၁၄၀. ဒွေဝါစိကာဒိပဝါရဏာ

၂၃၄. တေန ခေါ ပန သမယေန ကောသလေသု ဇနပဒေ အညတရသ္မိံ အာဝါသေ တဒဟု ပဝါရဏာယ သဝရဘယံ အဟောသိ. ဘိက္ခူ နာသက္ခိံသု တေဝါစိကံ ပဝါရေတုံ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဒွေဝါစိကံ ပဝါရေတုန္တိ.

ဗာဠှတရံ သဝရဘယံ အဟောသိ. ဘိက္ခူ နာသက္ခိံသု ဒွေဝါစိကံ ပဝါရေတုံ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဧကဝါစိကံ ပဝါရေတုန္တိ.

ဗာဠှတရံ သဝရဘယံ အဟောသိ. ဘိက္ခူ နာသက္ခိံသု ဧကဝါစိကံ ပဝါရေတုံ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ သမာနဝဿိကံ ပဝါရေတုန္တိ.

တေန ခေါ ပန သမယေန အညတရသ္မိံ အာဝါသေ တဒဟု ပဝါရဏာယ မနုဿေဟိ ဒါနံ ဒေန္တေဟိ ယေဘုယျေန ရတ္တိ ခေပိတာ ဟောတိ. အထ ခေါ တေသံ ဘိက္ခူနံ ဧတဒဟောသိ – ‘‘မနုဿေဟိ ဒါနံ ဒေန္တေဟိ ယေဘုယျေန ရတ္တိ ခေပိတာ. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ ရတ္တိ ဝိဘာယိဿတိ. ကထံ နု ခေါ အမှေဟိ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ မနုဿေဟိ ဒါနံ ဒေန္တေဟိ ယေဘုယျေန ရတ္တိ ခေပိတာ ဟောတိ. တတြ စေ၊ ဘိက္ခဝေ၊ ဘိက္ခူနံ ဧဝံ ဟောတိ – ‘‘မနုဿေဟိ ဒါနံ ဒေန္တေဟိ ယေဘုယျေန ရတ္တိ ခေပိတာ. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ ရတ္တိ ဝိဘာယိဿတီ’’တိ၊ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. မနုဿေဟိ ဒါနံ ဒေန္တေဟိ ယေဘုယျေန ရတ္တိ ခေပိတာ. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ ရတ္တိ ဝိဘာယိဿတိ. ယဒိ သံဃဿ ပတ္တကလ္လံ၊ သံဃော ဒွေဝါစိကံ၊ ဧကဝါစိကံ၊ သမာနဝဿိကံ ပဝါရေယျာ’’တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ ဘိက္ခူဟိ ဓမ္မံ ဘဏန္တေဟိ။ပေ။ သုတ္တန္တိကေဟိ သုတ္တန္တံ သင်္ဂါယန္တေဟိ။ ဝိနယဓရေဟိ ဝိနယံ ဝိနိစ္ဆိနန္တေဟိ။ ဓမ္မကထိကေဟိ ဓမ္မံ သာကစ္ဆန္တေဟိ။ ဘိက္ခူဟိ ကလဟံ ကရောန္တေဟိ ယေဘုယျေန ရတ္တိ ခေပိတာ ဟောတိ. တတြ စေ ဘိက္ခူနံ ဧဝံ ဟောတိ – ‘‘ဘိက္ခူဟိ ကလဟံ ကရောန္တေဟိ ယေဘုယျေန ရတ္တိ ခေပိတာ. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ ရတ္တိ ဝိဘာယိဿတီ’’တိ၊ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. ဘိက္ခူဟိ ကလဟံ ကရောန္တေဟိ ယေဘုယျေန ရတ္တိ ခေပိတာ. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ ရတ္တိ ဝိဘာယိဿတိ. ယဒိ သံဃဿ ပတ္တကလ္လံ၊ သံဃော ဒွေဝါစိကံ၊ ဧကဝါစိကံ၊ သမာနဝဿိကံ ပဝါရေယျာ’’တိ.

တေန ခေါ ပန သမယေန ကောသလေသု ဇနပဒေ အညတရသ္မိံ အာဝါသေ တဒဟု ပဝါရဏာယ မဟာဘိက္ခုသံဃော သန္နိပတိတော ဟောတိ၊ ပရိတ္တဉ္စ အနောဝဿိကံ [အနောဝဿကံ (က.)] ဟောတိ၊ မဟာ စ မေဃော ဥဂ္ဂတော ဟောတိ. အထ ခေါ တေသံ ဘိက္ခူနံ ဧတဒဟောသိ – ‘‘အယံ ခေါ မဟာဘိက္ခုသံဃော သန္နိပတိတော၊ ပရိတ္တဉ္စ အနောဝဿိကံ၊ မဟာ စ မေဃော ဥဂ္ဂတော. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ မေဃော ပဝဿိဿတိ. ကထံ နု ခေါ အမှေဟိ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ မဟာဘိက္ခုသံဃော သန္နိပတိတော ဟောတိ၊ ပရိတ္တဉ္စ အနောဝဿိကံ ဟောတိ၊ မဟာ စ မေဃော ဥဂ္ဂတော ဟောတိ. တတြ စေ ဘိက္ခူနံ ဧဝံ ဟောတိ – ‘‘အယံ ခေါ မဟာဘိက္ခုသံဃော သန္နိပတိတော၊ ပရိတ္တဉ္စ အနောဝဿိကံ၊ မဟာ စ မေဃော ဥဂ္ဂတော. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ မေဃော ပဝဿိဿတီ’’တိ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. အယံ မဟာဘိက္ခုသံဃော သန္နိပတိတော၊ ပရိတ္တဉ္စ အနောဝဿိကံ၊ မဟာ စ မေဃော ဥဂ္ဂတော. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ မေဃော ပဝဿိဿတိ. ယဒိ သံဃဿ ပတ္တကလ္လံ၊ သံဃော ဒွေဝါစိကံ၊ ဧကဝါစိကံ၊ သမာနဝဿိကံ ပဝါရေယျာ’’တိ.

ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟု ပဝါရဏာယ ရာဇန္တရာယော ဟောတိ။ပေ။ စောရန္တရာယော ဟောတိ။ အဂျန္တရာယော ဟောတိ။ ဥဒကန္တရာယော ဟောတိ။ မနုဿန္တရာယော ဟောတိ။ အမနုဿန္တရာယော ဟောတိ။ ဝါဠန္တရာယော ဟောတိ။ သရီသပန္တရာယော ဟောတိ။ ဇီဝိတန္တရာယော ဟောတိ။ ဗြဟ္မစရိယန္တရာယော ဟောတိ. တတြ စေ ဘိက္ခူနံ ဧဝံ ဟောတိ – ‘‘အယံ ခေါ၊ ဗြဟ္မစရိယန္တရာယော. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ ဗြဟ္မစရိယန္တရာယော ဘဝိဿတီ’’တိ၊ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. အယံ ဗြဟ္မစရိယန္တရာယော. သစေ သံဃော တေဝါစိကံ ပဝါရေဿတိ၊ အပ္ပဝါရိတောဝ သံဃော ဘဝိဿတိ၊ အထာယံ ဗြဟ္မစရိယန္တရာယော ဘဝိဿတိ. ယဒိ သံဃဿ ပတ္တကလ္လံ၊ သံဃော ဒွေဝါစိကံ၊ ဧကဝါစိကံ၊ သမာနဝဿိကံ ပဝါရေယျာ’’တိ.

ဒွေဝါစိကာဒိပဝါရဏာ နိဋ္ဌိတာ.