၃. ဥက္ကောဋနသိက္ခာပဒဝဏ္ဏနာ

၃၉၂. တတိယေ ‘‘တဿ ဘိက္ခုနော သန္တိကံ ဂန္တွာ’’တိ ဝုတ္တတ္တာ ယဿ အဓိကရဏံ သံဃကမ္မေန နိဟတံ၊ တဿ သမ္မုခေ ဧဝ ဥက္ကောဋေန္တဿ ပါစိတ္တိယံ. ပရမ္မုခေ ပန ဒုက္ကဋမေဝ.

၃၉၅. ‘‘ဓမ္မကမ္မေ အဓမ္မကမ္မသညီ ဥက္ကောဋေတိ၊ အနာပတ္တီ’’တိ ဝုတ္တတ္တာ အနာဒရိယတာဒိ ဝိယ ဥက္ကောဋနံ သယံ အကုသလံ န ဟောတိ၊ ဓမ္မကမ္မသညာယ၊ ပန ဝိမတိယာ စ ဥက္ကောဋနေနေဝ အကုသလံ ဟောတိ. ယထာဓမ္မံ နိဟတတာ၊ ဇာနနာ၊ ဥက္ကောဋနာတိ တီဏိ အင်္ဂါနိ.

ဥက္ကောဋနသိက္ခာပဒဝဏ္ဏနာ နိဋ္ဌိတာ.