၁၄၃. ဝတ္ထုဌပနာဒိ

၂၃၉. ဣဓ ပန၊ ဘိက္ခဝေ၊ ဘိက္ခု တဒဟု ပဝါရဏာယ သံဃမဇ္ဈေ ဥဒါဟရေယျ – ‘‘သုဏာတု မေ၊ ဘန္တေ၊ သံဃော. ဣဒံ ဝတ္ထု ပညာယတိ၊ န ပုဂ္ဂလော. ယဒိ သံဃဿ ပတ္တကလ္လံ၊ ဝတ္ထုံ ဌပေတွာ သံဃော ပဝါရေယျာ’’တိ. သော ဧဝမဿ ဝစနီယော – ‘‘ဘဂဝတာ ခေါ၊ အာဝုသော၊ ဝိသုဒ္ဓါနံ ပဝါရဏာ ပညတ္တာ. သစေ ဝတ္ထု ပညာယတိ၊ န ပုဂ္ဂလော၊ ဣဒါနေဝ နံ ဝဒေဟီ’’တိ.

ဣဓ ပန၊ ဘိက္ခဝေ၊ ဘိက္ခု တဒဟု ပဝါရဏာယ သံဃမဇ္ဈေ ဥဒါဟရေယျ – ‘‘သုဏာတု မေ၊ ဘန္တေ၊ သံဃော. အယံ ပုဂ္ဂလော ပညာယတိ၊ န ဝတ္ထု. ယဒိ သံဃဿ ပတ္တကလ္လံ၊ ပုဂ္ဂလံ ဌပေတွာ သံဃော ပဝါရေယျာ’’တိ. သော ဧဝမဿ ဝစနီယော – ‘‘ဘဂဝတာ ခေါ၊ အာဝုသော၊ သမဂ္ဂါနံ ပဝါရဏာ ပညတ္တာ. သစေ ပုဂ္ဂလော ပညာယတိ၊ န ဝတ္ထု၊ ဣဒါနေဝ နံ ဝဒေဟီ’’တိ.

ဣဓ ပန၊ ဘိက္ခဝေ၊ ဘိက္ခု တဒဟု ပဝါရဏာယ သံဃမဇ္ဈေ ဥဒါဟရေယျ – ‘‘သုဏာတု မေ၊ ဘန္တေ၊ သံဃော. ဣဒံ ဝတ္ထု စ ပုဂ္ဂလော စ ပညာယတိ. ယဒိ သံဃဿ ပတ္တကလ္လံ၊ ဝတ္ထုဉ္စ ပုဂ္ဂလဉ္စ ဌပေတွာ သံဃော ပဝါရေယျာ’’တိ. သော ဧဝမဿ ဝစနီယော – ‘‘ဘဂဝတာ ခေါ၊ အာဝုသော၊ ဝိသုဒ္ဓါနဉ္စ သမဂ္ဂါနဉ္စ ပဝါရဏာ ပညတ္တာ. သစေ ဝတ္ထု စ ပုဂ္ဂလော စ ပညာယတိ၊ ဣဒါနေဝ နံ ဝဒေဟီ’’တိ.

ပုဗ္ဗေ စေ၊ ဘိက္ခဝေ၊ ပဝါရဏာယ ဝတ္ထု ပညာယတိ၊ ပစ္ဆာ ပုဂ္ဂလော၊ ကလ္လံ ဝစနာယ. ပုဗ္ဗေ စေ၊ ဘိက္ခဝေ၊ ပဝါရဏာယ ပုဂ္ဂလော ပညာယတိ၊ ပစ္ဆာ ဝတ္ထု၊ ကလ္လံ ဝစနာယ. ပုဗ္ဗေ စေ၊ ဘိက္ခဝေ၊ ပဝါရဏာယ ဝတ္ထု စ ပုဂ္ဂလော စ ပညာယတိ၊ တံ စေ ကတာယ ပဝါရဏာယ ဥက္ကောဋေတိ၊ ဥက္ကောဋနကံ ပါစိတ္တိယန္တိ.

ဝတ္ထုဌပနာဒိ နိဋ္ဌိတာ.