၄. ဆဗ္ဗဿသိက္ခာပဒဝဏ္ဏနာ

၅၅၇. ဆဗ္ဗဿသိက္ခာပဒေ ပန ‘‘ယေသံ နော သန္ထတေ ဒါရကာ ဥဟဒန္တိပိ ဥမ္မိဟန္တိပိ၊ ယေသံ နော သန္ထတာ ဥန္ဒူရေဟိပိ ခဇ္ဇန္တီ’’တိ ဧဝံ ပါဠိပဒါနံ သမ္ဗန္ဓော ဝေဒိတဗ္ဗော. ဟဒ ကရီသောဿဂ္ဂေ၊ မိဟ သေစနေတိ ပနိမဿတ္ထံ သန္ဓာယာဟ ‘‘ဝစ္စမ္ပိ ပဿာဝမ္ပိ ကရောန္တီ’’တိ. ပဝါရဏာဥပေါသထပါဋိပဒဒိဝသေသု သန္ထတံ ကရိတွာ ပုန ဆဋ္ဌေ ဝဿေ ပရိပုဏ္ဏေ ပဝါရဏာဥပေါသထပါဋိပဒဒိဝသေသု ကရောန္တော ‘‘ဆဗ္ဗဿာနိ ကရောတီ’’တိ ဝုစ္စတိ. ဒုတိယဒိဝသတော ပဋ္ဌာယ ကရောန္တော ပန အတိရေကဆဗ္ဗဿာနိ ကရောတိ နာမ.

ဆဗ္ဗဿသိက္ခာပဒဝဏ္ဏနာ နိဋ္ဌိတာ.