၁၄၁. ပဝါရဏာဌပနံ

၂၃၅. တေန ခေါ ပန သမယေန ဆဗ္ဗဂ္ဂိယာ ဘိက္ခူ သာပတ္တိကာ ပဝါရေန္တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ သာပတ္တိကေန ပဝါရေတဗ္ဗံ. ယော ပဝါရေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ ယော သာပတ္တိကော ပဝါရေတိ၊ တဿ ဩကာသံ ကာရာပေတွာ အာပတ္တိယာ စောဒေတုန္တိ.

တေန ခေါ ပန သမယေန ဆဗ္ဗဂ္ဂိယာ ဘိက္ခူ ဩကာသံ ကာရာပိယမာနာ န ဣစ္ဆန္တိ ဩကာသံ ကာတုံ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဩကာသံ အကရောန္တဿ ပဝါရဏံ ဌပေတုံ. ဧဝဉ္စ ပန၊ ဘိက္ခဝေ၊ ဌပေတဗ္ဗာ. တဒဟု ပဝါရဏာယ စာတုဒ္ဒသေ ဝါ ပန္နရသေ ဝါ တသ္မိံ ပုဂ္ဂလေ သမ္မုခီဘူတေ သံဃမဇ္ဈေ ဥဒါဟရိတဗ္ဗံ – ‘‘သုဏာတု မေ၊ ဘန္တေ၊ သံဃော. ဣတ္ထန္နာမော ပုဂ္ဂလော သာပတ္တိကော. တဿ ပဝါရဏံ ဌပေမိ. န တသ္မိံ သမ္မုခီဘူတေ ပဝါရေတဗ္ဗ’’န္တိ. ဌပိတာ ဟောတိ ပဝါရဏာတိ.

တေန ခေါ ပန သမယေန ဆဗ္ဗဂ္ဂိယာ ဘိက္ခူ – ပုရမှာကံ ပေသလာ ဘိက္ခူ ပဝါရဏံ ဌပေန္တီတိ – ပဋိကစ္စေဝ သုဒ္ဓါနံ ဘိက္ခူနံ အနာပတ္တိကာနံ အဝတ္ထုသ္မိံ အကာရဏေ ပဝါရဏံ ဌပေန္တိ၊ ပဝါရိတာနမ္ပိ ပဝါရဏံ ဌပေန္တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ သုဒ္ဓါနံ ဘိက္ခူနံ အနာပတ္တိကာနံ အဝတ္ထုသ္မိံ အကာရဏေ ပဝါရဏာ ဌပေတဗ္ဗာ. ယော ဌပေယျ၊ အာပတ္တိ ဒုက္ကဋဿ. န၊ ဘိက္ခဝေ၊ ပဝါရိတာနမ္ပိ ပဝါရဏာ ဌပေတဗ္ဗာ. ယော ဌပေယျ၊ အာပတ္တိ ဒုက္ကဋဿ.

၂၃၆. ဧဝံ ခေါ၊ ဘိက္ခဝေ၊ ဌပိတာ ဟောတိ ပဝါရဏာ၊ ဧဝံ အဋ္ဌပိတာ. ကထဉ္စ၊ ဘိက္ခဝေ၊ အဋ္ဌပိတာ ဟောတိ ပဝါရဏာ? တေဝါစိကာယ စေ၊ ဘိက္ခဝေ၊ ပဝါရဏာယ ဘာသိတာယ လပိတာယ ပရိယောသိတာယ ပဝါရဏံ ဌပေတိ၊ အဋ္ဌပိတာ ဟောတိ ပဝါရဏာ. ဒွေဝါစိကာယ စေ၊ ဘိက္ခဝေ၊။ ဧကဝါစိကာယ စေ၊ ဘိက္ခဝေ၊။ သမာနဝဿိကာယ စေ၊ ဘိက္ခဝေ၊ ပဝါရဏာယ ဘာသိတာယ လပိတာယ ပရိယောသိတာယ ပဝါရဏံ ဌပေတိ၊ အဋ္ဌပိတာ ဟောတိ ပဝါရဏာ. ဧဝံ ခေါ၊ ဘိက္ခဝေ၊ အဋ္ဌပိတာ ဟောတိ ပဝါရဏာ.

ကထဉ္စ၊ ဘိက္ခဝေ၊ ဌပိတာ ဟောတိ ပဝါရဏာ? တေဝါစိကာယ၊ စေ၊ ဘိက္ခဝေ၊ ပဝါရဏာယ ဘာသိတာယ လပိတာယ အပရိယောသိတာယ ပဝါရဏံ ဌပေတိ၊ ဌပိတာ ဟောတိ ပဝါရဏာ. ဒွေဝါစိကာယ စေ၊ ဘိက္ခဝေ၊။ ဧကဝါစိကာယ စေ၊ ဘိက္ခဝေ၊။ သမာနဝဿိကာယ စေ၊ ဘိက္ခဝေ၊ ပဝါရဏာယ ဘာသိတာယ လပိတာယ အပရိယောသိတာယ ပဝါရဏံ ဌပေတိ၊ ဌပိတာ ဟောတိ ပဝါရဏာ. ဧဝံ ခေါ၊ ဘိက္ခဝေ၊ ဌပိတာ ဟောတိ ပဝါရဏာ.

၂၃၇. ဣဓ ပန၊ ဘိက္ခဝေ၊ တဒဟု ပဝါရဏာယ ဘိက္ခု ဘိက္ခုဿ ပဝါရဏံ ဌပေတိ. တံ စေ ဘိက္ခုံ အညေ ဘိက္ခူ ဇာနန္တိ၊ ‘‘အယံ ခေါ အာယသ္မာ အပရိသုဒ္ဓကာယသမာစာရော၊ အပရိသုဒ္ဓဝစီသမာစာရော၊ အပရိသုဒ္ဓါဇီဝေါ၊ ဗာလော၊ အဗျတ္တော၊ န ပဋိဗလော အနုယုဉ္ဇီယမာနော အနုယောဂံ ဒါတု’’န္တိ၊ ‘အလံ၊ ဘိက္ခု၊ မာ ဘဏ္ဍနံ၊ မာ ကလဟံ၊ မာ ဝိဂ္ဂဟံ၊ မာ ဝိဝါဒ’န္တိ ဩမဒ္ဒိတွာ သံဃေန ပဝါရေတဗ္ဗံ.

ဣဓ ပန၊ ဘိက္ခဝေ၊ တဒဟု ပဝါရဏာယ ဘိက္ခု ဘိက္ခုဿ ပဝါရဏံ ဌပေတိ. တံ စေ ဘိက္ခုံ အညေ ဘိက္ခူ ဇာနန္တိ၊ ‘‘အယံ ခေါ အာယသ္မာ ပရိသုဒ္ဓကာယသမာစာရော၊ အပရိသုဒ္ဓဝစီသမာစာရော၊ အပရိသုဒ္ဓါဇီဝေါ၊ ဗာလော၊ အဗျတ္တော၊ န ပဋိဗလော အနုယုဉ္ဇီယမာနော အနုယောဂံ ဒါတု’’န္တိ၊ ‘အလံ၊ ဘိက္ခု၊ မာ ဘဏ္ဍနံ၊ မာ ကလဟံ၊ မာ ဝိဂ္ဂဟံ၊ မာ ဝိဝါဒ’န္တိ ဩမဒ္ဒိတွာ သံဃေန ပဝါရေတဗ္ဗံ.

ဣဓ ပန၊ ဘိက္ခဝေ၊ တဒဟု ပဝါရဏာယ ဘိက္ခု ဘိက္ခုဿ ပဝါရဏံ ဌပေတိ. တံ စေ ဘိက္ခုံ အညေ ဘိက္ခူ ဇာနန္တိ၊ ‘‘အယံ ခေါ အာယသ္မာ ပရိသုဒ္ဓကာယသမာစာရော၊ ပရိသုဒ္ဓဝစီသမာစာရော၊ အပရိသုဒ္ဓါဇီဝေါ၊ ဗာလော၊ အဗျတ္တော၊ န ပဋိဗလော အနုယုဉ္ဇီယမာနော အနုယောဂံ ဒါတု’’န္တိ၊ ‘အလံ၊ ဘိက္ခု၊ မာ ဘဏ္ဍနံ၊ မာ ကလဟံ၊ မာ ဝိဂ္ဂဟံ၊ မာ ဝိဝါဒ’န္တိ ဩမဒ္ဒိတွာ သံဃေန ပဝါရေတဗ္ဗံ.

ဣဓ ပန၊ ဘိက္ခဝေ၊ တဒဟု ပဝါရဏာယ ဘိက္ခု ဘိက္ခုဿ ပဝါရဏံ ဌပေတိ. တံ စေ ဘိက္ခုံ အညေ ဘိက္ခူ ဇာနန္တိ၊ ‘‘အယံ ခေါ အာယသ္မာ ပရိသုဒ္ဓကာယသမာစာရော၊ ပရိသုဒ္ဓဝစီသမာစာရော၊ ပရိသုဒ္ဓါဇီဝေါ၊ ဗာလော၊ အဗျတ္တော၊ န ပဋိဗလော အနုယုဉ္ဇီယမာနော အနုယောဂံ ဒါတု’’န္တိ၊ ‘အလံ၊ ဘိက္ခု၊ မာ ဘဏ္ဍနံ၊ မာ ကလဟံ၊ မာ ဝိဂ္ဂဟံ၊ မာ ဝိဝါဒ’န္တိ ဩမဒ္ဒိတွာ သံဃေန ပဝါရေတဗ္ဗံ.

ဣဓ ပန၊ ဘိက္ခဝေ၊ တဒဟု ပဝါရဏာယ ဘိက္ခု ဘိက္ခုဿ ပဝါရဏံ ဌပေတိ. တံ စေ ဘိက္ခုံ အညေ ဘိက္ခူ ဇာနန္တိ၊ ‘‘အယံ ခေါ အာယသ္မာ ပရိသုဒ္ဓကာယသမာစာရော၊ ပရိသုဒ္ဓဝစီသမာစာရော၊ ပရိသုဒ္ဓါဇီဝေါ၊ ပဏ္ဍိတော၊ ဗျတ္တော၊ ပဋိဗလော အနုယုဉ္ဇီယမာနော အနုယောဂံ ဒါတု’’န္တိ၊ သော ဧဝမဿ ဝစနီယော၊ ‘‘ယံ ခေါ တွံ၊ အာဝုသော၊ ဣမဿ ဘိက္ခုနော ပဝါရဏံ ဌပေသိ၊ ကိမှိ နံ ဌပေသိ၊ သီလဝိပတ္တိယာ ဝါ ဌပေသိ၊ အာစာရဝိပတ္တိယာ ဝါ ဌပေသိ၊ ဒိဋ္ဌိဝိပတ္တိယာ ဝါ ဌပေသီ’’တိ? သော စေ ဧဝံ ဝဒေယျ – ‘‘သီလဝိပတ္တိယာ ဝါ ဌပေမိ၊ အာစာရဝိပတ္တိယာ ဝါ ဌပေမိ၊ ဒိဋ္ဌိဝိပတ္တိယာ ဝါ ဌပေမီ’’တိ၊ သော ဧဝမဿ ဝစနီယော – ‘‘ဇာနာသိ ပနာယသ္မာ သီလဝိပတ္တိံ၊ ဇာနာသိ အာစာရဝိပတ္တိံ၊ ဇာနာသိ ဒိဋ္ဌိဝိပတ္တိ’’န္တိ? သော စေ ဧဝံ ဝဒေယျ – ‘‘ဇာနာမိ ခေါ အဟံ၊ အာဝုသော၊ သီလဝိပတ္တိံ၊ ဇာနာမိ အာစာရဝိပတ္တိံ၊ ဇာနာမိ ဒိဋ္ဌိဝိပတ္တိ’’န္တိ၊ သော ဧဝမဿ ဝစနီယော – ‘‘ကတမာ ပနာဝုသော၊ သီလဝိပတ္တိ၊ ကတမာ အာစာရဝိပတ္တိ၊ ကတမာ ဒိဋ္ဌိဝိပတ္တီ’’တိ? သော စေ ဧဝံ ဝဒေယျ – ‘‘စတ္တာရိ ပါရာဇိကာနိ၊ တေရသ သံဃာဒိသေသာ၊ အယံ သီလဝိပတ္တိ၊ ထုလ္လစ္စယံ၊ ပါစိတ္တိယံ၊ ပါဋိဒေသနီယံ၊ ဒုက္ကဋံ၊ ဒုဗ္ဘာသိတံ၊ အယံ အာစာရဝိပတ္တိ၊ မိစ္ဆာဒိဋ္ဌိ၊ အန္တဂ္ဂါဟိကာဒိဋ္ဌိ၊ အယံ ဒိဋ္ဌိဝိပတ္တီ’’တိ၊ သော ဧဝမဿ ဝစနီယော – ‘‘ယံ ခေါ တွံ၊ အာဝုသော၊ ဣမဿ ဘိက္ခုနော ပဝါရဏံ ဌပေသိ၊ ဒိဋ္ဌေန ဝါ ဌပေသိ၊ သုတေန ဝါ ဌပေသိ၊ ပရိသင်္ကာယ ဝါ ဌပေသီ’’တိ? သော စေ ဧဝံ ဝဒေယျ – ‘‘ဒိဋ္ဌေန ဝါ ဌပေမိ၊ သုတေန ဝါ ဌပေမိ၊ ပရိသင်္ကာယ ဝါ ဌပေမီ’’တိ၊ သော ဧဝမဿ ဝစနီယော – ‘‘ယံ ခေါ တွံ၊ အာဝုသော၊ ဣမဿ ဘိက္ခုနော ဒိဋ္ဌေန ပဝါရဏံ ဌပေသိ၊ ကိံ တေ ဒိဋ္ဌံ၊ ကိန္တိ တေ ဒိဋ္ဌံ၊ ကဒါ တေ ဒိဋ္ဌံ၊ ကတ္ထ တေ ဒိဋ္ဌံ၊ ပါရာဇိကံ အဇ္ဈာပဇ္ဇန္တော ဒိဋ္ဌော၊ သံဃာဒိသေသံ အဇ္ဈာပဇ္ဇန္တော ဒိဋ္ဌော၊ ထုလ္လစ္စယံ။ ပါစိတ္တိယံ။ ပါဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပဇ္ဇန္တော ဒိဋ္ဌော၊ ကတ္ထ စ တွံ အဟောသိ၊ ကတ္ထ စာယံ ဘိက္ခု အဟောသိ၊ ကိဉ္စ တွံ ကရောသိ၊ ကိဉ္စာယံ ဘိက္ခု ကရောတီ’’တိ? သော စေ ဧဝံ ဝဒေယျ – ‘‘န ခေါ အဟံ၊ အာဝုသော၊ ဣမဿ ဘိက္ခုနော ဒိဋ္ဌေန ပဝါရဏံ ဌပေမိ၊ အပိစ သုတေန ပဝါရဏံ ဌပေမီ’’တိ၊ သော ဧဝမဿ ဝစနီယော – ‘‘ယံ ခေါ တွံ၊ အာဝုသော၊ ဣမဿ ဘိက္ခုနော သုတေန ပဝါရဏံ ဌပေသိ၊ ကိံ တေ သုတံ၊ ကိန္တိ တေ သုတံ၊ ကဒါ တေ သုတံ၊ ကတ္ထ တေ သုတံ၊ ပါရာဇိကံ အဇ္ဈာပန္နောတိ သုတံ၊ သံဃာဒိသေသံ အဇ္ဈာပန္နောတိ သုတံ၊ ထုလ္လစ္စယံ။ ပါစိတ္တိယံ။ ပါဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပန္နောတိ သုတံ၊ ဘိက္ခုဿ သုတံ၊ ဘိက္ခုနိယာ သုတံ၊ သိက္ခမာနာယ သုတံ၊ သာမဏေရဿ သုတံ၊ သာမဏေရိယာ သုတံ၊ ဥပါသကဿ သုတံ၊ ဥပါသိကာယ သုတံ၊ ရာဇူနံ သုတံ၊ ရာဇမဟာမတ္တာနံ သုတံ၊ တိတ္ထိယာနံ သုတံ၊ တိတ္ထိယသာဝကာနံ သုတ’’န္တိ? သော စေ ဧဝံ ဝဒေယျ – ‘‘န ခေါ အဟံ၊ အာဝုသော၊ ဣမဿ ဘိက္ခုနော သုတေန ပဝါရဏံ ဌပေမိ၊ အပိစ ပရိသင်္ကာယ ပဝါရဏံ ဌပေမီ’’တိ၊ သော ဧဝမဿ ဝစနီယော – ‘‘ယံ ခေါ တွံ၊ အာဝုသော၊ ဣမဿ ဘိက္ခုနော ပရိသင်္ကာယ ပဝါရဏံ ဌပေသိ၊ ကိံ ပရိသင်္ကသိ၊ ကိန္တိ ပရိသင်္ကသိ၊ ကဒါ ပရိသင်္ကသိ၊ ကတ္ထ ပရိသင်္ကသိ၊ ပါရာဇိကံ အဇ္ဈာပန္နောတိ ပရိသင်္ကသိ၊ သံဃာဒိသေသံ အဇ္ဈာပန္နောတိ ပရိသင်္ကသိ၊ ထုလ္လစ္စယံ။ ပါစိတ္တိယံ။ ပါဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပန္နောတိ ပရိသင်္ကသိ၊ ဘိက္ခုဿ သုတွာ ပရိသင်္ကသိ၊ ဘိက္ခုနိယာ သုတွာ ပရိသင်္ကသိ၊ သိက္ခမာနာယ သုတွာ ပရိသင်္ကသိ၊ သာမဏေရဿ သုတွာ ပရိသင်္ကသိ၊ သာမဏေရိယာ သုတွာ ပရိသင်္ကသိ၊ ဥပါသကဿ သုတွာ ပရိသင်္ကသိ၊ ဥပါသိကာယ သုတွာ ပရိသင်္ကသိ၊ ရာဇူနံ သုတွာ ပရိသင်္ကသိ၊ ရာဇမဟာမတ္တာနံ သုတွာ ပရိသင်္ကသိ၊ တိတ္ထိယာနံ သုတွာ ပရိသင်္ကသိ၊ တိတ္ထိယသာဝကာနံ သုတွာ ပရိသင်္ကသီ’’တိ? သော စေ ဧဝံ ဝဒေယျ – ‘‘န ခေါ အဟံ၊ အာဝုသော၊ ဣမဿ ဘိက္ခုနော ပရိသင်္ကာယ ပဝါရဏံ ဌပေမိ၊ အပိ စ အဟမ္ပိ န ဇာနာမိ ကေန ပနာဟံ ဣမဿ ဘိက္ခုနော ပဝါရဏံ ဌပေမီ’’တိ. သော စေ၊ ဘိက္ခဝေ၊ စောဒကော ဘိက္ခု အနုယောဂေန ဝိညူနံ သဗြဟ္မစာရီနံ စိတ္တံ န အာရာဓေတိ၊ အနနုဝါဒေါ စုဒိတော ဘိက္ခူတိ အလံ ဝစနာယ. သော စေ၊ ဘိက္ခဝေ၊ စောဒကော ဘိက္ခု အနုယောဂေန ဝိညူနံ သဗြဟ္မစာရီနံ စိတ္တံ အာရာဓေတိ၊ သာနုဝါဒေါ စုဒိတော ဘိက္ခူတိ အလံ ဝစနာယ. သော စေ၊ ဘိက္ခဝေ၊ စောဒကော ဘိက္ခု အမူလကေန ပါရာဇိကေန အနုဒ္ဓံသိတံ ပဋိဇာနာတိ၊ သံဃာဒိသေသံ အာရောပေတွာ သံဃေန ပဝါရေတဗ္ဗံ. သော စေ၊ ဘိက္ခဝေ၊ စောဒကော ဘိက္ခု အမူလကေန သံဃာဒိသေသေန အနုဒ္ဓံသိတံ ပဋိဇာနာတိ၊ ယထာဓမ္မံ ကာရာပေတွာ သံဃေန ပဝါရေတဗ္ဗံ. သော စေ၊ ဘိက္ခဝေ၊ စောဒကော၊ ဘိက္ခု အမူလကေန ထုလ္လစ္စယေန။ ပါစိတ္တိယေန။ ပါဋိဒေသနီယေန။ ဒုက္ကဋေန။ ဒုဗ္ဘာသိတေန အနုဒ္ဓံသိတံ ပဋိဇာနာတိ၊ ယထာဓမ္မံ ကာရာပေတွာ သံဃေန ပဝါရေတဗ္ဗံ. သော စေ၊ ဘိက္ခဝေ၊ စုဒိတော ဘိက္ခု ပါရာဇိကံ အဇ္ဈာပန္နောတိ ပဋိဇာနာတိ၊ နာသေတွာ သံဃေန ပဝါရေတဗ္ဗံ. သော စေ၊ ဘိက္ခဝေ၊ စုဒိတော ဘိက္ခု သံဃာဒိသေသံ အဇ္ဈာပန္နောတိ ပဋိဇာနာတိ၊ သံဃာဒိသေသံ အာရောပေတွာ သံဃေန ပဝါရေတဗ္ဗံ. သော စေ၊ ဘိက္ခဝေ၊ စုဒိတော ဘိက္ခု ထုလ္လစ္စယံ။ ပါစိတ္တိယံ။ ပါဋိဒေသနီယံ။ ဒုက္ကဋံ။ ဒုဗ္ဘာသိတံ အဇ္ဈာပန္နောတိ ပဋိဇာနာတိ၊ ယထာဓမ္မံ ကာရာပေတွာ သံဃေန ပဝါရေတဗ္ဗံ.

ပဝါရဏာဌပနံ နိဋ္ဌိတံ.