သေဒမောစနဂါထာဝဏ္ဏနာ

အဝိပ္ပဝါသပဉှာဝဏ္ဏနာ

၄၇၉. တဟိန္တိ တသ္မိံ ပုဂ္ဂလေ. အကပ္ပိယသမ္ဘောဂေါ နာမ မေထုနဓမ္မာဒိ. ‘‘ဝရသေနာသနရက္ခဏတ္ထာယ ဝိဿဇ္ဇေတွာ ပရိဘုဉ္ဇိတုံ ဝဋ္ဋတီ’’တိ ဂရုဘဏ္ဍဝိနိစ္ဆယေ ဝုတ္တော. ဧကာဒသာဝန္ဒိယေ ပဏ္ဍကာဒယော ဧကာဒသ. ဥပေတိ သပရိသံ. န ဇီဝတိ နိမ္မိတရူပတ္တာ. ‘‘ဥဗ္ဘက္ခကေန ဝဒါမီ’’တိ ဣမိနာ မုခေ မေထုနဓမ္မာဘာဝံ ဒီပေတိ. အဓောနာဘိဝိဝဇ္ဇနေန ဝစ္စမဂ္ဂပ္ပဿာဝမဂ္ဂေသု. ဂါမန္တရပရိယာပန္နံ နဒိပါရံ ဩက္ကန္တဘိက္ခုနိံ သန္ဓာယာတိ ဘိက္ခုနိယာ ဂါမာပရိယာပန္နပရတီရေ နဒိသမီပမေဝ သန္ဓာယ ဝုတ္တာ. တတ္ထ ပရတီရေ ဂါမူပစာရော ဧကလေဍ္ဍုပါတော နဒိပရိယန္တေန ပရိစ္ဆိန္နော၊ တသ္မာ ပရတီရေ ရတနမတ္တမ္ပိ အရညံ န အတ္ထိ၊ တဉ္စ တိဏာဒီဟိ ပဋိစ္ဆန္နတ္တာ ဒဿနူပစာရဝိရဟိတံ ကရောတိ. တတ္ထ အတ္တနော ဂါမေ အာပတ္တိ နတ္ထိ. ပရတီရေ ပန ဧကလေဍ္ဍုပါတသင်္ခါတေ ဂါမူပစာရေယေဝ ပဒံ ဌပေတိ. အန္တရေ အဘိဓမ္မဝသေန အရညဘူတံ သကဂါမံ အတိက္ကမတိ နာမ၊ တသ္မာ ဂဏမှာ ဩဟီယနာ စ ဟောတီတိ ဉာတဗ္ဗံ. ဧတ္တာဝတာပိ သန္တောသမကတွာ ဝိစာရေတွာ ဂဟေတဗ္ဗံ. ဘိက္ခူနံ သန္တိကေ ဥပသမ္ပန္နာ ပဉ္စသတာ မဟာပဇာပတိပ္ပမုခါ. မဟာပဇာပတိပိ ဟိ အာနန္ဒတ္ထေရေန ဒိန္နဩဝါဒဿ ပဋိဂ္ဂဟိတတ္တာ ဘိက္ခူနံ သန္တိကေ ဥပသမ္ပန္နာ နာမ.

ပါရာဇိကာဒိပဉှာဝဏ္ဏနာ

၄၈၀. ‘‘ဒုဿကုဋိံ သန္ဓာယာ’’တိ သဟ ဒုဿေန ဝီတိက္ကမနဿ သက္ကုဏေယျတာယ ဝုတ္တံ. လိင်္ဂပရိဝတ္တေ ပဋိဂ္ဂဟဏဿ ဝိဇဟနတော သာမံ ဂဟေတွာ ဘုဉ္ဇိတုံ န ဝဋ္ဋတိ. ကာကဦဟဒနံ ဝါတိ ကာကေန ဦဟဒနံ ဝါ. ‘‘တယော ပုရိသေပိ ဥပဂန္တွာ’’တိ ပါဌသေသော.

ပါစိတ္တိယာဒိပဉှာဝဏ္ဏနာ

၄၈၁. မေထုနဓမ္မပစ္စယာ နာမ ကာယသံသဂ္ဂေါ. တံဟေတု မေထုနဓမ္မဿ ပုဗ္ဗဘာဂဘူတံ ကာယသံသဂ္ဂံ ဝါယာမန္တိယာတိ အဋ္ဌဝတ္ထုပူရဏံ သန္ဓာယ. ပရိဘောဂပ္ပစ္စယာတိ ပရိဘောဂကာရဏာ. တသ္မာတိ ယသ္မာ ပရိဘောဂပ္ပစ္စယာ အာပဇ္ဇတိ၊ တသ္မာ ဘောဇနပရိယောသာနေ ဟောတီတိ အတ္ထော. ပေါရာဏပေါတ္ထကေသု ‘‘တဿာ’’တိ ပါဌော. ‘‘ကာရဏဝစနံ သုန္ဒရံ ဘောဇနပရိစ္ဆေဒဒဿနတော’’တိ ဝဒန္တိ.

သေဒမောစနဂါထာဝဏ္ဏနာ နိဋ္ဌိတာ.