၁၀. ဗန္ဓနသုတ္တဝဏ္ဏနာ

၁၂၁. ဣဒန္တိ ‘‘ဣဓ၊ ဘန္တေ’’တိအာဒိကံ ဝစနံ. တေ ဘိက္ခူ အာရောစေသုန္တိ သမ္ဗန္ဓော. တေသူတိ တေသု ရညာ ဗန္ဓာပိတမနုဿေသု. သုကတကာရဏန္တိ သုကာရဏကိရိယံ အာရောစေသုံ၊ န ကေဝလံ တေသံ မနုဿာနံ ဗန္ဓာပိတဘာဝံ. ဣဒါနိ တမတ္ထံ ဝိတ္ထာရတော ဒဿေတုံ ‘‘ရညော ကိရာ’’တိအာဒိ ဝုတ္တံ. အဋ္ဌဝင်္ကောတိ အဋ္ဌံသော. အန္တောဃရစာရိနောတိ အန္တေပုရဝါသိနော.

ဥက္ကဋ္ဌေတိ ယုဒ္ဓေ. မန္တီသူတိ ဂုတ္တမန္တီသု. အကုတူဟလန္တိ သညတံ. ပိယန္တိ ပိယာယိတဗ္ဗံ. အန္နပါနမှိ မဓုရေ အဘုတ္တေ ဥပ္ပန္နေ. အတ္ထေတိ အတ္ထေ ကိစ္စေ ဇာတေ ထိရန္တိ န ကထေန္တိ ကာယဗလမတ္တေန အပနေတုံ သက္ကုဏေယျတ္တာ. သုဋ္ဌု ရတ္တရတ္တာတိ အတိဝိယ ရတ္တာ ဧဝ ဟုတွာ ရတ္တာ. သာရတ္တေနာတိ သာရဘာဝေန သာရဘာဝသညာယ. ဩဟာရိနန္တိ ဟေဋ္ဌာ ဟရဏသီလန္တိ အာဟ ‘‘စတူသု အပါယေသု အာကဍ္ဎနက’’န္တိ. သိထိလန္တိ သိထိလာကာရံ၊ န ပန သိထိလံ. တေနာဟ ဘဂဝါ ‘‘ဒုပ္ပမုဉ္စ’’န္တိ.

ဗန္ဓနသုတ္တဝဏ္ဏနာ နိဋ္ဌိတာ.

ပဌမဝဂ္ဂဝဏ္ဏနာ နိဋ္ဌိတာ.