၅. ဧကန္တဒုက္ခသုတ္တဝဏ္ဏနာ

၁၁၈. ဧကန္တေနေဝ ဒုက္ခာတိ အဝီစိမဟာနိရယော ဝိယ ဧကန္တတော ဒုက္ခာ ဧဝ သုခေန အဝေါမိဿာ. ဒုက္ခေန အနုပတိတာတိ ဒုက္ခေနေဝ သဗ္ဗသော ဥပဂတာ. ဒုက္ခေန ဩက္ကန္တာတိ ဗဟိဒ္ဓါ ဝိယ အန္တောပိ ဒုက္ခေန အဝက္ကန္တာ အနုပဝိဋ္ဌာ. သုခဝေဒနာပစ္စယတာယ ဣမာသံ ဓာတူနံ သုခတာ ဝိယ ဒုက္ခဝေဒနာပစ္စယတာပိ ဝေဒိတဗ္ဗာ၊ သင်္ခါရဒုက္ခတာ ပန သဗ္ဗတ္ထ စရိတာ ဧဝ. သဗ္ဗတ္ထာတိ သဗ္ဗာသု ဓာတူသု၊ သဗ္ဗဋ္ဌာနေသု ဝါ. ပဌမံ သုခံ ဒဿေတွာပိ ပစ္ဆာ ဒုက္ခဿ ကထိတတ္တာ ‘‘ဒုက္ခလက္ခဏံ ကထိတ’’န္တိ ဝုတ္တံ.

ဧကန္တဒုက္ခသုတ္တဝဏ္ဏနာ နိဋ္ဌိတာ.