၂. ဥပါဒါနသုတ္တဝဏ္ဏနာ

၅၂. အာရမ္မဏာဒိဘာဝေန သံဝတ္တနတော ဥပါဒါနာနံ ဟိတာနိ ဥပါဒါနိယာနိ၊ တေသု ဥပါဒါနိယေသု. တေနာဟ ‘‘စတုန္နံ ဥပါဒါနာနံ ပစ္စယေသူ’’တိ. အဿာဒံ အနုပဿန္တဿာတိ အသာဒေတဗ္ဗံ မိစ္ဆာဉာဏေန အနုပဿတော. တဒါဟာရောတိ သောဠသ ဝါ ဝီသံ တိံသံ စတ္တာလီသံ ပညာသံ ဝါ အာဟာရော ပစ္စယော ဧတဿာတိ တဒါဟာရော. အဂ္ဂိက္ခန္ဓော ဝိယ တယော ဘဝါ ဧကာဒသဟိ အဂ္ဂီဟိ အာဒိတ္တဘာဝတော ဧတဒေဝ ဘဝတ္တယံ. အဂ္ဂိ။ပေ။ ပုထုဇ္ဇနော အဂ္ဂိက္ခန္ဓသဒိသဿ ဘဝတ္တယဿ ပရိဗန္ဓနတော.

ကမ္မဋ္ဌာနဿာတိ ဝိပဿနာကမ္မဋ္ဌာနဿ. တေနာဟ ‘‘တေဘူမကဓမ္မေသူ’’တိ. ဓမ္မပါသာဒန္တိ လောကုတ္တရဓမ္မပါသာဒံ. သော ဟိ အစ္စုဂ္ဂတဋ္ဌေန ‘‘ပါသာဒေါ’’တိ ဝုစ္စတိ. သတိပဋ္ဌာနမဟာဝီထိယံ ဖလက္ခဏေ ပဝတ္တာယာတိ.

ဥပါဒါနသုတ္တဝဏ္ဏနာ နိဋ္ဌိတာ.