ယာနကထာ

ယာနကထာယံ ‘‘အနုဇာနာမိ၊ ဘိက္ခဝေ၊ ပုရိသယုတ္တံ ဟတ္ထဝဋ္ဋက’’န္တိ (မဟာဝ. ၂၅၃) ဧတ္ထ အနုဇာနာမိ၊ ဘိက္ခဝေ၊ ပုရိသယုတ္တံ၊ အနုဇာနာမိ၊ ဘိက္ခဝေ၊ ဟတ္ထဝဋ္ဋကန္တိ ဧဝံ ပစ္စေကံ ဝါကျပရိသမာပနံ အဓိပ္ပေတန္တိ အာဟ ‘‘ပုရိသယုတ္တံ ဣတ္ထိသာရထိ ဝါ။ပေ။ ပုရိသာ ဝါ၊ ဝဋ္ဋတိယေဝါ’’တိ. ‘‘ပီဌကသိဝိကန္တိ ပီဌကယာနံ. ပါဋင်္ကိန္တိ အန္ဒောလိကာယေတံ အဓိဝစန’’န္တိ သာရတ္ထဒီပနိယံ (သာရတ္ထ. ဋီ. မဟာဝဂ္ဂ ၃.၂၅၃) ဝုတ္တံ၊ ‘‘ပီဌကသိဝိကန္တိ ဖလကာဒိနာ ကတံ ပီဌကယာနံ. ပဋပေါတလိကံ အန္ဒောလိကာ. သဗ္ဗမ္ပိ ယာနံ ဥပါဟနေနပိ ဂန္တုံ အသမတ္ထဿ ဂိလာနဿ အနုညာတ’’န္တိ ဝိမတိဝိနောဒနိယံ (ဝိ. ဝိ. ဋီ. မဟာဝဂ္ဂ ၂.၂၅၃).