၉၁. သင်္ဃုပေါသထာဒိပ္ပဘေဒံ

၁၆၈. တေန ခေါ ပန သမယေန အညတရသ္မိံ အာဝါသေ တဒဟုပေါသထေ စတ္တာရော ဘိက္ခူ ဝိဟရန္တိ. အထ ခေါ တေသံ ဘိက္ခူနံ ဧတဒဟောသိ – ‘‘ဘဂဝတာ ပညတ္တံ ‘ဥပေါသထော ကာတဗ္ဗော’တိ၊ မယဉ္စမှာ စတ္တာရော ဇနာ၊ ကထံ နု ခေါ အမှေဟိ ဥပေါသထော ကာတဗ္ဗော’’တိ? ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ စတုန္နံ ပါတိမောက္ခံ ဥဒ္ဒိသိတုန္တိ.

တေန ခေါ ပန သမယေန အညတရသ္မိံ အာဝါသေ တဒဟုပေါသထေ တယော ဘိက္ခူ ဝိဟရန္တိ. အထ ခေါ တေသံ ဘိက္ခူနံ ဧတဒဟောသိ – ‘‘ဘဂဝတာ အနုညာတံ စတုန္နံ ပါတိမောက္ခံ ဥဒ္ဒိသိတုံ၊ မယဉ္စမှာ တယော ဇနာ၊ ကထံ နု ခေါ အမှေဟိ ဥပေါသထော ကာတဗ္ဗော’’တိ? ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ တိဏ္ဏံ ပါရိသုဒ္ဓိဥပေါသထံ ကာတုံ. ဧဝဉ္စ ပန၊ ဘိက္ခဝေ၊ ကာတဗ္ဗော. ဗျတ္တေန ဘိက္ခုနာ ပဋိဗလေန တေ ဘိက္ခူ ဉာပေတဗ္ဗာ –

‘‘သုဏန္တု မေ အာယသ္မန္တာ. အဇ္ဇုပေါသထော ပန္နရသော. ယဒါယသ္မန္တာနံ ပတ္တကလ္လံ၊ မယံ အညမညံ ပါရိသုဒ္ဓိဥပေါသထံ ကရေယျာမာ’’တိ.

ထေရေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ တေ ဘိက္ခူ ဧဝမဿု ဝစနီယာ – ‘‘ပရိသုဒ္ဓေါ အဟံ၊ အာဝုသော၊ ပရိသုဒ္ဓေါတိ မံ ဓာရေထ. ပရိသုဒ္ဓေါ အဟံ၊ အာဝုသော၊ ပရိသုဒ္ဓေါတိ မံ ဓာရေထ. ပရိသုဒ္ဓေါ အဟံ၊ အာဝုသော၊ ပရိသုဒ္ဓေါတိ မံ ဓာရေထာ’’တိ.

နဝကေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ တေ ဘိက္ခူ ဧဝမဿု ဝစနီယာ – ‘‘ပရိသုဒ္ဓေါ အဟံ၊ ဘန္တေ၊ ပရိသုဒ္ဓေါတိ မံ ဓာရေထ. ပရိသုဒ္ဓေါ အဟံ၊ ဘန္တေ၊ ပရိသုဒ္ဓေါတိ မံ ဓာရေထ. ပရိသုဒ္ဓေါ အဟံ၊ ဘန္တေ၊ ပရိသုဒ္ဓေါတိ မံ ဓာရေထာ’’တိ.

တေန ခေါ ပန သမယေန အညတရသ္မိံ အာဝါသေ တဒဟုပေါသထေ ဒွေ ဘိက္ခူ ဝိဟရန္တိ. အထ ခေါ တေသံ ဘိက္ခူနံ ဧတဒဟောသိ – ‘‘ဘဂဝတာ အနုညာတံ စတုန္နံ ပါတိမောက္ခံ ဥဒ္ဒိသိတုံ၊ တိဏ္ဏန္နံ ပါရိသုဒ္ဓိဥပေါသထံ ကာတုံ. မယဉ္စမှာ ဒွေ ဇနာ. ကထံ နု ခေါ အမှေဟိ ဥပေါသထော ကာတဗ္ဗော’’တိ? ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဒွိန္နံ ပါရိသုဒ္ဓိဥပေါသထံ ကာတုံ. ဧဝဉ္စ ပန၊ ဘိက္ခဝေ၊ ကာတဗ္ဗော. ထေရေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ နဝေါ ဘိက္ခု ဧဝမဿ ဝစနီယော – ‘‘ပရိသုဒ္ဓေါ အဟံ၊ အာဝုသော၊ ပရိသုဒ္ဓေါတိ မံ ဓာရေဟိ. ပရိသုဒ္ဓေါ အဟံ၊ အာဝုသော၊ ပရိသုဒ္ဓေါတိ မံ ဓာရေဟိ. ပရိသုဒ္ဓေါ အဟံ၊ အာဝုသော၊ ပရိသုဒ္ဓေါတိ မံ ဓာရေဟီ’’တိ.

နဝကေန ဘိက္ခုနာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ထေရော ဘိက္ခု ဧဝမဿ ဝစနီယော – ‘‘ပရိသုဒ္ဓေါ အဟံ၊ ဘန္တေ၊ ပရိသုဒ္ဓေါတိ မံ ဓာရေထ. ပရိသုဒ္ဓေါ အဟံ၊ ဘန္တေ၊ ပရိသုဒ္ဓေါတိ မံ ဓာရေထ. ပရိသုဒ္ဓေါ အဟံ၊ ဘန္တေ၊ ပရိသုဒ္ဓေါတိ မံ ဓာရေထာ’’တိ.

တေန ခေါ ပန သမယေန အညတရသ္မိံ အာဝါသေ တဒဟုပေါသထေ ဧကော ဘိက္ခု ဝိဟရတိ. အထ ခေါ တဿ ဘိက္ခုနော ဧတဒဟောသိ – ‘‘ဘဂဝတာ အနုညာတံ စတုန္နံ ပါတိမောက္ခံ ဥဒ္ဒိသိတုံ၊ တိဏ္ဏန္နံ ပါရိသုဒ္ဓိဥပေါသထံ ကာတုံ၊ ဒွိန္နံ ပါရိသုဒ္ဓိဥပေါသထံ ကာတုံ. အဟဉ္စမှိ ဧကကော. ကထံ နု ခေါ မယာ ဥပေါသထော ကာတဗ္ဗော’’တိ? ဘဂဝတော ဧတမတ္ထံ အာရောစေသုံ. ဣဓ ပန၊ ဘိက္ခဝေ၊ အညတရသ္မိံ အာဝါသေ တဒဟုပေါသထေ ဧကော ဘိက္ခု ဝိဟရတိ. တေန၊ ဘိက္ခဝေ၊ ဘိက္ခုနာ ယတ္ထ ဘိက္ခူ ပဋိက္ကမန္တိ ဥပဋ္ဌာနသာလာယ ဝါ၊ မဏ္ဍပေ ဝါ၊ ရုက္ခမူလေ ဝါ၊ သော ဒေသော သမ္မဇ္ဇိတွာ ပါနီယံ ပရိဘောဇနီယံ ဥပဋ္ဌာပေတွာ အာသနံ ပညပေတွာ ပဒီပံ ကတွာ နိသီဒိတဗ္ဗံ. သစေ အညေ ဘိက္ခူ အာဂစ္ဆန္တိ၊ တေဟိ သဒ္ဓိံ ဥပေါသထော ကာတဗ္ဗော. နော စေ အာဂစ္ဆန္တိ၊ အဇ္ဇ မေ ဥပေါသထောတိ အဓိဋ္ဌာတဗ္ဗော. နော စေ အဓိဋ္ဌဟေယျ၊ အာပတ္တိ ဒုက္ကဋဿ.

တတြ၊ ဘိက္ခဝေ၊ ယတ္ထ စတ္တာရော ဘိက္ခူ ဝိဟရန္တိ၊ န ဧကဿ ပါရိသုဒ္ဓိံ အာဟရိတွာ တီဟိ ပါတိမောက္ခံ ဥဒ္ဒိသိတဗ္ဗံ. ဥဒ္ဒိသေယျုံ စေ၊ အာပတ္တိ ဒုက္ကဋဿ. တတြ၊ ဘိက္ခဝေ၊ ယတ္ထ တယော ဘိက္ခူ ဝိဟရန္တိ၊ န ဧကဿ ပါရိသုဒ္ဓိံ အာဟရိတွာ ဒွီဟိ ပါရိသုဒ္ဓိဥပေါသထော ကာတဗ္ဗော. ကရေယျုံ စေ၊ အာပတ္တိ ဒုက္ကဋဿ. တတြ၊ ဘိက္ခဝေ၊ ယတ္ထ ဒွေ ဘိက္ခူ ဝိဟရန္တိ၊ န ဧကဿ ပါရိသုဒ္ဓိံ အာဟရိတွာ ဧကေန အဓိဋ္ဌာတဗ္ဗော. အဓိဋ္ဌဟေယျ စေ၊ အာပတ္တိ ဒုက္ကဋဿာတိ.