အာနိသံသကထာ

၆၈. အာနိသံသကထာယံ ဝိနယံ ဓာရေတီတိ ဝိနယဓရော၊ သိက္ခနဝါစနမနသိကာရဝိနိစ္ဆယနတဒနုလောမကရဏာဒိနာ ဝိနယပရိယတ္တိကုသလော ဘိက္ခု. ဝိနယပရိယတ္တိမူလံ ဧတေသန္တိ ဝိနယပရိယတ္တိမူလကာ. ကေ တေ? ပဉ္စာနိသံသာ. ဝိနယပရိယတ္တိယေဝ မူလံ ကာရဏံ ကတွာ လဘိတဗ္ဗအာနိသံသာ၊ န အညပရိယတ္တိံ ဝါ ပဋိပတ္တိအာဒယော ဝါ မူလံ ကတွာတိ အတ္ထော. အထ ဝါ ပရိယာပုဏနံ ပရိယတ္တိ၊ ဝိနယဿ ပရိယတ္တိ ဝိနယပရိယတ္တိ၊ သာ မူလံ ဧတေသန္တိ ဝိနယပရိယတ္တိမူလကာ၊ ဝိနယပရိယာပုဏနဟေတုဘဝါ အာနိသံသာတိ အတ္ထော. ‘‘ကတမေ’’တိအာဒိနာ တေသံ ပဉ္စာနိသံသာဒီနံ သရူပံ ပုစ္ဆိတွာ ‘‘အတ္တနော’’တိအာဒိနာ ဝိဿဇ္ဇေတွာ တံ ဝစနံ ပါဠိယာ သမတ္ထေတုံ ‘‘ဝုတ္တဉှေတ’’န္တိအာဒိမာဟ.

ဧဝံ ပဉ္စာနိသံသာနံ သရူပံ ဒဿေတွာ ဣဒါနိ တေယေဝ ဝိတ္ထာရတော ဒဿေတုံ ‘‘ကထမဿာ’’တိအာဒိနာ ပုစ္ဆိတွာ ‘‘ဣဓေကစ္စော’’တိအာဒိနာ ဝိဿဇ္ဇေတိ. တတ္ထ အတ္တနော သီလက္ခန္ဓသုဂုတ္တဘာဝေါ နာမ အာပတ္တိအနာပဇ္ဇနဘာဝေနေဝ ဟောတိ၊ နော အညထာတိ အာပတ္တိအာပဇ္ဇနကာရဏံ ဒဿေတွာ တဒဘာဝေန အနာပဇ္ဇနံ ဒဿေတုံ ‘‘အာပတ္တိံ အာပဇ္ဇန္တော ဆဟာကာရေဟိ အာပဇ္ဇတီ’’တိအာဒိမာဟ. တတ္ထ –

‘‘သဉ္စိစ္စ အာပတ္တိံ အာပဇ္ဇတိ၊

အာပတ္တိံ ပရိဂူဟတိ၊

အဂတိဂမနဉ္စ ဂစ္ဆတိ၊

ဧဒိသော ဝုစ္စတိ အလဇ္ဇိပုဂ္ဂလော’’တိ. (ပရိ. ၃၅၉) –

ဝုတ္တေန အလဇ္ဇီလက္ခဏေန န လဇ္ဇတိ န ဟိရီယတီတိ အလဇ္ဇီ၊ တဿ ဘာဝေါ အလဇ္ဇိတာ. နတ္ထိ ဉာဏံ ဧတဿာတိ အညာဏံ၊ တဿ ဘာဝေါ အညာဏတာ. ကုကတဿ ဘာဝေါ ကုက္ကုစ္စံ၊ တေန ပကတော ကုက္ကုစ္စပကတော၊ တဿ ဘာဝေါ ကုက္ကုစ္စပကတတာ. ကပ္ပတီတိ ကပ္ပိယံ၊ န ကပ္ပိယံ အကပ္ပိယံ၊ တသ္မိံ အကပ္ပိယေ၊ ကပ္ပိယံ ဣတိ သညာ ယဿ သော ကပ္ပိယသညီ၊ တဿ ဘာဝေါ ကပ္ပိယသညိတာ. ဣတရံ တပ္ပဋိပက္ခတော ကာတဗ္ဗံ၊ ဣမေသု ပဉ္စသု ပဒေသု ယကာရလောပေါ၊ တသ္မာ ‘‘အလဇ္ဇိတာယ အာပတ္တိံ အာပဇ္ဇတီ’’တိအာဒိနာ ယောဇေတဗ္ဗာနိ. ဟေတွတ္ထေ စေတံ နိဿက္ကဝစနံ. သရတီတိ သတိ၊ သမုဿနံ သမ္မောသော. သတိယာ သမ္မောသော သတိသမ္မောသော၊ တသ္မာ သတိသမ္မောသာ. ဟေတွတ္ထေ စေတံ ကရဏဝစနံ. ဣဒါနိ တာနိ ကာရဏာနိ ဝိတ္ထာရတော ဒဿေတုံ ‘‘ကထ’’န္တျာဒိမာဟ. တံ နယာနုယောဂေန ဝိညေယျမေဝ.

အရိဋ္ဌော ဣတိ ဘိက္ခု အရိဋ္ဌဘိက္ခု၊ ကဏ္ဋကော ဣတိ သာမဏေရော ကဏ္ဋကသာမဏေရော၊ ဝေသာလိယာ ဇာတာ ဝေသာလိကာ၊ ဝဇ္ဇီနံ ပုတ္တာ ဝဇ္ဇိပုတ္တာ၊ ဝေသာလိကာ စ တေ ဝဇ္ဇိပုတ္တာ စာတိ ဝေသာလိကဝဇ္ဇိပုတ္တာ၊ အရိဋ္ဌဘိက္ခု စ ကဏ္ဋကသာမဏေရော စ ဝေသာလိကဝဇ္ဇိပုတ္တာ စ အရိဋ္ဌဘိက္ခုကဏ္ဋကသာမဏေရဝေသာလိကဝဇ္ဇိပုတ္တကာ. ပရူပဟာရော စ အညာဏဉ္စ ကင်္ခါဝိတရဏဉ္စ ပရူပဟာရအညာဏကင်္ခါဝိတရဏာ. ကေ တေ? ဝါဒါ. တေ အာဒိ ယေသံ တေတိ ပရူပဟာရအညာဏကင်္ခါဝိတရဏာဒယော. ဝဒန္တိ ဧတေဟီတိ ဝါဒါ၊ ပရူပဟာရအညာဏကင်္ခါဝိတရဏာဒယော ဝါဒါ ဧတေသန္တိ ပရူ။ပေ။ ဝါဒါ. ကေ တေ? မိစ္ဆာဝါဒိနော. အရိဋ္ဌ။ပေ။ ပုတ္တာ စ ပရူပဟာရ။ပေ။ ဝါဒါ စ မဟာသံဃိကာဒယော စ သာသနပစ္စတ္ထိကာ နာမာတိ သမုစ္စယဒွန္ဒဝသေန ယောဇနာ ကာတဗ္ဗာ. သေသံ သုဝိညေယျမေဝ.

အာနိသံသကထာ နိဋ္ဌိတာ.

ဣတိ ဝိနယသင်္ဂဟသံဝဏ္ဏနာဘူတေ ဝိနယာလင်္ကာရေ

ပကိဏ္ဏကဝိနိစ္ဆယကထာလင်္ကာရော နာမ

စတုတ္တိံသတိမော ပရိစ္ဆေဒေါ.