မဟာဝိဘင်္ဂသင်္ဂဟကထာဝဏ္ဏနာ

၄. ဧဝံ သောတုဇနံ သဝနေ နိယောဇေတွာ ယထာပဋိညာတံ ဥတ္တရဝိနိစ္ဆယံ ဒဿေတုမာဟ ‘‘မေထုန’’န္တိအာဒိ. ‘‘ကတိ အာပတ္တိယော’’တိ အယံ ဒိဋ္ဌသံသန္ဒနာ၊ အဒိဋ္ဌဇောတနာ၊ ဝိမတိစ္ဆေဒနာ၊ အနုမတိ၊ ကထေတုကမျတာပုစ္ဆာတိ ပဉ္စန္နံ ပုစ္ဆာနံ ကထေတုကမျတာပုစ္ဆာ. တိဿော အာပတ္တိယော ဖုသေတိ တဿာ သင်္ခေပတော ဝိဿဇ္ဇနံ.

၅. ဧဝံ ဂဏနာဝသေန ဒဿိတာနံ ‘‘ဘဝေ’’တိအာဒိ သရူပတော ဒဿနံ. ခေတ္တေတိ တိဏ္ဏံ မဂ္ဂါနံ အညတရသ္မိံ အလ္လောကာသေ တိလဗီဇမတ္တေပိ ပဒေသေ. မေထုနံ ပဋိသေဝန္တဿ ပါရာဇိကံ ဘဝေတိ သမ္ဗန္ဓော. ‘‘ထုလ္လစ္စယ’’န္တိ ဝုတ္တန္တိ ယောဇနာ. ‘‘ယေဘုယျက္ခာယိတေ’’တိ ဣဒံ နိဒဿနမတ္တံ၊ ဥပဍ္ဎက္ခာယိတေပိ ထုလ္လစ္စယဿ ဟေဋ္ဌာ ဝုတ္တတ္တာ. ဝဋ္ဋကတေ မုခေ အဖုသန္တံ အင်္ဂဇာတံ ပဝေသေန္တဿ ဒုက္ကဋံ ဝုတ္တန္တိ ယောဇနာ.

၆. ‘‘အဒိန္နံ အာဒိယန္တော’’တိအာဒယောပိ ဝုတ္တနယာယေဝ.

၇. ပဉ္စမာသဂ္ဃနေ ဝါပီတိ ပေါရာဏကဿ နီလကဟာပဏဿ စတုတ္ထဘာဂသင်္ခါတေ ပဉ္စမာသေ၊ တဒဂ္ဃနကေ ဝါ. အဓိကေ ဝါတိ အတိရေကပဉ္စမာသကေ ဝါ တဒဂ္ဃနကေ ဝါ. အဒိန္နေ ပဉ္စဝီသတိယာ အဝဟာရာနံ အညတရေန အဝဟဋေ ပရာဇယော ဟောတီတိ အတ္ထော. မာသေ ဝါ ဦနမာသေ ဝါ တဒဂ္ဃနကေ ဝါ ဒုက္ကဋံ. တတော မဇ္ဈေတိ ပဉ္စမာသကတော မဇ္ဈေ. ပဉ္စ မာသာ သမာဟဋာ၊ ပဉ္စန္နံ မာသာနံ သမာဟာရောတိ ဝါ ပဉ္စမာသံ၊ ပဉ္စမာသံ အဂ္ဃတီတိ ပဉ္စမာသဂ္ဃနံ၊ ပဉ္စမာသဉ္စ ပဉ္စမာသဂ္ဃနဉ္စ ပဉ္စမာသဂ္ဃနံ၊ ဧကဒေသသရူပေကသေသောယံ၊ တသ္မိံ. မာသေ ဝါတိ ဧတ္ထာပိ မာသော စ မာသဂ္ဃနကဉ္စ မာသမာသဂ္ဃနကောတိ ဝတ္တဗ္ဗေ ‘‘မာသေ’’တိ ဧကဒေသသရူပေကသေသော၊ ဥတ္တရပဒလောပေါ စ ဒဋ္ဌဗ္ဗော.

‘‘ပဉ္စမာသဂ္ဃနေ’’တိ သာမညေန ဝုတ္တေပိ ပေါရာဏကဿ နီလကဟာပဏဿေဝ စတုတ္ထဘာဂဝသေန ပဉ္စမာသနိယမော ကာတဗ္ဗော. တထာ ဟိ ဘဂဝတာ ဒုတိယပါရာဇိကံ ပညာပေန္တေန ဘိက္ခူသု ပဗ္ဗဇိတံ ပုရာဏဝေါဟာရိကမဟာမတ္တံ ဘိက္ခုံ ‘‘ကိတ္တကေန ဝတ္ထုနာ ရာဇာ မာဂဓော သေနိယော ဗိမ္ဗိသာရော စောရံ ဂဟေတွာ ဟနတိ ဝါ ဗန္ဓတိ ဝါ ပဗ္ဗာဇေတိ ဝါ’’တိ ပုစ္ဆိတွာ တေန ‘‘ပါဒေန ဝါ ပါဒါရဟေန ဝါ’’တိ ဝုတ္တေ တေနေဝ ပမာဏေန အဒိန္နံ အာဒိယန္တဿ ပညတ္တံ. အဋ္ဌကထာယဉ္စ –

‘‘ပဉ္စမာသကော ပါဒေါတိ ပါဠိံ ဥလ္လိင်္ဂိတွာ ‘တဒါ ရာဇဂဟေ ဝီသတိမာသကော ကဟာပဏော ဟောတိ၊ တသ္မာ ပဉ္စမာသကော ပါဒေါ’. ဧတေန လက္ခဏေန သဗ္ဗဇနပဒေသု ကဟာပဏဿ စတုတ္ထော ဘာဂေါ ‘ပါဒေါ’တိ ဝေဒိတဗ္ဗော. သော စ ခေါ ပေါရာဏကဿ နီလကဟာပဏဿ ဝသေန၊ န ဣတရေသံ ဒုဒြဒါမကာဒီနံ. တေန ဟိ ပါဒေန အတီတာ ဗုဒ္ဓါပိ ပါရာဇိကံ ပညပေသုံ၊ အနာဂတာပိ ပညပေဿန္တိ. သဗ္ဗဗုဒ္ဓါနဉှိ ပါရာဇိကဝတ္ထုမှိ ဝါ ပါရာဇိကေ ဝါ နာနတ္တံ နတ္ထိ၊ ဣမာနေဝ စတ္တာရိ ပါရာဇိကဝတ္ထူနိ၊ ဣမာနေဝ စတ္တာရိ ပါရာဇိကာနိ၊ ဣတော ဦနံ ဝါ အတိရေကံ ဝါ နတ္ထိ. တသ္မာ ဘဂဝါပိ ဓနိယံ ဝိဂရဟိတွာ ပါဒေနေဝ ဒုတိယပါရာဇိကံ ပညပေန္တော ‘ယော ပန ဘိက္ခု အဒိန္နံ ထေယျသင်္ခါတ’န္တိအာဒိမာဟာ’’တိ (ပါရာ. အဋ္ဌ. ၁.၈၈) ဝုတ္တံ.

သာရတ္ထဒီပနိယဉ္စ –

‘‘စတုတ္ထော ဘာဂေါ ပါဒေါတိ ဝေဒိတဗ္ဗောတိ ဣမိနာဝ သဗ္ဗဇနပဒေသု ကဟာပဏဿေဝ ဝီသတိမော ဘာဂေါမာသကောတိ ဣဒဉ္စ ဝုတ္တမေဝ ဟောတီတိ ဒဋ္ဌဗ္ဗံ. ပေါရာဏသတ္ထာနုရူပံ လက္ခဏသမ္ပန္နာ ဥပ္ပါဒိတာ နီလကဟာပဏာတိ ဝေဒိတဗ္ဗာ. ဒုဒြဒါမေန ဥပ္ပါဒိတော ဒုဒြဒါမကော. သော ကိရ နီလကဟာပဏဿ တိဘာဂံ အဂ္ဃတီ’တိ ဝတွာ ‘ယသ္မိံ ပဒေသေ နီလကဟာပဏာ န သန္တိ၊ တတ္ထာပိ နီလကဟာပဏဝသေနေဝ ပရိစ္ဆေဒေါ ကာတဗ္ဗော. ကထံ? နီလကဟာပဏာနံ ဝဠဉ္ဇနဋ္ဌာနေ စ အဝဠဉ္ဇနဋ္ဌာနေ စ သမာနအဂ္ဃဝသေန ပဝတ္တမာနံ ဘဏ္ဍံ နီလကဟာပဏေန သမာနဂ္ဃံ ဂဟေတွာ တဿ စတုတ္ထဘာဂဂ္ဃနကံ နီလကဟာပဏဿ ပါဒဂ္ဃနကန္တိ ပရိစ္ဆိန္ဒိတွာ ဝိနိစ္ဆယော ကာတဗ္ဗော’’တိ (သာရတ္ထ. ဋီ. ၂.၈၈) အယမတ္ထောဝ ဝုတ္တော.

ဧတ္ထ ကဟာပဏံ နာမ ကရောန္တာ သုဝဏ္ဏေနပိ ကရောန္တိ ရဇတေနပိ တမ္ဗေနပိ သုဝဏ္ဏရဇတတမ္ဗမိဿကေနပိ. တေသု ကတရံ ကဟာပဏံ နီလကဟာပဏန္တိ? ကေစိ တာဝ ‘‘သုဝဏ္ဏကဟာပဏ’’န္တိ. ကေစိ ‘‘မိဿကကဟာပဏ’’န္တိ. တတ္ထ ‘‘သုဝဏ္ဏကဟာပဏ’’န္တိ ဝဒန္တာနံ အယမဓိပ္ပါယော – ပါရာဇိကဝတ္ထုနာ ပါဒေန သဗ္ဗတ္ထ ဧကလက္ခဏေန ဘဝိတဗ္ဗံ၊ ကာလဒေသပရိဘောဂါဒိဝသေန အဂ္ဃနာနတ္တံ ပါဒဿေဝ ဘဝိတဗ္ဗံ. ဘဂဝတာ ဟိ ဓမ္မိကရာဇူဟိ ဟနနဗန္ဓနပဗ္ဗာဇနာနုရူပေနေဝ အဒိန္နာဒါနေ ပါရာဇိကံ ပညတ္တံ၊ န ဣတရထာ. တသ္မာ ဧသာ သဗ္ဗဒါ သဗ္ဗတ္ထ အဗျဘိစာရီတိ သုဝဏ္ဏမယဿ ကဟာပဏဿ စတုတ္ထေန ပါဒေန ဘဝိတဗ္ဗန္တိ.

‘‘မိဿကကဟာပဏ’’န္တိ ဝဒန္တာနံ ပန အယမဓိပ္ပါယော –

အဋ္ဌကထာယံ –

‘‘တဒါ ရာဇဂဟေ ဝီသတိမာသကော ကဟာပဏော ဟောတိ၊ တသ္မာ ပဉ္စမာသကော ပါဒေါ. ဧတေန လက္ခဏေန သဗ္ဗဇနပဒေသု ကဟာပဏဿ စတုတ္ထော ဘာဂေါ ‘ပါဒေါ’တိ ဝေဒိတဗ္ဗော. သော စ ခေါ ပေါရာဏကဿ နီလကဟာပဏဿ ဝသေန၊ န ဣတရေသံ ဒုဒြဒါမကာဒီန’’န္တိ (ပါရာ. အဋ္ဌ. ၁.၈၈) –

ဝုတ္တတ္တာ၊ သာရတ္ထဒီပနိယဉ္စ –

‘‘ပေါရာဏသတ္ထာနုရူပံ လက္ခဏသမ္ပန္နာ ဥပ္ပါဒိတာ နီလကဟာပဏာတိ ဝေဒိတဗ္ဗာ’’တိ (သာရတ္ထ. ဋီ. ၂.၈၈) –

ဝုတ္တတ္တာ စ ‘‘ဝိနယဝိနိစ္ဆယံ ပတွာ ဂရုကေ ဌာတဗ္ဗ’’န္တိ ဝစနတော စ မိဿကကဟာပဏောယေဝ နီလကဟာပဏော. တတ္ထေဝ ဟိ ပေါရာဏသတ္ထဝိဟိတံ လက္ခဏံ ဒိဿတိ. ကထံ? ပဉ္စ မာသာ သုဝဏ္ဏဿ၊ တထာ ရဇတဿ၊ ဒသ မာသာ တမ္ဗဿာတိ ဧတေ ဝီသတိ မာသေ မိဿေတွာ ဗန္ဓနတ္ထာယ ဝီဟိမတ္တံ လောဟံ ပက္ခိပိတွာ အက္ခရာနိ စ ဟတ္ထိအာဒီနမညတရဉ္စ ရူပံ ဒဿေတွာ ကတော နိဒ္ဒေါသတ္တာ နီလကဟာပဏော နာမ ဟောတီတိ.

သိက္ခာဘာဇနဝိနိစ္ဆယေ စ ကေသုစိ ပေါတ္ထကေသု ‘‘ပါဒေါ နာမ ပဉ္စ မာသာ သုဝဏ္ဏဿာ’’တိ ပုရိမပက္ခဝါဒီနံ မတေန ပါဌော လိခိတော. ကေသုစိ ပေါတ္ထကေသု ဒုတိယပက္ခဝါဒီနံ မတေန ‘‘ပဉ္စ မာသာ ဟိရညဿာ’’တိ ပါဌော လိခိတော. သီဟဠဘာသာယ ပေါရာဏကေဟိ လိခိတာယ သာမဏေရသိက္ခာယ ပန –

‘‘ပေါရာဏကဿ နီလကဟာပဏဿာတိ ဝုတ္တအဋ္ဌကထာဝစနဿ၊ ပေါရာဏကေ ရတနသုတ္တာဘိဓာနကသုတ္တေ ဝုတ္တကဟာပဏလက္ခဏဿ စ အနုရူပတော ‘သုဝဏ္ဏရဇတတမ္ဗာနိ မိဿေတွာ ဥဋ္ဌာပေတွာ ကတကဟာပဏံ ကဟာပဏံ နာမာ’တိ စ ‘သာမဏေရာနမုပသမ္ပန္နာနဉ္စ အဒိန္နာဒါနပါရာဇိကဝတ္ထုမှိ ကော ဝိသေသော’တိ ပုစ္ဆံ ကတွာ ‘သာမဏေရာနံ ဒသိကသုတ္တေနာပိ ပါရာဇိကော ဟောတိ၊ ဥပသမ္ပန္နာနံ ပန သုဝဏ္ဏဿ ဝီသတိဝီဟိမတ္တေနာ’’တိ –

စ ဝိသေသော ဒဿိတော.

တံ ပန သုဝဏ္ဏမာသကဝသေန အဍ္ဎတိယမာသကံ ဟောတိ၊ ပဉ္စမာသကေန စ ဘဂဝတာ ပါရာဇိကံ ပညတ္တံ. တသ္မာ တဿ ယထာဝုတ္တလက္ခဏဿ ကဟာပဏဿ သဗ္ဗဒေသေသု အလဗ္ဘမာနတ္တာ သဗ္ဗဒေသသာဓာရဏေန တဿ မိဿကကဟာပဏဿ ပဉ္စမာသပါဒဂ္ဃနကေန သုဝဏ္ဏေနေဝ ပါရာဇိကဝတ္ထုမှိ နိယမိတေ သဗ္ဗဒေသဝါသီနံ ဥပကာရာယ ဟောတီတိ ဧဝံ သုဝဏ္ဏေနေဝ ပါရာဇိကဝတ္ထုပရိစ္ဆေဒေါ ကတော. အယမေဝ နိယမော သီဟဠာစရိယဝါဒေဟိ သာရောတိ ဂဟိတော. တသ္မာ သိက္ခာဂရုကေဟိ သဗ္ဗတ္ထ ပေသလေဟိ ဝိနယဓရေဟိ အယမေဝ ဝိနိစ္ဆယော သာရတော ပစ္စေတဗ္ဗော. ဟောန္တိ စေတ္ထ –

‘‘ဟေမရဇတတမ္ဗေဟိ၊ သတ္ထေ နိဒ္ဒိဋ္ဌလက္ခဏံ၊

အဟာပေတွာ ကတော ဝီသ-မာသော နီလကဟာပဏော.

ဟေမပါဒံ သဇ္ဈုပါဒံ၊ တမ္ဗပါဒဒွယဉှိ သော၊

မိဿေတွာ ရူပမပ္ပေတွာ၊ ကာတုံ သတ္ထေသု ဒဿိတော.

‘ဧလာ’တိ ဝုစ္စတေ ဒေါသော၊ နိဒ္ဒေါသတ္တာ တထီရိတော၊

တဿ ပါဒေါ သုဝဏ္ဏဿ၊ ဝီသဝီဟဂ္ဃနော မတော.

ယသ္မိံ ပန ပဒေသေ သော၊ န ဝတ္တတိ ကဟာပဏော၊

ဝီသသောဝဏ္ဏဝီဟဂ္ဃံ၊ တပ္ပါဒဂ္ဃန္တိ ဝေဒိယံ.

ဝီသသောဝဏ္ဏဝီဟဂ္ဃံ၊ ထေနေန္တာ ဘိက္ခဝေါ တတော၊

စဝန္တိ သာမညဂုဏာ၊ ဣစ္စာဟု ဝိနယညုနော’’တိ.

၉. ဩပါတန္တိ အာဝါဋံ. ဒုက္ခေ ဇာတေတိ ယောဇနာ.

၁၀. ဥတ္တရိံ ဓမ္မန္တိ ဧတ္ထ ‘‘ဥတ္တရိမနုဿဓမ္မ’’န္တိ ဝတ္တဗ္ဗေ နိရုတ္တိနယေန မဇ္ဈပဒလောပံ၊ နိဂ္ဂဟီတာဂမဉ္စ ကတွာ ‘‘ဥတ္တရိံ ဓမ္မ’’န္တိ ဝုတ္တံ. ဥတ္တရိမနုဿာနံ ဈာယီနဉ္စေဝ အရိယာနဉ္စ ဓမ္မံ ဥတ္တရိမနုဿဓမ္မံ. အတ္တုပနာယိကန္တိ အတ္တနိ တံ ဥပနေတိ ‘‘မယိ အတ္ထီ’’တိ သမုဒါစရန္တော၊ အတ္တာနံ ဝါ တတ္ထ ဥပနေတိ ‘‘အဟံ ဧတ္ထ သန္ဒိဿာမီ’’တိ သမုဒါစရန္တောတိ အတ္တုပနာယိကော၊ တံ အတ္တုပနာယိကံ၊ ဧဝံ ကတွာ ဝဒန္တောတိ သမ္ဗန္ဓော.

၁၁. ပရိယာယေတိ ‘‘ယော တေ ဝိဟာရေ ဝသတိ၊ သော ဘိက္ခု အရဟာ’’တိအာဒိနာ (ပရိ. ၂၈၇) ပရိယာယဘဏနေ. ဉာတေတိ ယံ ဥဒ္ဒိဿ ဘဏတိ၊ တသ္မိံ ဝိညုမှိ မနုဿဇာတိကေ အစိရေန ဉာတေ. နော စေတိ နော စေ ဇာနာတိ.

ဣတိ ဥတ္တရေ လီနတ္ထပကာသနိယာ

ပါရာဇိကကထာဝဏ္ဏနာ နိဋ္ဌိတာ.

၁၃. စေတေတိ၊ ဥပက္ကမတိ၊ မုစ္စတိ၊ ဧဝံ အင်္ဂတ္တယေ ပုဏ္ဏေ ဂရုကံ ဝုတ္တံ. ဒွင်္ဂေ စေတေတိ၊ ဥပက္ကမတိ ယဒိ န မုစ္စတိ၊ ဧဝံ အင်္ဂဒွယေ ထုလ္လစ္စယန္တိ ယောဇနာ. ပယောဂေတိ ပယောဇေတွာ ဥပက္ကမိတုံ အင်္ဂဇာတာမသနံ၊ ပရဿ အာဏာပနန္တိ ဧဝရူပေ သာဟတ္ထိကာဏတ္တိကပယောဂေ.

၁၄. ဝုတ္တနယေနေဝ ဥပရူပရိ ပဉှာပုစ္ဆနံ ဉာတုံ သက္ကာတိ တံ အဝတ္တုကာမော အာဟ ‘‘ဣတော ပဋ္ဌာယာ’’တိအာဒိ. မယမ္ပိ ယဒေတ္ထ ပုဗ္ဗေ အဝုတ္တမနုတ္တာနတ္ထဉ္စ၊ တဒေဝ ဝဏ္ဏယိဿာမ.

၁၅. ကာယေနာတိ အတ္တနော ကာယေန. ကာယန္တိ ဣတ္ထိယာ ကာယံ. ဧသ နယော ‘‘ကာယဗဒ္ဓ’’န္တိ ဧတ္ထာပိ.

၁၆. အတ္တနော ကာယေန ပဋိဗဒ္ဓေန ဣတ္ထိယာ ကာယပဋိဗဒ္ဓေ ဖုဋ္ဌေ တု ဒုက္ကဋန္တိ ယောဇနာ.

၁၇. တိဿော အာပတ္တိယော သိယုန္တိ ယောဇနာ. ဒွိန္နံ မဂ္ဂါနန္တိ ဝစ္စမဂ္ဂပဿာဝမဂ္ဂါနံ.

၁၈. ဝဏ္ဏာဒိဘညေတိ ဝဏ္ဏာဒိနာ ဘဏနေ. ကာယပဋိဗဒ္ဓေ ဝဏ္ဏာဒိနာ ဘညေ ဒုက္ကဋန္တိ ယောဇနာ.

၁၉. အတ္တကာမစရိယာယာတိ အတ္တကာမပါရိစရိယာယ.

၂၀. ပဏ္ဍကဿ သန္တိကေပိ အတ္တကာမပါရိစရိယာယ ဝဏ္ဏံ ဝဒတော တဿ ဘိက္ခုနောတိ ယောဇနာ. တိရစ္ဆာနဂတဿာပိ သန္တိကေတိ ဧတ္ထာပိ ဧသေဝ နယော.

၂၁. ဣတ္ထိပုရိသာနမန္တရေ သဉ္စရိတ္တံ သဉ္စရဏဘာဝံ သမာပန္နေ ဘိက္ခုမှိ ပဋိဂ္ဂဏှနဝီမံသာပစ္စာဟရဏကတ္တိကေ သမ္ပန္နေ တဿ ဗုဓော ဂရုကံ နိဒ္ဒိသေတိ ယောဇနာ.

၂၂. ဒွင်္ဂသမာယောဂေတိ တီသွေတေသု ဒွိန္နံ အင်္ဂါနံ ယထာကထဉ္စိ သမာယောဂေ. အင်္ဂေ သတိ ပနေကသ္မိန္တိ တိဏ္ဏမေကသ္မိံ ပန အင်္ဂေ သတိ.

၂၄. ပယောဂေတိ ‘‘အဒေသိတဝတ္ထုကံ ပမာဏာတိက္ကန္တံ ကုဋိံ၊ အဒေသိတဝတ္ထုကံ မဟလ္လကဝိဟာရဉ္စ ကာရေဿာမီ’’တိ ဥပကရဏတ္ထံ အရညဂမနတော ပဋ္ဌာယ သဗ္ဗပယောဂေ. ဧကပိဏ္ဍေ အနာဂတေတိ သဗ္ဗပရိယန္တိမံ ပိဏ္ဍံ သန္ဓာယ ဝုတ္တံ.

၂၅. ဣဓ ယော ဘိက္ခု အမူလကေန ပါရာဇိကေန ဓမ္မေန အနုဒ္ဓံသေတီတိ ယောဇနာ.

၂၆. ဩကာသံ န စ ကာရေတွာတိ ‘‘ကရောတု မေ၊ အာယသ္မာ၊ ဩကာသံ၊ အဟံ တေ ဝတ္တုကာမော’’တိ ဧဝံ တေန ဘိက္ခုနာ ဩကာသံ အကာရာပေတွာ.

၂၈. အညဘာဂိယေတိ အညဘာဂိယပဒေန ဥပလက္ခိတသိက္ခာပဒေ. ဧဝံ အညတြပိ ဤဒိသေသု ဌာနေသု အတ္ထော ဝေဒိတဗ္ဗော.

၂၉. ‘‘သမနုဘာသနာယ ဧဝါ’’တိ ပဒစ္ဆေဒေါ. န ပဋိနိဿဇန္တိ အပ္ပဋိနိဿဇန္တော.

၃၀. ဉတ္တိယာ ဒုက္ကဋံ အာပန္နော သိယာ၊ ဒွီဟိ ကမ္မဝါစာဟိ ထုလ္လတံ အာပန္နော သိယာ၊ ကမ္မဝါစာယ ဩသာနေ ဂရုကံ အာပန္နော သိယာတိ ယောဇနာ. ‘‘ထုလ္လတ’’န္တိ ဣဒံ ထုလ္လစ္စယာပတ္တိဥပလက္ခဏဝစနံ.

၃၁. စတူသု ယာဝတတိယကေသု ပဌမေ အာပတ္တိပရိစ္ဆေဒံ ဒဿေတွာ ဣတရေသံ တိဏ္ဏံ တေနပိ ဧကပရိစ္ဆေဒတ္တာ တတ္ထ ဝုတ္တနယမေဝ တေသု အတိဒိသန္တော အာဟ ‘‘ဘေဒါနုဝတ္တကေ’’တိအာဒိ.

ဣတိ ဥတ္တရေ လီနတ္ထပကာသနိယာ

သံဃာဒိသေသကထာဝဏ္ဏနာ နိဋ္ဌိတာ.

၃၂. အတိရေကစီဝရန္တိ အနဓိဋ္ဌိတံ၊ အဝိကပ္ပိတံ ဝိကပ္ပနုပဂပမာဏံ စီဝရံ လဒ္ဓါ ဒသာဟံ အတိက္ကမန္တော ဧကမေဝ နိဿဂ္ဂိယံ ပါစိတ္တိယံ အာပဇ္ဇတိ. တိစီဝရေန ဧကရတ္တိမ္ပိ ဝိနာ ဝသန္တော ဧကမေဝ နိဿဂ္ဂိယံ ပါစိတ္တိယံ အာပဇ္ဇတိ. ဣဒဉ္စ ဇာတိဝသေန ဧကတ္တံ သန္ဓာယ ဝုတ္တံ ဝတ္ထုဂဏနာယ အာပတ္တီနံ ပရိစ္ဆိန္ဒိတဗ္ဗတ္တာ.

၃၃. ဂဟေတွာကာလစီဝရန္တိ အကာလစီဝရံ ပဋိဂ္ဂဟေတွာ. မာသန္တိ သတိယာ ပစ္စာသာယ နိက္ခိပိတုံ အနုညာတံ မာသံ. အတိက္ကမန္တောတိ သတိယာပိ ပစ္စာသာယ ဝီတိက္ကမန္တော အန္တောမာသေ အနဓိဋ္ဌဟိတွာ၊ အဝိကပ္ပေတွာ ဝါ တိံသဒိဝသာနိ အတိက္ကမန္တော၊ စီဝရုပ္ပါဒဒိဝသံ အရုဏံ အာဒိံ ကတွာ ဧကတိံသမံ အရုဏံ ဥဋ္ဌာပေန္တောတိ အတ္ထော. ဧကံ နိဿဂ္ဂိယံ အာပတ္တိံ အာပဇ္ဇတီတိ ဥဒီရိတန္တိ ယောဇနာ.

၃၄. အညာတိကာယ ဘိက္ခုနိယာ. ယံကိဉ္စိ ပုရာဏစီဝရန္တိ ဧကဝါရမ္ပိ ပရိဘုတ္တံ သင်္ဃာဋိအာဒီနမညတရံ စီဝရံ.

၃၅. ပယောဂသ္မိန္တိ ‘‘ဓောဝါ’’တိအာဒိကေ ဘိက္ခုနော အာဏတ္တိကပယောဂေ၊ ဧဝံ အာဏတ္တာယ စ ဘိက္ခုနိယာ ဥဒ္ဓနာဒိကေ သဗ္ဗသ္မိံ ပယောဂေ စ. ‘‘နိဿဂ္ဂိယာဝ ပါစိတ္တိ ဟောတီတိ နိဿဂ္ဂိယာ ပါစိတ္တိ စ ဟောတီတိ ယောဇနာ.

၃၆. ပဋိဂဏှတောတိ ဧတ္ထ ‘‘အညတြ ပါရိဝတ္တကာ’’တိ ယောဇနာ.

၃၈. ပယောဂသ္မိန္တိ ဝိညာပနပယောဂေ. ဝိညာပိတေတိ ဝိညာပိတစီဝရေ ပဋိလဒ္ဓေ.

၃၉. ဘိက္ခူတိ အစ္ဆိန္နစီဝရော ဝါ နဋ္ဌစီဝရော ဝါ ဘိက္ခု. တဒုတ္တရိန္တိ သန္တရုတ္တရပရမတော ဥတ္တရိံ.

၄၁. ပယောဂေတိ ဝိကပ္ပနာပဇ္ဇနပယောဂေ.

၄၂. ဒုဝေတိ ဒုက္ကဋပါစိတ္တိယဝသေန ဒုဝေ အာပတ္တိယော ဖုသေတိ ယောဇေတဗ္ဗံ.

၄၄. ပယောဂေတိ အနုညာတပယောဂတော အတိရေကာဘိနိပ္ဖါဒနပယောဂေ. လာဘေတိ စီဝရဿ ပဋိလာဘေ.

ကထိနဝဂ္ဂဝဏ္ဏနာ ပဌမာ.

၄၅. ကောသိယဝဂ္ဂဿ အာဒီသု ပဉ္စသု သိက္ခာပဒေသု ဒွေ ဒွေ အာပတ္တိယောတိ ယောဇနာ. ပယောဂေတိ ကရဏကာရာပနပယောဂေ. လာဘေတိ ကတွာ ဝါ ကာရေတွာ ဝါ ပရိနိဋ္ဌာပနေ.

၄၆. ‘‘ဂဟေတွာ ဧဠကလောမာနီ’’တိ ပဒစ္ဆေဒေါ. အတိက္ကမန္တိ အတိက္ကမန္တော.

၄၇. အညာယာတိ အညာတိကာယ ဘိက္ခုနိယာ. ‘‘ဓောဝါပေတိ ဧဠလောမက’’န္တိ ပဒစ္ဆေဒေါ. ဧဠလောမကန္တိ ဧဠကလောမာနိ. နိရုတ္တိနယေန က-ကာရဿ ဝိပရိယာယော. ပယောဂေတိ ဓောဝါပနပယောဂေ.

၄၈. ပယောဂေတိ ပဋိဂ္ဂဏှနပယောဂေ.

၄၉. နာနာကာရန္တိ နာနပ္ပကာရံ. သမာပဇ္ဇန္တိ သမာပဇ္ဇန္တော ဘိက္ခု. သမာပန္နေတိ သံဝေါဟာရေ သမာပန္နေ သတိ. ပယောဂေတိ သမာပဇ္ဇနပယောဂေ.

၅၀. ပယောဂေတိ ကယဝိက္ကယာပဇ္ဇနပယောဂေ. တသ္မိံ ကတေတိ တသ္မိံ ဘဏ္ဍေ အတ္တနော သန္တကဘာဝံ နီတေ.

ကောသိယဝဂ္ဂဝဏ္ဏနာ ဒုတိယာ.

၅၁. အတိရေကကန္တိ အနဓိဋ္ဌိတံ၊ အဝိကပ္ပိတံ ဝါ ပတ္တံ. ဒသာဟံ အတိက္ကမေန္တဿ တဿ ဘိက္ခုနော ဧကာဝ နိဿဂ္ဂိယာပတ္တိ ဟောတီတိ ယောဇနာ.

၅၂-၃. နတ္ထိ ဧတဿ ပဉ္စ ဗန္ဓနာနီတိ အပဉ္စဗန္ဓနော၊ တသ္မိံ၊ ဦနပဉ္စဗန္ဓနေ ပတ္တေတိ အတ္ထော. ပယောဂေတိ ဝိညာပနပယောဂေ. တဿ ပတ္တဿ လာဘေ ပဋိလာဘေ.

၅၄. ဘေသဇ္ဇန္တိ သပ္ပိအာဒိကံ.

၅၅. ပယောဂေတိ ပရိယေသနပယောဂေ.

၅၆. ပယောဂေတိ အစ္ဆိန္ဒနအစ္ဆိန္ဒာပနပယောဂေ. ဟဋေတိ အစ္ဆိန္ဒိတွာ ဂဟိတေ.

၅၇. ဒွေ ပနာပတ္တိယော ဖုသေတိ ဝါယာပနပယောဂေ ဒုက္ကဋံ၊ ဝိကပ္ပနုပဂပစ္ဆိမစီဝရပမာဏေန ဝီတေ နိဿဂ္ဂိယန္တိ ဒွေ အာပတ္တိယော အာပဇ္ဇတီတိ အတ္ထော.

၅၈-၉. ယော ပန ဘိက္ခု အပ္ပဝါရိတော အညာတကဿေဝ တန္တဝါယေ သမေစ္စ ဥပသင်္ကမိတွာ စီဝရေ ဝိကပ္ပံ အာပဇ္ဇန္တော ဟောတိ. သောတိ သော ဘိက္ခု. ဒွေ အာပတ္တိယော အာပဇ္ဇတိ၊ န သံသယောတိ ယောဇနာ. ပယောဂေတိ ဝိကပ္ပါပဇ္ဇနပယောဂေ.

၆၀. အစ္စေကသညိတံ စီဝရံ ပဋိဂ္ဂဟေတွာတိ ယောဇနာ. ကာလန္တိ စီဝရကာလံ.

၆၁. တိဏ္ဏမညတရံ ဝတ္ထန္တိ တိဏ္ဏံ စီဝရာနံ အညတရံ စီဝရံ. ဃရေတိ အန္တရဃရေ. နိဒဟိတွာတိ နိက္ခိပိတွာ. တေန စီဝရေန ဝိနာ ဆာရတ္တတော အဓိကံ ဒိဝသံ ယဿ အာရညကဿ ဝိဟာရဿ ဂေါစရဂါမေ တံ စီဝရံ နိက္ခိတ္တံ၊ တမှာ ဝိဟာရာ အညတြ ဝသန္တော နိဿဂ္ဂိယံ ဖုသေတိ ယောဇနာ.

၆၂. သံဃိကံ လာဘံ ပရိဏတံ ဇာနံ ဇာနန္တော.

၆၃. ပယောဂေတိ ပရိဏာမနပယောဂေ. သဗ္ဗတ္ထာတိ ပါရာဇိကာဒီသု သဗ္ဗသိက္ခာပဒေသု. အပ္ပနာဝါရပရိဟာနီတိ ပရိဝါရေ ပဌမံ ဝုတ္တကတ္ထပညတ္တိဝါရဿ ပရိဟာပနံ၊ ဣဓ အဝစနန္တိ အတ္ထော၊ တဿ ဝါရဿ ပရိဝါရေ သဗ္ဗပဌမတ္တာ ပဌမံ ဝတ္တဗ္ဗဘာဝေပိ တတ္ထ ဝတ္တဗ္ဗံ ပစ္ဆာ ဂဏှိတုကာမေန မယာ တံ ဌပေတွာ ပဌမံ အာပတ္တိဒဿနတ္ထံ တဒနန္တရော ကတာပတ္တိဝါရော ပဌမံ ဝုတ္တောတိ အဓိပ္ပါယော.

ပတ္တဝဂ္ဂဝဏ္ဏနာ တတိယာ.

ဣတိ ဥတ္တရေ လီနတ္ထပကာသနိယာ

တိံသနိဿဂ္ဂိယကထာဝဏ္ဏနာ နိဋ္ဌိတာ.

၆၄. မနုဿုတ္တရိဓမ္မေတိ ဥတ္တရိမနုဿဓမ္မေ. အဘူတသ္မိံ ဥတ္တရိမနုဿဓမ္မေ သမုလ္လပိတေ ပရာဇယော ပါရာဇိကာပတ္တိ.

၆၅. အမူလန္တိမဝတ္ထုနာ အမူလကေန ပါရာဇိကေန ဓမ္မေန ဘိက္ခုံ စောဒနာယ ဂရု သံဃာဒိသေသော ဟောတီတိ ယောဇနာ. ပရိယာယဝစနေတိ ‘‘ယော တေ ဝိဟာရေ ဝသတီ’’တိအာဒိနာ (ပရိ. ၂၈၇) ပရိယာယေန ကထနေ. ဉာတေတိ ယဿ ကထေတိ၊ တသ္မိံ ဝစနာနန္တရမေဝ ဉာတေ.

၆၆. နော စေ ပန ဝိဇာနာတီတိ အထ တံ ပရိယာယေန ဝုတ္တံ ဝစနာနန္တရမေဝ သစေ န ဇာနာတိ. သမုဒါဟဋန္တိ ကထိတံ.

၆၇. ဩမသတော ဘိက္ခုဿ ဒုဝေ အာပတ္တိယော ဝုတ္တာ. ဥပသမ္ပန္နံ ဩမသတော ပါစိတ္တိ သိယာ. ဣတရံ အနုပသမ္ပန္နံ ဩမသတော ဒုက္ကဋံ သိယာတိ ယောဇနာ.

၆၈. ပေသုညဟရဏေပိ ဒွေ အာပတ္တိယော ဟောန္တိ.

၆၉. ပယောဂေတိ ပဒသော ဓမ္မံ ဝါစေန္တဿ ဝစနကိရိယာရမ္ဘတော ပဋ္ဌာယ ယာဝ ပဒါဒီနံ ပရိသမာပနံ၊ ဧတ္ထန္တရေ အက္ခရုစ္စာရဏပယောဂေ ဒုက္ကဋံ. ပဒါနံ ပရိသမတ္တိယံ ပါစိတ္တိယံ.

၇၀. ‘‘တိရတ္တာ အနုပသမ္ပန္နသဟသေယျာယာ’’တိ ပဒစ္ဆေဒေါ. အနုပသမ္ပန္နေန သဟသေယျာ အနုပသမ္ပန္နသဟသေယျာ၊ တာယ. တိရတ္တာ ဥတ္တရိံ အနုပသမ္ပန္နသဟသေယျာယာတိ ယောဇနာ. ပယောဂေတိ သယနတ္ထာယ သေယျာပညာပနကာယာဝဇ္ဇနာဒိပုဗ္ဗပယောဂေ. ပန္နေတိ ကာယပသာရဏလက္ခဏေန သယနေန နိပန္နေ.

၇၁. ယော ပန ဘိက္ခု ဧကရတ္တိယံ မာတုဂါမေန သဟသေယျံ ကပ္ပေတိ. ဒုက္ကဋာဒယောတိ ‘‘ပယောဂေ ဒုက္ကဋံ၊ နိပန္နေ ပါစိတ္တိယ’’န္တိ ယထာဝုတ္တဒွေအာပတ္တိယော အာပဇ္ဇတီတိ ယောဇနာ.

၇၂. ပယောဂေတိ ယထာဝုတ္တလက္ခဏပယောဂေ.

၇၃. အနုပသမ္ပန္နေတိ သမီပတ္ထေ စေတံ ဘုမ္မံ. အနုပသမ္ပန္နဿ သန္တိကေ ဘူတံ ဥတ္တရိမနုဿဓမ္မံ ယော သစေ အာရောစေတီတိ ယောဇနာ. ဒုက္ကဋာဒယောတိ ယဿ အာရောစေတိ၊ သော နပ္ပဋိဝိဇာနာတိ၊ ဒုက္ကဋံ၊ ပဋိဝိဇာနာတိ၊ ပါစိတ္တိယန္တိ ဧဝံ ဒွေ အာပတ္တိယော တဿ ဟောန္တိ.

၇၄. အညတော အညဿ ဥပသမ္ပန္နဿ ဒုဋ္ဌုလ္လဿ အာပတ္တိံ အနုပသမ္ပန္နေ အနုပသမ္ပန္နဿ သန္တိကေ ဝဒံ ဝဒန္တောတိ ယောဇနာ. ပယောဂေတိ အာရမ္ဘတော ပဋ္ဌာယ ပုဗ္ဗပယောဂေ ဒုက္ကဋံ အာဂစ္ဆတိ ဒုက္ကဋံ အာပဇ္ဇတိ. အာရောစိတေ ပါစိတ္တိ သိယာတိ ယောဇနာ.

၇၅. ပယောဂေတိ ‘‘အကပ္ပိယပထဝိံ ခဏိဿာမီ’’တိ ကုဒါလ ပရိယေသနာဒိသဗ္ဗပယောဂေတိ.

မုသာဝါဒဝဂ္ဂဝဏ္ဏနာ ပဌမာ.

၇၆. ပါတေန္တောတိ ဝိကောပေန္တော. တဿာတိ ဘူတဂါမဿ. ပါတေတိ ဝိကောပနေ.

၇၇. အညဝါဒကဝိဟေသကာနံ ဧကယောဂနိဒ္ဒိဋ္ဌတ္တာ တတ္ထ ဝုတ္တနယေနေဝ ဝိဟေသကေ စ ဉာတုံ သက္ကာတိ တတ္ထ ဝိသုံ အာပတ္တိဘေဒေါ န ဝုတ္တော.

၇၈. ပရန္တိ အညံ သံဃေန သမ္မတသေနာသနပညာပကာဒိကံ ဥပသမ္ပန္နံ. ဥဇ္ဈာပေန္တောတိ တဿ အယသံ ဥပ္ပါဒေတုကာမတာယ ဘိက္ခူဟိ အဝဇာနာပေတုံ ‘‘ဆန္ဒာယ ဣတ္ထန္နာမော ဣဒံ နာမ ကရောတီ’’တိအာဒီနိ ဝတွာ အဝညာယ ဩလောကာပေန္တော၊ လာမကတော ဝါ စိန္တာပေန္တော. ပယောဂေတိ ဥဇ္ဈာပနတ္ထာယ တဿ အဝဏ္ဏဘဏနာဒိကေ ပုဗ္ဗပယောဂေ.

၈၃. သံဃိကေ ဝိဟာရေ ပုဗ္ဗူပဂတံ ဘိက္ခုံ ဇာနံ ဇာနန္တော အနုပခဇ္ဇ သေယျံ ကပ္ပေတိ၊ တဿေဝံ သေယျံ ကပ္ပယတောတိ ယောဇနာ. ပယောဂေဒုက္ကဋာဒယောတိ ဧတ္ထ အလုတ္တသမာသော. အာဒိ-သဒ္ဒေန သေယျာကပ္ပနေ ပါစိတ္တိယံ သင်္ဂဏှာတိ.

၈၄. ပယောဂေတိ ‘‘နိက္ကဍ္ဎထ ဣမ’’န္တိအာဒိကေ အာဏတ္တိကေ ဝါ ‘‘ယာဟိ ယာဟီ’’တိအာဒိကေ ဝါစသိကေ ဝါ ဟတ္ထေန တဿ အင်္ဂပရာမသနာဒိဝသေန ကတေ ကာယိကေ ဝါ နိက္ကဍ္ဎနပယောဂေ. သေသန္တိ ပါစိတ္တိယံ.

၈၅. ‘‘ဝေဟာသကုဋိယာ ဥပရီ’’တိ ပဒစ္ဆေဒေါ. အာဟစ္စပါဒကေတိ ဧတ္ထ ‘‘မဉ္စေ ဝါ ပီဌေ ဝါ’’တိ သေသော. သီဒန္တိ နိသီဒန္တော. ဒုက္ကဋာဒယောတိ ပယောဂေ ဒုက္ကဋံ၊ နိပဇ္ဇာယ ပါစိတ္တိယန္တိ ဣမာ အာပတ္တိယော ဖုသေတိ အတ္ထော.

၈၆. အဿ ပဇ္ဇဿ ပဌမပါဒံ ဒသက္ခရပါဒကံ ဆန္ဒောဝိစိတိယံ ဝုတ္တဂါထာ၊ ‘‘ဂါထာဆန္ဒော အတီတဒွယ’’န္တိ ဣမိနာ ဆန္ဒောဝိစိတိလက္ခဏေန ဂါထာဆန္ဒတ္တာ အဓိဋ္ဌိတွာ ဒွတ္တိပရိယာယေတိ ဧတ္ထ အက္ခရဒွယံ အဓိကံ ဝုတ္တန္တိ ဒဋ္ဌဗ္ဗံ. ပယောဂေတိ အဓိဋ္ဌာနပယောဂေ. အဓိဋ္ဌိတေတိ ဒွတ္တိပရိယာယာနံ ဥပရိ အဓိဋ္ဌာနေ ကတေ.

၈၇. ပယောဂေတိ သိဉ္စနသိဉ္စာပနပယောဂေ. သိတ္တေတိ သိဉ္စနကိရိယပရိယောသာနေ.

ဘူတဂါမဝဂ္ဂဝဏ္ဏနာ ဒုတိယာ.

၈၈. ဒုက္ကဋံ ဖုသေတိ ယောဇနာ. ဩဝဒိတေ ပါစိတ္တိ သိယာတိ ယောဇနာ.

၈၉. ဝိဘာဂေါယေဝ ဝိဘာဂတာ.

၉၀. အညာတိကာယ ဘိက္ခုနိယာ အညတြ ပါရိဝတ္တကာ စီဝရံ ဒေန္တော ဘိက္ခု ဒုဝေ အာပတ္တိယော ဖုသေတိ ယောဇနာ. ပယောဂေတိ ဒါနပယောဂေ.

၉၃. ‘‘နာဝံ ဧက’’န္တိ ပဒစ္ဆေဒေါ. ပယောဂေတိ အဘိရုဟဏပယောဂေ. ဒုက္ကဋာဒယောတိ အာဒိ-သဒ္ဒေန အဘိရုဠှေ ပါစိတ္တိယံ သင်္ဂဏှာတိ.

၉၄. ‘‘ဒုဝိဓံ အာပတ္တိ’’န္တိ ပဒစ္ဆေဒေါ.

၉၆. ဘိက္ခုနိယာ သဒ္ဓိံ ရဟော နိသဇ္ဇံ ကပ္ပေန္တော ဘိက္ခု ပယောဂေဒုက္ကဋာဒယော ဒွေပိ အာပတ္တိယော ဖုသေတိ ယောဇနာ.

ဩဝါဒဝဂ္ဂဝဏ္ဏနာ တတိယာ.

၉၇. တဒုတ္တရိန္တိ တတော ဘုဉ္ဇိတုံ အနုညာတဧကဒိဝသတော ဥတ္တရိံ ဒုတိယဒိဝသတော ပဋ္ဌာယ. အနန္တရဿ ဝဂ္ဂဿာတိ ဩဝါဒဝဂ္ဂဿ. နဝမေနာတိ ဘိက္ခုနိယာ ပရိပါစိတပိဏ္ဍပါတသိက္ခာပဒေန.

၉၉. ဒွတ္တိပတ္တေတိ ဒွတ္တိပတ္တပူရေ. တဒုတ္တရိန္တိ ဒွတ္တိပတ္တပူရတော ဥတ္တရိံ. ပယောဂေတိ ပဋိဂ္ဂဟဏပယောဂေ.

၁၀၁. အဘိဟဋ္ဌုန္တိ အဘိဟရိတွာ.

၁၀၂. တဿာတိ အဘိဟရန္တဿ. ပိဋကေတိ ဝိနယပိဋကေ.

၁၀၃. ဒသမေပီတိ ဧတ္ထ ‘‘ဒသမေ အပီ’’တိ ပဒစ္ဆေဒေါ.

ဘောဇနဝဂ္ဂဝဏ္ဏနာ စတုတ္ထာ.

၁၀၄. အစေလကာဒိနောတိ အာဒိ-သဒ္ဒေန ‘‘ပရိဗ္ဗာဇကဿ ဝါ ပရိဗ္ဗာဇိကာယ ဝါ’’တိ (ပါစိ. ၂၇၀) ဝုတ္တေ သင်္ဂဏှာတိ. ဘောဇနာဒိကန္တိ အာဒိ-သဒ္ဒေန ခါဒနီယံ သင်္ဂဏှာတိ. ပယောဂေတိ သဟတ္ထာ ဒါနပယောဂေ.

၁၀၅. ဒါပေတွာ ဝါ အဒါပေတွာ ဝါ ကိဉ္စိ အာမိသံ. ပယောဂေတိ ဥယျောဇနပယောဂေ. တသ္မိန္တိ တသ္မိံ ဘိက္ခုမှိ. ဥယျောဇိတေ ပါစိတ္တိ သိယာတိ ယောဇနာ.

၁၀၉. ဥမ္မာရာတိက္ကမေတိ ဣန္ဒခီလာတိက္ကမေ.

၁၁၀. တဒုတ္တရိန္တိ တတော ပရိစ္ဆိန္နရတ္တိပရိယန္တတော ဝါ ပရိစ္ဆိန္နဘေသဇ္ဇပရိယန္တတော ဝါ ဥတ္တရိံ.

၁၁၁. ဥယျုတ္တံ ဒဿနတ္ထာယ ဂစ္ဆန္တော ဒွေ အာပတ္တိယော ဖုသေတိ ယောဇနာ.

အစေလကဝဂ္ဂဝဏ္ဏနာ ပဉ္စမာ.

၁၁၄. မေရေယျန္တိ မေရယံ. နိရုတ္တိနယေန အ-ကာရဿ ဧ-ကာရော၊ ယ-ကာရဿ စ ဒွိတ္တံ. မေရယ-သဒ္ဒပရိယာယော ဝါ မေရေယျ-သဒ္ဒေါ. မုနီတိ ဘိက္ခု.

၁၁၅. ‘‘ဘိက္ခု အင်္ဂုလိပတောဒေနာ’’တိ ပဒစ္ဆေဒေါ. ပယောဂေတိ ဟာသာပနပယောဂေ. တဿာတိ ဟာသာပေန္တဿ.

၁၁၆. ဂေါပ္ဖကာ ဟေဋ္ဌာ ဥဒကေ ဒုက္ကဋံ. ဂေါပ္ဖကတော ဥပရိ ဥပရိဂေါပ္ဖကံ၊ ဥဒကံ၊ တသ္မိံ၊ ဂေါပ္ဖကတော အဓိကပ္ပမာဏေ ဥဒကေတိ အတ္ထော.

၁၁၇. အနာဒရိယန္တိ ပုဂ္ဂလာနာဒရိယံ၊ ဓမ္မာနာဒရိယံ ဝါ. ပယောဂေတိ အနာဒရိယဝသေန ပဝတ္တေ ကာယပယောဂေ ဝါ ဝစီပယောဂေ ဝါ. ကတေ အနာဒရိယေ.

၁၁၈. ပယောဂေတိ ဘိံသာပနပယောဂေ.

၁၁၉. ဇောတိန္တိ အဂ္ဂိံ. သမာဒဟိတွာနာတိ ဇာလေတွာ. ‘‘ဝိသိဗ္ဗေန္တော’’တိ ဣမိနာ ဖလူပစာရေန ကာရဏံ ဝုတ္တံ. ဝိသိဗ္ဗနကိရိယာ ဟိ သမာဒဟနကိရိယာယ ဖလန္တိ ဝိသိဗ္ဗနကိရိယာဝေါဟာရေန သမာဒဟနကိရိယာဝ. တသ္မာ ဝိသိဗ္ဗေန္တောတိ ဧတ္ထ သမာဒဟန္တောတိ အတ္ထော. ပယောဂေတိ သမာဒဟနသမာဒဟာပနပယောဂေ. ဝိသီဝိတေတိ ဝုတ္တနယေန သမာဒဟိတေတိ အတ္ထော.

၁၂၀. ပယောဂေတိ စုဏ္ဏမတ္တိကာဘိသင်္ခရဏာဒိသဗ္ဗပယောဂေ. ဣတရန္တိ ပါစိတ္တိယံ.

၁၂၁. တိဏ္ဏံ ဒုဗ္ဗဏ္ဏကရဏာနန္တိ ကံသနီလပတ္တနီလကဒ္ဒမသင်္ခါတာနံ တိဏ္ဏံ ဒုဗ္ဗဏ္ဏကရဏာနံ. ဧကံ အညတရံ အနာဒိယ အဒတွာ. စီဝရန္တိ နဝစီဝရံ.

၁၂၂. နတ္ထိ ဧတဿ ဥဒ္ဓါရန္တိ အနုဒ္ဓါရော၊ တံ အနုဒ္ဓါရန္တိ ဝတ္တဗ္ဗေ ဂါထာဗန္ဓဝသေန ရဿတ္တံ၊ အကတပစ္စုဒ္ဓါရန္တိ အတ္ထော.

၁၂၃. အပနိဓေန္တောတိ အပနေတွာ နိဓေန္တော နိက္ခိပေန္တော. ပတ္တာဒိကန္တိ အာဒိ-သဒ္ဒေန စီဝရနိသီဒနသူစိဃရကာယဗန္ဓနာနံ ဂဟဏံ. ပယောဂေတိ အပနိဓာနပယောဂေ. တသ္မိံ ပတ္တာဒိကေ ပဉ္စဝိဓေ ပရိက္ခာရေ. အပနိဟိတေ သေသာ ပါစိတ္တိယာပတ္တိ သိယာတိ ယောဇနာ.

သုရာပါနဝဂ္ဂဝဏ္ဏနာ ဆဋ္ဌာ.

၁၂၄. တပေါဓနောတိ ပါတိမောက္ခသံဝရသီလသင်္ခါတံ တပေါဓနမဿာတိ တပေါဓနော၊ ဘိက္ခု.

၁၂၅. တသ္မိံ ဩပါတေ.

၁၂၆. မနုဿဝိဂ္ဂဟော မနုဿသရီရော. တိရစ္ဆာနဂတော နာဂေါ ဝါ သုပဏ္ဏော ဝါ. တဿ ဩပါတခဏကဿ.

၁၂၇. ပဋုဗုဒ္ဓိနာတိ သဗ္ဗေသု ဉေယျဓမ္မေသု နိပုနဉာဏေန ဘဂဝတာ.

၁၂၈. ပယောဂေတိ ပရိဘောဂတ္ထာယ ဂဟဏာဒိကေ ပယောဂေ. တဿာတိ ဘိက္ခုဿ.

၁၂၉. ဥက္ကောဋေန္တောတိ ဥစ္စာလေန္တော ယထာဌာနေ ဌာတုံ အဒေန္တော. ပယောဂေတိ ဥက္ကောဋနပယောဂေ. ဥက္ကောဋိတေ ပါစိတ္တိယံ သိယာတိ ယောဇနာ.

၁၃၀. ဒုဋ္ဌုလ္လံ ဝဇ္ဇကန္တိ သံဃာဒိသေသာဒိကေ. ဧကံ ပါစိတ္တိယံ အာပတ္တိံ အာပဇ္ဇတိ ဣတိ ဒီပိတန္တိ ယောဇနာ.

၁၃၁. ပယောဂေတိ ဂဏပရိယေသနာဒိပယောဂေ. ဒုက္ကဋံ ပတ္တော သိယာ ဒုက္ကဋာပတ္တိံ အာပန္နော ဘဝေယျာတိ အတ္ထော. သေသာတိ ပါစိတ္တိယာပတ္တိ ဥပသမ္ပာဒိတေ သိယာ. ဂါထာဗန္ဓဝသေန ဥပသဂ္ဂလောပေါ.

၁၃၂-၃. ဇာနံ ထေယျသတ္ထေန သဟ သံဝိဓာယ မဂ္ဂံ ပဋိပဇ္ဇတော စ တထေဝ မာတုဂါမေန သဟ သံဝိဓာယ မဂ္ဂံ ပဋိပဇ္ဇတော စာတိ ယောဇနာ. ပယောဂေတိ သံဝိဓာယ ဂန္တုံ ပဋိပုစ္ဆာဒိကရဏပယောဂေ. ပဋိပန္နေတိ မဂ္ဂပဋိပန္နေ. အနန္တရန္တိ အဒ္ဓယောဇနဂါမန္တရာတိက္ကမနာနန္တရံ.

၁၃၄. ဉတ္တိယာ ဩသာနေ ဒုက္ကဋံ ဖုသေတိ ယောဇနာ.

၁၃၅. အကတာနုဓမ္မေနာတိ အနုဓမ္မော ဝုစ္စတိ အာပတ္တိယာ အဒဿနေ ဝါ အပ္ပဋိကမ္မေ ဝါ ပါပိကာယ ဒိဋ္ဌိယာ အပ္ပဋိနိဿဂ္ဂေ ဝါ ဓမ္မေန ဝိနယေန သတ္ထုသာသနေန ဥက္ခိတ္တကဿ အနုလောမဝတ္တံ ဒိသွာ ကတွာ ဩသာရဏာ၊ သော ဩသာရဏသင်္ခါတော အနုဓမ္မော ယဿ န ကတော၊ အယံ အကတာနုဓမ္မော နာမ၊ တာဒိသေန ဘိက္ခုနာ သဒ္ဓိန္တိ အတ္ထော. သမ္ဘုဉ္ဇန္တောတိ အာမိသသမ္ဘောဂံ ကရောန္တော ဘိက္ခု. ပယောဂေတိ ဘုဉ္ဇိတုံ အာမိသပဋိဂ္ဂဟဏာဒိပယောဂေ. ဘုတ္တေတိ သမ္ဘုတ္တေ၊ ဥဘယသမ္ဘောဂေ၊ တဒညတရေ ဝါ ကတေတိ အတ္ထော.

၁၃၆. ဥပလာပေန္တောတိ ပတ္တစီဝရဥဒ္ဒေသပရိပုစ္ဆနာဒိဝသေန သင်္ဂဏှန္တော. ပယောဂေတိ ဥပလာပနပယောဂေ.