၈. စေတနာသုတ္တဝဏ္ဏနာ

၃၈. ယဉ္စာတိ ဧတ္ထ စ-သဒ္ဒေါ အဋ္ဌာနေ. တေန စေတနာယ ဝိယ ပကပ္ပါနာနုသယာနမ္ပိ ဝိညာဏဿ ဌိတိယာ ဝက္ခမာနံယေဝ အဝိသိဋ္ဌံ အာရမ္မဏဘာဝံ ဇောတေတိ. ကာမံ တီသုပိ ပဒေသု ‘‘ပဝတ္တေတိ’’ဣစ္စေဝ အတ္ထော ဝုတ္တော၊ ဝတ္တနတ္ထော ပန စေတနာဒီနံ ယထာက္ကမံ စေတယနပကပ္ပနာနုသယနရူပေါ ဝိသိဋ္ဌဋ္ဌော ဒဋ္ဌဗ္ဗော. တေဘူမကကုသလာကုသလစေတနာ ဂဟိတာ ကမ္မဝိညာဏဿ ပစ္စယနိဒ္ဓါရဏမေတန္တိ. တဏှာဒိဋ္ဌိကပ္ပါ ဂဟိတာ ယထာရဟန္တိ အဓိပ္ပါယော. အဋ္ဌသုပိ ဟိ လောဘသဟဂတစိတ္တေသု တဏှာကပ္ပေါ၊ တတ္ထ စတူသွေဝ ဒိဋ္ဌိကပ္ပေါတိ. ကာမံ အနုသယာ လောကိယကုသလစေတနာသုပိ အနုသေန္တိယေဝ၊ အကုသလေသု ပန ပဝတ္တိ ပါကဋာတိ ‘‘ဒွါဒသန္နံ စေတနာန’’န္တိ ဝုတ္တံ. သဟဇာတကောဋိယာတိ ဣဒံ ပစ္စုပ္ပန္နာပိ ကာမရာဂါဒယော အနုသယာဝ ဝုစ္စန္တိ တံသဒိသတာယာတိ ဝုတ္တံ. န ဟိ ကာလဘေဒေန လက္ခဏပ္ပဘေဒေါ အတ္ထီတိ. အနာဂတာ ဧဝ ဟိ ကာမရာဂါဒယော နိပ္ပရိယာယတော ‘‘အနုသယာ’’တိ ဝတ္တဗ္ဗတံ အရဟန္တိ. ပစ္စယုပ္ပန္နော ဝဋ္ဋတီတိ အာဟ ‘‘အာရမ္မဏံ ပစ္စယော’’တိ. ကမ္မဝိညာဏဿ ဌိတတ္ထန္တိ ကမ္မဝိညာဏဿေဝ ပဝတ္တိယာ. တသ္မိံ ပစ္စယေ သတီတိ တသ္မိံ စေတနာပကပ္ပနာနုသယသညိတေ ပစ္စယေ သတိ ပတိဋ္ဌာ ဝိညာဏဿ ဟောတိ. သန္တာနေ ဖလဒါနသမတ္ထတာယေဝ ဟောတီတိ ‘‘ပတိဋ္ဌာ ဟောတိ၊ တသ္မိံ ပတိဋ္ဌိတေ’’တိ ဝုတ္တံ. သန္နိဋ္ဌာပကစေတနာဝသေန ဝိရုဠှေတိ. ပတိဋ္ဌိတေတိ ဟိ ဣမိနာ ကမ္မဿ ကတဘာဝေါ ဝုတ္တော၊ ‘‘ဝိရုဠှေ’’တိ ဣမိနာ ဥပစိတဘာဝေါ. တေနာဟ ‘‘ကမ္မံ ဇဝါပေတွာ’’တိအာဒိ. တတ္ထ ပုရေတရံ ဥပ္ပန္နာဟိ ကမ္မစေတနာဟိ လဒ္ဓပစ္စယတ္တာ ဗလပ္ပတ္တာယ သန္နိဋ္ဌာပကစေတနာယ ကမ္မဝိညာဏံ လဒ္ဓပတိဋ္ဌံ ဝိရုဠှမူလဉ္စ ဟောတီတိ ဝုတ္တံ ‘‘နိဗ္ဗတ္တမူလေ ဇာတေ’’တိ. တထာ ဟိ သန္နိဋ္ဌာပကစေတနာ ဝိပါကံ ဒေန္တံ အနန္တရေ ဇာတိဝသေန ဒေတိ ဥပပဇ္ဇဝေဒနီယကမ္မန္တိ.

တေဘူမကစေတနာယာတိ တေဘူမကကုသလာကုသလစေတနာယ. အပ္ပဝတ္တနက္ခဏောတိ ဣဓ ပဝတ္တနက္ခဏော ဇာယမာနက္ခဏော. န ဇာယမာနက္ခဏော အပ္ပဝတ္တနက္ခဏော န ကေဝလံ ဘင်္ဂက္ခဏော အပ္ပဟီနာနုသယဿ အဓိပ္ပေတတ္တာ. အပ္ပဟီနကောဋိယာတိ အသမုစ္ဆိန္နဘာဝေန. တဒိဒံ တေဘူမကကုသလာကုသလစေတနာသု အပ္ပဝတ္တမာနာသု အနုသယာနံ သဟဇာတကောဋိအာဒိနာ ပဝတ္တိ နာမ နတ္ထိ၊ ဝိပါကာဒီသု အပ္ပဟီနကောဋိယာ ပဝတ္တတိ ကရောန္တဿ အဘာဝတောတိ ဣမမတ္ထံ သန္ဓာယ ဝုတ္တံ. အဝါရိတတ္တာတိ ပဋိပက္ခေတိ အဝါရိတဗ္ဗတ္တာ. ပစ္စယောဝ ဟောတိ ဝိညာဏဿ ဌိတိယာ.

ပဌမဒုတိယဝါရေဟိ ဝဋ္ဋံ ဒဿေတွာ တတိယဝါရေ ‘‘နော စေ’’တိအာဒိနာ ဝိဝဋ္ဋံ ဒဿိတန္တိ ‘‘ပဌမပဒေ တေဘူမကကုသလာကုသလစေတနာ နိဝတ္တာ’’တိအာဒိ ဝုတ္တံ. တတ္ထ နိဝတ္တာတိ အကရဏတော အပ္ပဝတ္တိယာ အပဂတာ. တဏှာဒိဋ္ဌိယော နိဝတ္တာတိ ယောဇနာ. ဝုတ္တပ္ပကာရေသူတိ ‘‘တေဘူမကဝိပါကေသူ’’တိအာဒိနာ ဝုတ္တပ္ပကာရေသု.

ဧတ္ထာတိ ဣမသ္မိံ သုတ္တေ. ဧတ္ထ စေတနာပကပ္ပနာနံ ပဝတ္တနဝသေန ဓမ္မပရိစ္ဆေဒေါ ဒဿိတောတိ ‘‘စေတေတီတိ တေဘူမကကုသလာကုသလစေတနာ ဂဟိတာ’’တိအာဒိနယော ဣဓေဝ ဟောတီတိ ဒဿိတော. စတဿောတိ ပဋိဃဒွယမောဟမူလသမာဂတာ စတဿော အကုသလစေတနာ. စတူသု အကုသလစေတနာသူတိ ယထာဝုတ္တာသု ဧဝ စတူသု အကုသလစေတနာသု၊ ဣတရာ ပန ‘‘န ပကပ္ပေတီ’’တိ ဣမိနာ ပဋိက္ခေပေန နိဝတ္တာတိ. သုတ္တေ အာဂတံ ဝါရေတွာတိ ‘‘နော စ ပကပ္ပေတီ’’တိ ဧဝံ ပဋိက္ခေပဝသေန သုတ္တေ အာဂတံ ဝဇ္ဇေတွာ. ‘‘န ပကပ္ပေတီ’’တိ ဟိ ဣမိနာ အဋ္ဌသု လောဘသဟဂတစိတ္တေသု သဟဇာတကောဋိယာ ပဝတ္တအနုသယော နိဝတ္တိတော တေသံ စိတ္တာနံ အပ္ပဝတ္တနတော၊ တသ္မာ တံ ဌာနံ ဌပေတွာတိ အတ္ထော. ပုရိမသဒိသောဝ ပုရိမနယေသု ဝုတ္တနယေန ဂဟေတဗ္ဗော ဓမ္မပရိစ္ဆေဒတ္တာ.

တဒပ္ပတိဋ္ဌိတေတိ သမာသဘာဝတော ဝိဘတ္တိလောပေါ၊ သန္ဓိဝသေန ဒ-ကာရာဂမော၊ တဿ အပ္ပတိဋ္ဌိတံ တဒပ္ပတိဋ္ဌိတံ၊ တသ္မိံ တဒပ္ပတိဋ္ဌိတေတိ ဧဝမေတ္ထ သမာသပဒသိဒ္ဓိ ဒဋ္ဌဗ္ဗာ. ဧတ္ထာတိ ဧတသ္မိံ တတိယဝါရေ အရဟတ္တမဂ္ဂဿ ကိစ္စံ ကထိတံ သဗ္ဗသော အနုသယနိဗ္ဗတ္တိဘေဒနတော. ခီဏာသဝဿ ကိစ္စကရဏန္တိပိ ဝတ္တုံ ဝဋ္ဋတိ သဗ္ဗသော ဝေဒနာဒီနံ ပဋိက္ခေပဘာဝတော. နဝ လောကုတ္တရဓမ္မာတိပိ ဝတ္တုံ ဝဋ္ဋတိ မဂ္ဂပဋိပါဋိယာ အနုသယသမုဂ္ဃါဋနတော မဂ္ဂါနန္တရာနိ ဖလာနိ၊ တဒုဘယာရမ္မဏဉ္စ နိဗ္ဗာနန္တိ. ဝိညာဏဿာတိ ကမ္မဝိညာဏဿ. ပုနဗ္ဘဝသီသေန အနန္တရဘဝသင်္ဂဟိတံ နာမရူပံ ပဋိသန္ဓိဝိညာဏမေဝ ဝါ ဂဟိတန္တိ အာဟ ‘‘ပုနဗ္ဘဝဿ စ အန္တရေ ဧကော သန္ဓီ’’တိ. ဘဝဇာတီနန္တိ ဧတ္ထ ‘‘ဒုတိယဘဝဿ တတိယဘဝေ ဇာတိယာ’’တိ ဧဝံ ပရမ္ပရဝသေန ဂဟေတဗ္ဗံ. အာယတိံ ပုနဗ္ဘဝါဘိနိဗ္ဗတ္တိဂဟဏေန ပန နာနန္တရိယတော ကမ္မဘဝေါ ဂဟိတော၊ ဇာတိဟေတုဖလသိဒ္ဓိပေတ္ထ ဝုတ္တာ ဧဝါတိ ဝေဒိတဗ္ဗံ. ဧတ္ထ စ ‘‘နော စေ၊ ဘိက္ခဝေ၊ စေတေတိ နော စ ပကပ္ပေတိ၊ အထ ခေါ အနုသေတီ’’တိ ဧဝံ ဘဂဝတာ ဒုတိယနယေ ပုဗ္ဗဘာဂေ ဘဝနိဗ္ဗတ္တကကုသလာကုသလာယူဟနံ၊ ပကပ္ပနဉ္စ ဝိနာပိ ဘဝေသု ဒိဋ္ဌာဒီနဝဿ ယောဂိနော အနုသယပစ္စယာ ဝိပဿနာစေတနာပိ ပဋိသန္ဓိဇနကာ ဟောတီတိ ဒဿနတ္ထံ ကုသလာကုသလဿ အပ္ပဝတ္တိ စေပိ၊ တဒါ ဝိဇ္ဇမာနတေဘူမကဝိပါကာဒိဓမ္မေသု အပ္ပဟီနကောဋိယာ အနုသယိတကိလေသပ္ပစ္စယာ ဘဝဝဇ္ဇဿ ကမ္မဝိညာဏဿ ပတိဋ္ဌိတတာ ဟောတီတိ ဒဿနတ္ထဉ္စ ဝုတ္တော. ‘‘န စေတေတိ ပကပ္ပေတိ အနုသေတီ’’တိ အယံ နယော န ဂဟိတော စေတနံ ဝိနာ ပကပ္ပနဿ အဘာဝတော.

စေတနာသုတ္တဝဏ္ဏနာ နိဋ္ဌိတာ.