၆. ထေယျသတ္ထသိက္ခာပဒဝဏ္ဏနာ

၄၀၉. ထေယျသတ္ထော စေ သုဒ္ဓမာတုဂါမော ဒွေ အာပတ္တိယော. အထ ဘိက္ခုနိယော၊ သမယော ရက္ခတိ. ထေယျသတ္ထဘာဝဿ ဌာနံ ကတွာ ရက္ခဏီယတ္တာ သဟဓမ္မိကာနံ ရက္ခတိယေဝါတိ ဧကေ. ထေယျဘာဝေ န သဟဓမ္မိကတာ၊ တသ္မာ န ရက္ခတိ ဧဝါတိ ဧကေ. အပါရာဇိကထေယျဘာဝေ သတိ သဟဓမ္မိကဘာဝေါတိ စေ? ဣတရသ္မိံ ဣတရန္တိ သမယော အနိဿဋော အာပဇ္ဇတိ. ဘိက္ခု ထေယျသတ္ထော စေ၊ ယထာဝတ္ထုကမေဝ. ထေယျသတ္ထေ ထေယျသတ္ထသညီ သဒ္ဓိံ သံဝိဓာယာတိ စ. ‘‘သဒ္ဓိ’’န္တိ ပဒံ ကေသုစိ နတ္ထိ၊ တံ အနနုရူပံ. တထာ ဒုတိယေပိ.

ထေယျသတ္ထသိက္ခာပဒဝဏ္ဏနာ နိဋ္ဌိတာ.