၃. အသုရိန္ဒကသုတ္တဝဏ္ဏနာ

၁၈၉. တေနေဝါတိ ဘာတုပဗ္ဗဇိတေနေဝ. အဿေဝါတိ တိတိက္ခဿ. ‘‘တံ ဇယံ ဟောတီ’’တိ လိင်္ဂဝိပလ္လာသဝသေန ဝုတ္တန္တိ အာဟ ‘‘သော ဇယော ဟောတီ’’တိ၊ ဒုဇ္ဇယံ ကောဓံ တိတိက္ခာယ ဇိနန္တဿာတိ အဓိပ္ပါယော. ယသ္မာ တိတိက္ခာဒယော န ကောဓဝသိကံ ဓုရံ၊ တံ ပန ဗာလာနံ မညနာမတ္တန္တိ ဣဓ ဣမမတ္ထံ ဝိဘာဝေတုံ ‘‘ကတမဿာ’’တိအာဒိ ဝုတ္တံ. ဝိဇာနတောဝ ဇယော န အဝိဇာနတော တိတိက္ခာယ အဘာဝတော. န ဟိ အဝိဇာနန္တော အန္ဓဗာလော ကောဓံ ဝိဇေတုံ သက္ကောတိ. ကေဝလံ ဇယံ မညတိ ကိလေသေဟိ ပရာဇိတော သမာနောပီတိ အဓိပ္ပါယော.

အသုရိန္ဒကသုတ္တဝဏ္ဏနာ နိဋ္ဌိတာ.