၅. ပရိဘောဂမယပုညကထာဝဏ္ဏနာ
၄၈၅. တဿာ လဒ္ဓိယာတိ ပဉ္စန္နံ ဝိညာဏာနံ သမောဓာနံ ဟောတီတိ လဒ္ဓိယာ. ဧတေသန္တိ ဝတ္တမာနစိတ္တပရိဘောဂမယပုညာနံ.
၄၈၆. အယံ ဝါဒေါ ဟီယတိ ပရိဘောဂဿေဝ အဘာဝတော. စာဂစေတနာယ ဧဝ ပုညဘာဝေါ၊ န စိတ္တဝိပ္ပယုတ္တဿ. ဧဝန္တိ ဣမိနာ ပကာရေန၊ အပရိဘုတ္တေ ဒေယျဓမ္မေ ပုညဘာဝေနာတိ အတ္ထော. အပရိဘုတ္တေ ဒေယျဓမ္မေ ပုညဘာဝတော ဧဝ ဟိ ပုထုဇ္ဇနကာလေ ဒိန္နံ အရဟာ ဟုတွာ ပရိဘုဉ္ဇန္တေ တမ္ပိ ပုထုဇ္ဇနေ ဒါနမေဝါတိ နိစ္ဆိတံ. ပရဝါဒီပဋိက္ခေပမုခေန သကဝါဒံ ပတိဋ္ဌာပေတိ ပဌမော အတ္ထဝိကပ္ပေါ၊ ဒုတိယော ပန ဥဇုကမေဝ သကဝါဒံ ပတိဋ္ဌာပေတီတိ အယမေတေသံ ဝိသေသော.
ပရိဘောဂမယပုညကထာဝဏ္ဏနာ နိဋ္ဌိတာ.