၅. အတ္တရက္ခိတသုတ္တဝဏ္ဏနာ

၁၁၆. ပီဒဟနန္တိ သံယမနံ. ကမ္မပထဘေဒံ အပ္ပတ္တဿာတိ သုပိနကာလော ဝိယ ပဝတ္တိမတ္တတာယ ကမ္မပထဝိသေသံ အဂတဿ. ကမ္မဿာတိ အကုသလကမ္မဿ. သံဝရန္တိ သံဝရဘာဝံ ဒဿေတိ၊ ဣတရဿ ပန သံဝရဘာဝေါ ပုရိမေဟိ တီဟိ ပဒေဟိ ဒဿိတောဝါတိ. ဩတ္တပ္ပမ္ပိ ဂဟိတမေဝ တဒဝိနာဘာဝတော. န ဟိ ပါပဇိဂုစ္ဆနံ ပါပဥတြာသရဟိတံ၊ ဥတြာသော ဝါ ပါပဇိဂုစ္ဆနရဟိတော အတ္ထီတိ.

အတ္တရက္ခိတသုတ္တဝဏ္ဏနာ နိဋ္ဌိတာ.