၁၅. ပရိက္ခာရဟာရဝိဘင်္ဂဝိဘာဝနာ

၄၉. ယေန ယေန သံဝဏ္ဏနာဝိသေသဘူတေန ဝိဘင်္ဂေန ဒုက္ခသစ္စာဒီနံ ဧကတ္တတာဒယော ဝိဘတ္တာ၊ သော သံဝဏ္ဏနာဝိသေသဘူတော ပရိပုဏ္ဏော၊ ‘‘ကတမော ပရိက္ခာရဟာရဝိဘင်္ဂေါ နာမာ’’တိ ပုစ္ဆိတဗ္ဗတ္တာ ‘‘တတ္ထ ကတမော ပရိက္ခာရော ဟာရော’’တိအာဒိ ဝုတ္တံ. တတ္ထ တတ္ထာတိ တေသု နိဒ္ဒိဋ္ဌေသု သောဠသသု ဒေသနာဟာရာဒီသု ကတမော သံဝဏ္ဏနာဝိသေသော ပရိက္ခာရော ဟာရော ပရိက္ခာရဟာရဝိဘင်္ဂေါ နာမာတိ ပုစ္ဆတိ. ‘‘ယေ ဓမ္မာ ယံ ဓမ္မံ ဇနယန္တီ’’တိအာဒိနိဒ္ဒေသဿ ဣဒါနိ မယာ ဝုစ္စမာနော ‘‘ယော ဓမ္မော ယံ ဓမ္မံ ဇနယတိ၊ တဿ သော ပရိက္ခာရော’’တိအာဒိကော ပရိက္ခာရဘူတဿ ဟေတုနော စေဝ ပစ္စယဿ စ ဝိတ္ထာရသံဝဏ္ဏနာဝိသေသော ပရိက္ခာရဝိဘင်္ဂေါ နာမ.

‘‘ကတမော သံဝဏ္ဏေတဗ္ဗော ပရိက္ခာရော’’တိ ပုစ္ဆိတဗ္ဗတ္တာ ‘‘ယော ဓမ္မော’’တိအာဒိ ဝုတ္တံ. တတ္ထ ယော ဟေတုပစ္စယပ္ပကာရော ဓမ္မော ယံ ဖလဘူတံ ဓမ္မံ ဇနယတိ ဇနေတိ၊ တဿ ဖလဓမ္မဿ သော ဟေတုပစ္စယပ္ပကာရော ဓမ္မော ပရိက္ခာရော နာမ. ‘‘ကိံလက္ခဏော ပရိက္ခာရော’’တိ ပုစ္ဆိတဗ္ဗတ္တာ တထာ ပုစ္ဆိတွာ လက္ခဏဝိသေသံ ဒဿေတုံ ‘‘ကိံလက္ခဏော’’တိအာဒိ ဝုတ္တံ. အဋ္ဌကထာယံ ပန – ‘‘တတ္ထ ‘ယော ဓမ္မော ယံ ဓမ္မံ ဇနယတိ၊ တဿ သော ပရိက္ခာရော’တိ သင်္ခေပတော ပရိက္ခာရလက္ခဏံ ဝတွာ တံ ဝိဘာဂေန ဒဿေတုံ ‘ကိံလက္ခဏော’တိအာဒိ ဝုတ္တ’’န္တိ (နေတ္တိ. အဋ္ဌ. ၄၉) ဝုတ္တံ. ‘‘ကိတ္တကာ ဓမ္မာ ဇနယန္တီ’’တိ ပုစ္ဆိတဗ္ဗတ္တာ ‘‘ဒွေ ဓမ္မာ ဇနယန္တိ ဟေတု စ ပစ္စယော စာ’’တိ ဝုတ္တံ. ‘‘ဟေတုပိ ကာရဏံ၊ ပစ္စယောပိ ကာရဏံ၊ တသ္မာ ကာရဏာယေဝ ကေန လက္ခဏေန ဒွိဓာ ဝုတ္တာ’’တိ ဝတ္တဗ္ဗတ္တာ ‘‘တတ္ထ ကိံလက္ခဏော’’တိအာဒိ ဝုတ္တံ. ဇနိတဗ္ဗဖလတော အညေဟိ ဖလေဟိ အသာဓာရဏလက္ခဏော ဟေတု၊ သဗ္ဗဖလေဟိ သာဓာရဏလက္ခဏော ပစ္စယော၊ ဣမိနာ ဝိသေသလက္ခဏေန ဒွိဓာ ဝတ္တဗ္ဗာတိ အတ္ထော. ‘‘သာဓာရဏာသာဓာရဏဝိသေသော ကီဒိသော ဘဝေ’’တိ ပုစ္ဆိတဗ္ဗတ္တာ ‘‘ယထာ ကိံ ဘဝေ’’တိ ပုစ္ဆိတွာ ‘‘ယထာ အင်္ကုရဿာ’’တိအာဒိ ဝုတ္တံ. ယထာ ယော သာဓာရဏာသာဓာရဏဝိသေသော အတ္ထိ၊ တထာ သော သာဓာရဏာသာဓာရဏဝိသေသော ကိံ ဝိယ ဘဝေတိ အတ္ထော. အင်္ကုရဿ နိဗ္ဗတ္တိယာ ဗီဇံ အသာဓာရဏံ ယထာ၊ တထာ ဟေတု ဖလဿ နိဗ္ဗတ္တိယာ အသာဓာရဏော ဘဝေ. ပထဝီ စ အာပေါ စ အင်္ကုရဿ နိဗ္ဗတ္တိယာ သာဓာရဏာ ဘဝန္တိ ယထာ၊ တထာ ပစ္စယော ဖလဿ နိဗ္ဗတ္တိယာ သာဓာရဏော ဘဝေ. သဗ္ဗဖလဿ ပစ္စယတ္တာ အင်္ကုရဿ ဗီဇံ အသာဓာရဏံ ဇနကံ ဟေတု. ‘‘ကထံ ပထဝီ၊ အာပေါ စ သာဓာရဏာ ဇနကာတိ သဒ္ဒဟိတဗ္ဗာ’’တိ ပုစ္ဆိတဗ္ဗတ္တာ ‘‘အင်္ကုရဿ ဟီ’’တိအာဒိ ဝုတ္တံ. သမံ သမာနံ ဖလံ ဘဝါပေတီတိ သဘာဝေါ၊ ကော သော? ဗီဇံ ဟေတုယေဝ. ‘‘ကိံ ဟေတုပစ္စယာနံ ဝိသေသော ဗီဇင်္ကုရောပမာယေဝ ဒဿေတဗ္ဗော၊ ဥဒါဟု အညူပမာယပိ ဒဿေတဗ္ဗော’’တိ ဝတ္တဗ္ဗတ္တာ အညာယ ဥပမာယပိ ဝိသေသံ ဒဿေတုံ ‘‘ယထာ ဝါ ပနာ’’တိအာဒိ ဝုတ္တံ. ဣမာယ ဥပမာယပိ ဟေတုပစ္စယာနံ ဝိသေသော ဝိဇာနိတဗ္ဗောတိ အဓိပ္ပါယော.

ဗီဇင်္ကုရာဒီသု ဗာဟိရေသု ပရိက္ခာရဘူတာနံ ဟေတုပစ္စယာနံ ဝိသေသော အာစရိယေန ဝိဘတ္တော၊ အမှေဟိ စ ဉာတော၊ ‘‘ကထံ အဇ္ဈတ္တိကေသု ဝိဘတ္တော’’တိ ပုစ္ဆိတဗ္ဗတ္တာ ‘‘အယဉှိ သံသာရော’’တိအာဒိ ဝုတ္တံ. အထ ဝါ ‘‘ဗာဟိရေသု ပရိက္ခာရဘူတော ဟေတုပစ္စယော ယုတ္တော ဟောတု၊ ကထံ အဇ္ဈတ္တိကေသု ယုတ္တော’’တိ ဝတ္တဗ္ဗတ္တာ ‘‘အယဉှိ သံသာရော’’တိအာဒိ ဝုတ္တံ. အဋ္ဌကထာယံ ပန – ‘‘ဧဝံ ဗာဟိရံ ဟေတုပစ္စယဝိဘာဂံ ဒဿေတွာ ဣဒါနိ အဇ္ဈတ္တိကံ ဒဿေတုံ ‘အယဉှိ သံသာရော’တိအာဒိ ဝုတ္တ’’န္တိ (နေတ္တိ. အဋ္ဌ. ၄၉) ဝုတ္တံ. ဟေတုပစ္စယေဟိ သဟ သံသာရော ဘဝတီတိ သဟေတုပစ္စယော. အယံ သံသာရော ဟိ ယသ္မာ သဟေတုပစ္စယော ဟုတွာ နိဗ္ဗတ္တော၊ တသ္မာ အဇ္ဈတ္တိကေပိ ပရိက္ခာရဘူတော ဟေတုပစ္စယော ယုတ္တောယေဝါတိ ဒဋ္ဌဗ္ဗောတိ အဓိပ္ပါယော.

သော ဣမဿ သံသာရဿ သဟေတုပစ္စယတ္တံ ယဒိ ဘဂဝတာ ဝုတ္တံ၊ ဧဝံ သတိ အမှေဟိ သဒ္ဒဟိတဗ္ဗံ၊ ‘‘ကထံ သဒ္ဒဟိတဗ္ဗ’’န္တိ ဝတ္တဗ္ဗတ္တာ ‘‘ဧဝဉှီ’’တိအာဒိ ဝုတ္တံ. ဧဝန္တိ ဣမိနာ အဝိဇ္ဇာဒိနာ ဟေတုပစ္စယေန သဗ္ဗော ပဋိစ္စသမုပ္ပါဒေါ သံသာရောတိ နိဗ္ဗတ္တောတိ ဘဂဝတာ သံသာရဿ သဟေတုပစ္စယတ္တံ ဝုတ္တံ၊ တသ္မာ သဒ္ဒဟိတဗ္ဗံ. အဝိဇ္ဇာဒယော သင်္ခါရာဒီနံ ပစ္စယော ဟောတု၊ ‘‘ကတမော အဝိဇ္ဇာယ ဟေတူ’’တိ ပုစ္ဆိတဗ္ဗတ္တာ ‘‘ဣတိ အဝိဇ္ဇာ အဝိဇ္ဇာယ ဟေတူ’’တိ ဝုတ္တံ. ‘‘ကတမော အဝိဇ္ဇာယ ပစ္စယော’’တိ ပုစ္ဆိတဗ္ဗတ္တာ ‘‘အယောနိသော မနသိကာရော ပစ္စယော’’တိ ဝုတ္တံ. ‘‘ကတမာ အဝိဇ္ဇာ ကတမာယ အဝိဇ္ဇာယ ဟေတူ’’တိ ပုစ္ဆိတဗ္ဗတ္တာ ‘‘ပုရိမိကာ အဝိဇ္ဇာ ပစ္ဆိမိကာယ အဝိဇ္ဇာယ ဟေတူ’’တိ ဝုတ္တံ. ‘‘ကတမာ ပုရိမိကာ အဝိဇ္ဇာ ကတမာ ပစ္ဆိမိကာ အဝိဇ္ဇာ’’တိ ပုစ္ဆိတဗ္ဗတ္တာ ‘‘တတ္ထာ’’တိအာဒိ ဝုတ္တံ. ‘‘အဝိဇ္ဇာပရိယုဋ္ဌာနဿ ဟေတုဘူတော ပုရိမော အဝိဇ္ဇာနုသယော သမနန္တရောဝ ကိံ၊ ဥဒါဟု ပရမ္ပရဟေတုပိ ဟောတီ’’တိ ပုစ္ဆိတဗ္ဗတ္တာ ‘‘ဗီဇင်္ကုရော ဝိယာ’’တိအာဒိ ဝုတ္တံ. ဗီဇင်္ကုရောတိ ဗီဇာနံ အင်္ကုရောတိ ဗီဇင်္ကုရော၊ ဗီဇာနံ သမနန္တရဟေတုတာယ အင်္ကုရော နိဗ္ဗတ္တတိ ဝိယ. ယတ္ထ ရုက္ခာဒိကေ ယံ ဖလံ နိဗ္ဗတ္တတိ၊ တသ္မိံ ရုက္ခာဒိကေ နိဗ္ဗတ္တဿ အဿ ဖလဿ ဣဒံ ဗီဇံ ပန ပရမ္ပရဟေတုတာယ ဟေတုဘူတံ ဘဝတိ.

‘‘ဗီဇံ ပန ဧကံယေဝ ဟောတိ၊ ကထံ ဒွိဓာ ဝတ္တဗ္ဗ’’န္တိ ဝတ္တဗ္ဗတ္တာ ‘‘ဒုဝိဓော ဟီ’’တိအာဒိ ဝုတ္တံ၊ သမနန္တရကာလပရမ္ပရကာလဘေဒေန ဟေတုပိ ဒုဝိဓော ဟောတိယေဝါတိ အတ္ထော. ဗီဇဘူတော ဟေတု ဒုဝိဓော ယထာ၊ ဧဝံ အဝိဇ္ဇာယ ဟေတုဘူတော အဝိဇ္ဇာနုသယောပိ သမနန္တရဟေတု စ ပရမ္ပရဟေတု စာတိ ကာလဘေဒေန ဒုဝိဓော ဘဝတိ၊ သမနန္တရော အဝိဇ္ဇာနုသယော သမနန္တရဿ အဝိဇ္ဇာပရိယုဋ္ဌာနဿ သမနန္တရဟေတု ဟောတိ. ပုရိမတရော အဝိဇ္ဇာနုသယော ပစ္ဆိမတရဿ အဝိဇ္ဇာပရိယုဋ္ဌာနဿ ပရမ္ပရဟေတု ဟောတိ. ဣတိ ဗီဇဘူတော အသာဓာရဏော ဟေတု၊ ပထဝီအာပါဒိကော သာဓာရဏော ပစ္စယောတိ ဝိသေသော ပါကဋော ယထာ၊ ဧဝံ အဝိဇ္ဇာနုသယော အသာဓာရဏော ဟေတု၊ အယောနိသောမနသိကာရော သာဓာရဏော ပစ္စယောတိ ဝိသေသော ဒဋ္ဌဗ္ဗော.

‘‘ဧတ္တကေနေဝ ဟေတုပစ္စယာနံ ဝိသေသော ဝတ္တဗ္ဗော’’တိ ဝတ္တဗ္ဗတ္တာ ‘‘ယထာ ဝါ ပန ထာလကဉ္စာ’’တိအာဒိ ဝုတ္တံ. အဋ္ဌကထာယံ ပန – ‘‘ယထာ ဝါ ပနာတိအာဒိနာပိ ဟေတုပစ္စယဝိဘာဂမေဝ ဒဿေတီ’’တိ ဝုတ္တံ. တတ္ထ ပဒီပဿ ပစ္စယဘူတံ ထာလကဉ္စ ဝဋ္ဋိ စ တေလဉ္စ ပဒီပဿ သဘာဝဟေတု သမာနဟေတု န ဟောတီတိ ယောဇနာ. ‘‘ပဒီပဿ ပစ္စယဘူတမ္ပိ ထာလကာဒိကံ သဘာဝဟေတု န ဟောတီတိ ကသ္မာ သဒ္ဒဟိတဗ္ဗ’’န္တိ ဝတ္တဗ္ဗတ္တာ ‘‘န ဟိ သက္ကာ’’တိအာဒိ ဝုတ္တံ. ပဒီပဿ ပစ္စယဘူတံ အနဂ္ဂိကံ အဂ္ဂိရဟိတံ ထာလကဉ္စ ဝဋ္ဋိဉ္စ တေလဉ္စ ဒီပေတုံ ဇာလေတုံ ဟိ ယသ္မာ န သက္ကာ၊ တသ္မာ ပုရိမော ပဒီပေါ ပစ္ဆိမဿ ပဒီပဿ သဘာဝဟေတု ဟောတိ ဝိယ၊ ဧဝံ ထာလကာဒိကံ သဘာဝဟေတု န ဟောတိ. ဣတိ ဧဝံပကာရော သဘာဝေါ သမာနော ပဒီပေါ ဟေတု ဟောတိ ယထာ၊ ပရဘာဝေါ အသမာနော ထာလကာဒိကော ပစ္စယော ဟောတိ ယထာ စ၊ တထာ အဇ္ဈတ္တိကော သဘာဝေါ ဟေတု ဟောတိ၊ ဗာဟိရော အသမာနော ပစ္စယော ဟောတိ. ဇနကော အဝိဇ္ဇာနုသယော အဝိဇ္ဇာပရိယုဋ္ဌာနဿ ဟေတု ဟောတိ၊ ပရိဂ္ဂါဟကော ဥပတ္ထမ္ဘကော ပစ္စယော ဟောတိ. အညေဟိ ဖလေဟိ အသာဓာရဏော ဟေတု ဟောတိ၊ သဗ္ဗေဟိ ဖလေဟိ သာဓာရဏော ပစ္စယော ဟောတီတိ ယောဇေတွာ ပဒီပေါပမာယပိ ဟေတုပစ္စယာနံ ပါကဋော ဝိသေသော ဒဋ္ဌဗ္ဗောတိ အဓိပ္ပါယော.

ဟေတုပစ္စယပ္ပဘေဒံ ကာရဏံ ပရိက္ခာရောတိ အာစရိယေန ဝုတ္တံ၊ တဿ ကာရဏဿ ကာရဏဘာဝေါ စ ဖလာပေက္ခော ဟောတိ၊ တသ္မာ ‘‘ယော ကာရဏဘာဝေါ ယေနာကာရေန ဟောတိ၊ ကတမော သော ကာရဏဘာဝေါ၊ ကတမော သော အာကာရော’’တိ ပုစ္ဆိတဗ္ဗတ္တာ စ ‘‘ယံ ဖလံ ယေန ဝိသေသေန ဟောတိ၊ ကတမံ တံ ဖလံ၊ ကတမော သော ဝိသေသော’’တိ ပုစ္ဆိတဗ္ဗတ္တာ စ ‘‘ကာရဏဖလာနံ ယော သမ္ဗန္ဓော ဟောတိ၊ ကတမော သော သမ္ဗန္ဓော’’တိ ပုစ္ဆိတဗ္ဗတ္တာ စ တံ သဗ္ဗံ ဝိဘာဝေတုံ ‘‘အဝုပစ္ဆေဒတ္ထော’’တိအာဒိ ဝုတ္တံ. အယမနုသန္ဓျတ္ထော စ အဋ္ဌကထာယံ ‘‘ဣဒါနိ ယသ္မာ ကာရဏံ ‘ပရိက္ခာရော’တိ ဝုတ္တံ၊ ကာရဏဘာဝေါ စ ဖလာပေက္ခာယ၊ တသ္မာ ကာရဏဿ ယော ကာရဏဘာဝေါ ယထာ စ သော ဟောတိ၊ ယဉ္စ ဖလံ၊ ယော စ တဿ ဝိသေသော၊ ယော စ ကာရဏဖလာနံ သမ္ဗန္ဓော၊ တံ သဗ္ဗံ ဝိဘာဝေတုံ ‘အဝုပစ္ဆေဒတ္ထော’တိအာဒိ ဝုတ္တ’’န္တိ (နေတ္တိ. အဋ္ဌ. ၄၉) ဣမိနာ ဝုတ္တောတိ ဒဋ္ဌဗ္ဗော.

တတ္ထ အဝုပစ္ဆိန္နဿ ဟေတုပစ္စယသင်္ခါတဿ ကာရဏဿ ယော အနုပစ္ဆေဒတ္ထော အတ္ထိ၊ သော အနုပစ္ဆေဒတ္ထော သန္တတိအတ္ထော ဟောတိ ဖလေန သမ္ဗန္ဓတ္တာ၊ ယဉ္စ ကာရဏံ အတ္တနော ဖလဿ ဇနကံ ဥပတ္ထမ္ဘကံ ဟုတွာ နိရုဇ္ဈတိ၊ သော အနုပစ္ဆိန္နော ဧဝ နာမ ဟောတီတိ. ယဉ္စ ဖလံ အညဿ ကာရဏံ ဟုတွာ နိရုဇ္ဈတိ၊ တသ္မိံ အနုပစ္ဆိန္နေ တဿ စ သန္တတိအတ္ထော ဟောတိ. ယံ ပန ဖလံ အညဿ ဖလဿ ကာရဏံ အဟုတွာ နိရုဇ္ဈတိ၊ တံ ဥပစ္ဆိန္နံ ဟောတိ၊ ယထာ တံ အရဟတော စုတိစိတ္တန္တိ. ကာရဏတော နိဗ္ဗတ္တဿ ဖလဿ ယော နိဗ္ဗတ္တိအတ္ထော အတ္ထိ၊ သော နိဗ္ဗတ္တိအတ္ထော ဖလတ္ထော ဟောတိ. ပဋိသန္ဓိက္ခန္ဓာနံ ယော ပဋိသန္ဓိအတ္ထော ပဋိသန္ဒဟနတ္ထော အတ္ထိ၊ သော ပဋိသန္ဓိအတ္ထော ပုနဗ္ဘဝတ္ထော ပုနဗ္ဘဝနတ္ထော ဟောတိ. ကိလေသာနံ ယော ပလိဗောဓတ္ထော သန္တာနေ ဥပ္ပဇ္ဇနတ္ထော အတ္ထိ၊ သော ပလိဗောဓတ္ထော ပရိယုဋ္ဌာနတ္ထော ဟောတိ. ကိလေသာနံ မဂ္ဂေန ယော အသမုဂ္ဃါတတ္ထော အတ္ထိ၊ သော အသမုဂ္ဃါတတ္ထော အနုသယတ္ထော ဟောတိ. အဝိဇ္ဇာယ စတုန္နံ သစ္စာနံ ယော အသမ္ပဋိဝေဓတ္ထော အတ္ထိ၊ သော အသမ္ပဋိဝေဓတ္ထော အဝိဇ္ဇတ္ထော ဟောတိ. အရဟတ္တမဂ္ဂေန ယော အပရိညာတတ္ထော အတ္ထိ၊ သော အပရိညာတတ္ထော ဝိညာဏဿ ပဋိသန္ဓိဝိညာဏဿ ဗီဇတ္ထော ဟောတိ.

ဧတ္တာဝတာ ကာရဏဘာဝေါ စ ကာရဏာကာရော စ ဖလဉ္စ ဖလဝိသေသော စ အာစရိယေန ဝိဘတ္တော၊ အမှေဟိ စ ဉာတော၊ ‘‘ကတမော ပရမ္ပရဟေတုပစ္စယတ္ထော၊ ကတမော စ သမ္ဗန္ဓတ္ထော’’တိ ပုစ္ဆိတဗ္ဗတ္တာ ‘‘ယတ္ထ အဝုပစ္ဆေဒေါ’’တိအာဒိ ဝုတ္တံ. ယတ္ထ ယဿံ ရူပါရူပပဝတ္တိယံ အဝုပစ္ဆိန္နဿ ဟေတုပစ္စယပ္ပဘေဒဿ ကာရဏဿ ယော အဝုပစ္ဆေဒေါ အတ္ထိ၊ သော အဝုပစ္ဆေဒေါ တတ္ထ တိဿံ ရူပါရူပပဝတ္တိယံ သန္တတိ ဟောတိ. ယတ္ထ ယဿံ ရူပါရူပပဝတ္တိယံ ယာ သန္တတိ အတ္ထိ၊ သာ သန္တတိတတ္ထ ရူပါရူပပဝတ္တိယံ နိဗ္ဗတ္တိ ဟောတီတိအာဒိနာ ယောဇေတွာ ပရမ္ပရဟေတုအာဒိကော ဝိညာတဗ္ဗော.

သီလက္ခန္ဓောတိ ပရိသုဒ္ဓသီလက္ခန္ဓော. သမာဓိက္ခန္ဓဿာတိ မဟဂ္ဂတက္ခန္ဓဿ၊ သမာဓိပဋ္ဌာနော ဟိ မဟဂ္ဂတဓမ္မော. ပညာက္ခန္ဓောတိ မဂ္ဂဖလပညာပဓာနက္ခန္ဓော. သော ဟိ ဝိမုတ္တိဉာဏဒဿနသင်္ခါတဿ ပစ္စဝေက္ခဏဉာဏက္ခန္ဓဿ ပစ္စယော ဟောတိ. တိတ္ထညုတာဒီနံ အတ္ထော ပဒဋ္ဌာနဟာရဝိဘင်္ဂဝဏ္ဏနာယံ ဝုတ္တောဝ.

သဘာဝေါ ဟေတူတိ အာစရိယေန ဝုတ္တော၊ ‘‘ကီဒိသော သော သဘာဝေါ ဟေတူ’’တိ ပုစ္ဆိတဗ္ဗတ္တာ ‘‘ယထာ ဝါ ပန စက္ခုဉ္စ ပဋိစ္စာ’’တိအာဒိ ဝုတ္တံ. စက္ခုဝိညာဏံ စက္ခုဉ္စ စက္ခုန္ဒြိယဉ္စ ပဋိစ္စ နိဿယံ ကတွာ ရူပေ ပဋိစ္စ အာရမ္မဏံ ကတွာ ဥပ္ပဇ္ဇတိ. တတ္ထ စက္ခာဒီသု စက္ခုန္ဒြိယံ အာဓိပတေယျပစ္စယတာယ ဣန္ဒြိယပစ္စယတာယ စက္ခုဝိညာဏဿ ပစ္စယော၊ ရူပါရမ္မဏံ ပုရေဇာတာရမ္မဏပစ္စယတာယ ပစ္စယော၊ အာလောကော သန္နိဿယတာယ ဥပနိဿယတာယ ပစ္စယော ဟောတိ. သော ပစ္စယော ဟောန္တော ဖလေန စက္ခုဝိညာဏေန အသမာနတ္တာ သဘာဝေါ ဟေတု န ဟောတိ၊ ပစ္စယော စ ဟောတိ မနသိကာရော. ကိရိယမနောဓာတု ပန ဖလေန စက္ခုဝိညာဏေန ဝိညာဏဘာဝေန သမာနတ္တာ သဘာဝေါ ဟေတု ဟောတိ ယထာ၊ ဧဝံ သင်္ခါရာ နာမက္ခန္ဓဘာဝေန သမာနတ္တာ ဝိညာဏဿ ပစ္စယာ ဟောန္တာ သဘာဝေါ ဟေတု ဟောန္တိ. ဝိညာဏံ နာမရူပေန ဧကသန္တတိဝသေန သမာနတ္တာ နာမရူပဿ ပစ္စယော ဟောန္တံ သဘာဝေါ ဟေတု ဟောတိ. ဣမိနာ နယေန ‘‘နာမရူပံ သဠာယတနဿာ’’တိအာဒီသုပိ အတ္ထော ဝေဒိတဗ္ဗော. ဧဝံ ဝုတ္တပ္ပကာရော ဟေတု၊ ပစ္စယော ဇနကော၊ ဥပတ္ထမ္ဘကော စ ယော ကောစိ ဥပနိဿယော ဗလဝပစ္စယော ဟောတိ၊ သဗ္ဗော သော ဟေတုပစ္စယော ဇနကဥပတ္ထမ္ဘကော ဇနိတဗ္ဗုပတ္ထမ္ဘိယဿ ဖလဿ ပရိက္ခရဏတော အဘိသင်္ခရဏတော နိပ္ပရိယာယတော ပရိက္ခာရော နာမ.

‘‘ဝုတ္တပ္ပကာရော ဟေတုပစ္စယော ပရိက္ခာရော နာမာတိ ကေန အမှေဟိ သဒ္ဒဟိတဗ္ဗော’’တိ ဝတ္တဗ္ဗတ္တာ ‘‘တေနာဟာ’’တိအာဒိ ဝုတ္တံ. တေန ကာရဏဘူတေန သဗ္ဗဿ ဟေတုပစ္စယဿ ပရိက္ခာရဘာဝေန အာယသ္မာ မဟာကစ္စာနော ‘‘ယေ ဓမ္မာ ယံ ဓမ္မံ ဇနယန္တီ’’တိ ယံ ဝစနံ အာဟ၊ တေန ဝစနေန သဒ္ဒဟိတဗ္ဗော၊ ‘‘ယေ ဓမ္မာ ယံ ဓမ္မံ ဇနယန္တီ’’တိ ဝစနံ နိဿာယ တုမှေဟိ သလ္လက္ခေတဗ္ဗောတိ အဓိပ္ပါယော.

‘‘ဧတ္တကောဝ ပရိက္ခာရော ဟာရော ယုဉ္ဇိတဗ္ဗော’’တိ ဝတ္တဗ္ဗတ္တာ ‘‘နိယုတ္တော ပရိက္ခာရော ဟာရော’’တိ ဝုတ္တံ၊ ယော ယော ပရိက္ခာရော ဟာရော ယုဉ္ဇိတဗ္ဗော၊ သော သော ပရိက္ခာရော ဟာရော နီဟရိတွာ ယုတ္တော ယုဉ္ဇိတဗ္ဗောတိ.

ဣတိ ပရိက္ခာရဟာရဝိဘင်္ဂေ သတ္တိဗလာနုရူပါ ရစိတာ

ဝိဘာဝနာ နိဋ္ဌိတာ.

ပဏ္ဍိတေဟိ ပန အဋ္ဌကထာဋီကာနုသာရေန ဂမ္ဘီရတ္ထော ဝိတ္ထာရတော ဝိဘဇိတွာ ဂဟေတဗ္ဗောတိ.