၃. ဂိဉ္ဇကာဝသထသုတ္တဝဏ္ဏနာ

၉၇. ဣတော ပဋ္ဌာယာတိ ‘‘ဓာတုံ၊ ဘိက္ခဝေ’’တိ ဣမသ္မာ တတိယသုတ္တတော ပဋ္ဌာယ. ယာဝ ကမ္မဝဂ္ဂေါ၊ တာဝ နေတွာ ဥပဂန္တွာ သေတိ ဧတ္ထာတိ အာသယော၊ ဟီနာဒိဘာဝေန အဓီနော အာသယော အဇ္ဈာသယော၊ တံ အဇ္ဈာသယံ၊ အဓိမုတ္တန္တိ အတ္ထော. သညာ ဥပ္ပဇ္ဇတီတိအာဒီသု ဟီနာဒိဘေဒံ အဇ္ဈာသယံ ပဋိစ္စ ဟီနာဒိဘေဒါ သညာ၊ တန္နိဿယဒိဋ္ဌိဝိကပ္ပနာ၊ ဝိတက္ကော စ ဥပ္ပဇ္ဇတိ သဟဇာတကောဋိယာ ဥပနိဿယကောဋိယာ စ. သတ္ထာရေသူတိ တေသံ သတ္ထုပဋိညတာယ ဝုတ္တံ၊ န သတ္ထုလက္ခဏသဗ္ဘာဝတော. အသမ္မာသမ္ဗုဒ္ဓေသူတိ အာဓာရေ ဝိသယေ စ ဘုမ္မံ ဧကတော ကတွာ ဝုတ္တန္တိ ပဌမံ တာဝ ဒဿေန္တော ‘‘မယံ သမ္မာသမ္ဗုဒ္ဓါ’’တိအာဒိံ ဝတွာ ဣတရံ ဒဿေန္တော ‘‘တေသု သမ္မာသမ္ဗုဒ္ဓါ ဧတေ’’တိအာဒိမာဟ. တေသံ ‘‘မယံ သမ္မာသမ္ဗုဒ္ဓါ’’တိ ဥပ္ပန္နဒိဋ္ဌိ ဣဓ မူလဘာဝေန ပုစ္ဆိတာ၊ ဣတရာ အနုသင်္ကိတာတိ ပုစ္ဆတိယေဝါတိ သာသင်္ကံ ဝဒတိ.

‘‘မဟတီ’’တိ ဧတ္ထ မဟာသဒ္ဒေါ ‘‘မဟာဇနော’’တိအာဒီသု ဝိယ ဗဟုအတ္ထဝါစကောတိ ဒဋ္ဌဗ္ဗော. အဝိဇ္ဇာပိ ဟီနဟီနတရဟီနတမာဒိဘေဒေန ဗဟုပကာရာ. တဿာတိ ဒိဋ္ဌိယာ. ကသ္မာ ပနေတ္ထ ‘‘ယဒိဒံ အဝိဇ္ဇာ ဓာတူ’’တိ အဝိဇ္ဇံ ဥဒ္ဓရိတွာ ‘‘ဟီနံ ဓာတုံ ပဋိစ္စာ’’တိ အဇ္ဈာသယဓာတု နိဒ္ဒိဋ္ဌာတိ? န ခေါ ပနေတံ ဧဝံ ဒဋ္ဌဗ္ဗံ၊ ‘‘အညံ ဥဒ္ဓရိတွာ အညံ နိဒ္ဒိဋ္ဌာ’’တိ၊ ယတော အဝိဇ္ဇာသီသေန အဇ္ဈာသယဓာတု ဧဝ ဂဟိတာ. အဝိဇ္ဇာဂဟိတော ဟိ ပုရိသပုဂ္ဂလော ဒိဋ္ဌဇ္ဈာသယော ဟီနာဒိဘေဒံ အဝိဇ္ဇာဓာတုံ နိဿာယ တတော သညာဒိဋ္ဌိအာဒိကေ သင်္ကပ္ပေတိ. ပဏိဓိ ပတ္ထနာ၊ သာ ပန တထာ တထာ စိတ္တဿ ဌပနဝသေန ဟောတီတိ အာဟ ‘‘စိတ္တဋ္ဌပန’’န္တိ. တေနာဟ ‘‘သာ ပနေသာ’’တိအာဒိ. ဧတေတိ ဟီနပစ္စယာ သညာဒိဋ္ဌိဝိတက္ကစေတနာ ပတ္ထနာ ပဏိဓိသင်္ခါတာ ဟီနာ ဓမ္မာ. ဟီနော နာမ ဟီနဓမ္မသမာယောဂတော. သဗ္ဗပဒါနီတိ ‘‘ပညပေတီ’’တိအာဒီနိ ပဒါနိ ယောဇေတဗ္ဗာနိ ဟီနသဒ္ဒေန မဇ္ဈိမုတ္တမဋ္ဌာနန္တရဿ အသမ္ဘဝတော. ဥပပဇ္ဇနံ ‘‘ဥပပတ္တီ’’တိ အာဟ ‘‘ဒွေ ဥပပတ္တိယော ပဋိလာဘော စ နိဗ္ဗတ္တိ စာ’’တိ. တတ္ထ ဟီနကုလာဒီတိ အာဒိ-သဒ္ဒေန ဟီနရူပဘောဂပရိသာဒီနံ သင်္ဂဟော. ဟီနတ္တိကဝသေနာတိ ဟီနတ္တိကေ ဝုတ္တတ္တိကပဒဝသေနာတိ အဓိပ္ပါယော. စိတ္တုပ္ပါဒက္ခဏေတိ ဣဒံ ဟီနတ္တိကပရိယာပန္နာနံ စိတ္တုပ္ပါဒါနံ ဝသေန တတ္ထ တတ္ထ လဒ္ဓတ္တာ ဝုတ္တံ. ပဉ္စသု နီစကုလေသူတိ စဏ္ဍာလဝေနနေသာဒရထကာရပုက္ကုသကုလေသု. ဒွါဒသအကုသလစိတ္တုပ္ပါဒါနံ ပန ယော ကောစိ ပဋိလာဘော ဟီနောတိ ယောဇနာ. သေသဒွယေပိ ဧသေဝ နယော. ဣမသ္မိံ ဌာနေတိ ‘‘ယာယံ၊ ဘန္တေ၊ ဒိဋ္ဌီ’’တိအာဒိနာ အာဂတေ ဣမသ္မိံ ဌာနေ. ‘‘ဓာတုံ၊ ဘိက္ခဝေ၊ ပဋိစ္စ ဥပ္ပဇ္ဇတီ’’တိအာဒိနာ အာဂတတ္တာ နိဗ္ဗတ္တိယေဝ အဓိပ္ပေတာ၊ န ပဋိလာဘော.

ဂိဉ္ဇကာဝသထသုတ္တဝဏ္ဏနာ နိဋ္ဌိတာ.