၂. ကာယသံသဂ္ဂသိက္ခာပဒဝဏ္ဏနာ

၂၆၉. ဒုတိယေ ယေသု ဝိဝဋေသု အန္ဓကာရော ဟောတိ၊ တာနိ ဝိဝရန္တောတိ ဗြာဟ္မဏိယာ သဒ္ဓိံ ကာယသံသဂ္ဂံ သမာပဇ္ဇိတုကာမော ဧဝမကာသိ. တေန ကတဿပိ ဝိပ္ပကာရဿ အတ္တနိ ကတတ္တာ ‘‘အတ္တနော ဝိပ္ပကာရ’’န္တိ ဝုတ္တံ. ဥဠာရတ္တတာတိ ဥဠာရစိတ္တတာ၊ ပဏီတာဓိမုတ္တတာတိ ဝုတ္တံ ဟောတိ.

၂၇၀. ဩတိဏ္ဏောတိ ဣဒံ ကမ္မသာဓနံ ကတ္တုသာဓနံ ဝါ ဟောတီတိ တဒုဘယဝသေန အတ္ထံ ဒဿေန္တော ‘‘ယက္ခာဒီဟိ ဝိယ သတ္တာ’’တိအာဒိမာဟ. အသမပေက္ခိတွာတိ ယထာသဘာဝံ အနုပပရိက္ခိတွာ၊ ယထာ တေ ရတိဇနကာ ရူပါဒယော ဝိသယာ အနိစ္စဒုက္ခာသုဘာနတ္တာကာရေန အဝတ္ထိတာ၊ တထာ အပဿိတွာတိ ဝုတ္တံ ဟောတိ.

၂၇၁. သညမဝေလန္တိ သီလမရိယာဒံ. အာစာရောတိ အာစရဏံ ဟတ္ထဂဟဏာဒိကိရိယာ. အဿာတိ ‘‘ကာယသံသဂ္ဂံ သမာပဇ္ဇေယျာ’’တိ ပဒဿ.

၂၇၃. ဧတေသံ ပဒါနံ ဝသေနာတိ အာမသနာဒိပဒါနံ ဝသေန. ဣတော စိတော စ။ပေ။ သဉ္စောပေတီတိ အတ္တနော ဟတ္ထံ ဝါ ကာယံ ဝါ တိရိယံ ဣတော စိတော စ သဉ္စာရေတိ. ‘‘ကာယတော အမောစေတွာဝါတိ ဝစနတော မတ္ထကတော ပဋ္ဌာယ ဟတ္ထံ ဩတာရေန္တဿ ကာယတော မောစေတွာ နိဝတ္ထသာဋကူပရိ ဩမသန္တဿ ထုလ္လစ္စယံ၊ သာဋကတော ဩတာရေတွာ ဇင်္ဃတော ပဋ္ဌာယ ကာယံ ဩမသန္တဿ ပုန သံဃာဒိသေသော’’တိ ဝဒန္တိ.

ဒွါဒသသုပိ အာမသနာဒိပ္ပယောဂေသု ဧကေကသ္မိံ ပယောဂေ ကာယတော အမောစိတေ ဧကေကာဝ အာပတ္တိ ဟောတီတိ အာဟ ‘‘မူလဂ္ဂဟဏမေဝ ပမာဏ’’န္တိ. ဣဒဉ္စ ဧကေန ဟတ္ထေန ကာယံ ဂဟေတွာ ဣတရေန ဟတ္ထေန ကာယပရာမသနံ သန္ဓာယ ဝုတ္တံ. ဧကေန ပန ဟတ္ထေန ကာယပဋိဗဒ္ဓံ ဂဟေတွာ ဣတရေန တတ္ထ တတ္ထ ကာယံ ပရာမသတော ပယောဂဂဏနာယ အာပတ္တိ. အယံ ပန သံဃာဒိသေသော န ကေဝလံ ဝတ္ထုဝသေနေဝ၊ အပိစ သညာဝသေနပီတိ အာဟ ‘‘ဣတ္ထိယာ ဣတ္ထိသညိဿ သံဃာဒိသေသော’’တိ. ပါဠိယံ တိရစ္ဆာနဂတော စ ဟောတီတိ ဧတ္ထ တိရစ္ဆာနဂတိတ္ထိယာ တိရစ္ဆာနဂတပုရိသဿ စ ဂဟဏံ ဝေဒိတဗ္ဗံ.

သမသာရာဂေါတိ ကာယသံသဂ္ဂရာဂေန ဧကသဒိသရာဂေါ. ပုရိမနယေနေဝါတိ ရဇ္ဇုဝတ္ထာဒီဟိ ပရိက္ခိပိတွာ ဂဟဏေ ဝုတ္တနယေန. ပုန ပုရိမနယေနေဝါတိ သမသာရာဂေါ ဝုတ္တော. အနန္တရနယေနေဝါတိ ကာယပဋိဗဒ္ဓအာမသနနယေန. ဝေဏိဂ္ဂဟဏေန လောမာနမ္ပိ သင်္ဂဟိတတ္တာ လောမာနံ ဖုသနေပိ သံဃာဒိသေသော ဝုတ္တော. ဣဒါနိ ဝုတ္တမေဝတ္ထံ ပကာသေတုကာမော ‘‘ဥပါဒိန္နကေန ဟီ’’တိအာဒိမာဟ.

ယထာနိဒ္ဒိဋ္ဌနိဒ္ဒေသေတိ ယထာဝုတ္တကာယသံသဂ္ဂနိဒ္ဒေသေ. တေနာတိ တေန ယထာဝုတ္တကာရဏေန. သညာယ ဝိရာဂိတမှီတိ သညာယ ဝိရဒ္ဓါယ. လိင်္ဂဗျတ္တယေန ‘‘ဝိရာဂိတမှီ’’တိ ဝုတ္တံ. ဣမံ နာမ ဝတ္ထုန္တိ ဣမသ္မိံ သိက္ခာပဒေ အာဂတံ သန္ဓာယ ဝဒတိ. အညမ္ပိ ယံ ကိဉ္စိ ဝတ္ထုံ သန္ဓာယ ဝဒတီတိပိ ကေစိ. သာရတ္တန္တိ ကာယသံသဂ္ဂရာဂေန သာရတ္တံ. ဝိရတ္တန္တိ ကာယသံသဂ္ဂရာဂရဟိတံ မာတုဘဂိနီအာဒိံ သန္ဓာယ ဝဒတိ. ‘‘ဝိရတ္တံ ဂဏှိဿာမီ’’တိ ဝိရတ္တံ ဂဏှိ၊ ဒုက္ကဋန္တိ မာတုပေမာဒိဝသေန ဂဟဏေ ဒုက္ကဋံ ဝုတ္တံ.

ဣမာယ ပါဠိယာ သမေတီတိ သမ္ဗန္ဓော. ကထံ သမေတီတိ စေ? ယဒိ ဟိ ‘‘ဣတ္ထိယာ ကာယပဋိဗဒ္ဓံ ဂဏှိဿာမီ’’တိ စိတ္တေ ဥပ္ပန္နေ ဣတ္ထိသညာ ဝိရာဂိတာ ဘဝေယျ၊ ကာယပဋိဗဒ္ဓဂ္ဂဟဏေ ထုလ္လစ္စယံ ဝဒန္တေန ဘဂဝတာ ‘‘ဣတ္ထီ စ ဟောတိ ဣတ္ထိသညီ စာ’’တိ န ဝတ္တဗ္ဗံ သိယာ၊ ဝုတ္တဉ္စ၊ တသ္မာ ‘‘ဣတ္ထိယာ ကာယပဋိဗဒ္ဓံ ဂဏှိဿာမီ’’တိ ကာယံ ဂဏှန္တဿ ဣတ္ထိသညာ ဝိရာဂိတာ နာမ န ဟောတီတိ ‘‘ကာယပဋိဗဒ္ဓံ ဂဏှိဿာမီတိ ကာယံ ဂဏှန္တော ယထာဝတ္ထုကမေဝ အာပဇ္ဇတီ’’တိ မဟာသုမတ္ထေရေန ဝုတ္တဝါဒေါ ဣမာယ ပါဠိယာ သမေတိ. ယော ပနေတ္ထ ‘‘သတိပိ ဣတ္ထိသညာယ ကာယပဋိဗဒ္ဓံ ဂဏှန္တဿ ဂဟဏသမယေ ‘ကာယပဋိဗဒ္ဓံ ဂဏှိဿာမီ’တိ သညံ ဌပေတွာ ‘ဣတ္ထိံ ဂဏှာမီ’တိ သညာယ အဘာဝတော ဝတ္ထုသညာနံ ဘိန္နတ္တာ အယုတ္တ’’န္တိ ဝဒေယျ၊ သော ပုစ္ဆိတဗ္ဗော ‘‘ကိံ ကာယပဋိဗဒ္ဓံ ဝတ္ထာဒိံ ဂဏှန္တော ဣတ္ထိယာ ရာဂေန ဂဏှာတိ၊ ဥဒါဟု ဝတ္ထာဒီသု ရာဂေနာ’’တိ. ယဒိ ‘‘ဝတ္ထာဒီသု ရာဂေန ဂဏှာတီ’’တိ ဝဒေယျ၊ ဣတ္ထိယာ ကာယပဋိဗဒ္ဓံ အဟုတွာ အညတ္ထ ဌိတံ ဝတ္ထာဒိံ ဂဏှန္တဿပိ ထုလ္လစ္စယံ သိယာ၊ တသ္မာ ဣတ္ထီ ဣတ္ထိသညာ သာရတ္တဘာဝေါ ဂဟဏဉ္စာတိ အင်္ဂပါရိပူရိသဗ္ဘာဝတော မဟာသုမတ္ထေရဝါဒေါဝ ယုတ္တဝါဒေါ. အဋ္ဌကထာဝိနိစ္ဆယေဟိ စ သမေတီတိ ဧတ္ထာပိ အယမဓိပ္ပါယော – ယဒိ သညာဝိရာဂေန ဝိရာဂိတံ နာမ သိယာ၊ ‘‘သမ္ဗဟုလာ ဣတ္ထိယော ဗာဟာဟိ ပရိက္ခိပိတွာ ဂဏှာမီ’’တိ ဧဝံသညိဿ ‘‘မဇ္ဈဂတိတ္ထိယော ကာယပဋိဗဒ္ဓေန ဂဏှာမီ’’တိ ဧဝရူပါယ သညာယ အဘာဝတော မဇ္ဈဂတာနံ ဝသေန ထုလ္လစ္စယံ န သိယာ၊ ဧဝံ သန္တေပိ အဋ္ဌကထာယ ထုလ္လစ္စယဿ ဝုတ္တတ္တာ သညာဝိရာဂေန ဝိရာဂိတံ နာမ န ဟောတီတိ အယမတ္ထော သိဒ္ဓေါယေဝါတိ. နီလေန ဒုဝိညေယျသဘာဝတော ကာဠိတ္ထီ ဝုတ္တာ.

၂၇၉. သေဝနာဓိပ္ပါယောတိ ဖဿသုခသေဝနာဓိပ္ပါယော. ဣတ္ထိယာ ကာယေန ဘိက္ခုဿ ကာယပဋိဗဒ္ဓါမသနဝါရေပိ ဖဿံ ပဋိဝိဇာနာတီတိ ဣဒံ အတ္တနော ကာယပဋိဗဒ္ဓါမသနေပိ ကာယသမ္ဗန္ဓသဘာဝတော ဝုတ္တံ. ဧတ္ထာတိ နိဿဂ္ဂိယေန နိဿဂ္ဂိယဝါရေ. မောက္ခာဓိပ္ပါယောတိ ဧတ္ထ ပဌမံ ကာယသံသဂ္ဂရာဂေ သတိပိ ပစ္ဆာ မောက္ခာဓိပ္ပါယဿ အနာပတ္တိ.

၂၈၁. ပါရိပန္ထိကာတိ ဝိလုမ္ပနိကာ၊ အန္တရာယိကာတိ ဝုတ္တံ ဟောတိ. နဒီသောတေန ဝုယှမာနံ မာတရန္တိ ဥက္ကဋ္ဌပရိစ္ဆေဒဒဿနတ္ထံ ဝုတ္တံ၊ အညာသုပိ ပန ဣတ္ထီသု ကာရုညာဓိပ္ပါယေန မာတရိ ဝုတ္တနယေန ပဋိပဇ္ဇန္တဿ နေဝတ္ထိ ဒေါသောတိ ဝဒန္တိ. ‘‘မာတရ’’န္တိ ဝုတ္တတ္တာ အညာသံ န ဝဋ္ဋတီတိ ဝဒန္တာပိ အတ္ထိ. တိဏဏ္ဍုပကန္တိ ဟိရီဝေရာဒိမူလေဟိ ကတစုမ္ဗဋကံ. တာလပဏ္ဏမုဒ္ဒိကန္တိ တာလပဏ္ဏေဟိ ကတအင်္ဂုလိမုဒ္ဒိကံ. ပရိဝတ္တေတွာတိ အတ္တနော နိဝါသနပါရုပနဘာဝတော အပနေတွာ၊ စီဝရတ္ထာယ အပနာမေတွာတိ ဝုတ္တံ ဟောတိ. စီဝရတ္ထာယ ပါဒမူလေ ဌပေတိ၊ ဝဋ္ဋတီတိ ဣဒံ နိဒဿနမတ္တံ၊ ပစ္စတ္ထရဏဝိတာနာဒိအတ္ထမ္ပိ ဝဋ္ဋတိယေဝ၊ ပူဇာဒိအတ္ထံ တာဝကာလိကမ္ပိ ဂဟေတုံ ဝဋ္ဋတိ.

ဣတ္ထိသဏ္ဌာနေန ကတန္တိ ဧတ္ထ ဟေဋ္ဌိမပရိစ္ဆေဒတော ပါရာဇိကဝတ္ထုဘူတတိရစ္ဆာနဂတိတ္ထီနမ္ပိ အနာမာသဘာဝတော တာဒိသံ ဣတ္ထိသဏ္ဌာနေန ကတံ တိရစ္ဆာနဂတရူပမ္ပိ အနာမာသန္တိ ဒဋ္ဌဗ္ဗံ. ‘‘ဘိက္ခုနီဟိ ပဋိမာရူပံ အာမသိတုံ ဝဋ္ဋတီ’’တိ ဝဒန္တိ အာစရိယာ. ဣတ္ထိရူပါနိ ဒဿေတွာ ကတံ ဝတ္ထဉ္စ ပစ္စတ္ထရဏဉ္စ ဘိတ္တိဉ္စ ဣတ္ထိရူပံ အနာမသိတွာ ဂဏှိတုံ ဝဋ္ဋတိ. ဘိန္ဒိတွာတိ ဧတ္ထ ဟတ္ထေန အဂ္ဂဟေတွာဝ ကေနစိဒေဝ ဒဏ္ဍာဒိနာ ဘိန္ဒိတဗ္ဗံ. ဧတ္ထ စ ‘‘အနာမာသမ္ပိ ဟတ္ထေန အပရာမသိတွာ ဒဏ္ဍာဒိနာ ကေနစိ ဘိန္ဒိတုံ ဝဋ္ဋတီ’’တိ ဣဓ ဝုတ္တတ္တာ ‘‘ပံသုကူလံ ဂဏှန္တေန မာတုဂါမသရီရေပိ သတ္ထာဒီဟိ ဝဏံ ကတွာ ဂဟေတဗ္ဗ’’န္တိ ဝုတ္တတ္တာ စ ဂဟိတမဏ္ဍူကသပ္ပိနိံ ဒဏ္ဍာဒီဟိ နိပ္ပီဠေတွာ မဏ္ဍူကံ ဝိဿဇ္ဇာပေတုံ ဝဋ္ဋတိ.

မဂ္ဂံ အဓိဋ္ဌာယာတိ မဂ္ဂေ ဂစ္ဆာမီတိ ဧဝံ မဂ္ဂသညီ ဟုတွာတိ အတ္ထော. ကီဠန္တေနာတိ ဣဒံ ဂိဟိသန္တကံ သန္ဓာယ ဝုတ္တံ၊ ဘိက္ခုသန္တကံ ပန ယေန ကေနစိ အဓိပ္ပါယေန အနာမသိတဗ္ဗမေဝ ဒုရုပစိဏ္ဏဘာဝတော. တာလပနသာဒီနီတိ စေတ္ထ အာဒိ-သဒ္ဒေန နာဠိကေရလဗုဇတိပုသအလာဗုကုမ္ဘဏ္ဍပုဿဖလဧဠာလုကဖလာနံ သင်္ဂဟော ဒဋ္ဌဗ္ဗော. ‘‘ယထာဝုတ္တဖလာနံယေဝ စေတ္ထ ကီဠာဓိပ္ပါယေန အာမသနံ န ဝဋ္ဋတီ’’တိ ဝုတ္တတ္တာ ပါသာဏသက္ခရာဒီနိ ကီဠာဓိပ္ပါယေနပိ အာမသိတုံ ဝဋ္ဋတိ.

မုတ္တာတိ ဟတ္ထိကုမ္ဘဇာဒိကာ အဋ္ဌဝိဓာ မုတ္တာ. တထာ ဟိ ဟတ္ထိကုမ္ဘံ၊ ဝရာဟဒါဌံ၊ ဘုဇင်္ဂသီသံ၊ ဝလာဟကံ၊ ဝေဠု၊ မစ္ဆသိရော၊ သင်္ခေါ၊ သိပ္ပီတိ အဋ္ဌ မုတ္တာယောနိယော. တတ္ထ ဟတ္ထိကုမ္ဘဇာ ပီတဝဏ္ဏာ ပဘာဝိဟီနာ. ဝရာဟဒါဌဇာ ဝရာဟဒါဌဝဏ္ဏာဝ. ဘုဇင်္ဂသီသဇာ နီလာဒိဝဏ္ဏာ သုဝိသုဒ္ဓါ ဝဋ္ဋလာ. ဝလာဟကဇာ အာဘာသူရာ ဒုဗ္ဗိဘာဂရူပါ ရတ္တိဘာဂေ အန္ဓကာရံ ဝိဒ္ဓမန္တိယော တိဋ္ဌန္တိ၊ ဒေဝူပဘောဂါ ဧဝ စ ဟောန္တိ. ဝေဠုဇာ ကရကဖလသမာနဝဏ္ဏာ န အာဘာသူရာ၊ တေ စ ဝေဠူ အမနုဿဂေါစရေ ဧဝ ပဒေသေ ဇာယန္တိ. မစ္ဆသိရဇာ ပါဌီနပိဋ္ဌိသမအာနဝဏ္ဏာ ဝဋ္ဋလာ လဃဝေါ စ ဟောန္တိ ပဘာဝိဟီနာ စ၊ တေ စ မစ္ဆာ သမုဒ္ဒမဇ္ဈေယေဝ ဇာယန္တိ. သင်္ခဇာ သင်္ခဥဒရစ္ဆဝိဝဏ္ဏာ ကောလဖလပ္ပမာဏာပိ ဟောန္တိ ပဘာဝိဟီနာဝ. သိပ္ပိဇာ ပဘာဝိသေသယုတ္တာ ဟောန္တိ နာနာသဏ္ဌာနာ. ဧဝံ ဇာတိတော အဋ္ဌဝိဓာသု မုတ္တာသု ယာ မစ္ဆသင်္ခသိပ္ပိဇာ၊ တာ သာမုဒ္ဒိကာ. ဘုဇင်္ဂဇာပိ ကာစိ သာမုဒ္ဒိကာ ဟောန္တိ၊ ဣတရာ အသာမုဒ္ဒိကာ. ယသ္မာ ဗဟုလံ သာမုဒ္ဒိကာဝ မုတ္တာ လောကေ ဒိဿန္တိ၊ တတ္ထာပိ သပ္ပိဇာဝ၊ ဣတရာ ကဒါစိ ကာစိ၊ တသ္မာ သမ္မောဟဝိနောဒနိယံ ‘‘မုတ္တာတိ သာမုဒ္ဒိကာ မုတ္တာ’’တိ ဝုတ္တံ.

မဏီတိ ဌပေတွာ ဝေဠုရိယာဒိကေ သေသော ဇောတိရသာဒိဘေဒေါ သဗ္ဗောပိ မဏိ. ဝေဠုရိယောတိ ဝံသဝဏ္ဏမဏိ. သင်္ခေါတိ သာမုဒ္ဒိကသင်္ခေါ. သိလာတိ ကာဠသိလာပဏ္ဍုသိလာသေတသိလာဒိဘေဒါ သဗ္ဗာပိ သိလာ. ရဇတန္တိ ကဟာပဏာဒိကံ ဝုတ္တာဝသေသံ ရတနသမ္မတံ. ဇာတရူပန္တိ သုဝဏ္ဏံ. လောဟိတင်္ကောတိ ရတ္တမဏိ. မသာရဂလ္လန္တိ ကဗရမဏိ. ဘဏ္ဍမူလတ္ထာယာတိ ပတ္တစီဝရာဒိဘဏ္ဍမူလတ္ထာယ. ကုဋ္ဌရောဂဿာတိ နိဒဿနမတ္တံ၊ တာယ ဝူပသမေတဗ္ဗဿ ယဿ ကဿစိ ရောဂဿတ္ထာယပိ ဝဋ္ဋတိယေဝ. ‘‘ဘေသဇ္ဇတ္ထဉ္စ အဓိဋ္ဌာယေဝ မုတ္တာ ဝဋ္ဋတီ’’တိ တီသုပိ ဂဏ္ဌိပဒေသု ဝုတ္တံ. အာကရမုတ္တောတိ အာကရတော မုတ္တမတ္တော. ‘‘ဘဏ္ဍမူလတ္ထာယ သမ္ပဋိစ္ဆိတုံ ဝဋ္ဋတီ’’တိ ဣမိနာ စ အာမသိတုမ္ပိ ဝဋ္ဋတီတိ ဒဿေတိ. ပစိတွာ ကတောတိ ကာစကာရေဟိ ပစိတွာ ကတော.

ဓောတဝိဒ္ဓေါ စ ရတနမိဿောတိ အလင်္ကာရတ္ထံ ကဉ္စနလတာဒိံ ဒဿေတွာ ကတော ရတနခစိတော ဓောတဝိဒ္ဓေါ အနာမာသော. ဓောတဝိဒ္ဓေါ စ ရတနမိဿော စာတိ ဝိသုံ ဝါ ပဒံ သမ္ဗန္ဓိတဗ္ဗံ. ပါနီယသင်္ခေါတိ ဣမိနာ စ သင်္ခေန ကတပါနီယဘာဇနပိဓာနာဒိသမဏပရိက္ခာရောပိ အာမသိတုံ ဝဋ္ဋတီတိ သိဒ္ဓံ. သေသန္တိ ရတနမိဿံ ဌပေတွာ အဝသေသံ. မုဂ္ဂဝဏ္ဏံယေဝ ရတနသမ္မိဿံ ကရောန္တိ၊ န အညန္တိ အာဟ ‘‘မုဂ္ဂဝဏ္ဏာဝါ’’တိ၊ မုဂ္ဂဝဏ္ဏာ ရတနမိဿာဝ န ဝဋ္ဋတီတိ ဝုတ္တံ ဟောတိ. သေသာတိ ရတနသမ္မိဿံ ဌပေတွာ အဝသေသာ မုဂ္ဂဝဏ္ဏာ နီလသိလာ.

ဗီဇတော ပဋ္ဌာယာတိ ဓာတုပါသာဏတော ပဋ္ဌာယ. သုဝဏ္ဏစေတိယန္တိ ဓာတုကရဏ္ဍကံ. ပဋိက္ခိပီတိ ‘‘ဓာတုဋ္ဌပနတ္ထာယ ဂဏှထာ’’တိ အဝတွာ ‘‘တုမှာကံ ဂဏှထာ’’တိ ပေသိတတ္တာ ပဋိက္ခိပိ. သုဝဏ္ဏဗုဗ္ဗုဠကန္တိ သုဝဏ္ဏတာရကံ. ‘‘ကေဠာပယိတုန္တိ ဣတော စိတော စ သဉ္စာရန္တေဟိ အာမသိတုံ ဝဋ္ဋတီ’’တိ မဟာအဋ္ဌကထာယံ ဝုတ္တံ. ကစဝရမေဝ ဟရိတုံ ဝဋ္ဋတီတိ စေတိယဂေါပကာ ဝါ ဘိက္ခူ ဟောန္တု အညေ ဝါ၊ ဟတ္ထေနပိ ပုဉ္ဆိတွာ ကစဝရံ အပနေတုံ ဝဋ္ဋတိ၊ မလမ္ပိ ပမဇ္ဇိတုံ ဝဋ္ဋတိယေဝ.

အာရကူဋလောဟန္တိ ကိတ္တိမလောဟံ. တီဏိ ဟိ ကိတ္တိမလောဟာနိ ကံသလောဟံ၊ ဝဋ္ဋလောဟံ၊ အာရကူဋန္တိ. တတ္ထ တိပုတမ္ဗေ မိဿေတွာ ကတံ ကံသလောဟံ၊ သီသတမ္ဗေ မိဿေတွာ ကတံ ဝဋ္ဋလောဟံ၊ ပကတိရသတမ္ဗေ မိဿေတွာ ကတံ အာရကူဋံ. တေနေဝ တံကရဏေန နိဗ္ဗတ္တတ္တာ ‘‘ကိတ္တိမလောဟ’’န္တိ ဝုစ္စတိ. ‘‘ဇာတရူပဂတိကမေဝါတိ ဝုတ္တတ္တာ အာရကူဋံ သုဝဏ္ဏသဒိသမေဝ အာမသိတုံ န ဝဋ္ဋတိ၊ အညံ ပန ဝဋ္ဋတီ’’တိ တီသုပိ ဂဏ္ဌိပဒေသု ဝုတ္တံ. ကေစိ ပန ‘‘အာရကူဋံ အနာမသိတဗ္ဗတော ဇာတရူပဂတိကမေဝါတိ ဝုတ္တံ၊ တသ္မာ ဥဘယမ္ပိ ဇာတရူပံ ဝိယ အာမသိတုံ န ဝဋ္ဋတီ’’တိ ဝဒန္တိ. ပဌမံ ဝုတ္တောယေဝ စ အတ္ထော ဂဏ္ဌိပဒကာရေဟိ အဓိပ္ပေတော. ပဋိဇဂ္ဂိတုံ ဝဋ္ဋတီတိ သေနာသနပဋိဗဒ္ဓတ္တာ ဝုတ္တံ.

သာမိကာနံ ပေသေတဗ္ဗန္တိ သာမိကာနံ သာသနံ ပေသေတဗ္ဗံ. ဘိန္ဒိတွာတိ ဟတ္ထေန အဂ္ဂဟေတွာ အညေန ယေန ကေနစိ ဘိန္ဒိတွာ. ဘေရိသင်္ဃာဋောတိ သင်္ဃဋိတစမ္မဘေရီ. ဝီဏာသင်္ဃာဋောတိ သင်္ဃဋိတစမ္မဝီဏာ. စမ္မဝိနဒ္ဓါနံ ဘေရိဝီဏာနမေတံ အဓိဝစနံ. တုစ္ဆပေါက္ခရန္တိ အဝိနဒ္ဓစမ္မံ ဘေရိပေါက္ခရံ ဝီဏာပေါက္ခရဉ္စ. အာရောပိတစမ္မန္တိ ဘေရိအာဒီနံ ဝိနဒ္ဓနတ္ထာယ မုခဝဋ္ဋိယံ အာရောပိတစမ္မံ တတော ဥဒ္ဓရိတွာ ဝိသုံ ဌပိတစမ္မဉ္စ. ဩနဟိတုံ ဝါတိ ဘေရိပေါက္ခရာဒီနိ စမ္မံ အာရောပေတွာ ဝိနန္ဓိတုံ. ဩနဟာပေတုံ ဝါတိ တထေဝ အညေဟိ ဝိနန္ဓာပေတုံ. ပါရာဇိကပ္ပဟောနကကာလေတိ အကုထိတကာလေ.

၂၈၂. သင်္ကမာဒိ ဘူမိဂတိကတ္တာ န ကာယပဋိဗဒ္ဓဋ္ဌာနိယန္တိ ဒုက္ကဋံ ဝုတ္တံ. ဧကပဒိကသင်္ကမောတိ ခုဒ္ဒကသေတု. သကဋမဂ္ဂသင်္ကမောတိ သကဋမဂ္ဂဘူတော မဟာသေတု. ဌာနာ စာလေတုန္တိ ရဇ္ဇုံ ဌာနာ စာလေတုံ. ပဋိစ္ဆာဒေတဗ္ဗာတိ အပနေတဗ္ဗာ. မနုဿိတ္ထီ၊ ဣတ္ထိသညိတာ၊ ကာယသံသဂ္ဂရာဂေါ၊ တေန ရာဂေန ဝါယာမော၊ ဟတ္ထဂ္ဂါဟာဒိသမာပဇ္ဇနန္တိ ဣမာနေတ္ထ ပဉ္စ အင်္ဂါနိ.

ကာယသံသဂ္ဂသိက္ခာပဒဝဏ္ဏနာ နိဋ္ဌိတာ.