ဥပါလိပဉ္စကဝဏ္ဏနာ

အနိဿိတဝဂ္ဂဝဏ္ဏနာ

၄၁၉. ကာယိကဥပဃာတိကာ နာမ ကာယေန ဝီတိက္ကမော.

နပ္ပဋိပ္ပဿမ္ဘနဝဂ္ဂဝဏ္ဏနာ

၄၂၀. ဩမဒ္ဒကာရကောတိ ဩမဒ္ဒိတွာ အဘိဘဝိတွာ ကာရကော.

ဝေါဟာရဝဂ္ဂဝဏ္ဏနာ

၄၂၄. ဘေဒကရဝတ္ထူနိ နိဿာယ ဝိဝါဒါဓိကရဏံ သမုဋ္ဌာတိ၊ ဧဝံ ယထာသင်္ချံ ဂစ္ဆတိ. ကောဓောပနာဟာဒိဒွါဒသမူလပယောဂံ ဝိဝါဒါဓိကရဏံ၊ တထာ သေသေသု. ဩသာရဏာဒီသု နဝသု ဌာနေသု ကမ္မဉတ္တိယာ ကရဏံ. ဒွီသု ဌာနေသု ဉတ္တိဒုတိယဉတ္တိစတုတ္ထကမ္မေသု. ယသ္မာ မဟာအဋ္ဌကထာယံ ဝုတ္တနယေနေဝ ဥဘတောဝိဘင်္ဂါ အသင်္ဂဟိတာ၊ တသ္မာ ယံ ကုရုန္ဒိယံ ဝုတ္တံ၊ တံ ဂဟေတဗ္ဗန္တိ သမ္ဗန္ဓော.

ဒိဋ္ဌာဝိကမ္မဝဂ္ဂဝဏ္ဏနာ

၄၂၅. တိဏ္ဏန္နံ ဥပရိ သဟ အာပတ္တိံ ဒေသေတုံ န လဗ္ဘန္တိ. ကမ္မနာနာသံဝါသကာနံ လဒ္ဓိဂ္ဂဟိတကောဝ လဒ္ဓိနာနာသံဝါသကော. ‘‘အဝိပ္ပဝါသသီမာယ ဌိတဿာ’’တိ မဟာသီမံ ကိရ သန္ဓာယ ဝုတ္တံ.

၄၃၃. ‘‘ဥမ္မာဒါ စိတ္တက္ခေပါ’’တိ ပါဌော.

မုသာဝါဒဝဂ္ဂဝဏ္ဏနာ

၄၄၄. ပရိယာယေန ဇာနန္တဿာတိ ယဿ ကဿစိ ဇာနန္တဿ ပရိယာယေန ဝုတ္တမုသာဝါဒေါတိ အတ္ထော.

၄၄၆. အနုယောဂေါ န ဒါတဗ္ဗောတိ တေန ဝုတ္တံ အနာဒိယိတွာ တုဏှီ ဘဝိတဗ္ဗန္တိ အတ္ထော.

ဘိက္ခုနောဝါဒဝဂ္ဂဝဏ္ဏနာ

၄၅၄. ဝေါဟာရနိရုတ္တိယံ သဒ္ဒနိရုတ္တိယံ. မဂ္ဂပစ္စဝေက္ခဏာဒယော ဧကူနဝီသတိ.

ဥဗ္ဗာဟိကဝဂ္ဂဝဏ္ဏနာ

၄၅၅. ပသာရေတာ မောဟေတာ.

အဓိကရဏဝူပသမဝဂ္ဂဝဏ္ဏနာ

၄၅၈. ‘‘ယထာရတ္တန္တိ အနုပသမ္ပန္နေ အပေက္ခတီ’’တိပိ ဝဒန္တိ. ‘‘ယထာဝုဍ္ဎန္တိ ဥပသမ္ပန္နေ အပေက္ခတီ’’တိ လိခိတံ.

ကထိနတ္ထာရဝဂ္ဂဝဏ္ဏနာ

၄၆၇. ‘‘ဧကာဝတ္တော’’တိပိ ပဌန္တိ၊ တဿ ကုဒ္ဓေါ ကောဓာဘိဘူတောတိ ကိရတ္ထော. ဧကဝတ္ထောတိပိ ကေစိ၊ ဥတ္တရာသင်္ဂံ အပနေတွာ ဌိတောတိ ကိရတ္ထော၊ တံ သဗ္ဗံ အဋ္ဌကထာယံ ဥဒ္ဓဋပါဠိယာ ဝိရုဇ္ဈတီတိ. ဧကာဝဋ္ဋောတိ ဟိ ဥဒ္ဓဋံ၊ တသ္မာ န ဂဟေတဗ္ဗံ. အန္တရာ ဝုတ္တကာရဏေနာတိ ‘‘ကိစ္စယပသုတတ္တာ ဝန္ဒနံ အသမန္နာဟရန္တော နလာဋံ ပဋိဟညေယျာ’’တိအာဒိဝုတ္တကာရဏေန.

ဥပါလိပဉ္စကဝဏ္ဏနာ နိဋ္ဌိတာ.

အာပတ္တိသမုဋ္ဌာနဝဏ္ဏနာ

၄၇၀. ပုဗ္ဗေ ဝုတ္တမေဝါတိ သဟသေယျာဒိပဏ္ဏတ္တိဝဇ္ဇံ. ဣတရန္တိ သစိတ္တကံ. ဒေသေန္တော၊ ဒေါမနဿိကော အညေဟိ ဘိံသာပနာဒီနိ ကတွာ အာပတ္တိံ အာပဇ္ဇိတွာတိ အဓိပ္ပါယော.