၁. ကောသိယသိက္ခာပဒဝဏ္ဏနာ

၅၄၂. ပါဠိယံ ‘‘ကောသိယကာရကေ’’တိ ဧတ္ထ ကောသံ ကရောန္တီတိ ကောသကာရကာတိ လဒ္ဓဝေါဟာရာနံ ပါဏကာနံ ကောသတော နိဗ္ဗတ္တံ ကောသိယံ၊ တံ ကရောန္တီတိ ကောသိယကာရကာ၊ တန္တဝါယာ. သံဟနနံ သင်္ဃာတော၊ ဝိနာသောတိ အတ္ထော. ကောသိယမိဿကန္တိ ကောသိယတန္တုနာ မိဿံ. ‘‘အဝါယိမ’’န္တိ ဝုတ္တတ္တာ ဝါယိတွာ စေ ကရောန္တိ၊ အနာပတ္တိ. အနာပတ္တိ ဝိတာနံ ဝါတိအာဒိနာ ဝိတာနာဒီနံ အတ္ထာယ ကရဏေပိ တေနာကာရေန ပရိဘောဂေပိ အနာပတ္တိ ဝုတ္တာ.

ဧဝမ္ပိ မိဿေတွာ ကတမေဝ ဟောတီတိ ဣမိနာ ဝါတေန အာဟရိတွာ ပါတိတေပိ အစိတ္တကတ္တာ အာပတ္တိယေဝါတိ ဒဿေတိ. ကောသိယမိဿကတာ၊ အတ္တနော အတ္ထာယ သန္ထတဿ ကရဏံ ကာရာပနံ၊ ပဋိလာဘော စာတိ ဣမာနေတ္ထ တီဏိ အင်္ဂါနိ.

ကောသိယသိက္ခာပဒဝဏ္ဏနာ နိဋ္ဌိတာ.

၅၄၇. သုဒ္ဓကာဠကသိက္ခာပဒံ ဥတ္တာနတ္ထမေဝ.