၁. ပဌမာဒိသိက္ခာပဒဝဏ္ဏနာ

၁၀၆၇. ‘‘ဂဗ္ဘိနိ’’န္တိ ဒဿနာဒီဟိပိ ဂဗ္ဘသမ္ဘဝတော ဝုတ္တံ. ပဒဘာဇနေပိ ပဝါရိတဘာဝေါ န ဒိဿတိ.

၁၀၇၄. ဓာတိ ဝါတိ ဧတ္ထ ဒါရကံ သာမိကာနံ ဒတွာ အာဟဋေ ဝဍ္ဎေတိ၊ တထာ မာတာပီတိ ကေစိ.

၁၀၈၀. ‘‘သိက္ခမာန’’န္တိ ပါဌံ ဒီပဝါသိနော ရောစေန္တိ ကိရိယာကိရိယတ္တာ၊ ဇမ္ဗုဒီပဝါသိနော ‘‘သိက္ခမာနာ’’တိ. တဿတ္ထော သိက္ခာဓမ္မမာနနတော သိက္ခမာနာတိ. ဣဓ ကိရိယာ န ဟောတိ၊ သညာဝ အဓိပ္ပေတာ. န ဧတာသု အသိက္ခိတာ ဥပသမ္ပာဒေတဗ္ဗာ ဥပဇ္ဈာယိနီအာဒီနံ အာပတ္တိဘာဝါ. ‘‘တဿာ ဥပသမ္ပဒါ ဟောတိ ဧဝါ’’တိ ဝဒန္တိ.

၁၀၈၂. ဓမ္မကမ္မေတိ ဥပသမ္ပဒကမ္မံ အဓိပ္ပေတံ.

၁၁၁၂. ဝုဋ္ဌာပိတန္တိ သာမဏေရိဘူမိတော ယာယ ထေရိယာ ဥပသမ္ပဒါပေက္ခာ ဝုဋ္ဌပိတာ၊ သာ ထေရီ ဝုဋ္ဌာပိတာ နာမ၊ တေနေဝ ပုန ဝိသေသနတ္ထံ ‘‘ပဝတ္တိနိ’’န္တိ အာဟ.

ပဌမာဒိသိက္ခာပဒဝဏ္ဏနာ နိဋ္ဌိတာ.

ဂဗ္ဘိနိဝဂ္ဂဝဏ္ဏနာ နိဋ္ဌိတာ.