၄. ဉာဏကထာဝဏ္ဏနာ

၆၁၄-၆၁၅. ‘‘အန္ဓကာ’’တိ ဝုတ္တာ ပုဗ္ဗသေလိယအပရသေလိယရာဇဂိရိကသိဒ္ဓတ္ထိကာပိ ယေဘုယျေန မဟာသံဃိကာ ဧဝါတိ ဝုတ္တံ ‘‘ပုဗ္ဗေ။ပေ။ ဘဝေယျု’’န္တိ. တတ္ထ အညေတိ ဝစနံ ဒွိန္နံ ကထာနံ ဥဇုဝိပစ္စနီကဘာဝတော. ပုရိမကာနဉှိ စက္ခုဝိညာဏာဒိသမင်္ဂီ ‘‘ဉာဏီ’’တိ ဝုစ္စတိ၊ ဣမေသံ သော ဧဝ ‘‘ဉာဏီ’’တိ န ဝတ္တဗ္ဗောတိ ဝုတ္တော. ရာဂဝိဂမော ရာဂဿ သမုစ္ဆိန္ဒနံ၊ တထာ အညာဏဝိဂမော. ယထာ သမုစ္ဆိန္နာဝိဇ္ဇော ‘‘ဉာဏီ’’တိ၊ ပဋိပက္ခတော ‘‘အညာဏီ’’တိ၊ ဧဝံ အသမုစ္ဆိန္နာဝိဇ္ဇော ‘‘အညာဏီ’’တိ၊ ပဋိပက္ခတော ‘‘ဉာဏီ’’တိ ဝုတ္တော. အညာဏဿ ဝိဂတတ္တာ သော ‘‘ဉာဏီ’’တိ ဝတ္တဗ္ဗတံ အာပဇ္ဇတိ၊ န ပန သတတံ သမိတံ ဉာဏဿ ပဝတ္တနတောတိ အဓိပ္ပါယော.

ဉာဏကထာဝဏ္ဏနာ နိဋ္ဌိတာ.