၄. ပိယသုတ္တဝဏ္ဏနာ

၁၁၅. ရဟသိ ဂတဿာတိ ဇနသမ္ဗာဓတော အပက္ကန္တဿ. နိလီနဿ တေနေဝ ဇနဝိဝေကေန ဧကမန္တံ နိသဇ္ဇာယ ဧကီဘာဝေန ပဋိသလ္လီနဿ ဝိယ. တေနာဟ ‘‘ဧကီဘူတဿာ’’တိ. သဗ္ဗညုဘာသိတံ ကရောန္တော အာဟ တဿ ဝစနံ ‘‘ဧဝမေတ’’န္တိ သမ္ပဋိစ္ဆိတွာ တဿ ဝစနံ တထာပစ္စနုဘာသန္တော. အန္တကေနာဓိပန္နတ္တာ ဧဝ ခေတ္တဝတ္ထုဟိရညသုဝဏ္ဏာဒိ မာနုသံ ဘဝံ ဇဟတော. အနုဂန္တိ အနုဂတံ၊ တမေဝ အနုဂါမီတိ အတ္ထော. နိစယန္တိ ဥပရူပရိ ဝဍ္ဎိယာ နိစိတဘူတံ. သမ္ပရာယိကန္တိ သမ္ပရာယ ဟိတံ.

ပိယသုတ္တဝဏ္ဏနာ နိဋ္ဌိတာ.