ပါဒဗ္ဘဉ္ဇနကထာ

ပါဒဗ္ဘဉ္ဇနကထာယံ ‘‘အနုဇာနာမိ၊ ဘိက္ခဝေ၊ ပါဒဗ္ဘဉ္ဇန’’န္တိ (မဟာဝ. ၂၆၇) ဝစနတော ပါဒေသု ဖလိတေသု ပါဒဗ္ဘဉ္ဇနံ ပစိတဗ္ဗံ. နက္ခမနီယော ဟောတိ၊ ‘‘အနုဇာနာမိ၊ ဘိက္ခဝေ၊ ပဇ္ဇံ အဘိသင်္ခရိတု’’န္တိ (မဟာဝ. ၂၆၇) ဝစနတော ပါဒဗ္ဘဉ္ဇနတေလေန နက္ခမနီယေ သတိ ပဇ္ဇံ အဘိသင်္ခရိတဗ္ဗံ. တတ္ထ ပဇ္ဇံ အဘိသင်္ခရိတုန္တိ ယေန ဖလိတပါဒါ ပါကတိကာ ဟောန္တိ၊ တံ နာဠိကေရာဒီသု နာနာဘေသဇ္ဇာနိ ပက္ခိပိတွာ ပဇ္ဇံ အဘိသင်္ခရိတုံ၊ ပါဒါနံ သပ္ပါယဘေသဇ္ဇံ ပစိတုန္တိ အတ္ထော.