၁၃၉. ဝဇ္ဇနီယပုဂ္ဂလသန္ဒဿနာ

၂၃၃. န၊ ဘိက္ခဝေ၊ ဘိက္ခုနိယာ နိသိန္နပရိသာယ ပဝါရေတဗ္ဗံ. ယော ပဝါရေယျ၊ အာပတ္တိ ဒုက္ကဋဿ. န၊ ဘိက္ခဝေ၊ သိက္ခမာနာယ။ပေ။ န သာမဏေရဿ။ပေ။ န သာမဏေရိယာ။ပေ။ န သိက္ခံ ပစ္စက္ခာတကဿ။ပေ။ န အန္တိမဝတ္ထုံ အဇ္ဈာပန္နကဿ နိသိန္နပရိသာယ ပဝါရေတဗ္ဗံ. ယော ပဝါရေယျ၊ အာပတ္တိ ဒုက္ကဋဿ.

န အာပတ္တိယာ အဒဿနေ ဥက္ခိတ္တကဿ နိသိန္နပရိသာယ ပဝါရေတဗ္ဗံ. ယော ပဝါရေယျ၊ ယထာဓမ္မော ကာရေတဗ္ဗော. န အာပတ္တိယာ အပ္ပဋိကမ္မေ ဥက္ခိတ္တကဿ။ပေ။ န ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကဿ နိသိန္နပရိသာယ ပဝါရေတဗ္ဗံ. ယော ပဝါရေယျ၊ ယထာဓမ္မော ကာရေတဗ္ဗော.

န ပဏ္ဍကဿ နိသိန္နပရိသာယ ပဝါရေတဗ္ဗံ. ယော ပဝါရေယျ၊ အာပတ္တိ ဒုက္ကဋဿ. န ထေယျသံဝါသကဿ။ပေ။ န တိတ္ထိယပက္ကန္တကဿ။ပေ။ န တိရစ္ဆာနဂတဿ။ပေ။ န မာတုဃာတကဿ။ပေ။ န ပိတုဃာတကဿ။ပေ။ န အရဟန္တဃာတကဿ။ပေ။ န ဘိက္ခုနိဒူသကဿ ။ပေ။ န သံဃဘေဒကဿ။ပေ။ န လောဟိတုပ္ပါဒကဿ ။ပေ။ န ဥဘတောဗျဉ္ဇနကဿ နိသိန္နပရိသာယ ပဝါရေတဗ္ဗံ. ယော ပဝါရေယျ၊ အာပတ္တိ ဒုက္ကဋဿ.

န၊ ဘိက္ခဝေ၊ ပါရိဝါသိကပဝါရဏာဒါနေန ပဝါရေတဗ္ဗံ၊ အညတြ အဝုဋ္ဌိတာယ ပရိသာယ. န စ၊ ဘိက္ခဝေ၊ အပ္ပဝါရဏာယ ပဝါရေတဗ္ဗံ၊ အညတြ သံဃသာမဂ္ဂိယာတိ.

ဝဇ္ဇနီယပုဂ္ဂလသန္ဒဿနာ နိဋ္ဌိတာ.

ဒုတိယဘာဏဝါရော နိဋ္ဌိတော.