၆. ဣတောဒိန္နကထာဝဏ္ဏနာ

၄၈၈-၄၉၁. တေနေဝ စီဝရာဒိဒါနေနာတိ အနုမောဒနံ ဝိနာ ဒါယကေန ပဝတ္တိတစီဝရာဒိဒါနေန. တေနာဟ ‘‘သယံကတေန ကမ္မုနာ ဝိနာပီ’’တိ. ဣမိနာ ကာရဏေနာတိ အနုမောဒိတတ္တာဝ တေသံ တတ္ထ ဘောဂါ ဥပ္ပဇ္ဇန္တီတိ ဧတေန ကာရဏေန. ယဒိ ယန္တိအာဒိ ပရဝါဒိနော လဒ္ဓိပတိဋ္ဌာပနာကာရဒဿနံ. တတ္ထ ယဒိ န ယာပေယျုံ၊ ကထံ အနုမောဒေယျုံ၊ စိတ္တံ ပသာဒေယျုံ ၊ ပီတိံ ဥပ္ပါဒေယျုံ၊ သောမနဿံ ပဋိလဘေယျုန္တိ ဧကစ္စေ အညေ ပေတေ အနုမောဒနာဒီနိ ကတွာ ယာပေန္တေ ဒိသွာ အနုမောဒနာဒီနိ ကရောန္တိ၊ တသ္မာ တေ ဣတော ဒိန္နေန ယာပေန္တီတိ အဓိပ္ပါယော.

ဣတောဒိန္နကထာဝဏ္ဏနာ နိဋ္ဌိတာ.