၄. ပဒဋ္ဌာနဟာရဝိဘင်္ဂဝိဘာဝနာ

၂၂. ယေန ယေန သံဝဏ္ဏနာဝိသေသဘူတေန ယုတ္တိဟာရဝိဘင်္ဂဘူတေန ပဉှာဝိဿဇ္ဇနာဒီနံ ယုတ္တာယုတ္တဘာဝေါ ဝိဘတ္တော၊ သော သံဝဏ္ဏနာဝိသေသဘူတော ယုတ္တိဟာရဝိဘင်္ဂေါ ပရိပုဏ္ဏော၊ ‘‘ကတမော ပဒဋ္ဌာနဟာရဝိဘင်္ဂေါ’’တိ ပုစ္ဆိတဗ္ဗတ္တာ ‘‘တတ္ထ ကတမော ပဒဋ္ဌာနော ဟာရော’’တိအာဒိ အာရဒ္ဓံ. တတ္ထ တတ္ထာတိ တေသု နိဒ္ဒိဋ္ဌေသု သောဠသသု ဒေသနာဟာရာဒီသု ဟာရေသု ကတမော သံဝဏ္ဏနာဝိသေသော ပဒဋ္ဌာနော ဟာရော ပဒဋ္ဌာနဟာရဝိဘင်္ဂေါတိ ပုစ္ဆတိ. ‘‘ဓမ္မံ ဒေသေသိ ဇိနော’’တိအာဒိနိဒ္ဒေသဿ ဣဒါနိ မယာ ဝုစ္စမာနော ‘‘အယံ ပဒဋ္ဌာနော ဟာရော’’တိအာဒိကော ဝိတ္ထာရသံဝဏ္ဏနာဝိသေသော ပဒဋ္ဌာနဟာရဝိဘင်္ဂေါတိ ဝိညေယျော. တေန ဝုတ္တံ – ‘‘တတ္ထ ကတမော ပဒဋ္ဌာနော ဟာရောတိအာဒိ ပဒဋ္ဌာနဟာရဝိဘင်္ဂေါ’’တိ (နေတ္တိ. အဋ္ဌ. ၂၂). ‘‘အယံ ဣဒါနိ ဝုစ္စမာနော ဝိတ္ထာရဘူတော ပဒဋ္ဌာနော ဟာရော ပိဋကတ္တယေ ဒေသိတေသု ဓမ္မေသု ကိံ နာမ ဓမ္မံ ဒေသယတိ သံဝဏ္ဏေတီ’’တိ ပုစ္ဆံ ဌပေတွာ ‘‘ဣဒံ အာသန္နကာရဏံ ဣမဿ အာသန္နဖလဿ ပဒဋ္ဌာန’’န္တိ နိယမေတွာ ဝိဘဇိတုံ ‘‘အယံ ပဒဋ္ဌာနော’’တိအာဒိ ဝုတ္တံ. တဿတ္ထော – သဗ္ဗေသု ဝိညေယျဓမ္မေသု ယာထာဝတော အသမ္ပဋိဝေဓော လက္ခဏံ ဧတိဿာ အဝိဇ္ဇာယာတိ သဗ္ဗဓမ္မယာထာဝအသမ္ပဋိဝေဓလက္ခဏာ၊ အဝိဇ္ဇာ၊ တဿာ အဝိဇ္ဇာယ အသုဘေ ‘‘သုဘ’’န္တိအာဒိဝိပလ္လာသာ ပဒဋ္ဌာနံ အာသန္နကာရဏံ. ဝိပလ္လာသေ သတိ အဝိဇ္ဇာ ဝတ္တတိ ဥပရူပရိ ဇာယတိ န ဟာယတိ၊ တသ္မာ ဝိပလ္လာသာ အဝိဇ္ဇာယ ပဒဋ္ဌာနံ အာသန္နကာရဏံ ဘဝန္တိ. အဝိဇ္ဇာယ ဝဋ္ဋမူလကတ္တာ တံ အာဒိံ ကတွာ ပဒဋ္ဌာနံ ဝိဘတ္တန္တိ ဒဋ္ဌဗ္ဗံ.

တဏှာယပိ ဝဋ္ဋမူလကတ္တာ တဒနန္တရံ တဏှာယ ပဒဋ္ဌာနံ ဝိဘဇိတုံ ‘‘အဇ္ဈောသာနလက္ခဏာ’’တိအာဒိ ဝုတ္တံ. တတ္ထ ပိယရူပံ သာတရူပန္တိ ပိယသဘာဝံ သာတသဘာဝံ စက္ခာဒိဓမ္မဇာတံ. ပိယနီယသာတနီယေ စက္ခာဒိကေ သတိ တဏှာ ဝတ္တတိ ဥပရူပရိ ဇာယတိ၊ တသ္မာ ပိယရူပံ သာတရူပံ တဏှာယ ပဒဋ္ဌာနံ အာသန္နကာရဏံ ဘဝတိ.

အဒိန္နာဒါနေ သတိ လောဘော ဝတ္တတိ၊ တသ္မာ အဒိန္နာဒါနံ လောဘဿ ပဒဋ္ဌာနံ ဘဝတိ. အဒိန္နာဒါနဉှိ ဧကဝါရံ ဥပ္ပန္နမ္ပိ အနာဒီနဝဒဿနတော လောဘဿ အာသန္နကာရဏံ ဘဝတွေဝ.

ကေသာဒီသု အသုဘေသု ပဝတ္တာယပိ သုဘသညာယ နီလာဒိဝဏ္ဏဒီဃာဒိသဏ္ဌာနဟသနာဒိဗျဉ္ဇနဂ္ဂဟဏလက္ခဏတ္တာ စက္ခုန္ဒြိယာဒီနံ အသံဝရော သုဘသညာယ ပဒဋ္ဌာနံ ဘဝတိ.

ဒုက္ခဒုက္ခာဒီသု ပဝတ္တာယပိ သုခသညာယ သာသဝဖဿူပဂမနလက္ခဏတ္တာ ရူပါဒီသု အဿာဒေါ သုခသညာယ ပဒဋ္ဌာနံ.

ရူပက္ခန္ဓာဒီသု အနိစ္စေသု ပဝတ္တာယပိ နိစ္စသညာယ သင်္ခတလက္ခဏာနံ ဓမ္မာနံ အသမနုပဿနလက္ခဏတ္တာ ရူပက္ခန္ဓာဒီသု နိစ္စဂ္ဂဟဏံ ဝိညာဏံ နိစ္စသညာယ ပဒဋ္ဌာနံ.

အနိစ္စဒုက္ခာနတ္တသင်္ခါတေသု ခန္ဓာဒီသု ပဝတ္တာယပိ အတ္တသညာယ အနိစ္စသညာဒုက္ခသညာနံ အသမနုပဿနလက္ခဏတ္တာ အဟံမမာဒိဝသေန ပဝတ္တော နာမကာယော အတ္တသညာယ ပဒဋ္ဌာနံ.

ဧဝံ အဝိဇ္ဇာဒီနံ အကုသလပက္ခာနံ ဓမ္မာနံ ပဒဋ္ဌာနံ ဒဿေတွာ ဣဒါနိ တပ္ပဋိပက္ခာနံ ဝိဇ္ဇာဒီနံ ဓမ္မာနံ ပဒဋ္ဌာနံ ဒဿေတုံ ‘‘သဗ္ဗဓမ္မသမ္ပဋိဝေဓလက္ခဏာ’’တိအာဒိ ဝုတ္တံ. သဗ္ဗေသု ဉေယျဓမ္မေသု ပဝတ္တာယ ဝိဇ္ဇာယ သဗ္ဗဓမ္မသမ္ပဋိဝေဓလက္ခဏတ္တာ သဗ္ဗံ နေယျံ ဝိဇ္ဇာယ ပဒဋ္ဌာနံ.

သမထဿ စိတ္တဝိက္ခေပသင်္ခါတဥဒ္ဓစ္စပဋိသံဟရဏသင်္ခါတဝိက္ခမ္ဘနလက္ခဏတ္တာ ပဋိဘာဂနိမိတ္တဘူတာ အသုဘာ သမထဿ ပဒဋ္ဌာနံ. အသုဘာယ ဟိ တဏှာပဋိပက္ခတ္တာ၊ တဏှာယ စ အဘာဝေ သမထော တိဋ္ဌတီတိ.

အဒိန္နာဒါနာ ဝေရမဏိဝသေန ပဝတ္တဿ အလောဘဿ ဣစ္ဆာဝစရပဋိသံဟရဏလက္ခဏတ္တာ အဒိန္နာဒါနာ ဝေရမဏီ အလောဘဿ ပဒဋ္ဌာနံ.

ပါဏာတိပါတာ ဝေရမဏိဝသေန ပဝတ္တဿ အဒေါသဿ အဗျာပဇ္ဇလက္ခဏတ္တာ ပါဏာတိပါတာ ဝေရမဏီ အဒေါသဿ ပဒဋ္ဌာနံ.

သမ္မာပဋိပတ္တိဝသေန ပဝတ္တဿ အမောဟဿ ဝတ္ထုအဝိပ္ပဋိပတ္တိလက္ခဏတ္တာ သမ္မာပဋိပတ္တိ အမောဟဿ ပဒဋ္ဌာနံ.

နိဗ္ဗိဒါဝသေန ပဝတ္တာယ အသုဘသညာယ ဝိနီလကဝိပုဗ္ဗကဂဟဏလက္ခဏတ္တာ နိဗ္ဗိဒါ အသုဘသညာယ ပဒဋ္ဌာနံ. နိဗ္ဗိဒါဉာဏေန ဟိ အနဘိရတိ ပဝတ္တတိ၊ အနဘိရတိယာ စ အသုဘသညာ ဌိတာတိ.

ဒုက္ခဝေဒနာဝသေန ပဝတ္တာယ ဒုက္ခသညာယ သာသဝဖဿပရိဇာနနလက္ခဏတ္တာ ဝေဒနာ ဒုက္ခသညာယ ပဒဋ္ဌာနံ.

ဥပ္ပါဒဝယဝသေန ပဝတ္တာယ အနိစ္စသညာယ သင်္ခတလက္ခဏာနံ ဓမ္မာနံ သမနုပဿနလက္ခဏတ္တာ ဥပ္ပါဒဝယာ အနိစ္စသညာယ ပဒဋ္ဌာနံ. ဥပ္ပါဒဝယဉှိ သမနုပဿိတွာ အနိစ္စသညာ ပဝတ္တာ.

ဓမ္မမတ္တသညာဝသေန ပဝတ္တာယ အနတ္တသညာယ သဗ္ဗဓမ္မအဘိနိဝေသလက္ခဏတ္တာ ဓမ္မသညာ အနတ္တသညာယ ပဒဋ္ဌာနံ.

ကာမရာဂဿ ရူပါဒိပဉ္စကာမဂုဏာရမ္မဏတ္တာ ပဉ္စ ကာမဂုဏာ ကာမရာဂဿ ပဒဋ္ဌာနံ.

ရူပသင်္ခါတေ ကာယေ အာရဗ္ဘ ပဝတ္တဿ ရူပရာဂဿ စက္ခာဒိပဉ္စိန္ဒြိယာနံ အနုသာရေန ပဝတ္တနတော ပဉ္စိန္ဒြိယာနိ ရူပါနိ ရူပရာဂဿ ပဒဋ္ဌာနံ.

ဘဝနိကန္တိဝသေန ပဝတ္တဿ ဘဝရာဂဿ ဆဠာယတနံ ပဒဋ္ဌာနံ. နိဗ္ဗတ္တဘဝါနုပဿိတာတိ ‘‘ဧဒိသံ အနိဋ္ဌံ ရူပံ မာ နိဗ္ဗတ္တတု၊ ဧဒိသံ ဣဋ္ဌံ ရူပံ နိဗ္ဗတ္တတု ဧဒိသီ ဒုက္ခာ ဝေဒနာ မာ နိဗ္ဗတ္တတု၊ ဧဒိသီ သုခါ ဝေဒနာ နိဗ္ဗတ္တတူ’’တိ ဧဝမာဒိနာ ပကာရေန ပဝတ္တာ ရူပါဘိနန္ဒနာ၊ သာ ပဉ္စန္နံ ဥပါဒါနက္ခန္ဓာနံ ပဒဋ္ဌာနံ.

ကမ္မဿကတညာဏဿ ပုဗ္ဗေနိဝါသာနုဿတိဉာဏာနုဂတတ္တာ ပုဗ္ဗေနိဝါသာနုဿတိဉာဏဒဿနံ ကမ္မဿကတညာဏဿ ပဒဋ္ဌာနံ.

ဩကပ္ပနံ လက္ခဏံ ယဿာ သဒ္ဓါယာတိ ဩကပ္ပနလက္ခဏာ သဒ္ဓါ. အဓိမုတ္တိ ပစ္စုပဋ္ဌာနံ ယဿာ သဒ္ဓါယာတိ အဓိမုတ္တိပစ္စုပဋ္ဌာနာ စ သဒ္ဓါ. အနာဝိလံ လက္ခဏံ ယဿ ပသာဒဿာတိ အနာဝိလလက္ခဏောတိ ပသာဒေါ. သမ္ပသီဒနံ ပစ္စုပဋ္ဌာနံ ယဿ ပသာဒဿာတိ သမ္ပသီဒနပစ္စုပဋ္ဌာနော စ ပသာဒေါ. သော ပန ပသာဒေါ သဒ္ဓါယ ဧဝ အဝတ္ထာဝိသေသောတိ ဝေဒိတဗ္ဗော. အဝေစ္စပသာဒေါ အဘိပတ္ထိယနလက္ခဏာယ သဒ္ဓါယ ပဒဋ္ဌာနံ၊ ဩကပ္ပနလက္ခဏာ သဒ္ဓါ အနာဝိလလက္ခဏဿ ပသာဒဿ ပဒဋ္ဌာနံ၊ စတုဗ္ဗိဓံ သမ္မပ္ပဓာနံ ဝီရိယံ အာရမ္ဘလက္ခဏဿ ဝီရိယဿ ပဒဋ္ဌာနံ၊ ကာယာဒိသတိပဋ္ဌာနံ အပိလာပနလက္ခဏာယ သတိယာ ပဒဋ္ဌာနံ၊ ဈာနသဟိတဿ သမာဓိဿ ဧကဂ္ဂလက္ခဏတ္တာ ဝိတက္ကာဒိဈာနာနိ သမာဓိဿ ပဒဋ္ဌာနံ၊ ပညာယ ကိစ္စပဇာနနအာရမ္မဏပဇာနနလက္ခဏတ္တာ သစ္စာနိ ပညာယ ပဒဋ္ဌာနံ.

‘‘ယေသံ အဝိဇ္ဇာဒီနံ ပဒဋ္ဌာနာနိ အာစရိယေန ဝိဘတ္တာနိ၊ တေ အဝိဇ္ဇာဒယော ကတမေသံ ဓမ္မာနံ ပဒဋ္ဌာနာနီ’’တိ ပုစ္ဆိတဗ္ဗတ္တာ တေ အဝိဇ္ဇာဒယောပိ ဣမေသံ ဓမ္မာနံ ပဒဋ္ဌာနာတိ ဒဿေတုံ ‘‘အပရော နယော’’တိအာဒိ ဝုတ္တံ. အဝိဇ္ဇာ အဿာဒမနသိကာရလက္ခဏဿ အယောနိသောမနသိကာရဿ ပဒဋ္ဌာနံ. အဝိဇ္ဇာယ ဟိ အာဒီနဝစ္ဆာဒနတော အယောနိသောမနသိကာရော ဇာတောတိ. သစ္စသမ္မောဟနလက္ခဏာ အဝိဇ္ဇာ ပုညာပုညာနေဉ္ဇာဘိသင်္ခါရာနံ ပဒဋ္ဌာနံ၊ ပုနဗ္ဘဝဝိရောဟနလက္ခဏာ တေဘူမကစေတနာ သင်္ခါရာ ဝိပါကဝိညာဏဿ ပဒဋ္ဌာနံ၊ ဩပပစ္စယိကသင်္ခါတေန ဥပပတ္တိဘဝဘာဝေန နိဗ္ဗတ္တိလက္ခဏံ ပဋိသန္ဓိဝိညာဏံ နာမရူပဿ ပဒဋ္ဌာနံ၊ နာမကာယရူပကာယသင်္ဃာတလက္ခဏံ နာမရူပံ ဆဠာယတနဿ ပဒဋ္ဌာနံ သဟဇာတာဒိပစ္စယဘာဝတော၊ စက္ခာဒီနံ ဆန္နံ ဣန္ဒြိယာနံ ပဝတ္တာနံ လက္ခဏံ ဆဠာယတနံ ဆဗ္ဗိဓဿ ဖဿဿ ယထာက္ကမံ ပဒဋ္ဌာနံ နိဿယာဒိပစ္စယဘာဝတော၊ စက္ခုပသာဒရူပါရမ္မဏံ စက္ခုဝိညာဏာဒိသန္နိပါတလက္ခဏော ဆဗ္ဗိဓော ဖဿော၊ တံ ဝေဒနာယ တေန ဆဗ္ဗိဓေန ဖဿေန သဟဇာတာယ ဆဗ္ဗိဓာယ ဝေဒနာယ ယထာက္ကမံ ပဒဋ္ဌာနံ သဟဇာတာဒိပစ္စယဘာဝတော၊ ဣဋ္ဌာနုဘဝနအနိဋ္ဌာနုဘဝနဣဋ္ဌာနိဋ္ဌာနုဘဝနလက္ခဏာ တိဝိဓာ ဝေဒနာ၊ တံ တဏှာယ တာယ တိဝိဓာယ ဝေဒနာယ ဝသေန ပဝတ္တာယ တဏှာယ ပဒဋ္ဌာနံ ဥပနိဿယာဒိပစ္စယဘာဝတော၊ သပရသန္တာနေသု အဇ္ဈောသာနလက္ခဏာ တဏှာ၊ တံ ဥပါဒါနဿ တာယ တဏှာယ ဝသေန ပဝတ္တဿ စတုဗ္ဗိဓဿ ဥပါဒါနဿ ပဒဋ္ဌာနံ ဥပနိဿယာဒိပစ္စယဘာဝတော. ‘‘သော ဝေဒနာယာ’’တိ စ ‘‘သာ တဏှာယာ’’တိ စ ‘‘သာ ဥပါဒါနဿာ’’တိ စ ပါဌေန ဘဝိတဗ္ဗံ၊ လိင်္ဂဝိပလ္လာသနိဒ္ဒေသော ဝါ သိယာ.

ယံ ဥပါဒါနံ ဩပပစ္စယိကံ ဥပပတ္တိက္ခန္ဓနိဗ္ဗတ္တကံ၊ တံ ဥပါဒါနံ ဒုဝိဓဿ ဘဝဿ ပဒဋ္ဌာနံ. ယော ကမ္မဘဝေါ နာမကာယရူပကာယသမ္ဘဝနလက္ခဏော၊ သော ကမ္မဘဝေါ ဇာတိယာ ပဒဋ္ဌာနံ. ယာ ဥပပတ္တိဘူတာ ဇာတိ ခန္ဓပါတုဘာဝလက္ခဏာ၊ တံ သာ ဇာတိ ဇရာယ ပဒဋ္ဌာနံ. ယာ ဇိဏ္ဏဇရာ ဥပဓိက္ခန္ဓပရိပါကလက္ခဏာ၊ တံ သာ ဇိဏ္ဏဇရာ မရဏဿ ပဒဋ္ဌာနံ. ယမ္ပိ ယဿ သမ္မုတိမရဏံ ဇီဝိတိန္ဒြိယုပစ္ဆေဒလက္ခဏံ၊ တမ္ပိ တဿ သမ္မုတိမရဏံ သောကဿ ပဒဋ္ဌာနံ. ပိယဿ မရဏံ စိန္တေန္တဿ ယေဘုယျေန သောကုပ္ပဇ္ဇနတော ယော သောကော ဉာတိအာဒိပိယေသု ဥဿုက္ကကာရကော၊ တံ သော သောကော ပရိဒေဝဿ ပဒဋ္ဌာနံ. ယော ပရိဒေဝေါ လာလပ္ပကာရကော၊ တံ သော ပရိဒေဝေါ ကာယိကဒုက္ခဿ ပဒဋ္ဌာနံ. ယံ ကာယိကံ ဒုက္ခံ ကာယသမ္ပီဠနလက္ခဏံ၊ တံ ကာယိကံ ဒုက္ခံ ဒေါမနဿဿ ပဒဋ္ဌာနံ. ယံ ဒေါမနဿံ စိတ္တသမ္ပီဠနလက္ခဏံ၊ တံ ဒေါမနဿံ ဥပါယာသဿ ပဒဋ္ဌာနံ. ယော ဥပါယာသော ဩဒဟနကာရကော အဝဒဟနကာရကော၊ တံ သော ဥပါယာသော ဘဝဿ ဥပါယာသဿ နိဿယသန္တာနဘဝဿ ပဒဋ္ဌာနံ.

ဘဝဿာတိ ဝုတ္တဘဝံ ဒဿေတုံ ‘‘ဣမာနီ’’တိအာဒိ ဝုတ္တံ. တတ္ထ ဘဝင်္ဂါနိ ကိလေသော ဘဝဿ အင်္ဂံ ကာရဏံ ကမ္မဝဋ္ဋဝိပါကဝဋ္ဋာနိ ဘဝသင်္ခါတာနိ အင်္ဂါနိ အဝယဝါနိ. ယဒါ ပစ္စုပ္ပန္နာဒိကာလေ သမဂ္ဂါနိ နိဗ္ဗတ္တာနိ ဘဝန္တိ၊ တဒါ သော ကိလေသဝဋ္ဋကမ္မဝဋ္ဋဝိပါကဝဋ္ဋသင်္ခါတော ဓမ္မသမူဟော ‘‘ဘဝဿာ’’တိ ဧတ္ထ ဘဝေါတိ ဒဋ္ဌဗ္ဗော. တံ ဘဝသင်္ခါတံ ကိလေသဝဋ္ဋကမ္မဝဋ္ဋဝိပါကဝဋ္ဋတ္တယံ သံသာရဿ ပဒဋ္ဌာနံ ပုရိမံ ပုရိမံ ဇာတိနိပ္ဖန္နကိလေသာဒိဝဋ္ဋေန သံသာရဿ အဗ္ဗောစ္ဆိန္နုပ္ပဇ္ဇနတော၊ ယော အရိယမဂ္ဂေါ နိယျာနိကလက္ခဏော၊ တံ သော အရိယမဂ္ဂေါ နိရောဓဿ နိဗ္ဗာနဿ ပဒဋ္ဌာနံ သမ္ပာပကဟေတုဘာဝတော.

ဗဟုဿုတော သဗ္ဗသိဿာဒီနံ ပတိဋ္ဌာနတ္တာ တိတ္ထံ ဝိယာတိ တိတ္ထံ၊ ဇာနာတီတိ ဉူ၊ တိတ္ထံ ဉူတိ တိတ္ထညူ၊ တိတ္ထညုနော ဘာဝေါ တိတ္ထညုတာ၊ သမ္မာပယိရုပါသနာ၊ သာ ပီတညုတာယ ပဒဋ္ဌာနံ. ဗဟုဿုတဿ ဟိ သမ္မာပယိရုပါသနာယ ဓမ္မူပသဉှိတံ ပါမောဇ္ဇံ ဇာယတိ၊ ပါမောဇ္ဇေန စ ကမ္မဋ္ဌာနဗြူဟနာ ဇာယတီတိ သပ္ပါယဓမ္မဿဝနေန ပီတိံ ဇာနာတီတိ ပီတညူ၊ ပီတညုနော ဘာဝေါ ပီတညုတာ၊ ကမ္မဋ္ဌာနဿ ဗြူဟနာ၊ သာ ပတ္တညုတာယ ပဒဋ္ဌာနံ. ကမ္မဋ္ဌာနဗြူဟနာယ ဟိ ဘာဝနာပတ္တဇာနနတာ ဇာယတီတိ ပတ္တညုတာ. ဘာဝနာပတ္တဇာနနတာ အတ္တညုတာယ ပဒဋ္ဌာနံ. ဘာဝနာပတ္တဇာနနတာယ ဟိ ပဉ္စဟိ ပဓာနိယင်္ဂေဟိ သမန္နာဂတဿ အတ္တနော ဇာနနတာ ဇာယတီတိ အတ္တညုတာ ပုဗ္ဗေကတပုညတာယ ပဒဋ္ဌာနံ.

ပဓာနိယင်္ဂေသု သမန္နာဂတတ္တဇာနနတာယ ဟိ ပုဗ္ဗေ ပုညကရဏံ ဇာတံ၊ ပုဗ္ဗေကတပုညတာ ပတိရူပဒေသဝါသဿ ပဒဋ္ဌာနံ. ပုဗ္ဗေ ဟိ ကတေန ပုညေန ပတိရူပဒေသဝါသော လဒ္ဓေါ၊ ပတိရူပဒေသဝါသော သပ္ပုရိသူပနိဿယဿ ပဒဋ္ဌာနံ. ပတိရူပဒေသဝါသေန ဟိ သပ္ပုရိသူပနိဿယော လဒ္ဓေါ၊ သပ္ပုရိသူပနိဿယော အတ္တသမ္မာပဏိဓာနဿ ပဒဋ္ဌာနံ. သပ္ပုရိသူပနိဿယေန ဟိ အတ္တသမ္မာပဏိဓာနံ ဇာတံ၊ အတ္တသမ္မာပဏိဓာနံ သီလာနံ ပဒဋ္ဌာနံ. အတ္တသမ္မာပဏိဓာနေန ဟိ သီလာနိ သမ္ပတိဋ္ဌိတာနိ၊ သီလာနိ အဝိပ္ပဋိသာရဿ ပဒဋ္ဌာနံ. အတ္တနိ ဟိ သမ္ပတိဋ္ဌိတံ သီလံ ပစ္စဝေက္ခန္တဿ ဝိပ္ပဋိသာရော နတ္ထေဝါတိ၊ အဝိပ္ပဋိသာရေန ပါမောဇ္ဇံ ဇာယတိ၊ တသ္မာ အဝိပ္ပဋိသာရော ပါမောဇ္ဇဿ ပဒဋ္ဌာနံ. ပါမောဇ္ဇေန ပီတိ ဇာယတိ၊ တသ္မာ ပါမောဇ္ဇံ ပီတိယာ ပဒဋ္ဌာနံ. ပီတိယာ ပဿဒ္ဓိ ဇာယတိ၊ တသ္မာ ပီတိ ပဿဒ္ဓိယာ ပဒဋ္ဌာနံ. ပဿဒ္ဓိယာ သုခံ ဇာယတိ၊ တသ္မာ ပဿဒ္ဓိ သုခဿ ပဒဋ္ဌာနံ. သုခေန သမာဓိ ဇာယတိ၊ တသ္မာ သုခံ သမာဓိဿ ပဒဋ္ဌာနံ. သမာဓိနာ ယထာဘူတဉာဏဒဿနံ ဇာယတိ၊ တသ္မာ သမာဓိ ယထာဘူတဉာဏဿ ပဒဋ္ဌာနံ. ယထာဘူတဉာဏဒဿနေန နိဗ္ဗိဒါဉာဏံ ဇာယတိ၊ တသ္မာ ယထာဘူတဉာဏဒဿနံ နိဗ္ဗိဒါယ ပဒဋ္ဌာနံ. နိဗ္ဗိဒါယ ဝိရာဂေါ ဇာယတိ၊ တသ္မာ နိဗ္ဗိဒါ ဝိရာဂဿ ပဒဋ္ဌာနံ. ဝိရာဂေန ဝိမုတ္တိ ဇာယတိ၊ တသ္မာ ဝိရာဂေါ ဝိမုတ္တိယာ ပဒဋ္ဌာနံ. ဝိမုတ္တိယာ ဝိမုတ္တိဉာဏဒဿနံ ဇာယတိ၊ တသ္မာ ဝိမုတ္တိ ဝိမုတ္တိဉာဏဒဿနဿ ပဒဋ္ဌာနံ. ဧဝံ ယထာဝုတ္တနယေန ယော ကောစိ ဓမ္မော ဥပနိဿယော ဟောတိ၊ ယော ကောစိ ဓမ္မော ပစ္စယော ဟောတိ၊ သဗ္ဗော သော ဓမ္မော အတ္တနော ပစ္စယုပ္ပန္နဿ ဓမ္မဿ ပဒဋ္ဌာနန္တိ ဒဋ္ဌဗ္ဗော.

‘‘ဥပနိဿယဓမ္မဿ၊ ပစ္စယဓမ္မဿ ဝါ ပစ္စယုပ္ပန္နဓမ္မဿ ပဒဋ္ဌာနဘာဝေါ ကေန သဒ္ဒဟိတဗ္ဗော’’တိ ဝတ္တဗ္ဗတ္တာ ‘‘တေနာဟာ’’တိအာဒိ ဝုတ္တံ. တတ္ထ တေနာတိ ယဿ ကဿစိ ဥပနိဿယဓမ္မဿ၊ ပစ္စယဓမ္မဿ စ ပစ္စယုပ္ပန္နဓမ္မဿ ပဒဋ္ဌာနဘာဝေန အာယသ္မာ မဟာကစ္စာနော ‘‘ဓမ္မံ ဒေသေတိ ဇိနော’’တိအာဒိကံ ယံ ဝစနံ အာဟ၊ တေန ဝစနေန တေသံ ဥပနိဿယဓမ္မပစ္စယဓမ္မာနံ ပဒဋ္ဌာနဘာဝေါ သဒ္ဒဟိတဗ္ဗောတိ. ‘‘ယထာဝုတ္တော ပဒဋ္ဌာနော ဟာရော ပရိပုဏ္ဏော ကိံ၊ ဥဒါဟု အညော နိဒ္ဓါရေတွာ ယောဇေတဗ္ဗော အတ္ထိ ကိ’’န္တိ ဝတ္တဗ္ဗတ္တာ ‘‘နိယုတ္တော ပဒဋ္ဌာနော ဟာရော’’တိ ဝုတ္တံ. ဣဓ ပါဠိယံ အဝိဘတ္တမ္ပိ ယထာလာဘဝသေန ပဒဋ္ဌာနော ဟာရော နီဟရိတွာ ယုတ္တော ယုဇ္ဇိတဗ္ဗော၊ ဝိဘဇိတဗ္ဗန္တိ ဝုတ္တံ ဟောတိ.

ဣတိ ပဒဋ္ဌာနဟာရဝိဘင်္ဂေ သတ္တိဗလာနုရူပါ ရစိတာ

ဝိဘာဝနာ နိဋ္ဌိတာ.

ပဏ္ဍိတေဟိ ပန အဋ္ဌကထာဋီကာနုသာရေန ဂမ္ဘီရတ္ထော ဝိတ္ထာရတော ဝိဘဇိတွာ ဂဟေတဗ္ဗောတိ.