ဆန္ဒာရောပနကထာ

၄၆. ဆန္ဒာရောပနကထာယံ ဆန္ဒသောတိ သက္ကဋဘာသာယ. န အာရောပေတဗ္ဗန္တိ ဝါစနာမဂ္ဂံ န အာရောပေတဗ္ဗံ. သကာယ နိရုတ္တိယာတိ မာဂဓဘာသာယ. တတ္ထ သန္တေဟိ ကတာတိ သက္ကဋာ၊ အဋ္ဌကဝါမကာဒီဟိ သမိတပါပေဟိ ဣသီဟိ ကတာတိ အတ္ထော. အထ ဝါ သက္ကရိတဗ္ဗာ ပူဇိတဗ္ဗာတိ သက္ကဋာ မနုဿာနံ ဟိတသုခါဝဟနတော၊ တဒတ္ထိကေဟိ မနုဿေဟိ ပူဇိတဗ္ဗာတိ အတ္ထော. ဘာသီယတေတိ ဘာသာ၊ သက္ကဋာ စ သာ ဘာသာ စာတိ သက္ကဋဘာသာ. ဝေဒတ္တယဂတာ နိရုတ္တိ၊ သဿ ဧသာတိ သကာ၊ ဘဂဝတော ဝစနန္တျတ္ထော. မဂဓေ ဇာတာ မာဂဓိကာ၊ အာဒိကပ္ပကာလေ မဂဓရဋ္ဌေ ဇာတာတိ အတ္ထော. ဥစ္စတေတိ ဥတ္တိ၊ နီဟရိတွာ ဥတ္တိ နိရုတ္တိ၊ ပိဋကတ္တယတော နီဟရိတွာ ကထီယတေတျတ္ထော. ဝုတ္တဉှေတံ ပေါရာဏေဟိ –

‘‘သာ မာဂဓီ မူလဘာသာ၊

နရာ ယာယာဒိကပ္ပိကာ၊

ဗြဟ္မာနော စာဿုတာလာပါ၊

သမ္ဗုဒ္ဓါ စာပိ ဘာသရေ’’တိ.

သေသံ သုဝိညေယျမေဝ.