၁၄၄. ဘဏ္ဍနကာရကဝတ္ထု

၂၄၀. တေန ခေါ ပန သမယေန သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ကောသလေသု ဇနပဒေ အညတရသ္မိံ အာဝါသေ ဝဿံ ဥပဂစ္ဆိံသု. တေသံ သာမန္တာ အညေ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သံဃေ အဓိကရဏကာရကာ ဝဿံ ဥပဂစ္ဆိံသု – မယံ တေသံ ဘိက္ခူနံ ဝဿံဝုဋ္ဌာနံ ပဝါရဏာယ ပဝါရဏံ ဌပေဿာမာတိ. အဿောသုံ ခေါ တေ ဘိက္ခူ – ‘‘အမှာကံ ကိရ သာမန္တာ အညေ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သံဃေ အဓိကရဏကာရကာ ဝဿံ ဥပဂတာ – မယံ တေသံ ဘိက္ခူနံ ဝဿံဝုဋ္ဌာနံ ပဝါရဏာယ ပဝါရဏံ ဌပေဿာမာ’’တိ. ကထံ နု ခေါ အမှေဟိ ပဋိပဇ္ဇိတဗ္ဗန္တိ? ဘဂဝတော ဧတမတ္ထံ အာရောစေသုံ.

ဣဓ ပန၊ ဘိက္ခဝေ၊ သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ အညတရသ္မိံ အာဝါသေ ဝဿံ ဥပဂစ္ဆန္တိ. တေသံ သာမန္တာ အညေ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သံဃေ အဓိကရဏကာရကာ ဝဿံ ဥပဂစ္ဆန္တိ – မယံ တေသံ ဘိက္ခူနံ ဝဿံဝုဋ္ဌာနံ ပဝါရဏာယ ပဝါရဏံ ဌပေဿာမာတိ. အနုဇာနာမိ၊ ဘိက္ခဝေ၊ တေဟိ ဘိက္ခူဟိ ဒွေ တယော ဥပေါသထေ စာတုဒ္ဒသိကေ ကာတုံ – ကထံ မယံ တေဟိ ဘိက္ခူဟိ ပဌမတရံ ပဝါရေယျာမာတိ. တေ စေ၊ ဘိက္ခဝေ၊ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သံဃေ အဓိကရဏကာရကာ တံ အာဝါသံ အာဂစ္ဆန္တိ၊ တေဟိ၊ ဘိက္ခဝေ၊ အာဝါသိကေဟိ ဘိက္ခူဟိ လဟုံ လဟုံ သန္နိပတိတွာ ပဝါရေတဗ္ဗံ၊ ပဝါရေတွာ ဝတ္တဗ္ဗာ – ‘‘ပဝါရိတာ ခေါ မယံ၊ အာဝုသော၊ ယထာယသ္မန္တာ မညန္တိ တထာ ကရောန္တူ’’တိ. တေ စေ၊ ဘိက္ခဝေ၊ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သံဃေ အဓိကရဏကာရကာ အသံဝိဟိတာ တံ အာဝါသံ အာဂစ္ဆန္တိ၊ တေဟိ၊ ဘိက္ခဝေ၊ အာဝါသိကေဟိ ဘိက္ခူဟိ အာသနံ ပညပေတဗ္ဗံ၊ ပါဒေါဒကံ ပါဒပီဌံ ပါဒကထလိကံ ဥပနိက္ခိပိတဗ္ဗံ၊ ပစ္စုဂ္ဂန္တွာ ပတ္တစီဝရံ ပဋိဂ္ဂဟေတဗ္ဗံ၊ ပါနီယေန ပရိပုစ္ဆိတဗ္ဗာ၊ တေသံ ဝိက္ခိတွာ [ဝိက္ခိပါပေတွာ (ပဋိဝိသောဓကာနံ မတိ)၊ အာစိက္ခိတွာ (က.)] နိဿီမံ ဂန္တွာ ပဝါရေတဗ္ဗံ၊ ပဝါရေတွာ ဝတ္တဗ္ဗာ – ‘‘ပဝါရိတာ ခေါ မယံ၊ အာဝုသော၊ ယထာယသ္မန္တာ မညန္တိ တထာ ကရောန္တူ’’တိ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ အာဝါသိကေန ဘိက္ခုနာ ဗျတ္တေန ပဋိဗလေန အာဝါသိကာ ဘိက္ခူ ဉာပေတဗ္ဗာ –

‘‘သုဏန္တု မေ၊ အာယသ္မန္တော [အာယသ္မန္တာ (က.)]၊ အာဝါသိကာ. ယဒါယသ္မန္တာနံ ပတ္တကလ္လံ၊ ဣဒါနိ ဥပေါသထံ ကရေယျာမ၊ ပါတိမောက္ခံ ဥဒ္ဒိသေယျာမ၊ အာဂမေ ကာဠေ ပဝါရေယျာမာ’’တိ. တေ စေ၊ ဘိက္ခဝေ၊ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သံဃေ အဓိကရဏကာရကာ တေ ဘိက္ခူ ဧဝံ ဝဒေယျုံ – ‘‘သာဓာဝုသော၊ ဣဒါနေဝ နော ပဝါရေထာ’’တိ၊ တေ ဧဝမဿု ဝစနီယာ – ‘‘အနိဿရာ ခေါ တုမှေ၊ အာဝုသော၊ အမှာကံ ပဝါရဏာယ၊ န တာဝ မယံ ပဝါရေယျာမာ’’တိ. တေ စေ၊ ဘိက္ခဝေ၊ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သံဃေ အဓိကရဏကာရကာ တံ ကာဠံ အနုဝသေယျုံ၊ အာဝါသိကေန၊ ဘိက္ခဝေ၊ ဘိက္ခုနာ ဗျတ္တေန ပဋိဗလေန အာဝါသိကာ ဘိက္ခူ ဉာပေတဗ္ဗာ –

‘‘သုဏန္တု မေ၊ အာယသ္မန္တော၊ အာဝါသိကာ. ယဒါယသ္မန္တာနံ ပတ္တကလ္လံ၊ ဣဒါနိ ဥပေါသထံ ကရေယျာမ၊ ပါတိမောက္ခံ ဥဒ္ဒိသေယျာမ၊ အာဂမေ ဇုဏှေ ပဝါရေယျာမာ’’တိ. တေ စေ၊ ဘိက္ခဝေ၊ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သံဃေ အဓိကရဏကာရကာ တေ ဘိက္ခူ ဧဝံ ဝဒေယျုံ – ‘‘သာဓာဝုသော၊ ဣဒါနေဝ နော ပဝါရေယျာထာ’’တိ၊ တေ ဧဝမဿု ဝစနီယာ – ‘‘အနိဿရာ ခေါ တုမှေ၊ အာဝုသော၊ အမှာကံ ပဝါရဏာယ၊ န တာဝ မယံ ပဝါရေယျာမာ’’တိ. တေ စေ၊ ဘိက္ခဝေ၊ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သံဃေ အဓိကရဏကာရကာ တမ္ပိ ဇုဏှံ အနုဝသေယျုံ၊ တေဟိ၊ ဘိက္ခဝေ၊ ဘိက္ခူဟိ သဗ္ဗေဟေဝ အာဂမေ ဇုဏှေ ကောမုဒိယာ စာတုမာသိနိယာ အကာမာ ပဝါရေတဗ္ဗံ.

တေဟိ စေ၊ ဘိက္ခဝေ၊ ဘိက္ခူဟိ ပဝါရိယမာနေ ဂိလာနော အဂိလာနဿ ပဝါရဏံ ဌပေတိ၊ သော ဧဝမဿ ဝစနီယော – ‘‘အာယသ္မာ ခေါ ဂိလာနော. ဂိလာနော စ အနနုယောဂက္ခမော ဝုတ္တော ဘဂဝတာ. အာဂမေဟိ၊ အာဝုသော၊ ယာဝ အရောဂေါ ဟောသိ. အရောဂေါ အာကင်္ခမာနော စောဒေဿသီ’’တိ. ဧဝဉ္စေ ဝုစ္စမာနော စောဒေတိ၊ အနာဒရိယေ ပါစိတ္တိယံ. တေဟိ စေ၊ ဘိက္ခဝေ၊ ဘိက္ခူဟိ ပဝါရိယမာနေ အဂိလာနော ဂိလာနဿ ပဝါရဏံ ဌပေတိ၊ သော ဧဝမဿ ဝစနီယော – ‘‘အယံ ခေါ၊ အာဝုသော၊ ဘိက္ခု ဂိလာနော. ဂိလာနော စ အနနုယောဂက္ခမော ဝုတ္တော ဘဂဝတာ. အာဂမေဟိ၊ အာဝုသော၊ ယာဝါယံ ဘိက္ခု အရောဂေါ ဟောတိ. အရောဂံ အာကင်္ခမာနော စောဒေဿသီ’’တိ. ဧဝဉ္စေ ဝုစ္စမာနော စောဒေတိ၊ အနာဒရိယေ ပါစိတ္တိယံ. တေဟိ စေ၊ ဘိက္ခဝေ၊ ဘိက္ခူဟိ ပဝါရိယမာနေ ဂိလာနော ဂိလာနဿ ပဝါရဏံ ဌပေတိ၊ သော ဧဝမဿ ဝစနီယော – ‘‘အာယသ္မန္တာ ခေါ ဂိလာနာ. ဂိလာနော စ အနနုယောဂက္ခမော ဝုတ္တော ဘဂဝတာ. အာဂမေဟိ၊ အာဝုသော၊ ယာဝ အရောဂါ ဟောထ. အရောဂေါ အရောဂံ အာကင်္ခမာနော စောဒေဿသီ’’တိ [ယာဝ အရောဂေါ ဟောတိ၊ အရောဂံ အာကင်္ခမာနော စောဒေဿသီတိ (က.)]. ဧဝဉ္စေ ဝုစ္စမာနော စောဒေတိ၊ အနာဒရိယေ ပါစိတ္တိယံ. တေဟိ စေ၊ ဘိက္ခဝေ၊ ဘိက္ခူဟိ ပဝါရိယမာနေ အဂိလာနော အဂိလာနဿ ပဝါရဏံ ဌပေတိ၊ ဥဘော သံဃေန သမနုယုဉ္ဇိတွာ သမနုဂါဟိတွာ [သမနုဘာသိတွာ (သီ.)] ယထာဓမ္မံ ကာရာပေတွာ သံဃေန ပဝါရေတဗ္ဗန္တိ.

ဘဏ္ဍနကာရကဝတ္ထု နိဋ္ဌိတံ.