၇. ဣဒ္ဓိဗလကထာဝဏ္ဏနာ

၆၂၁-၆၂၄. ယသ္မိံ အာယုကပ္ပေ ကမ္မက္ခယေန မရဏံ ဟောတိ၊ တံ သန္ဓာယ ဝုတ္တံ ‘‘ကမ္မဿ ဝိပါကဝသေနာ’’တိ၊ ယသ္မိံ ပန အာယုက္ခယေန မရဏံ ဟောတိ၊ တံ သန္ဓာယ ‘‘ဝဿဂဏနာယာ’’တိ. တတ္ထ ‘‘န စ တာဝ ကာလံ ကရောတိ၊ ယာဝ န တံ ပါပကမ္မံ ဗျန္တီ ဟောတီ’’တိ (မ. နိ. ၃.၂၅၀၊ အ. နိ. ၃.၃၆) ဝစနတော ယေဘုယျေန နိရယေ ကမ္မက္ခယေန မရဏံ ဟောတီတိ အာဟ ‘‘ကမ္မဿ ဝိပါကဝသေန ဝါတိ နိရယံဝ သန္ဓာယ ဝုတ္တ’’န္တိ. ‘‘ဝဿသတံ ဝဿသဟဿံ ဝဿသတသဟဿာနီ’’တိအာဒိနာ မနုဿာနံ ဒေဝါနဉ္စ အာယုပရိစ္ဆေဒဝစနတော ယေဘုယျေန တေသံ အာယုက္ခယေန မရဏံ ဟောတီတိ ဝုတ္တံ ‘‘ဝဿဂဏနာယ ဝါတိ မနုဿေ စာတုမဟာရာဇိကာဒိဒေဝေ စ သန္ဓာယာ’’တိ. ‘‘ဝုတ္တ’’န္တိ အာနေတွာ ယောဇေတဗ္ဗံ.

ဣဒ္ဓိဗလကထာဝဏ္ဏနာ နိဋ္ဌိတာ.