၇. သံဝိဓာနသိက္ခာပဒဝဏ္ဏနာ

၄၁၂. ‘‘တေန ခေါ ပန သမယေန အညတရာ ဣတ္ထီ’’တိ စ ပါဌော အတ္ထိ၊ ကေသုစိ နတ္ထိ. နတ္ထိဘာဝေါ သုန္ဒရော ‘‘တေန ခေါ သမယေနာ’’တိ အဓိကာရတ္တာတိ ကေစိ. ဣဓ ဧကတောဥပသမ္ပန္နာ၊ သိက္ခမာနာ၊ သာမဏေရီတိ ဣမာပိ တိဿော သင်္ဂဟံ ဂစ္ဆန္တိ. ဣမာသံ ပန သမယော ရက္ခတိ၊ အယမိမာသံ၊ မာတုဂါမဿ စ ဝိသေသော.

၄၁၄. အပိစေတ္ထ ‘‘ဝိညူ ပဋိဗလာ’’တိ ဝစနတော အပ္ပဋိဗလာ အနာပတ္တိဝတ္ထုကာတိ ဧကေ၊ တံ န ယုတ္တံ ဒုက္ကဋဝတ္ထုကတ္တာ. ‘‘ဘိက္ခု သံဝိဒဟတိ၊ မာတုဂါမော န သံဝိဒဟတိ၊ အာပတ္တိ ဒုက္ကဋဿာ’’တိ ဟိ ဝုတ္တံ. တထာ ဟိ ဥပပရိက္ခိတဗ္ဗံ.

သံဝိဓာနသိက္ခာပဒဝဏ္ဏနာ နိဋ္ဌိတာ.