၆. သဂါထာသုတ္တဝဏ္ဏနာ

၁၀၀. ‘‘ဓာတုသော သံသန္ဒန္တီ’’တိ ဣဒံ အဇ္ဈာသယတော သရိက္ခတာဒဿနံ၊ န ကာယေန မိဿီဘာဝဒဿနန္တိ အာဟ ‘‘သမုဒ္ဒန္တရေ’’တိအာဒိ. နိရန္တရောတိ နိဗ္ဗိသေသော. သံသဂ္ဂါတိ ပဉ္စဝိဓသံသဂ္ဂဟေတု. သံသဂ္ဂဂဟဏေန စေတ္ထ သံသဂ္ဂဝတ္ထုကာ တဏှာ ဂဟိတာ. တေနာဟ ‘‘ဒဿန။ပေ။ သ္နေဟေနာ’’တိ.

ဝနတိ ဘဇတိ သဇ္ဇတိ တေနာတိ ဝနံ၊ ဝနထောတိ စ ကိလေသော ဝုစ္စတီတိ အာဟ ‘‘ဝနထော ဇာတောတိ ကိလေသဝနံ ဇာတ’’န္တိ. ဣတရေ သံသဂ္ဂမူလကာတိ တမေဝ ပဋိက္ခိပန္တော အာဟ ‘‘အဒဿနေနာ’’တိ. သာဓုဇီဝီတိ သာဓု သုဋ္ဌု ဇီဝီ၊ တံဇီဝနသီလော. တေနာဟ ‘‘ပရိသုဒ္ဓဇီဝိတံ ဇီဝမာနော’’တိ.

သဂါထာသုတ္တဝဏ္ဏနာ နိဋ္ဌိတာ.