ဒုတိယဂါထာသင်္ဂဏိကဝဏ္ဏနာ

ကာယိကာဒိအာပတ္တိဝဏ္ဏနာ

၄၇၄-၅. နိဒါနုဒ္ဒေသံ ဝိနာ သေသုဒ္ဒေသာဘာဝါ ‘‘သဗ္ဗပါတိမောက္ခုဒ္ဒေသာနဉ္စ သင်္ဂဟော ဟောတီ’’တိ ဝုတ္တံ. ဝိနယေ ဂရုကာ ဝိနယဂရုကာ. ဣဒံ ပန ဒွီသု ဂါထာသု ကိဉ္စာပိ အာဂတံ၊ အညေဟိ ပန မိဿေတွာ ဝုတ္တဘာဝါ နာနာကရဏံ ပစ္စေတဗ္ဗံ. နဝသု ဌာနေသု ကမ္မံ ဟောတီတိ ကမ္မဉတ္တိ ဟောတိ. ဝါစာတိ ဝစီသမ္ဘဝါ. အဒ္ဓါနဟီနော ဦနဝီသတိဝဿော. ‘‘အပိစေတ္ထာတိ ကုရုန္ဒိဝါဒေါ’’တိ ဝုတ္တံ. ဝနပ္ပတိန္တိ ဧဝံ အဒိန္နာဒါနေ အာဂတံ ဝနပ္ပတိံ. ဝိဿဋ္ဌိဆဍ္ဍနေတိ သုက္ကဝိဿဋ္ဌိယံ. ဒုက္ကဋာ ကတာတိ ဒုက္ကဋံ ဝုတ္တံ. အာမကဓညံ ဝိညာပေတွာ ဘုဉ္ဇန္တိယာ ပုဗ္ဗပယောဂေ ဒုက္ကဋံ၊ အဇ္ဈောဟာရေ ပါစိတ္တိယံ.

ပါစိတ္တိယဝဏ္ဏနာ

၄၇၆. မဟာသံဃိကာ သာမဏေရေပိ အာပတ္တိံ ဒေသာပေန္တိ ကိရ၊ တေန ဝုတ္တံ ‘‘န ဒေသာပေတဗ္ဗာ’’တိ၊ ဒဏ္ဍကမ္မံ ပန တေသံ ကာတဗ္ဗံ တထာရူပေ ဩဠာရိကဝီတိက္ကမေ.

အဝန္ဒနီယပုဂ္ဂလာဒိဝဏ္ဏနာ

၄၇၇. ဒသသတံ အာပတ္တိယောတိ သဟဿံ အာပတ္တိယော. စမ္ပာယံ ဝိနယဝတ္ထုသ္မိန္တိ စမ္ပေယျက္ခန္ဓကေ. အဓမ္မေန ဝဂ္ဂန္တိအာဒီနိ စတ္တာရိ ကမ္မာနိယေဝ ဘဂဝတာ ဝုတ္တာနီတိ အတ္ထော. န ကေဝလံ အာပတ္တိယေဝ၊ အထ ခေါ ဆ သမထာ။ပေ။ သမ္မုခါဝိနယေန သမ္မန္တိ၊ သမာယောဂံ ဂစ္ဆန္တိ သမ္မုခါဝိနယေန သမ္ပယောဂံ ဂစ္ဆန္တီတိ အတ္ထော. ဝိနာ သမထေဟိ သမ္မတိ၊ သမထဘာဝံ ဂစ္ဆတိ. ပဋိသေဓတ္ထေ သတိ ဝိနာ သမထေဟီတိ သမထေဟိ ဝိနာတိ အတ္ထော.

သောဠသကမ္မာဒိဝဏ္ဏနာ

၄၇၈. အသုတ္တကန္တိ သုတ္တဝိရဟိတံ၊ ဥသုတ္တံ တတြ နတ္ထီတိ အဓိပ္ပါယော.

ဒုတိယဂါထာသင်္ဂဏိကဝဏ္ဏနာ နိဋ္ဌိတာ.