနုကမ္ပံ ဥပါဒါယ. ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ ဘန္တေ၊ အာယသ္မန္တေ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒန္တု မံ အာယသ္မန္တာ အနုကမ္ပံ ဥပါဒါယ. ပဿန္တော ပဋိကရိဿာမီ’’တိ.

၂၁၇. တေန ခေါ ပန သမယေန အညတရသ္မိံ အာဝါသေ တဒဟု ပဝါရဏာယ ဒွေ ဘိက္ခူ ဝိဟရန္တိ. အထ ခေါ တေသံ ဘိက္ခူနံ ဧတဒဟောသိ – ‘‘ဘဂဝတာ အနုညာတံ ပဉ္စန္နံ သံဃေ ပဝါရေတုံ၊ စတုန္နံ အညမညံ ပဝါရေတုံ၊ တိဏ္ဏံ အညမညံ ပဝါရေတုံ. မယဉ္စမှာ ဒွေ ဇနာ. ကထံ နု ခေါ အမှေဟိ ပဝါရေတဗ္ဗ’’န္တိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဒွိန္နံ အညမညံ ပဝါရေတုံ. ဧဝဉ္စ ပန၊ ဘိက္ခဝေ၊ ပဝါရေတဗ္ဗံ. ထေရေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ နဝေါ ဘိက္ခု ဧဝမဿ ဝစနီယော – ‘‘အဟံ၊ အာဝုသော၊ အာယသ္မန္တံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒတု မံ အာယသ္မာ အနုကမ္ပံ ဥပါဒါယ. ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ အာဝုသော၊ အာယသ္မန္တံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒတု မံ အာယသ္မာ အနုကမ္ပံ ဥပါဒါယ. ပဿန္တော ပဋိကရိဿာမီ’’တိ.

နဝကေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ထေရော ဘိက္ခု ဧဝမဿ ဝစနီယော – ‘‘အဟံ၊ ဘန္တေ၊ အာယသ္မန္တံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒတု မံ အာယသ္မာ အနုကမ္ပံ ဥပါဒါယ. ပဿန္တော ပဋိကရိဿာမိ. ဒုတိယမ္ပိ။ပေ။ တတိယမ္ပိ အဟံ၊ ဘန္တေ၊ အာယသ္မန္တံ ပဝါရေမိ ဒိဋ္ဌေန ဝါ သုတေန ဝါ ပရိသင်္ကာယ ဝါ. ဝဒတု မံ အာယသ္မာ အနုကမ္ပံ ဥပါဒါယ. ပဿန္တော ပဋိကရိဿာမီ’’တိ.

၂၁၈. တေန ခေါ ပန သမယေန အညတရသ္မိံ အာဝါသေ တဒဟု ပဝါရဏာယ ဧကော ဘိက္ခု ဝိဟရတိ. အထ ခေါ တဿ ဘိက္ခုနော ဧတဒဟောသိ – ‘‘ဘဂဝတာ အနုညာတံ ပဉ္စန္နံ သံဃေ ပဝါရေတုံ၊ စတုန္နံ အညမညံ ပဝါရေတုံ၊ တိဏ္ဏံ အညမညံ ပဝါရေတုံ၊ ဒွိန္နံ အညမညံ ပဝါရေတုံ. အဟဉ္စမှိ ဧကကော. ကထံ နု ခေါ မယာ ပဝါရေတဗ္ဗ’’န္တိ? ဘဂဝတော ဧတမတ္ထံ အာရောစေသုံ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ ဧကော ဘိက္ခု ဝိဟရတိ. တေန၊ ဘိက္ခဝေ၊ ဘိက္ခုနာ ယတ္ထ ဘိက္ခူ ပဋိက္ကမန္တိ ဥပဋ္ဌာနသာလာယ ဝါ မဏ္ဍပေ ဝါ ရုက္ခမူလေ ဝါ၊ သော ဒေသော သမ္မဇ္ဇိတွာ ပါနီယံ ပရိဘောဇနီယံ ဥပဋ္ဌာပေတွာ အာသနံ ပညပေတွာ ပဒီပံ ကတွာ နိသီဒိတဗ္ဗံ. သစေ အညေ ဘိက္ခူ အာဂစ္ဆန္တိ၊ တေဟိ သဒ္ဓိံ ပဝါရေတဗ္ဗံ၊ နော စေ အာဂစ္ဆန္တိ၊ ‘အဇ္ဇ မေ ပဝါရဏာ’တိ အဓိဋ္ဌာတဗ္ဗံ. နော စေ အဓိဋ္ဌေယျ၊ အာပတ္တိ ဒုက္ကဋဿ.

တတြ၊ ဘိက္ခဝေ၊ ယတ္ထ ပဉ္စ ဘိက္ခူ ဝိဟရန္တိ၊ န ဧကဿ ပဝါရဏံ အာဟရိတွာ

စတူဟိ သံဃေ ပဝါရေတဗ္ဗံ. ပဝါရေယျုံ စေ၊ အာပတ္တိ ဒုက္ကဋဿ. တတြ၊ ဘိက္ခဝေ၊ ယတ္ထ စတ္တာရော ဘိက္ခူ ဝိဟရန္တိ၊ န ဧကဿ ပဝါရဏံ အာဟရိတွာ တီဟိ အညမညံ ပဝါရေတဗ္ဗံ. ပဝါရေယျုံ စေ၊ အာပတ္တိ ဒုက္ကဋဿ. တတြ၊ ဘိက္ခဝေ၊ ယတ္ထ တယော ဘိက္ခူ ဝိဟရန္တိ၊ န ဧကဿ ပဝါရဏံ အာဟရိတွာ ဒွီဟိ အညမညံ ပဝါရေတဗ္ဗံ. ပဝါရေယျုံ စေ၊ အာပတ္တိ ဒုက္ကဋဿ. တတြ၊ ဘိက္ခဝေ၊ ယတ္ထ ဒွေ ဘိက္ခူ ဝိဟရန္တိ၊ န ဧကဿ ပဝါရဏံ အာဟရိတွာ ဧကေန အဓိဋ္ဌာတဗ္ဗံ. အဓိဋ္ဌေယျ စေ၊ အာပတ္တိ ဒုက္ကဋဿာတိ.

သံဃပဝါရဏာဒိပ္ပဘေဒါ နိဋ္ဌိတာ.

၁၂၅. အာပတ္တိပဋိကမ္မဝိဓိ

၂၁၉. တေန ခေါ ပန သမယေန အညတရော ဘိက္ခု တဒဟု ပဝါရဏာယ အာပတ္တိံ အာပန္နော ဟောတိ. အထ ခေါ တဿ ဘိက္ခုနော ဧတဒဟောသိ – ‘‘ဘဂဝတာ ပညတ္တံ ‘န သာပတ္တိကေန ပဝါရေတဗ္ဗ’န္တိ. အဟဉ္စမှိ အာပတ္တိံ အာပန္နော. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ [အာရောစေသိ (က.)].

ဣဓ ပန၊ ဘိက္ခဝေ၊ ဘိက္ခု တဒဟု ပဝါရဏာယ အာပတ္တိံ အာပန္နော ဟောတိ. တေန၊ ဘိက္ခဝေ၊ ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ၊ အာဝုသော၊ ဣတ္ထန္နာမံ အာပတ္တိံ အာပန္နော၊ တံ ပဋိဒေသေမီ’’တိ. တေန ဝတ္တဗ္ဗော – ‘‘ပဿသီ’’တိ. အာမ ပဿာမီတိ. အာယတိံ သံဝရေယျာသီတိ.

ဣဓ ပန၊ ဘိက္ခဝေ၊ ဘိက္ခု တဒဟု ပဝါရဏာယ အာပတ္တိယာ ဝေမတိကော ဟောတိ. တေန၊ ဘိက္ခဝေ၊ ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ၊ အာဝုသော၊ ဣတ္ထန္နာမာယ အာပတ္တိယာ ဝေမတိကော၊ ယဒါ နိဗ္ဗေမတိကော ဘဝိဿာမိ တဒါ တံ အာပတ္တိံ ပဋိကရိဿာမီ’’တိ ဝတွာ ပဝါရေတဗ္ဗံ၊ န တွေဝ တပ္ပစ္စယာ ပဝါရဏာယ အန္တရာယော ကာတဗ္ဗောတိ.

အာပတ္တိပဋိကမ္မဝိဓိ နိဋ္ဌိတာ.

၁၂၆. အာပတ္တိအာဝိကရဏဝိဓိ

၂၂၀. တေန ခေါ ပန သမယေန အညတရော ဘိက္ခု ပဝါရယမာနော အာပတ္တိံ သရတိ. အထ ခေါ တဿ ဘိက္ခုနော ဧတဒဟောသိ – ‘‘ဘဂဝတာ ပညတ္တံ ‘န သာပတ္တိကေန ပဝါရေတဗ္ဗ’န္တိ. အဟဉ္စမှိ အာပတ္တိံ အာပန္နော. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ.

ဣဓ ပန၊ ဘိက္ခဝေ၊ ဘိက္ခု ပဝါရယမာနော အာပတ္တိံ သရတိ. တေန၊ ဘိက္ခဝေ၊ ဘိက္ခုနာ သာမန္တော ဘိက္ခု ဧဝမဿ ဝစနီယော – ‘‘အဟံ၊ အာဝုသော၊ ဣတ္ထန္နာမံ အာပတ္တိံ အာပန္နော. ဣတော ဝုဋ္ဌဟိတွာ တံ အာပတ္တိံ ပဋိကရိဿာမီ’’တိ ဝတွာ ပဝါရေတဗ္ဗံ၊ န တွေဝ တပ္ပစ္စယာ ပဝါရဏာယ အန္တရာယော ကာတဗ္ဗော.

ဣဓ ပန၊ ဘိက္ခဝေ၊ ဘိက္ခု ပဝါရယမာနော အာပတ္တိယာ ဝေမတိကော ဟောတိ. တေန၊ ဘိက္ခဝေ၊

ဘိက္ခုနာ သာမန္တော ဘိက္ခု ဧဝမဿ ဝစနီယော – ‘‘အဟံ၊ အာဝုသော၊ ဣတ္ထန္နာမာယ အာပတ္တိယာ ဝေမတိကော၊ ယဒါ နိဗ္ဗေမတိကော ဘဝိဿာမိ တဒါ တံ အာပတ္တိံ ပဋိကရိဿာမီ’’တိ ဝတွာ ပဝါရေတဗ္ဗံ၊ န တွေဝ တပ္ပစ္စယာ ပဝါရဏာယ အန္တရာယော ကာတဗ္ဗောတိ.

အာပတ္တိ အာဝိကရဏဝိဓိ နိဋ္ဌိတာ.

၁၂၇. သဘာဂါပတ္တိပဋိကမ္မဝိဓိ

၂၂၁. တေန ခေါ ပန သမယေန အညတရသ္မိံ အာဝါသေ တဒဟု ပဝါရဏာယ သဗ္ဗော သံဃော သဘာဂံ အာပတ္တိံ အာပန္နော ဟောတိ. အထ ခေါ တေသံ ဘိက္ခူနံ ဧတဒဟောသိ – ‘‘ဘဂဝတာ ပညတ္တံ ‘န သဘာဂါ အာပတ္တိ ဒေသေတဗ္ဗာ၊ န သဘာဂါ အာပတ္တိ ပဋိဂ္ဂဟေတဗ္ဗာ’တိ. အယဉ္စ သဗ္ဗော သံဃော သဘာဂံ အာပတ္တိံ အာပန္နော. ကထံ နု ခေါ အမှေဟိ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သဗ္ဗော သံဃော သဘာဂံ အာပတ္တိံ အာပန္နော ဟောတိ. တေဟိ၊ ဘိက္ခဝေ၊ ဘိက္ခူဟိ ဧကော ဘိက္ခု သာမန္တာ အာဝါသာ သဇ္ဇုကံ ပါဟေတဗ္ဗော – ဂစ္ဆာဝုသော၊ တံ အာပတ္တိံ ပဋိကရိတွာ အာဂစ္ဆ၊ မယံ တေ သန္တိကေ တံ အာပတ္တိံ ပဋိကရိဿာမာတိ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. အယံ သဗ္ဗော သံဃော သဘာဂံ အာပတ္တိံ အာပန္နော. ယဒါ အညံ ဘိက္ခုံ သုဒ္ဓံ အနာပတ္တိကံ ပဿိဿတိ တဒါ တဿ သန္တိကေ တံ အာပတ္တိံ ပဋိကရိဿတီ’’တိ ဝတွာ ပဝါရေတဗ္ဗံ၊ န တွေဝ တပ္ပစ္စယာ ပဝါရဏာယ အန္တရာယော ကာတဗ္ဗော.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သဗ္ဗော သံဃော သဘာဂါယ အာပတ္တိယာ ဝေမတိကော ဟောတိ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. အယံ သဗ္ဗော သံဃော သဘာဂါယ အာပတ္တိယာ ဝေမတိကော. ယဒါ နိဗ္ဗေမတိကော ဘဝိဿတိ တဒါ တံ အာပတ္တိံ ပဋိကရိဿတီ’’တိ ဝတွာ၊ ပဝါရေတဗ္ဗံ၊ န တွေဝ တပ္ပစ္စယာ ပဝါရဏာယ အန္တရာယော ကာတဗ္ဗောတိ.

သဘာဂါပတ္တိပဋိကမ္မဝိဓိ နိဋ္ဌိတာ.

ပဌမဘာဏဝါရော နိဋ္ဌိတော.

၁၂၈. အနာပတ္တိပန္နရသကံ

၂၂၂. တေန ခေါ ပန သမယေန အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတိံသု၊ ပဉ္စ ဝါ အတိရေကာ ဝါ. တေ န ဇာနိံသု ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေသုံ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆိံသု ဗဟုတရာ. ဘဂဝတော ဧတမတ္ထံ အာရောစေသုံ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ အဝသေသေဟိ ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ အဝသေသေဟိ ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ၊ အဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ၊ အဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ၊ အဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ၊ ဧကစ္စာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ၊ ဧကစ္စာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ၊ ဧကစ္စာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ၊ သဗ္ဗာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ၊ သဗ္ဗာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အနာပတ္တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ သမဂ္ဂသညိနော ပဝါရေန္တိ. တေဟိ ပဝါရိတမတ္တေ၊ သဗ္ဗာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အနာပတ္တိ.

အနာပတ္တိပန္နရသကံ နိဋ္ဌိတံ.

၁၂၉. ဝဂ္ဂါဝဂ္ဂသညီပန္နရသကံ

၂၂၃. ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ ဝဂ္ဂသညိနော ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ ဝဂ္ဂသညိနော ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ အဝသေသေဟိ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ ဝဂ္ဂသညိနော ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ အဝသေသေဟိ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ဓမ္မသညိနော ဝိနယသညိနော ဝဂ္ဂါ ဝဂ္ဂသညိနော ပဝါရေန္တိ. တေဟိ ပဝါရိတမတ္တေ၊။ပေ။ အဝုဋ္ဌိတာယ ပရိသာယ။ပေ။ ဧကစ္စာယ ဝုဋ္ဌိတာယ ပရိသာယ။ပေ။ သဗ္ဗာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ။ပေ။ သမသမာ။ပေ။ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဝဂ္ဂါဝဂ္ဂသညီပန္နရသကံ နိဋ္ဌိတံ.

၁၃၀. ဝေမတိကပန္နရသကံ

၂၂၄. ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘ကပ္ပတိ နု ခေါ အမှာကံ ပဝါရေတုံ၊ န နု ခေါ ကပ္ပတီ’’တိ ဝေမတိကာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘ကပ္ပတိ နု ခေါ အမှာကံ ပဝါရေတုံ၊ န နု ခေါ ကပ္ပတီ’’တိ ဝေမတိကာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ အဝသေသေဟိ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘ကပ္ပတိ နု ခေါ အမှာကံ ပဝါရေတုံ၊ န နု ခေါ ကပ္ပတီ’’တိ ဝေမတိကာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ အဝသေသေဟိ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘ကပ္ပတိ နု ခေါ အမှာကံ ပဝါရေတုံ၊ န နု ခေါ ကပ္ပတီ’’တိ ဝေမတိကာ ပဝါရေန္တိ. တေဟိ ပဝါရိတမတ္တေ။ပေ။ အဝုဋ္ဌိတာယ ပရိသာယ။ပေ။ ဧကစ္စာယ ဝုဋ္ဌိတာယ ပရိသာယ။ပေ။ သဗ္ဗာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ။ပေ။ သမသမာ။ပေ။ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဝေမတိကပန္နရသကံ နိဋ္ဌိတံ.

၁၃၁. ကုက္ကုစ္စပကတပန္နရသကံ

၂၂၅. ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘ကပ္ပတေဝ အမှာကံ ပဝါရေတုံ၊ နာမှာကံ န ကပ္ပတီ’’တိ ကုက္ကုစ္စပကတာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘ကပ္ပတေဝ အမှာကံ ပဝါရေတုံ၊ နာမှာကံ န ကပ္ပတီ’’တိ ကုက္ကုစ္စပကတာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ အဝသေသေဟိ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ အညရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘ကပ္ပတေဝ အမှာကံ ပဝါရေတုံ၊ နာမှာကံ န ကပ္ပတီ’’တိ ကုက္ကုစ္စပကတာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ အဝသေသေဟိ [အဝသေသေဟိ တေသံ သန္တိကေ (က.)] ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘ကပ္ပတေဝ အမှာကံ ပဝါရေတုံ၊ နာမှာကံ န ကပ္ပတီ’’တိ ကုက္ကုစ္စပကတာ ပဝါရေန္တိ. တေဟိ ပဝါရိတမတ္တေ၊။ပေ။ အဝုဋ္ဌိတာယ ပရိသာယ။ပေ။ ဧကစ္စာယ ဝုဋ္ဌိတာယ ပရိသာယ။ပေ။ သဗ္ဗာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ။ပေ။ သမသမာ။ပေ။ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ဒုက္ကဋဿ.

ကုက္ကုစ္စပကတပန္နရသကံ နိဋ္ဌိတံ.

၁၃၂. ဘေဒပုရေက္ခာရပန္နရသကံ

၂၂၆. ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ အဝသေသေဟိ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ – ဘေဒပုရေက္ခာရာ ပဝါရေန္တိ. တေဟိ ပဝါရိယမာနေ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ အဝသေသေဟိ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ – ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ၊ တေဟိ ဘိက္ခဝေ ဘိက္ခူဟိ ပုန ပဝါရေတဗ္ဗံ၊ ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ၊ အဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ၊ အဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ၊ အဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ၊ ဧကစ္စာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ၊ ဧကစ္စာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ၊ ဧကစ္စာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ၊ သဗ္ဗာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ဗဟုတရာ. တေဟိ၊ ဘိက္ခဝေ၊ ဘိက္ခူဟိ ပုန ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ၊ သဗ္ဗာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ သမသမာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ

ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ ဇာနန္တိ ‘‘အတ္ထညေ အာဝါသိကာ ဘိက္ခူ အနာဂတာ’’တိ. တေ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. တေဟိ ပဝါရိတမတ္တေ၊ သဗ္ဗာယ ဝုဋ္ဌိတာယ ပရိသာယ၊ အထညေ အာဝါသိကာ ဘိက္ခူ အာဂစ္ဆန္တိ ထောကတရာ. ပဝါရိတာ သုပ္ပဝါရိတာ၊ တေသံ သန္တိကေ ပဝါရေတဗ္ဗံ. ပဝါရိတာနံ အာပတ္တိ ထုလ္လစ္စယဿ.

ဘေဒပုရေက္ခာရပန္နရသကံ နိဋ္ဌိတံ.

ပဉ္စဝီသတ္တိကာ နိဋ္ဌိတာ.

၁၃၃. သီမောတ္တန္တိကပေယျာလံ

၂၂၇. ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ သမ္ဗဟုလာ အာဝါသိကာ ဘိက္ခူ သန္နိပတန္တိ၊ ပဉ္စ ဝါ အတိရေကာ ဝါ. တေ န ဇာနန္တိ ‘‘အညေ အာဝါသိကာ ဘိက္ခူ အန္တောသီမံ ဩက္ကမန္တီ’’တိ။ပေ။ တေ န ဇာနန္တိ ‘‘အညေ အာဝါသိကာ ဘိက္ခူ အန္တောသီမံ ဩက္ကန္တာ’’တိ။ပေ။ တေ န ပဿန္တိ အညေ အာဝါသိကေ ဘိက္ခူ အန္တောသီမံ ဩက္ကမန္တေ။ပေ။ တေ န ပဿန္တိ အညေ အာဝါသိကေ ဘိက္ခူ အန္တောသီမံ ဩက္ကန္တေ။ပေ။ တေ န သုဏန္တိ ‘‘အညေ အာဝါသိကာ ဘိက္ခူ အန္တောသီမံ ဩက္ကမန္တီ’’တိ။ပေ။ တေ န သုဏန္တိ ‘‘အညေ အာဝါသိကာ ဘိက္ခူ အန္တောသီမံ ဩက္ကန္တာ’’တိ။ပေ။.

အာဝါသိကေန အာဝါသိကာ ဧကသတပဉ္စသတ္တတိ တိကနယတော၊ အာဝါသိကေန အာဂန္တုကာ၊ အာဂန္တုကေန အာဝါသိကာ၊ အာဂန္တုကေန အာဂန္တုကာ၊ ပေယျာလမုခေန သတ္တ တိကသတာနိ ဟောန္တိ.

သီမောက္ကန္တိကပေယျာလံ နိဋ္ဌိတံ.

၁၃၄. ဒိဝသနာနတ္တံ

၂၂၈. ဣဓ ပန၊ ဘိက္ခဝေ၊ အာဝါသိကာနံ ဘိက္ခူနံ စာတုဒ္ဒသော ဟောတိ၊ အာဂန္တုကာနံ ပန္နရသော. သစေ အာဝါသိကာ ဗဟုတရာ ဟောန္တိ၊ အာဂန္တုကေဟိ အာဝါသိကာနံ အနုဝတ္တိတဗ္ဗံ. သစေ သမသမာ ဟောန္တိ၊ အာဂန္တုကေဟိ အာဝါသိကာနံ အနုဝတ္တိတဗ္ဗံ. သစေ အာဂန္တုကာ ဗဟုတရာ ဟောန္တိ၊ အာဝါသိကေဟိ အာဂန္တုကာနံ အနုဝတ္တိတဗ္ဗံ.

ဣဓ ပန၊ ဘိက္ခဝေ၊ အာဝါသိကာနံ ဘိက္ခူနံ ပန္နရသော ဟောတိ၊ အာဂန္တုကာနံ စာတုဒ္ဒသော. သစေ အာဝါသိကာ ဗဟုတရာ ဟောန္တိ၊ အာဂန္တုကေဟိ အာဝါသိကာနံ အနုဝတ္တိတဗ္ဗံ. သစေ သမသမာ ဟောန္တိ၊ အာဂန္တုကေဟိ အာဝါသိကာနံ အနုဝတ္တိတဗ္ဗံ. သစေ အာဂန္တုကာ ဗဟုတရာ ဟောန္တိ၊ အာဝါသိကေဟိ အာဂန္တုကာနံ အနုဝတ္တိတဗ္ဗံ.

ဣဓ ပန၊ ဘိက္ခဝေ၊ အာဝါသိကာနံ ဘိက္ခူနံ ပါဋိပဒေါ ဟောတိ၊ အာဂန္တုကာနံ ပန္နရသော. သစေ အာဝါသိကာ ဗဟုတရာ ဟောန္တိ၊ အာဝါသိကေဟိ အာဂန္တုကာနံ နာကာမာ ဒါတဗ္ဗာ သာမဂ္ဂီ၊ အာဂန္တုကေဟိ နိဿီမံ ဂန္တွာ ပဝါရေတဗ္ဗံ. သစေ သမသမာ ဟောန္တိ၊ အာဝါသိကေဟိ အာဂန္တုကာနံ နာကာမာ ဒါတဗ္ဗာ သာမဂ္ဂီ၊ အာဂန္တုကေဟိ နိဿီမံ ဂန္တွာ ပဝါရေတဗ္ဗံ. သစေ အာဂန္တုကာ ဗဟုတရာ ဟောန္တိ၊ အာဝါသိကေဟိ အာဂန္တုကာနံ သာမဂ္ဂီ ဝါ ဒါတဗ္ဗာ၊ နိဿီမံ ဝါ ဂန္တဗ္ဗံ.

ဣဓ ပန၊ ဘိက္ခဝေ၊ အာဝါသိကာနံ ဘိက္ခူနံ ပန္နရသော ဟောတိ၊ အာဂန္တုကာနံ ပါဋိပဒေါ. သစေ အာဝါသိကာ ဗဟုတရာ ဟောန္တိ၊ အာဂန္တုကေဟိ အာဝါသိကာနံ သာမဂ္ဂီ ဝါ ဒါတဗ္ဗာ၊ နိဿီမံ ဝါ ဂန္တဗ္ဗံ. သစေ သမသမာ ဟောန္တိ၊ အာဂန္တုကေဟိ အာဝါသိကာနံ သာမဂ္ဂီ ဝါ ဒါတဗ္ဗာ၊ နိဿီမံ ဝါ ဂန္တဗ္ဗံ. သစေ အာဂန္တုကာ ဗဟုတရာ ဟောန္တိ၊ အာဂန္တုကေဟိ အာဝါသိကာနံ နာကာမာ ဒါတဗ္ဗာ သာမဂ္ဂီ၊ အာဝါသိကေဟိ နိဿီမံ ဂန္တွာ ပဝါရေတဗ္ဗံ.

ဒိဝသနာနတ္တံ နိဋ္ဌိတံ.

၁၃၅. လိင်္ဂါဒိဒဿနံ

၂၂၉. ဣဓ ပန၊ ဘိက္ခဝေ၊ အာဂန္တုကာ ဘိက္ခူ ပဿန္တိ အာဝါသိကာနံ ဘိက္ခူနံ အာဝါသိကာကာရံ၊ အာဝါသိကလိင်္ဂံ၊ အာဝါသိကနိမိတ္တံ၊ အာဝါသိကုဒ္ဒေသံ၊ သုပ္ပညတ္တံ မဉ္စပီဌံ ဘိသိဗိဗ္ဗောဟနံ၊ ပါနီယံ ပရိဘောဇနီယံ သပဋ္ဌိတံ၊ ပရိဝေဏံ သုသမ္မဋ္ဌံ၊ ပဿိတွာ ဝေမတိကာ ဟောန္တိ – ‘‘အတ္ထိ နု ခေါ အာဝါသိကာ ဘိက္ခူ၊ နတ္ထိ နု ခေါ’’တိ. တေ ဝေမတိကာ န ဝိစိနန္တိ၊ အဝိစိနိတွာ ပဝါရေန္တိ. အာပတ္တိ ဒုက္ကဋဿ။ပေ။ တေ ဝေမတိကာ ဝိစိနန္တိ၊ ဝိစိနိတွာ န ပဿန္တိ၊ အပဿိတွာ ပဝါရေန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ဧကတော ပဝါရေန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ပါဋေက္ကံ ပဝါရေန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ – ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ – ဘေဒပုရေက္ခာရာ ပဝါရေန္တိ. အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အာဂန္တုကာ ဘိက္ခူ သုဏန္တိ အာဝါသိကာနံ ဘိက္ခူနံ အာဝါသိကာကာရံ၊ အာဝါသိကလိင်္ဂံ၊ အာဝါသိကနိမိတ္တံ၊ အာဝါသိကုဒ္ဒေသံ၊ စင်္ကမန္တာနံ ပဒသဒ္ဒံ၊ သဇ္ဈာယသဒ္ဒံ၊ ဥက္ကာသိတသဒ္ဒံ၊ ခိပိတသဒ္ဒံ၊ သုတွာ ဝေမတိကာ ဟောန္တိ – ‘‘အတ္ထိ နု ခေါ အာဝါသိကာ ဘိက္ခူ၊ နတ္ထိ နု ခေါ’’တိ. တေ ဝေမတိကာ န ဝိစိနန္တိ၊ အဝိစိနိတွာ ပဝါရေန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ န ပဿန္တိ၊ အပဿိတွာ ပဝါရေန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ဧကတော ပဝါရေန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ပါဋေက္ကံ ပဝါရေန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ ဘေဒပုရေက္ခာရာ ပဝါရေန္တိ. အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အာဝါသိကာ ဘိက္ခူ ပဿန္တိ အာဂန္တုကာနံ ဘိက္ခူနံ အာဂန္တုကာကာရံ၊ အာဂန္တုကလိင်္ဂံ၊ အာဂန္တုကနိမိတ္တံ၊ အာဂန္တုကုဒ္ဒေသံ၊ အညာတကံ ပတ္တံ၊ အညာတကံ စီဝရံ၊ အညာတကံ နိသီဒနံ၊ ပါဒါနံ ဓောတံ၊ ဥဒကနိဿေကံ၊ ပဿိတွာ ဝေမတိကာ ဟောန္တိ – ‘‘အတ္ထိ နု ခေါ အာဂန္တုကာ ဘိက္ခူ၊ နတ္ထိ နု ခေါ’’တိ. တေ ဝေမတိကာ န ဝိစိနန္တိ၊ အဝိစိနိတွာ ပဝါရေန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ န ပဿန္တိ၊ အပဿိတွာ ပဝါရေန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ဧကတော ပဝါရေန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ပါဋေက္ကံ ပဝါရေန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ – နဿန္တေတေ၊ ဝိနဿန္တေတေ၊ ကော တေဟိ အတ္ထောတိ – ဘေဒပုရေက္ခာရာ ပဝါရေန္တိ. အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အာဝါသိကာ ဘိက္ခူ သုဏန္တိ အာဂန္တုကာနံ ဘိက္ခူနံ အာဂန္တုကာကာရံ၊

အာဂန္တုကလိင်္ဂံ၊ အာဂန္တုကနိမိတ္တံ၊ အာဂန္တုကုဒ္ဒေသံ၊ အာဂစ္ဆန္တာနံ ပဒသဒ္ဒံ၊ ဥပါဟနပပ္ဖေါဋနသဒ္ဒံ၊ ဥက္ကာသိတသဒ္ဒံ၊ ခိပိတသဒ္ဒံ၊ သုတွာ ဝေမတိကာ ဟောန္တိ – ‘‘အတ္ထိ နု ခေါ အာဂန္တုကာ ဘိက္ခူ၊ နတ္ထိ နု ခေါ’’တိ. တေ ဝေမတိကာ န ဝိစိနန္တိ၊ အဝိစိနိတွာ ပဝါရေန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ န ပဿန္တိ၊ အပဿိတွာ ပဝါရေန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ဧကတော ပဝါရေန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ပါဋေက္ကံ ပဝါရေန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ – နဿန္တေတေ၊ ဝိနဿန္တေတေ၊ ကော တေဟိ အတ္ထောတိ – ဘေဒပုရေက္ခာရာ ပဝါရေန္တိ. အာပတ္တိ ထုလ္လစ္စယဿ.

လိင်္ဂါဒိဒဿနံ နိဋ္ဌိတံ.

၁၃၆. နာနာသံဝါသကာဒီဟိ ပဝါရဏာ

၂၃၀. ဣဓ ပန၊ ဘိက္ခဝေ၊ အာဂန္တုကာ ဘိက္ခူ ပဿန္တိ အာဝါသိကေ ဘိက္ခူ နာနာသံဝါသကေ. တေ သမာနသံဝါသကဒိဋ္ဌိံ ပဋိလဘန္တိ၊ သမာနသံဝါသကဒိဋ္ဌိံ ပဋိလဘိတွာ န ပုစ္ဆန္တိ၊ အပုစ္ဆိတွာ ဧကတော ပဝါရေန္တိ. အနာပတ္တိ. တေ ပုစ္ဆန္တိ၊ ပုစ္ဆိတွာ နာဘိဝိတရန္တိ၊ အနဘိဝိတရိတွာ ဧကတော ပဝါရေန္တိ. အာပတ္တိ ဒုက္ကဋဿ. တေ ပုစ္ဆန္တိ၊ ပုစ္ဆိတွာ နာဘိဝိတရန္တိ၊ အနဘိဝိတရိတွာ ပါဋေက္ကံ ပဝါရေန္တိ. အနာပတ္တိ.

ဣဓ ပန၊ ဘိက္ခဝေ၊ အာဂန္တုကာ ဘိက္ခူ ပဿန္တိ အာဝါသိကေ ဘိက္ခူ သမာနသံဝါသကေ. တေ နာနာသံဝါသကဒိဋ္ဌိံ ပဋိလဘန္တိ၊ နာနာသံဝါသကဒိဋ္ဌိံ ပဋိလဘိတွာ န ပုစ္ဆန္တိ၊ အပုစ္ဆိတွာ ဧကတော ပဝါရေန္တိ. အာပတ္တိ ဒုက္ကဋဿ. တေ ပုစ္ဆန္တိ၊ ပုစ္ဆိတွာ အဘိဝိတရန္တိ၊ အဘိဝိတရိတွာ ပါဋေက္ကံ ပဝါရေန္တိ. အာပတ္တိ ဒုက္ကဋဿ. တေ ပုစ္ဆန္တိ၊ ပုစ္ဆိတွာ အဘိဝိတရန္တိ၊ အဘိဝိတရိတွာ ဧကတော ပဝါရေန္တိ. အနာပတ္တိ.

ဣဓ ပန၊ ဘိက္ခဝေ၊ အာဝါသိကာ ဘိက္ခူ ပဿန္တိ အာဂန္တုကေ ဘိက္ခူ နာနာသံဝါသကေ. တေ သမာနသံဝါသကဒိဋ္ဌိံ ပဋိလဘန္တိ၊ သမာနသံဝါသကဒိဋ္ဌိံ ပဋိလဘိတွာ န ပုစ္ဆန္တိ၊ အပုစ္ဆိတွာ ဧကတော ပဝါရေန္တိ. အနာပတ္တိ. တေ ပုစ္ဆန္တိ၊ ပုစ္ဆိတွာ နာဘိဝိတရန္တိ၊ အနဘိဝိတရိတွာ ဧကတော ပဝါရေန္တိ. အာပတ္တိ ဒုက္ကဋဿ. တေ ပုစ္ဆန္တိ၊ ပုစ္ဆိတွာ နာဘိဝိတရန္တိ၊ အနဘိဝိတရိတွာ ပါဋေက္ကံ ပဝါရေန္တိ. အနာပတ္တိ.

ဣဓ ပန၊ ဘိက္ခဝေ၊ အာဝါသိကာ ဘိက္ခူ ပဿန္တိ အာဂန္တုကေ ဘိက္ခူ သမာနသံဝါသကေ. တေ နာနာသံဝါသကဒိဋ္ဌိံ ပဋိလဘန္တိ၊ နာနာသံဝါသကဒိဋ္ဌိံ ပဋိလဘိတွာ န ပုစ္ဆန္တိ၊ အပုစ္ဆိတွာ ဧကတော ပဝါရေန္တိ. အာပတ္တိ ဒုက္ကဋဿ. တေ ပုစ္ဆန္တိ၊ ပုစ္ဆိတွာ အဘိဝိတရန္တိ၊ အဘိဝိတရိတွာ ပါဋေက္ကံ ပဝါရေန္တိ. အာပတ္တိ ဒုက္ကဋဿ. တေ ပုစ္ဆန္တိ၊ ပုစ္ဆိတွာ အဘိဝိတရန္တိ၊ အဘိဝိတရိတွာ ဧကတော ပဝါရေန္တိ. အနာပတ္တိ.

နာနာသံဝါသကာဒီဟိ ပဝါရဏာ နိဋ္ဌိတာ.

၁၃၇. န ဂန္တဗ္ဗဝါရော

၂၃၁. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ သံဃေန၊ အညတြ အန္တရာယာ.

န၊ ဘိက္ခဝေ၊ တဒဟု ပဝါရဏာယ သဘိက္ခုကာ အနာဝါသာ အဘိက္ခုကော အာဝါသော ဂန္တဗ္ဗော၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အနာဝါသာ အဘိက္ခုကော အနာဝါသော ဂန္တဗ္ဗော၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အနာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ သံဃေန၊ အညတြ အန္တရာယာ.

န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဂန္တဗ္ဗော၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အနာဝါသော ဂန္တဗ္ဗော၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ သံဃေန၊ အညတြ အန္တရာယာ.

န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ သဘိက္ခုကော အာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ သဘိက္ခုကော အနာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ.

န၊ ဘိက္ခဝေ၊ တဒဟု ပဝါရဏာယ သဘိက္ခုကာ အနာဝါသာ သဘိက္ခုကော အာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အနာဝါသာ သဘိက္ခုကော အနာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အနာဝါသာ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ.

န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ ဝါ အနာဝါသာ

ဝါ သဘိက္ခုကော အာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အနာဝါသော ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ. န၊ ဘိက္ခဝေ၊ တဒဟု ပဝါရဏာယ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ.