၅. ဂဟပတိဝဂ္ဂေါ

၁. ပဉ္စဝေရဘယသုတ္တဝဏ္ဏနာ

၄၁. ယတောတိ ယသ္မိံ ကာလေ. အယဉှိ တော-သဒ္ဒေါ ဒါ-သဒ္ဒေါ ဝိယ ဣဓ ကာလဝိသယော. တေနာဟ ‘‘ယဒါ’’တိ. ဘယဝေရစေတနာယောတိ ဘာယိတဗ္ဗဋ္ဌေန ဘယံ၊ ဝေရပသဝနဋ္ဌေန ဝေရန္တိ စ လဒ္ဓနာမာ စေတနာယော. ပါဏာတိပါတာဒယော ဟိ ယဿ ပဝတ္တန္တိ၊ ယဉ္စ ဥဒ္ဒိဿ ပဝတ္တိယန္တိ၊ ဥဘယေ သဘယဘေရဝါတိ တေ ဧဝ ဘာယိတဗ္ဗဘယဝေရဇနကာဝါတိ. သောတဿ အရိယမဂ္ဂဿ အာဒိတော ပဋ္ဌာယ ပဋိပတ္တိအဓိဂမော သောတာပတ္တိ၊ တဒတ္ထာယ တတ္ထ ပတိဋ္ဌိတဿ စ အင်္ဂါနိ သောတာပတ္တိယင်္ဂါနိ၊ တဒုဘယံ သန္ဓာယာဟ ‘‘ဒုဝိဓံ သောတာပတ္တိယာ အင်္ဂ’’န္တိ၊ သောတာပတ္တိအတ္ထံ အင်္ဂန္တိ အတ္ထော. ယံ ပုဗ္ဗဘာဂေတိ ယံ သယံ သောတာပတ္တိမဂ္ဂဖလပဋိလာဘတော ပုဗ္ဗဘာဂေ တဒတ္ထာယ သံဝတ္တတိ. ကိံ ပန တန္တိ အာဟ ‘‘သပ္ပုရိသသံသေဝေါ’’တိအာဒိ. သပ္ပုရိသာနံ ဗုဒ္ဓါဒီနံ အရိယဉာဏသညာဏဇာတာ ပယိရုပါသနာ၊ သဒ္ဓမ္မဿဝနံ စတုသစ္စဓမ္မဿဝနံ၊ ယောနိသော ဥပါယေန အနိစ္စာဒိတော မနသိ ကရဏံ ယောနိသော မနသိကာရော၊ ဥဿုက္ကာပေန္တေန ဓမ္မဿ နိဗ္ဗာနဿ အနုဓမ္မပဋိပဇ္ဇနံ ဓမ္မာနုဓမ္မပဋိပတ္တီတိ ဧတာနိ သောတာပတ္တိယာ အင်္ဂါနိ. အဋ္ဌကထာယံ ပန သောတာပတ္တိအင်္ဂန္တိ ပဒံ အပေက္ခိတွာ ‘‘ဧဝံ အာဂတ’’န္တိ ဝုတ္တံ. ဌိတဿ ပုဂ္ဂလဿ အင်္ဂံ. သောတာပန္နော အင်္ဂီယတိ ဉာယတိ ဧတေနာတိ သောတာပန္နဿ အင်္ဂန္တိပိ ဝုစ္စတိ. ဣဒံ ပစ္ဆာ ဝုတ္တံ အင်္ဂံ. ဒေါသေဟိ အာရကာတိ အရိယောတိ အာဟ ‘‘နိဒ္ဒေါသော’’တိ. ကထံ အဝိဇ္ဇာ သင်္ခါရာနံ ပစ္စယောတိအာဒိနာ ကေနစိပိ အနုပါရမ္ဘိယတ္တာ နိရုပါရမ္ဘော. ဉာဏံ သန္ဓာယ ‘‘နိဒ္ဒေါသော’’တိ ဝုတ္တံ၊ ပဋိစ္စသမုပ္ပါဒံ သန္ဓာယ ‘‘နိရုပါရမ္ဘော’’တိ ဝဒန္တိ. ဥဘယမ္ပိ ပန သန္ဓာယ ဥဘယံ ဝုတ္တန္တိ အပရေ. ပဋိစ္စသမုပ္ပါဒေါ ဧတ္ထ အဓိပ္ပေတော. တထာ ဟိ ဝုတ္တံ ‘‘အပရာပရံ ဥပ္ပန္နာယ ဝိပဿနာပညာယာ’’တိ. န ဟိ မဂ္ဂဉာဏံ ဝိပဿနာပညာတိ. သမ္မာ ဥပါယတ္တာ တဿ ပဋိစ္စသမုပ္ပန္နေ ယာထာဝတော ဉာယတီတိ ဉာယော၊ ပဋိစ္စသမုပ္ပါဒေါ. ဉာဏံ ပန ဉာယတိ သော ဧတေနာတိ ဉာယော.

တတ္ထာတိ နိရယေ. မဂ္ဂသောတန္တိ မဂ္ဂဿ သောတံ. အာပန္နောတိ အဓိဂတော. အပါယေသု ဥပ္ပဇ္ဇနသင်္ခါတော ဝိနိပါတဓမ္မော ဧတဿာတိ ဝိနိပါတဓမ္မော၊ န ဝိနိပါတဓမ္မော အဝိနိပါတဓမ္မော. ပရံ အယနန္တိ အတိဝိယ သဝိသယေ အယိတဗ္ဗံ ဗုဇ္ဈိတဗ္ဗံ. ယေသဉှိ ဓာတူနံ ဂတိအတ္ထော၊ ဗုဒ္ဓိပိ တေသံ အတ္ထော. တေနာဟ ‘‘အဝဿံ အဘိသမ္ဗုဇ္ဈနကော’’တိ.

ပါဏာတိပါတကမ္မကာရဏာတိ ပါဏာတိပါတသင်္ခါတဿ ပါပကမ္မဿ ကရဏဟေတု. ဝေရံ ဝုစ္စတိ ဝိရောဓော၊ တဒေဝ ဘာယိတဗ္ဗတော ဘယန္တိ အာဟ ‘‘ဘယံ ဝေရန္တိ အတ္ထတော ဧက’’န္တိ. ဣဒံ ဗာဟိရံ ဝေရံ နာမ တဿ ဝေရဿ မူလဘူတတော ဝေရကာရပုဂ္ဂလတော ဗဟိဘာဝတ္တာ. တေနေဝ ဟိ တဿ ဝေရကာရပုဂ္ဂလဿ ဥပ္ပန္နံ ဝေရံ သန္ဓာယ ‘‘ဣဒံ အဇ္ဈတ္တိကဝေရံ နာမာ’’တိ ဝုတ္တံ၊ တန္နိဿိတဿ ဝေရဿ မူလဘူတာ ဝေရကာရပုဂ္ဂလစေတနာ ဥပ္ပဇ္ဇတိ ပဟရိတုံ အသမတ္ထဿပီတိ အဓိပ္ပါယော. န ဟိ နေရယိကာ နိရယပါလေသု ပဋိပဟရိတုံ သက္ကောန္တိ. နိရယပါလဿ စေတနာ ဥပ္ပဇ္ဇတီတိ ဧတေန ‘‘အတ္ထိ နိရယေ နိရယပါလာ’’တိ ဒဿေတိ. ယံ ပနေတံ ဗာဟိရဝေရန္တိ ယမိဒံ ဒိဋ္ဌဓမ္မိကံ သမ္ပရာယိကဉ္စ ဗာဟိရံ ဝေရံ. ပုဂ္ဂလဝေရန္တိ ဝုတ္တံ အတ္တကိစ္စံ သာဓေတုံ အသက္ကောန္တော ကေဝလံ ပရပုဂ္ဂလေ ဥပ္ပန္နမတ္တံ ဝေရန္တိ ကတွာ. အတ္ထတော ဧကမေဝ ‘‘စေတသိက’’န္တိ ဝိသေသေတွာ ဝုတ္တတ္တာ. သေသပဒေသူတိ ‘‘အဒိန္နာဒါနပစ္စယာ’’တိအာဒိနာ အာဂတေသု သေသကောဋ္ဌာသေသု. အတ္ထော ဘဂ္ဂေါတိ အတ္ထော ဓံသိတော. အဓိဂတေနာတိ မဂ္ဂေန အဓိဂတေန. ‘‘အဘိဂတေနာ’’တိပိ ပါဌော၊ အဓိဝုတ္တေနာတိ အတ္ထော. တေနာဟ ‘‘အစလပ္ပသာဒေနာ’’တိ.

ပဉ္စဝေရဘယသုတ္တဝဏ္ဏနာ နိဋ္ဌိတာ.

၂. ဒုတိယပဉ္စဝေရဘယသုတ္တဝဏ္ဏနာ

၄၂. ဘိက္ခူနံ ကထိတဘာဝမတ္တမေဝ ဝိသေသောတိ ဧတေန ယာ သတ္ထာရာ ဧကစ္စာနံ ဒေသိတဒေသနာ၊ ပုန တဒညေသံ ဝေနေယျဒမကုသလေန ကာလန္တရေ တေနေဝ ဒေသိတာ၊ သာ ဓမ္မသံဂါဟကေဟိ ‘‘မာ နော သတ္ထုဒေသနာ သမ္ပဋိဂ္ဂဟံ ဝိနာ နဿတူ’’တိ ဝိသုံ သင်္ဂဟံ အာရောပိတာတိ ဒဿေတိ.

ဒုတိယပဉ္စဝေရဘယသုတ္တဝဏ္ဏနာ နိဋ္ဌိတာ.

၃. ဒုက္ခသုတ္တဝဏ္ဏနာ

၄၃. သမုဒယနံ သမုဒယော၊ သမုဒေတိ ဧတမှာတိ သမုဒယော၊ ဧဝံ ဥဘိန္နံ သမုဒယာနမတ္ထတောပိ ဘေဒေါ ဝေဒိတဗ္ဗော. ပစ္စယာဝ ပစ္စယသမုဒယော. အာရဒ္ဓဝိပဿကော ‘‘ဣမဉ္စ ဣမဉ္စ ပစ္စယသာမဂ္ဂိံ ပဋိစ္စ ဣမေ ဓမ္မာ ခဏေ ခဏေ ဥပ္ပဇ္ဇန္တီ’’တိ ပဿန္တော ‘‘ပစ္စယသမုဒယံ ပဿန္တောပိ ဘိက္ခု ခဏိကသမုဒယံ ပဿတီ’’တိ ဝုတ္တော ပစ္စယဒဿနမုခေန နိဗ္ဗတ္တိက္ခဏဿ ဒဿနတော. သော ပန ခဏေ ခဏေ သင်္ခါရာနံ နိဗ္ဗတ္တိံ ပဿိတုံ အာရဒ္ဓေါ ‘‘ဣမေဟိ နာမ ပစ္စယေဟိ နိဗ္ဗတ္တတီ’’တိ ပဿတိ. ‘‘သော ခဏိကသမုဒယံ ပဿန္တော ပစ္စယံ ပဿတီ’’တိ ဝဒန္တိ. ယသ္မာ ပန ပစ္စယတော သင်္ခါရာနံ ဥဒယံ ပဿန္တော ခဏတော တေသံ ဥဒယဒဿနံ ဟောတိ၊ ခဏတော ဧတေသံ ဥဒယံ ပဿတော ပဂေဝ ပစ္စယာနံ သုဂ္ဂဟိတတ္တာ ပစ္စယတော ဒဿနံ သုခေန ဣဇ္ဈတိ၊ တသ္မာ ဝုတ္တံ ‘‘ပစ္စယသမုဒယံ ပဿန္တောပီ’’တိအာဒိ. အတ္ထင်္ဂမဒဿနေပိ ဧသေဝ နယော. အစ္စန္တတ္ထင်္ဂမောတိ အပ္ပဝတ္တိ နိရောဓော နိဗ္ဗာနန္တိ. ဘေဒတ္ထင်္ဂမောတိ ခဏိကနိရောဓော. တဒုဘယံ ပုဗ္ဗဘာဂေ ဥဂ္ဂဟပရိပုစ္ဆာဒိဝသေန ပဿန္တော အညတရဿ ဒဿနေ ဣတရဒဿနမ္ပိ သိဒ္ဓမေဝ ဟောတိ၊ ပုဗ္ဗဘာဂေ စ အာရမ္မဏဝသေန ခယတော ဝယသမ္မသနာဒိကာလေ ဘေဒတ္ထင်္ဂမံ ပဿန္တော အတိရေကဝသေန အနုဿဝါဒိတော အစ္စန္တံ အတ္ထင်္ဂမံ ပဿတိ. မဂ္ဂက္ခဏေ ပနာရမ္မဏတော အစ္စန္တအတ္ထင်္ဂမံ ပဿတိ၊ အသမ္မောဟတော ဣတရမ္ပိ ပဿတိ. တံ သန္ဓာယာဟ ‘‘အစ္စန္တတ္ထင်္ဂမံ ပဿန္တောပီ’’တိအာဒိ. သမုဒယတ္ထင်္ဂမံ နိဗ္ဗတ္တိဘေဒန္တိ သမုဒယသင်္ခါတံ နိဗ္ဗတ္တိံ အတ္ထင်္ဂမသင်္ခါတံ ဘေဒဉ္စ. နိဿယဝသေနာတိ စက္ခုဿ သန္နိဿယဝသေန ပစ္စယံ ကတွာ. အာရမ္မဏဝသေနာတိ ရူပေ အာရမ္မဏံ ကတွာ. ယံ ပနေတ္ထ ဝတ္တဗ္ဗံ၊ တံ မဓုပိဏ္ဍိကသုတ္တဋီကာယံ ဝုတ္တနယေန ဝေဒိတဗ္ဗံ. တိဏ္ဏံ သင်္ဂတိ ဖဿောတိ ‘‘စက္ခု ရူပါနိ ဝိညာဏ’’န္တိ ဣမေသံ တိဏ္ဏံ သင်္ဂတိ သမာဂမေ နိဗ္ဗတ္တိ ဖဿောတိ ဝုတ္တောတိ အာဟ ‘‘တိဏ္ဏံ သင်္ဂတိယာ ဖဿော’’တိ. တိဏ္ဏန္တိ စ ပါကဋပစ္စယဝသေန ဝုတ္တံ၊ တဒညေပိ ပန မနသိကာရာဒယော ဖဿပစ္စယာ ဟောန္တိယေဝ. ဧဝန္တိ တဏှာဒီနံ အသေသဝိရာဂနိရောဓက္ကမေန. ဘိန္နံ ဟောတီတိ အနုပ္ပါဒနိရောဓေန နိရုဒ္ဓံ ဟောတိ. တေနာဟ ‘‘အပ္ပဋိသန္ဓိယ’’န္တိ.

ဒုက္ခသုတ္တဝဏ္ဏနာ နိဋ္ဌိတာ.

၄. လောကသုတ္တဝဏ္ဏနာ

၄၄. အယမေတ္ထ ဝိသေသောတိ ‘‘အယံ လောကဿာ’’တိ သမုဒယတ္ထင်္ဂမာနံ ဝိသေသဒဿနံ. ဧတ္ထ စတုတ္ထသုတ္တေ တတိယသုတ္တတော ဝိသေသော.

လောကသုတ္တဝဏ္ဏနာ နိဋ္ဌိတာ.

၅. ဉာတိကသုတ္တဝဏ္ဏနာ

၄၅. အညမညံ ဒွိန္နံ ဉာတီနံ ဂါမော ဉာတိကောတိ ဝုတ္တောတိ အာဟ ‘‘ဒွိန္နံ ဉာတကာနံ ဂါမေ’’တိ. ဂိဉ္ဇကာ ဝုစ္စန္တိ ဣဋ္ဌကာ၊ ဂိဉ္ဇကာဟိ ဧဝ ကတော အာဝသထော ဂိဉ္ဇကာဝသထော. သော ကိရ အာဝါသော ယထာ သုဓာပရိကမ္မေန ပယောဇနံ နတ္ထိ၊ ဧဝံ ဣဋ္ဌကာဟိ ဧဝ စိနိတွာ ဆာဒေတွာ ကတော. တာဒိသဉှိ ဆဒနံ သန္ဓာယ ဘဂဝတာ ဣဋ္ဌကာဆဒနံ အနုညာတံ. တေန ဝုတ္တံ ‘‘ဣဋ္ဌကာဟိ ကတေ မဟာပါသာဒေ’’တိ. တတ္ထ ဒွါရဗန္ဓကဝါဋဖလကာဒီနိ ပန ဒါရုမယာနိယေဝ. ပရိယာယတိ အတ္တနော ဖလံ ပရိဂ္ဂဟေတွာ ဝတ္တတီတိ ပရိယာယော၊ ကာရဏန္တိ အာဟ ‘‘ဓမ္မပရိယာယန္တိ ဓမ္မကာရဏ’’န္တိ၊ ပရိယတ္တိဓမ္မဘူတံ ဝိသေသာဓိဂမဿ ဟေတုန္တိ အတ္ထော. ဥပေစ္စ သုယျတိ ဧတ္ထာတိ ဥပဿုတီတိ ဝုတ္တံ ‘‘ဥပဿုတီတိ ဥပဿုတိဋ္ဌာန’’န္တိ. အတ္တနော ကမ္မန္တိ ယဒတ္ထံ တတ္ထ ဂတော၊ တံ ပရိဝေဏသမဇ္ဇနကိရိယံ. ပဟာယာတိ အကတွာ. ဧဝံ မဟတ္ထဉှိ ဝိမုတ္တာယတနသီသေ ဌတွာ သုဏန္တဿ မဟတော အတ္ထာယ သံဝတ္တတိ. ဧကင်္ဂဏံ အဟောသီတိ သဗ္ဗံ ဝိဝဋံ အဟောသိ. တီသု ဟိ ဘဝေသု သင်္ခါရဂတံ ပစ္စယုပ္ပန္နဝသေန မနသိကရောတော ဘဂဝတော ကိဉ္စိ အသေသေတွာ သဗ္ဗမ္ပိ တံ ဉာဏမုခေ အာပါထံ ဥပဂစ္ဆိ. တေန ဝုတ္တံ ‘‘ယာဝဘဝဂ္ဂါ ဧကင်္ဂဏံ အဟောသီ’’တိ. တန္တိဝသေန တမတ္ထံ ဝါစာယ နိစ္ဆာရေန္တော ‘‘ဝစသာ သဇ္ဈာယံ ကရောန္တော’’တိ ဝုတ္တော. ပစ္စယပစ္စယုပ္ပန္နဝသေန စ အတ္ထံ အာဟရိတွာ တေသံ နိရောဓေန ဝိဝဋ္ဋဿ အာဟတတ္တာ ‘‘ယထာနုသန္ဓိနာ’’တိ ဝုတ္တံ. အဒ္ဒသ ဉာဏစက္ခုနာ.

မနသာ သဇ္ဈာယံ ကရောန္တော ‘‘တုဏှီဘူတောဝ ပဂုဏံ ကရောန္တော’’တိ ဝုတ္တော. ပဒါနုပဒန္တိ ပဒဉ္စ အနုပဒဉ္စ. ပုရိမဉှိ ပဒံ နာမ၊ တဒနန္တရံ အနုပဒံ. ဃဋေတွာ သမ္ဗန္ဓံ ကတွာ အဝိစ္ဆိန္ဒိတွာ. ပရိယာပုဏာတီတိ အဇ္ဈယတိ. အာဓာရပ္ပတ္တန္တိ အာဓာရံ စိတ္တသန္တာနပ္ပတ္တံ အပ္ပမုဋ္ဌံ ဂတတ္တာ အာဓာရပ္ပတ္တံ နာမ. ကာရဏနိဿိတောတိ လောကုတ္တရဓမ္မဿ ကာရဏသန္နိဿိတော. အာဒိဗြဟ္မစရိယကောတိ အာဒိဗြဟ္မစရိယံ၊ တဒေဝ အာဒိဗြဟ္မစရိယကံ. ဓမ္မပရိယာယာပေက္ခာယ ပုလ္လိင်္ဂနိဒ္ဒေသော. တီသုပိ ဣမေသူတိ တတိယစတုတ္ထပဉ္စမေသု တီသု သုတ္တေသု.

ဉာတိကသုတ္တဝဏ္ဏနာ နိဋ္ဌိတာ.

၆. အညတရဗြာဟ္မဏသုတ္တဝဏ္ဏနာ

၄၆. နာမဝသေနာတိ ဂေါတ္တနာမဝသေန စ ကိတ္တိဝသေန စ အပါကဋော၊ တသ္မာ ‘‘ဇာတိဝသေန ဗြာဟ္မဏော’’တိ ဝုတ္တံ.

အညတရဗြာဟ္မဏသုတ္တဝဏ္ဏနာ နိဋ္ဌိတာ.

၇. ဇာဏုဿောဏိသုတ္တဝဏ္ဏနာ

၄၇. ဧဝံလဒ္ဓနာမောတိ ‘‘ဇာဏုဿောဏီ’’တိ ဧဝံလဒ္ဓနာမော ရညော သန္တိကာ အဓိဂတနာမော.

ဇာဏုဿောဏိသုတ္တဝဏ္ဏနာ နိဋ္ဌိတာ.

၈. လောကာယတိကသုတ္တဝဏ္ဏနာ

၄၈. အာယတိံ ဟိတံ တေန လောကော န ယတတိ န ဤဟတီတိ လောကာယတံ. န ဟိ တံ လဒ္ဓိံ နိဿာယ သတ္တာ ပုညကိရိယာယ စိတ္တမ္ပိ ဥပ္ပါဒေန္တိ၊ ကုတော ပယောဂေါ၊ တံ ဧတဿ အတ္ထိ၊ တတ္ထ ဝါ နိယုတ္တောတိ လောကာယတိကော. ပဌမသဒ္ဒေါ အာဒိအတ္ထဝါစကတ္တာ ဇေဋ္ဌဝေဝစနောတိ အာဟ ‘‘ပဌမံ လောကာယတ’’န္တိ. သာဓာရဏဝစနောပိ လောကသဒ္ဒေါ ဝိသိဋ္ဌဝိသယော ဣဓာဓိပ္ပေတောတိ အာဟ ‘‘ဗာလပုထုဇ္ဇနလောကဿာ’’တိ. ဣတ္တရဘာဝေန လကုဏ္ဍကဘာဝေန တဿ ဝိပုလာဒိဘာဝေန ဗာလာနံ ဥပဋ္ဌာနမတ္တန္တိ ဒဿေန္တော ‘‘အာယတံ မဟန္တ’’န္တိအာဒိမာဟ. ပရိတ္တန္တိ ခုဒ္ဒကံ. ဧကသဘာဝန္တိ ဧကံ သဘာဝံ. အဝိပရိဏာမဓမ္မတာယာတိ အာဟ ‘‘နိစ္စသဘာဝမေဝါတိ ပုစ္ဆတီ’’တိ. ပုရိမသဘာဝေန နာနာသဘာဝန္တိ ပုရိမသဘာဝတော ဘိန္နသဘာဝံ. ပစ္ဆာ န ဟောတီတိ ပစ္ဆာ ကိဉ္စိ န ဟောတိ သဗ္ဗသော သမုစ္ဆိဇ္ဇနတော. တေနာဟ ‘‘ဥစ္ဆေဒံ သန္ဓာယ ပုစ္ဆတီ’’တိ. ဧကတ္တန္တိ သဗ္ဗကာလံ အတ္တသမ္ဘဝံ. တထာ စေဝ ဂဟဏေန ဒွေပိ ဝါဒါ သဿတဒိဋ္ဌိယော ဟောန္တိ. နတ္ထိ န ဟောတိ. ပုထုတ္တံ နာနာသဘာဝံ၊ ဧကရူပံ န ဟောတီတိ ဝါ ဂဟဏေန ဒွေပိ ဝါဒါ ဥစ္ဆေဒဒိဋ္ဌိယောတိ.

လောကာယတိကသုတ္တဝဏ္ဏနာ နိဋ္ဌိတာ.

၉. အရိယသာဝကသုတ္တဝဏ္ဏနာ

၄၉. သံသယုပ္ပတ္တိ အာကာရဒဿနန္တိ ‘‘ကသ္မိံ သတိ ကိံ ဟောတီ’’တိ ကာရဏဿ ဖလဿ စ ပစ္စာမသနေန ဝိနာ ကေဝလံ ဣဒပ္ပစ္စယတာယ သံသယဿ ဥပ္ပဇ္ဇနာကာရဒဿနံ. သမုဒယတိ သမုဒေတီတိ အတ္ထောတိ အာဟ ‘‘ဥပ္ပဇ္ဇတီ’’တိ.

အရိယသာဝကသုတ္တဝဏ္ဏနာ နိဋ္ဌိတာ.

၁၀. ဒုတိယအရိယသာဝကသုတ္တဝဏ္ဏနာ

၅၀. ဒွေပိ နယာ ဧကတော ဝုတ္တာတိ ဣဒံ ‘‘ဝိညာဏေ သတိ နာမရူပံ ဟောတီ’’တိအာဒိနာ နဝမေ ဝုတ္တဿ နယဿ ‘‘အဝိဇ္ဇာယ သတိ သင်္ခါရာ ဟောန္တီ’’တိအာဒိနာ ဒသမေ ဝုတ္တနယေ အန္တောဂဓတ္တာ. နာနတ္တန္တိ ပုရိမတော နဝမတော ဒသမဿ နာနတ္တံ.

ဒုတိယအရိယသာဝကသုတ္တဝဏ္ဏနာ နိဋ္ဌိတာ.

ဂဟပတိဝဂ္ဂဝဏ္ဏနာ နိဋ္ဌိတာ.