၄. သတ္တဝဿာနုဗန္ဓသုတ္တဝဏ္ဏနာ

၁၆၀. ယသ္မာ ကပိလဝတ္ထုတော နိက္ခန္တကာလတော ပဋ္ဌာယ မာရော ဩတာရာပေက္ခော လောကနာထံ အနုဗန္ဓိတုံ အာရဒ္ဓေါ၊ တသ္မာ ဝုတ္တံ ‘‘ပုရေ ဗောဓိယာ ဆဗ္ဗဿာနီ’’တိ. အတိဂဟေတွာတိ အနုဂန္တွာ တဿ ယထာရုစိ ပဋိပတ္တိံ အနုဝတ္တော ဝိယ ဟုတွာ.

အဝဇ္ဈာယန္တောတိ ပဇ္ဈာယန္တော. ဇိတော ဝိတ္တပရာဇိတော အသိ နု. ပမာဏာတိက္ကန္တန္တိ ဂရုတရံ.

ခနိတွာ ဥမ္မူလေတွာ. ကာမာသဝါဒီနိ ပဇဟန္တော အနာသဝေါ.

ပေဟီတိ အပေဟိ. ပါရဂါမိနောတိ ပါရင်္ဂမနသီလာ. တေကာလိကော အယံ ဂါမိ-သဒ္ဒေါတိ အာဟ ‘‘ယေပီ’’တိအာဒိ.

မာရဝိသူကာနီတိ မာရကဏ္ဋကာနိ ကဏ္ဋကသဒိသာနိ မာရဿ ဒုရာစာရာနိ. ဝိရုဒ္ဓသေဝိတာနိ ဝိရောဓဝသေန တာသံယေဝ ဝေဝစနာနိ. တာနိ သရူပတော ဒဿေတုံ ‘‘အပ္ပမာယူ’’တိအာဒိ ဝုတ္တံ. နိဗ္ဗေဇနီယာတိ နိဗ္ဗေဒဒါယိကာ. ဥက္ကဏ္ဌနီယာတိ ဥက္ကဏ္ဌဝဟာ.

ဝိကပ္ပဝသေန ဝေဒိတဗ္ဗော ဩပမ္မပရိကပ္ပဝိသယတ္တာ တဿ ကိရိယာပဒဿ. တေနာဟ ‘‘အနုပရိဂစ္ဆေယျာ’’တိ. ဧတ္ထာတိ ဧတသ္မိံ မေဒဝဏ္ဏဝတ္ထုသ္မိံ. မုဒုန္တိ မုဒုမဓုရသံ ဝိန္ဒေယျာမ ပဋိလဘေယျာမ. အဿာဒေါတိ အဿာဒေတဗ္ဗော.

သတ္တဝဿာနုဗန္ဓသုတ္တဝဏ္ဏနာ နိဋ္ဌိတာ.