၃. ဘေသဇ္ဇသိက္ခာပဒဝဏ္ဏနာ

၆၂၀. ‘‘သာ အဟောသိ သုဝဏ္ဏမာလာ’’တိ ဝစနတော ဌပေတွာ သဟဓမ္မိကေ အညေသံ ယထာသုခံ ရူပိယံ ဒါတုံ ဝဋ္ဋတိ ဥဂ္ဂဏှာပေတုံ၊ သဗျောဟာရာပေဘုဉ္စာတိ အာစရိယော၊ ဝီမံသိတဗ္ဗံ ဣဒ္ဓိမဿ ဣဒ္ဓိဝိသယတ္တာ.

၆၂၂. ‘‘ယေသံ မံသံ ကပ္ပတီ’’တိ ဝစနေန ယေသံ မံသံ န ကပ္ပတိ၊ တေသံ သပ္ပိအာဒိ ကိဉ္စာပိ န ကပ္ပတိ၊ န ပန နိဿဂ္ဂိယဝတ္ထူတိ ဝေဒိတဗ္ဗံ. တထာ န ပဏီတဘောဇနဝတ္ထူတိ. ဥဂ္ဂဟိတကံ ကတွာ နိက္ခိတ္တန္တိ အဇ္ဈောဟရဏတ္ထံ နိက္ခိတ္တံ. ဣတရဉှိ ပဋိဂ္ဂဟေတွာ အဇ္ဈောဟရိတုံ ဝဋ္ဋတိ. ဥဘယေသမ္ပီတိ ပစ္ဆာဘတ္တံ ပဋိဂ္ဂဟိတေဟိ၊ ပုရေဘတ္တံ ပဋိဂ္ဂဟိတေဟိ စ ကတာနံ. ‘‘မံသဿ အကပ္ပိယတ္တာ’’တိ ကာရဏပတိရူပကံ ဝတွာ. ခါဒိံသူတိ ‘‘ဝိကာလေ ကေဝလံ နဝနီတမေဝ ခါဒိတုကာမေန ဒဓိတက္ကဂတာနိ အပနေတဗ္ဗာနိ၊ ပစိတုကာမဿ သာမံပါကံ န ဟောတီတိ ထေရဿ အဓိပ္ပါယော’’တိ ဝုတ္တံ. ‘‘ခယံ ဂမိဿတီ’’တိ ဝစနတော ခီရံ ပက္ခိပိတွာ ပက္ကသပ္ပိ ဝိကာလေ ကပ္ပတီတိ သိဒ္ဓံ. ဘေသဇ္ဇေဟီတိ ယာဝဇီဝိကဘေသဇ္ဇေဟိ. ကတတေလံ ပုရေဘတ္တန္တိ အပစိတွာ ကတံ ဧဝ. ဥဏှောဒကေနာတိ တာပနဘာဝံ ဒီပေတီတိ ကေစိ၊ တံ န သုန္ဒရံ. နိဗ္ဗဋ္ဋိတတ္တာတိ ပိညာကာဒိတော. ‘‘တေလတ္ထာယ ပဋိဂ္ဂဟိတ။ပေ။ ဒုက္ကဋမေဝါ’’တိ ဝစနတော အတေလတ္ထာယ ပဋိဂ္ဂဟိတေဟိ၊ သတ္တာဟာတိက္ကန္တေဟိပိ ကတတေလံ ကတဒိဝသတော ပဋ္ဌာယ သတ္တာဟံ ဝဋ္ဋတီတိ ဆာယာ ဒိဿတိ၊ ကရမန္ဒံ ရုက္ခသာရောတိ ကေစိ.

၆၂၃. အဝသကသဋေ ယသ္မာ ခီရာဒီနိ ပက္ခိပိတွာ တေလံ ပစန္တိ၊ တသ္မာ ကသဋံ န ဝဋ္ဋတိ၊ တေလမေဝ ဝဋ္ဋတိ၊ တေန ဝုတ္တံ ‘‘ပက္ကတေလကသဋေ ဝိယ ကုက္ကုစ္စာယတီ’’တိ. ဝသာယ သဒ္ဓိံ ပက္ကတ္တာ န ဝဋ္ဋတီတိ စေ? ဝဒထ၊ ဘန္တေ၊ နဝနီတေ ဒဓိဂုဠိကာတိအာဒိသမ္ဗန္ဓော. မဓုမှိ စတ္တာရော ကာလိကာ ယထာသမ္ဘဝံ ယောဇေတဗ္ဗာ၊ ဥစ္ဆုမှိ စ၊ ကထံ? သမက္ခိကံ သေဠကံ မဓု ယာဝကာလိကံ. အနေလကံ ဥဒကသမ္ဘိန္နံ ယာမကာလိကံ၊ အသမ္ဘိန္နံ သတ္တာဟကာလိကံ၊ မဓုသိဋ္ဌံ ပရိသုဒ္ဓံ ယာဝဇီဝိကံ. တထာ ဥစ္ဆု ဝါ ရသော ဝါ သကသဋော ယာဝကာလိကော၊ နိက္ကသဋော ဥဒကသမ္ဘိန္နော ယာမကာလိကော၊ အသမ္ဘိန္နော သတ္တာဟကာလိကော၊ သုက္ခကသဋံ ယာဝဇီဝိကန္တိ ဝေဒိတဗ္ဗံ. ကသ္မာ? ဥဒကသမ္ဘေဒဝိသေသတော.

ကိံ ဝုတ္တံ ဟောတိ? စတူသု ကာလိကေသု ပုဗ္ဗံ ပုဗ္ဗံ ဂရုကံ၊ အပရံ အပရံ လဟုကံ. တေသု စာယံ ဥဒကသမ္ဘေဒေါ ဂရုကံ လဟုကံ ကရောတိ၊ လဟုကဉ္စ ဂရုကံ. အမ္ဗရသာဒီနိ ဟိ ယာဝကာလိကတ္တာ ဂရုကာနိ၊ ဥဒကသမ္ဘေဒေါ ပန တာနိ အမ္ဗပါနာဒိသမညံ ဒတွာ လဟုကာနိ ယာမကာလိကာနိ ကရောတိ. ‘‘ဖာဏိတံ နာမ ဥစ္ဆုမှာ နိဗ္ဗတ္တန္တိ ဥစ္ဆုရသံ ဥပါဒါယာ’’တိ အဋ္ဌကထာဝစနတော ဥစ္ဆုရသော သတ္တာဟကာလိကောတိ သိဒ္ဓံ. တတ္ထ ‘‘ဥဒကသမ္ဘေဒေါ တံ ယာမကာလိကံ ကရောတီ’’တိအာဒိံ ဗဟုံ ဝတွာ ယောဇိတာ.

အပိစေတ္ထ ဥစ္ဆုရသော ‘‘အနုဇာနာမိ၊ ဘိက္ခဝေ၊ ဥစ္ဆုရသ’’န္တိ (မဟာဝ. ၃၀၀) အနုညာတတ္တာ ဂုဠောဒကံ ဝိယ ဥစ္ဆုရသသာမညတော ဥဒကေန အသမ္ဘိန္နောပိ အဂိလာနဿ ဝဋ္ဋတိ၊ တေနေဝါဟ အဋ္ဌကထာယံ ‘‘ဥစ္ဆုရသော နိကသဋော ပစ္ဆာဘတ္တံ ဝဋ္ဋတီ’’တိ (မဟာ. အဋ္ဌ. ၃၀၀). အယံ သဗ္ဗော နော တက္ကောတိ အာစရိယော. ကေစိ ပနာဟု ‘‘ဖာဏိတံ နာမ ဥစ္ဆုမှာ နိဗ္ဗတ္တ’န္တိ ဝစနတော၊ ‘ဥစ္ဆုရသံ ဥပါဒါယာ’တိ အဋ္ဌကထာဝစနတော စ ဥစ္ဆုရသော ဖာဏိတမေဝ၊ တသ္မာ ဂုဠေ ဝိယ ပဋိပဇ္ဇိတဗ္ဗ’’န္တိ. ကေစိ ‘‘ဝုတ္တနယေန သတ္တာဟကာလိကောဝ သမာနော ‘အနုဇာနာမိ၊ ဘိက္ခဝေ၊ ဥစ္ဆုရသ’န္တိ ဝိသုံ အနုညာတတ္တာ အသမ္ဘိန္နောပိ အဂိလာနဿ ဝဋ္ဋတီ’’တိ ဝဒန္တိ. ကေစိ ‘‘ဝုတ္တနယေန ဝိသုံ အနုညာတတ္တာ ဧဝ သမ္ဘိန္နော ဝါ အသမ္ဘိန္နော ဝါ ယာမကာလိကောဝ၊ ဂုဠောဒကံ ပန သတ္တာဟကာလိကမေဝါ’’တိ ဝဒန္တိ. ကေစိ ‘‘ဂုဠောဒကံ ဝိယ သော ဒုဝိဓောပိ သတ္တာဟကာလိကောယေဝါ’’တိ ဝဒန္တိ.

တတ္ထာယံ ပဌမာစရိယဝါဒေ ဝိစာရဏာ – ဖာဏိတာနုမတိယာယေဝ ဥစ္ဆုရသာနုမတိယာ သိဒ္ဓိတော ဝိသုံ ‘‘ဥစ္ဆုရသ’’န္တိ ဥဒ္ဓရိတွာ အနုမတိ နိရတ္ထိကာတိ အာပဇ္ဇတိ၊ တထာ ‘‘ဥစ္ဆုရသော နိကသဋော ပစ္ဆာဘတ္တံ ဝဋ္ဋတီ’’တိ အဋ္ဌကထာပိ နိရတ္ထိကာ. ‘‘သတ္တာဟံ ဝဋ္ဋတီ’’တိ ဝတ္တဗ္ဗံ သိယာတိ၊ န စ တထာ သက္ကာ ဝတ္တုံ. ပစ္ဆာဘတ္တံ ဝဋ္ဋနကရသာဓိကာရတ္တာတိ စေ? န၊ တသ္မိံ အဓိကာရေ သတ္တာဟကာလိကဿ အဝတ္တဗ္ဗပ္ပသင်္ဂတော. ကာလဘေဒံ အနပေက္ခိတွာ ရသာဓိကာရေ ဩတိဏ္ဏတ္တာ ဝုတ္တောတိ စေ? န သက္ကာ ‘‘နိကသဋော သတ္တာဟံ ဝဋ္ဋတီ’’တိ ဝတ္တုံ. ပစ္ဆာဘတ္တံ ဝဋ္ဋနကရသာဓိကာရတ္တာ န ဝတ္တဗ္ဗန္တိ စေ? န၊ ဧဝဉှိ ဝုတ္တေ တဒညရသော ဝိယ အယမ္ပိ ပစ္ဆာဘတ္တမေဝ ဝဋ္ဋတိ၊ န တတော ပရန္တိ အာပဇ္ဇတိ. တတော ပရံ အပရိဘောဂတ္တာ ‘‘ပစ္ဆာဘတ္တံ ဝဋ္ဋတီ’’တိ ဝုတ္တန္တိ စေ? န၊ ယာဝကာလိကဘာဝပ္ပသင်္ဂတော. န သော ပသင်္ဂေါ အာဘိဒေါသိကဿာပိ ဥစ္ဆုရသဿ ပါကေန ဖာဏိတာဒိဘာဝပ္ပသင်္ဂတော. အယမေဝ တတိယစတုတ္ထာစရိယဝါဒေသု ဝိစာရဏာ. ဒုတိယဝါဒေ ဝိစာရဏာ ဝုတ္တာ၊ ဝိမဒ္ဒေါ ပနေတ္ထ ဘေသဇ္ဇက္ခန္ဓကေ (မဟာဝ. ၃၀၀) အာဝိ ဘဝိဿတိ. ဖာဏိတံ နာမ ဥစ္ဆုမှာ နိဗ္ဗတ္တန္တိ မဓုကတာလနာဠိကေရဖာဏိတာဒိတော ဥက္ကဋဝတ္ထုတော နိဿဂ္ဂိယဝတ္ထုဖာဏိတဿ ဝိသေသဝစနံ၊ တေနေတံ ပညာယတိ ‘‘နိဿဂ္ဂိယဝတ္ထုဘူတံ ဣဓ ဖာဏိတံ နာမ ဥစ္ဆုမှာ နိဗ္ဗတ္တမေဝ၊ န မဓုကာဒိတော နိဗ္ဗတ္တ’’န္တိ. ဧတ္တာဝတာ ယံကိဉ္စိ ဥစ္ဆုမှာ နိဗ္ဗတ္တံ၊ န တံ သဗ္ဗံ ဖာဏိတမေဝ နာမာတိ သာဓိတံ ဟောတိ. တေနေဝ ခန္ဓကေ ဖာဏိတံ ပဌမံ အနုဇာနိတွာဝ ပစ္ဆာ ဥစ္ဆုရသော အနုညာတော၊ တထာ တတ္ထေဝ ဂုဠံ၊ ဂုဠောဒကဉ္စ.

ဥစ္ဆုရသံ ဥပါဒါယ အပက္ကာ ဝါတိအာဒိမှိ ပန ယေသံ လဒ္ဓိ ‘‘ဥစ္ဆုရသော ယာမကာလိကော’’တိ. ‘‘တေ အပက္ကာ ဝါတိ သာမံ ဘိက္ခုနာ အပက္ကာ ဝါ. အဝတ္ထုကပက္ကာ ဝါတိ ဝိနာ ဝတ္ထုနာ ပက္ကာ ဝါ’’တိ အတ္ထံ ဝဏ္ဏယန္တိ၊ တံ န ယုတ္တံ ‘‘ဥစ္ဆုရသံ ဥပါဒါယာ’’တိ ဣမဿ ဝစနဿ ပယောဇနာဘာဝပ္ပသင်္ဂတော၊ ဘိက္ခုနော ပစနာဓိကာရာဘာဝါ. သာမပါကော ဣဓာဓိပ္ပေတောတိ စေ? သာမံ အပက္ကဿ ဥစ္ဆုရသဿ တေသံ အတ္တနောမတိယာ ဖာဏိတဘာဝသိဒ္ဓိတော စ ပရတော ‘‘ပုရေဘတ္တံ ပဋိဂ္ဂဟိတေန အပရိဿာဝိတဥစ္ဆုရသေန ကတဖာဏိတ’’န္တိအာဒိနယဒဿနတော စ တံ အယုတ္တံ၊ တတ္ထ ‘‘အပရိဿာဝိတဥစ္ဆုရသေန သယံကတံ နိရာမိသမေဝ ဝဋ္ဋတီ’’တိ ဝစနံ ယံ တတ္ထ ကသဋံ သာမပါကံ န ဇနေတိ၊ သဝတ္ထုကပဋိဂ္ဂဟိတကတံယေဝ တံ ကရောတီတိ ဒီပေတိ၊ တသ္မာ ပဋိဂ္ဂဟေတုံ န ဝဋ္ဋတိ ဝိကာလေတိ ပေါရာဏာ. ‘‘ကောဋ္ဋိတဥစ္ဆုဖာဏိတံ ‘ရဇနပါကံ ဝိယ ဩဠာရိကံ သဝတ္ထုကပက္ကံ နာမ ဟောတီ’တိ သညာယ ပုရေဘတ္တမေဝ ဝဋ္ဋတီ’’တိ ဝုတ္တံ. မဟာအဋ္ဌကထာစရိယာ ‘‘ဧဝံ ဖာဏိတဂ္ဂဟဏံ အမဓုရံ၊ တသ္မာ ပစ္ဆာဘတ္တံ န ဝဋ္ဋတီ’’တိ ဝဒိံသု. ကိံ မဓုရတာယ၊ အမဓုရတာယ ဝါတိ? အတ္ထမေဝ ဒဿေတုံ မဟာပစ္စရိယံ တထာ ဝုတ္တန္တိ ဥပတိဿတ္ထေရော အာဟ ကိရ. တံ ယုတ္တန္တိ ဥစ္ဆုတော နိဗ္ဗတ္တတ္တာ ဝုတ္တံ၊ တေနေဝါဟ ‘‘ခဏ္ဍသက္ခရံ ပန။ပေ။ ဝဋ္ဋတီ’’တိ. ‘‘တံ ခီရဃဋေ ပက္ခိပိတွာ ပစန္တီ’’တိ လိခိတံ. ဇလ္လိကာ နာမ ဖေဏာဒိ.

ဘေသဇ္ဇောဒိသံ ဝဒန္တေန ဣတရေ အတ္ထုဒ္ဓါရဝသေန ဝုတ္တာ. ‘‘အာဟာရတ္ထံ ဖရိတုံ သမတ္ထာနီ’’တိ ခန္ဓကေ (မဟာဝ. ၂၆၀) ‘‘ယံ ဘေသဇ္ဇဉ္စေဝ အဿ ဘေသဇ္ဇသမ္မတဉ္စ လောကဿ၊ အာဟာရတ္ထဉ္စ ဖရေယျာ’’တိ ဝုတ္တတ္တာ ဝုတ္တံ. ဧတ္ထ ဝိစာရဏာ ဘေသဇ္ဇက္ခန္ဓကေ အာဝိ ဘဝိဿတိ.

၆၂၄. ဒွါရဝါတပါနကဝါဋာနီတိ ဒွါရဿ စ ဝါတပါနာနဉ္စ ကဝါဋာနိ. ကသာဝပက္ခေပမတ္တေန ဟိ တာနိ အတ္တနော သဘာဝံ ပရိစ္စဇိတာနိ ဟောန္တိ၊ တသ္မာ ‘‘မက္ခေတဗ္ဗာနီ’’တိ ဝုတ္တံ. ‘‘ကသာဝေါ နာမ ကနကလမ္ဗာဒီနိပီ’’တိ ဝဒန္တိ. အဓိဋ္ဌေတီတိ ‘‘ဣဒါနိ အဇ္ဈောဟရဏီယံ န ဘဝိဿတိ၊ ဗာဟိရပရိဘောဂေါ ဘဝိဿတီ’’တိ စိတ္တံ ဥပ္ပါဒေတိ. ဣဓ ‘‘ဝိကပ္ပေတီ’’တိ ပဒံ နတ္ထိ. အဓိဋ္ဌာနမ္ပိ မုခါရုဠှိယာ ဝုတ္တံ ‘‘ဣမံ နဝနီတံ အဓိဋ္ဌာမီ’’တိ အဝတ္တဗ္ဗတော.

၆၂၅. ပရိဘုဉ္ဇိတုံ ပန န ဝဋ္ဋတီတိ ဝိဿာသာဘာဝံ သန္ဓာယ ဝုတ္တံ. သစေ သဝိဿာသော၊ ဝဋ္ဋတီတိ ‘‘ပရိဘုဉ္ဇ တွ’’န္တိ ဧတ္တာဝတာ ဝိဿဇ္ဇိတံ ဟောတိ၊ တသ္မာ ဥဘိန္နံ အနာပတ္တီတိ သမ္ဗန္ဓော. သစေ န ဝိဿဇ္ဇိတံ၊ အာပတ္တိ ဟောတီတိ သိဒ္ဓံ. တသ္မာ ဥဘိန္နံ သန္တကံ စီဝရံ အညတရေန သမ္မုခီဘူတေန အဓိဋ္ဌာတဗ္ဗံ. နော စေ အဓိဋ္ဌာတိ၊ နိဿဂ္ဂိယံ ဟောတီတိပိ ယုဇ္ဇတိ. ကာကနိကမတ္တဉ္စေ မူလံ အဒိန္နံ၊ ‘‘န အဓိဋ္ဌာနုပဂံ။ပေ။ သကဘာဝံ န ဥပေတီ’’တိ ဣမိနာ ဧတံ သဒိသံ န ဟောတိ၊ အာဘိဓမ္မိကဂဏာနံ ဒိန္နံ ဝိယ စ န ဟောတိ. ကသ္မာ? အာဘိဓမ္မိကာ ဟိ အနုပသမ္ပန္နာပိ ဟောန္တိ၊ ပစ္ဆာ အာဘိဓမ္မိကဘူတာနမ္ပိ တံ သာဓာရဏံ ဟောတီတိ. ဧတ္ထ ဒွေပိ ဥပသမ္ပန္နာ ဧဝ၊ ဒွိန္နမ္ပိ တတ္ထ ယထာကာမကရဏီယတာ အတ္ထိ မမတ္တဉ္စ၊ န ဧဝံ တဒညေသံ သာဓာရဏံ၊ န စ ဒွေ တယော ဘိက္ခူ ‘‘ဧကတော ဝဿိဿာမာ’’တိ ကရောန္တိ၊ ရက္ခတိ တာဝ. ‘‘အဝိဘတ္တတ္တာ အနာပတ္တီ’’တိ ဣမိနာ စ ဣဒံ သဒိသံ၊ ယေန မူလေန ပဋိဂ္ဂဟိတံ၊ တဿ သစေ ဣတရော ဒေတိ၊ သော ဝါ တံ ဣတရဿ ဒေတိ၊ သတိ ပဋိဂ္ဂဟဏေ သတ္တာဟာတိက္ကမေ နိဿဂ္ဂိယတ္တာ၊ တသ္မာ တံ စီဝရံ ဒွီသု သမ္မုခီဘူတေန ဧကေန အဓိဋ္ဌာတဗ္ဗံ. ကိဉ္စာပိ ဧတ္ထ ပယောဂေါ န ဒိဿတိ သမာနပရိက္ခာရာနံ ဒွိန္နံ အဓိဋ္ဌာနပယောဂါဘာဝတော၊ တထာပိ သမာနသဗ္ဗဘဏ္ဍကာနံ ဒွိန္နံ တေလာဒိ ယေန ပဋိဂ္ဂဟိတံ၊ တဿ ကာလာတိက္ကမေ အာပတ္တိသမ္ဘဝတော၊ အနဓိဋ္ဌာနေ ဒုလ္လဘဝိသေသဟေတုတ္တာ စ ‘‘အဓိဋ္ဌာတဗ္ဗ’’န္တိ ဝုတ္တံ. တံ အယုတ္တံ ပတ္တစီဝရသတ္တာဟကာလိကာနံ အသဒိသဝိဓာနတ္တာ. ဧတ္ထ ပတ္တစီဝရဉှိ အတ္တနော သန္တကဘာဝံ ဥပဂတမေဝ အနဓိဋ္ဌဟန္တဿ ကာလာတိက္ကမေ အာပတ္တိ၊ သတ္တာဟကာလိကံ ပန ပရသန္တကသာဓာရဏမ္ပိ ပဋိဂ္ဂဟိတံ ပဋိဂ္ဂါဟကဿ ကာလာတိက္ကမေ အာပတ္တိကရံ. ပဋိဂ္ဂဟဏဉ္စေတ္ထ ပမာဏံ၊ န တတ္ထ သကသန္တကတာ၊ သတ္တာဟကာလိကဉ္စ နိဿဂ္ဂိယံ၊ သဗ္ဗေသမ္ပိ အနဇ္ဈောဟရဏီယံ. ပတ္တစီဝရံ အညဿ ပရိဘုဉ္ဇတော အနာပတ္တိ. ဣဒဉ္စ ကာလာတိက္ကန္တမ္ပိ နိဿဇ္ဇိတွာ ပစ္ဆာ လဒ္ဓံ ကပ္ပတိ. ပတ္တစီဝရံ ပန တံ တဿ ဝိနယကမ္မန္တိ ကပ္ပတီတိ. အဝိဘတ္တဿပိ ဣမဿ ဒါနံ ရုဟတိ၊ န ပတ္တစီဝရဿ. ဝုတ္တဉှေတံ အဋ္ဌကထာယံ ‘‘ဒွိန္နံ သန္တကံ ဟောတိ။ပေ။ သစေပိ အဝိဘဇိတွာ သဒ္ဓိဝိဟာရိကာဒီနံ ဒေန္တိ၊ အဒိန္နမေဝ ဟောတီ’’တိ. ယဿ ဒါနမေဝ န ရုဟတိ၊ တဿ ကုတော အဓိဋ္ဌာနံ. ဧကော စေ ပတ္တစီဝရံ ဒသမေ ဒိဝသေ ဣတရဿ ဒေတိ. တတော ပဋ္ဌာယ သော ဒသ ဒိဝသေ ပရိဟရိတုံ လဘတိ၊ န တထာ သတ္တာဟကာလိကန္တိ သဗ္ဗထာ ဥပပရိက္ခိယမာနံ သရိက္ခံ နက္ခမတီတိ န တံ သာရတော ဒဋ္ဌဗ္ဗန္တိ အာစရိယဿ တက္ကော. ‘‘ဝိနယကမ္မဝသေန ပန အနိဿဇ္ဇိတွာ သဟသာ ဝိရုဇ္ဈိတွာ ကဿစိ ပရိစ္စတ္တမ္ပိ ပုန ပဋိလဘိတွာ ပရိဘုဉ္ဇိတုံ န ဝဋ္ဋတီ’’တိ ဝုတ္တံ၊ သစေ ဒေသန္တရိတံ၊ သမုဒ္ဒန္တရိတံ ဝါ စီဝရံ နိဿဂ္ဂိယံ ဇာတံ၊ တံ ဣဓ ဌိတေန ဘိက္ခုနာ ဧကဿ ဝန္တေန စိတ္တေန စတ္တံ ကတွာ အနပေက္ခိတွာ အာပတ္တိံ ဒေသေတွာ တဿ ဝိဿာသေန ပုန ဂဟေတွာ အဓိဋ္ဌာတဗ္ဗံ၊ ‘‘ပတ္တာဒီသု စ အယမေဝ နယော’’တိ စ ဝုတ္တံ၊ ‘‘တာလနာဠိကေရဖာဏိတမ္ပိ သတ္တာဟကာလိကံ ဧဝါ’’တိ စ. ‘‘ဒွိန္နံ သန္တကံ ဧကေန ပဋိဂ္ဂဟိတံ သတ္တာဟကာလိကံ သတ္တာဟာတိက္ကမေ အာပတ္တိံ န ကရောတိ၊ ပရိဘုဉ္ဇိတုံ ပန ဒွိန္နမ္ပိ န ဝဋ္ဋတီ’’တိ စ ‘‘ပရသန္တကံ ပဋိဂ္ဂဟေတွာ ဌပိတေပိ ဧသေဝ နယော’’တိ စ ကေစိ ဝဒန္တိ. ဒုက္ကဋဝတ္ထုဘူတံ သပ္ပိအာဒိ နိဿဇ္ဇိတဗ္ဗံ ပုန ပရိဘုဉ္ဇိတုံ ဝဋ္ဋတီတိ ဝိဓာနံ န ဒိဿတီတိ.

ဘေသဇ္ဇသိက္ခာပဒဝဏ္ဏနာ နိဋ္ဌိတာ.