၉၂. အာပတ္တိပဋိကမ္မဝိဓိ

၁၆၉. တေန ခေါ ပန သမယေန အညတရော ဘိက္ခု တဒဟုပေါသထေ အာပတ္တိံ အာပန္နော ဟောတိ. အထ ခေါ တဿ ဘိက္ခုနော ဧတဒဟောသိ – ‘‘ဘဂဝတာ ပညတ္တံ ‘န သာပတ္တိကေန ဥပေါသထော ကာတဗ္ဗော’တိ. အဟဉ္စမှိ အာပတ္တိံ အာပန္နော. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ဣဓ ပန၊ ဘိက္ခဝေ၊ ဘိက္ခု တဒဟုပေါသထေ အာပတ္တိံ အာပန္နော ဟောတိ. တေန၊ ဘိက္ခဝေ၊ ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ၊ အာဝုသော၊ ဣတ္ထန္နာမံ အာပတ္တိံ အာပန္နော၊ တံ ပဋိဒေသေမီ’’တိ. တေန ဝတ္တဗ္ဗော – ‘‘ပဿသီ’’တိ. ‘‘အာမ ပဿာမီ’’တိ. ‘‘အာယတိံ သံဝရေယျာသီ’’တိ.

ဣဓ ပန၊ ဘိက္ခဝေ၊ ဘိက္ခု တဒဟုပေါသထေ အာပတ္တိယာ ဝေမတိကော ဟောတိ. တေန၊ ဘိက္ခဝေ၊ ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘အဟံ၊ အာဝုသော၊ ဣတ္ထန္နာမာယ အာပတ္တိယာ ဝေမတိကော၊ ယဒါ နိဗ္ဗေမတိကော ဘဝိဿာမိ၊ တဒါ တံ အာပတ္တိံ ပဋိကရိဿာမီ’’တိ ဝတွာ ဥပေါသထော ကာတဗ္ဗော၊ ပါတိမောက္ခံ သောတဗ္ဗံ၊ န တွေဝ တပ္ပစ္စယာ ဥပေါသထဿ အန္တရာယော ကာတဗ္ဗောတိ.

တေန ခေါ ပန သမယေန ဆဗ္ဗဂ္ဂိယာ ဘိက္ခူ သဘာဂံ အာပတ္တိံ ဒေသေန္တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ သဘာဂါ အာပတ္တိ ဒေသေတဗ္ဗာ. ယော ဒေသေယျ၊ အာပတ္တိ ဒုက္ကဋဿာတိ.

တေန ခေါ ပန သမယေန ဆဗ္ဗဂ္ဂိယာ ဘိက္ခူ သဘာဂံ အာပတ္တိံ ပဋိဂ္ဂဏှန္တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ သဘာဂါ အာပတ္တိ ပဋိဂ္ဂဟေတဗ္ဗာ. ယော ပဋိဂ္ဂဏှေယျ၊ အာပတ္တိ ဒုက္ကဋဿာတိ.