ပိဋ္ဌဘေသဇ္ဇကထာ

ပိဋ္ဌဘေသဇ္ဇကထာယံ ‘‘အနုဇာနာမိ၊ ဘိက္ခဝေ၊ နိသဒံ နိသဒပေါတက’’န္တိ (မဟာဝ. ၂၆၃) ဝစနတော ပိသိတေဟိ စုဏ္ဏကတေဟိ မူလဘေသဇ္ဇေဟိ အတ္ထေ သတိ နိသဒဉ္စ နိသဒပေါတကဉ္စ ပရိဟရိတုံ ဝဋ္ဋတိ. တတ္ထ နိသဒံ နိသဒပေါတကန္တိ ပိသနသိလာ စ ပိသနပေါတော စ. နိသဒန္တိ ပိသန္တိ စုဏ္ဏဝိစုဏ္ဏံ ကရောန္တိ မူလဘေသဇ္ဇာဒယော ဧတ္ထာတိ နိသဒံ၊ ပိသနသိလာ. နိသဒန္တိ ပိသန္တိ စုဏ္ဏဝိစုဏ္ဏံ ကရောန္တိ မူလဘေသဇ္ဇာဒယော ဧတေနာတိ နိသဒံ၊ ပေါသေတဗ္ဗောတိ ပေါတော၊ ဒါရကော. ခုဒ္ဒကပ္ပမာဏတာယ ပေါတော ဝိယာတိ ပေါတော၊ နိသဒဉ္စ တံ ပေါတော စာတိ နိသဒပေါတော၊ တံ နိသဒပေါတကံ. နိပုဗ္ဗသဒ စုဏ္ဏကရဏေတိ ဓာတု.