အန္တောဝုတ္ထာဒိကထာ

အန္တောဝုတ္ထာဒိကထာယံ ‘‘တေန ခေါ ပန သမယေန ဘဂဝတော ဥဒရဝါတာဗာဓော ဟောတိ၊ အထ ခေါ အာယသ္မာ အာနန္ဒော ‘ပုဗ္ဗေပိ ဘဂဝတော ဥဒရဝါတာဗာဓော တေကဋုလယာဂုယာ ဖာသု ဟောတီ’တိ သာမံ တိလမ္ပိ တဏ္ဍုလမ္ပိ မုဂ္ဂမ္ပိ ဝိညာပေတွာ အန္တော ဝါသေတွာ အန္တော သာမံ ပစိတွာ ဘဂဝတော ဥပနာမေသိ ‘ပိဝတု ဘဂဝါ တေကဋုလယာဂု’န္တိ. ဇာနန္တာပိ တထာဂတာ ပုစ္ဆန္တိ၊ ဇာနန္တာပိ န ပုစ္ဆန္တိ၊ ကာလံ ဝိဒိတွာ ပုစ္ဆန္တိ၊ ကာလံ ဝိဒိတွာ န ပုစ္ဆန္တိ၊ အတ္ထသဉှိတံ တထာဂတာ ပုစ္ဆန္တိ၊ နော အနတ္ထသဉှိတံ၊ အနတ္ထသဉှိတေ သေတုဃာတော တထာဂတာနံ. ဒွီဟိ အာကာရေဟိ ဗုဒ္ဓါ ဘဂဝန္တော ဘိက္ခူ ပဋိပုစ္ဆန္တိ ‘ဓမ္မံ ဝါ ဒေသေဿာမ၊ သာဝကာနံ ဝါ သိက္ခာပဒံ ပညပေဿာမာ’တိ.

အထ ခေါ ဘဂဝါ အာယသ္မန္တံ အာနန္ဒံ အာမန္တေသိ ‘ကုတာယံ၊ အာနန္ဒ၊ ယာဂူ’တိ. အထ ခေါ အာယသ္မာ အာနန္ဒော ဘဂဝတော ဧတမတ္ထံ အာရောစေသိ. ဝိဂရဟိ ဗုဒ္ဓေါ ဘဂဝါ အနနုစ္ဆဝိကံ၊ အာနန္ဒ၊ အနနုလောမိကံ အပ္ပတိရူပံ အဿမဏကံ အကပ္ပိယံ အကရဏီယံ၊ ကထဉှိ နာမ တွံ၊ အာနန္ဒ၊ ဧဝရူပါယ ဗာဟုလ္လာယ စေတေဿသိ၊ ယဒပိ၊ အာနန္ဒ၊ အန္တော ဝုတ္ထံ၊ တဒပိ အကပ္ပိယံ. ယဒပိ အန္တော ပက္ကံ၊ တဒပိ အကပ္ပိယံ. ယဒပိ သာမံ ပက္ကံ၊ တဒပိ အကပ္ပိယံ. နေတံ၊ အာနန္ဒ၊ အပ္ပသန္နာနံ ဝါ ပသာဒါယ။ပေ။ ဝိဂရဟိတွာ ဓမ္မိံ ကထံ ကတွာ ဘိက္ခူ အာမန္တေသိ – န၊ ဘိက္ခဝေ၊ အန္တော ဝုတ္ထံ အန္တော ပက္ကံ သာမံ ပက္ကံ ပရိဘုဉ္ဇိတဗ္ဗံ၊ ယော ပရိဘုဉ္ဇေယျ၊ အာပတ္တိ ဒုက္ကဋဿ. အန္တော စေ၊ ဘိက္ခဝေ၊ ဝုတ္ထံ အန္တော ပက္ကံ သာမံ ပက္ကံ၊ တဉ္စေ ပရိဘုဉ္ဇေယျ၊ အာပတ္တိ တိဏ္ဏံ ဒုက္ကဋာနံ. အန္တော စေ၊ ဘိက္ခဝေ၊ ဝုတ္ထံ အန္တော ပက္ကံ အညေဟိ ပက္ကံ၊ တဉ္စေ ပရိဘုဉ္ဇေယျ၊ အာပတ္တိ ဒွိန္နံ ဒုက္ကဋာနံ. အန္တော စေ၊ ဘိက္ခဝေ၊ ဝုတ္ထံ ဗဟိ ပက္ကံ သာမံ ပက္ကံ၊ တဉ္စေ ပရိဘုဉ္ဇေယျ၊ အာပတ္တိ ဒွိန္နံ ဒုက္ကဋာနံ. ဗဟိ စေ၊ ဘိက္ခဝေ၊ ဝုတ္ထံ အန္တော ပက္ကံ သာမံ ပက္ကံ၊ တဉ္စေ ပရိဘုဉ္ဇေယျ၊ အာပတ္တိ ဒွိန္နံ ဒုက္ကဋာနံ. အန္တော စေ၊ ဘိက္ခဝေ၊ ဝုတ္ထံ ဗဟိ ပက္ကံ အညေဟိ ပက္ကံ၊ တဉ္စေ ပရိဘုဉ္ဇေယျ၊ အာပတ္တိ ဒုက္ကဋဿ. ဗဟိ စေ၊ ဘိက္ခဝေ၊ ဝုတ္ထံ အန္တော ပက္ကံ အညေဟိ ပက္ကံ၊ တဉ္စေ ပရိဘုဉ္ဇေယျ၊ အာပတ္တိ ဒုက္ကဋဿ. ဗဟိ စေ၊ ဘိက္ခဝေ၊ ဝုတ္ထံ ဗဟိ ပက္ကံ သာမံ ပက္ကံ၊ တဉ္စေ ပရိဘုဉ္ဇေယျ၊ အာပတ္တိ ဒုက္ကဋဿ. ဗဟိ စေ၊ ဘိက္ခဝေ၊ ဝုတ္ထံ ဗဟိ ပက္ကံ အညေဟိ ပက္ကံ၊ တဉ္စေ ပရိဘုဉ္ဇေယျ၊ အနာပတ္တီ’’တိ (မဟာဝ. ၂၇၄) ဝစနတော သဟသေယျပ္ပဟောနကေ ဌာနေ ဝုတ္ထတာ၊ တတ္ထ ပက္ကတာ၊ ဥပသမ္ပန္နေန သာမံ ပက္ကတာတိ ဣမေသံ တိဏ္ဏံ အင်္ဂါနံ သမ္ဘဝေ သတိ တိဿော အာပတ္တိယော၊ ဒွိန္နံ သမ္ဘဝေ ဒွေ အာပတ္တိယော၊ ဧကဿ အင်္ဂဿ သမ္ဘဝေ ဧကာ အာပတ္တီတိ ဝေဒိတဗ္ဗံ.

အန္တော ဝုတ္ထန္တိ အကပ္ပိယကုဋိယံ ဝုတ္ထံ. သာမံ ပက္ကန္တိ ဧတ္ထ ယံ ကိဉ္စိ အာမိသံ ဘိက္ခုနော ပစိတုံ န ဝဋ္ဋတိ. သစေပိဿ ဥဏှယာဂုယာ သုလသိပဏ္ဏာနိ ဝါ သိင်္ဂိဝေရံ ဝါ လောဏံ ဝါ ပက္ခိပန္တိ၊ တမ္ပိ စာလေတုံ န ဝဋ္ဋတိ. ‘‘ယာဂုံ နိဗ္ဗာပေမီ’’တိ ပန စာလေတုံ ဝဋ္ဋတိ. ဥတ္တဏ္ဍုဘတ္တံ လဘိတွာပိ ပိဒဟိတုံ န ဝဋ္ဋတိ. သစေ ပန မနုဿာ ပိဒဟိတွာဝ ဒေန္တိ၊ ဝဋ္ဋတိ. ‘‘ဘတ္တံ ဝါ မာ နိဗ္ဗာယတူ’’တိ ပိဒဟိတုံ ဝဋ္ဋတိ. ‘‘အနုဇာနာမိ၊ ဘိက္ခဝေ၊ ပုန ပါကံ ပစိတု’’န္တိ (မဟာဝ. ၂၇၄) ဝစနတော ပုဗ္ဗေ အနုပသမ္ပန္နေဟိ ပက္ကံ ပုန ပစိတုံ ဝဋ္ဋတိ. ဝုတ္တဉှိ အဋ္ဌကထာယံ (မဟာဝ. အဋ္ဌ. ၂၇၄) ‘‘ခီရတက္ကာဒီသု ပန သကိံ ကုထိတေသု အဂ္ဂိံ ဒါတုံ ဝဋ္ဋတိ ပုနပါကဿ အနုညာတတ္တာ’’တိ. ‘‘အနုဇာနာမိ၊ ဘိက္ခဝေ၊ အန္တော ဝါသေတု’’န္တိ (မဟာဝ. ၂၇၄) ဝစနတော ဒုဗ္ဘိက္ခသမယေ တဏ္ဍုလာဒီနိ အန္တော ဝါသေတုံ ဝဋ္ဋတိ. ‘‘အနုဇာနာမိ၊ ဘိက္ခဝေ၊ အန္တော ပစိတု’’န္တိ (မဟာဝ. ၂၇၄) ဝစနတော ဒုဗ္ဘိက္ခသမယေ အန္တော ပစိတုံ ဝဋ္ဋတိ. ‘‘အနုဇာနာမိ၊ ဘိက္ခဝေ၊ သာမံ ပစိတု’’န္တိ (မဟာဝ. ၂၇၄) ဝစနတော ဒုဗ္ဘိက္ခသမယေ သာမမ္ပိ ပစိတုံ ဝဋ္ဋတိ. ‘‘အနုဇာနာမိ၊ ဘိက္ခဝေ၊ အန္တော ဝုတ္ထံ အန္တော ပက္ကံ သာမံ ပက္က’’န္တိ (မဟာဝ. ၂၇၄) ဝစနတော ဒုဗ္ဘိက္ခသမယေ တီဏိပိ ဝဋ္ဋန္တိ.