၂. အညဝါဒကသိက္ခာပဒဝဏ္ဏနာ
၉၈-၉. အညံ ဝဒတီတိ အညဝါဒကံ၊ ‘‘ဝစနံ ကရေယျာ’’တိ လိခိတံ. ‘‘တုဏှီဘူတဿေတံ နာမ’’န္တိ ပါဌော. ဥဂ္ဃါတေတုကာမောတိ သမောဟနိတုကာမော၊ အန္တရာယံ ကတ္တုကာမောတိ ပေါရာဏာ.
၁၀၀. ‘‘သုဒိဋ္ဌော ဘန္တေ၊ န ပနေသော ကဟာပဏောတိအာဒီသု အနာရောပိတေ ဒုက္ကဋေန မုသာဝါဒပါစိတ္တိယံ၊ အရောပိတေ ပါစိတ္တိယဒွယံ ဟောတီ’’တိ ဝဒန္တိ၊ ဝီမံသိတဗ္ဗံ.
၁၀၂. အဓမ္မေန ဝါ ဝဂ္ဂေန ဝါ န ကမ္မာရဟဿ ဝါတိ ဧတ္ထ ‘‘မယိ ဝုတ္တေ မံ ဝါ အညံ ဝါ သံဃော အဓမ္မေန ဝါ ကမ္မံ၊ ဝဂ္ဂေန ဝါ ကမ္မံ ကရိဿတိ၊ န ကမ္မာရဟဿ ဝါ မေ၊ အညဿ ဝါ ကမ္မံ ကရိဿတီ’’တိ န ကထေတီတိ ယောဇေတဗ္ဗံ.
အညဝါဒကသိက္ခာပဒဝဏ္ဏနာ နိဋ္ဌိတာ.